Mataupu 5

Aoina o Faamatalaga mai le Aiga

O Se Taumafaiga Faaleaiga

Talu ai o galuega o le malumalu ma talafaasolopito o aiga e faia mo aiga, e masani lava la ona sili atu ona lelei le faia e aiga. E faateleina ia faamanuiaga o galuega o le malumalu ma talafaasolopito o aiga pe a galulue faatasi ia aiga e sue o latou tuaa. Afai e leai ni tagata o aiga patino e mafai ma naunau e fesoasoani ia te oe, e mafai ona e mauaina isi, e aofia ai ni uo ma tagata o le aiga lautele, o e mafai ona fesoasoani atu.

E masani lava ona i ai i tagata o aiga ia faamatalaga e faasoa atu, pe latou te naunau e fesoasoani ia te oe e sue ni faamatalaga. Atonu e manatuaina e tagata o lou aiga ma isi e iloaina ou tuaa ni mea taua na tutupu ma ni aso e le i faamaumauina. Atonu o loo ia te i latou ni meatotino taua a le aiga na tuufaasolo mai i augatupulaga, faamaumauga, ni mea faamanatu, atapue, ma isi aitema taua. Atonu e i ai ni tala fiafia faaleaiga latou te faamatalaina, ma o nisi taimi e mafai ona latou faasino oe i isi e iloaina ou tuaa po o isi tagata o lou aiga e te le iloaina.

Faatalanoaina o Tagata o le Aiga

O se faatalanoaga patino atonu o le auala sili lea e ao mai ai faamatalaga o le talafaasolopito o aiga mai tagata o lou aiga. Faatautaia se faatalanoaga faaletagata pe a mafai ai. Afai e le mafai ona e faia lea mea, ia faafesootai tagata o lou aiga i le telefoni, tusi, po o se i-meli. Faaaoga ia faamatalaga nei e fesoasoani ai ia te oe e faatautaia le faatalanoaga.

Faafesootai le Tagata o le Aiga

Pe a e faafesootaia muamua le tagata o le aiga, ia fai mea nei:

1. Ta’u i le tagata pe o ai oe ma pe faapefea ona aiga oulua.

2. Faamalamalama i ai o loo e faia ia sailiga o talafaasolopito o aiga po o sailiga o gafa. Ta’u i le tagata pe o ai aiga po o ni tagata o le aiga e te fia aoao e uiga i ai ma pe o a mea e te fia iloaina. Afai e le auai le tagata i le Ekalesia ma fesili mai pe aisea ua e aoina ai faamatalaga o le talafaasolopito o aiga, atonu e te manao e faasoa atu lou talitonuga o sootaga faaleaiga e mafai ona faavavau, ae le na o mo le olaga nei. E mafai ona e faamalamalama atu e faapea o loo taumafai le Au Paia o Aso e Gata Ai e sue o latou tuaa ma faamanuia i latou e ala i galuega o loo faia i malumalu, lea e tuufaatasia ai aiga e faavavau.

3. Faatulaga se taimi e mafai ai ona e faatautaia se faatalanoaga ma le tagata. Tuu atu se taimi ia lava i le tagata e sue ai pepa po o faamaumauga po o le mafaufau foi i mea e mafai ona ia manatuaina.

Saunia mo le Faatalanoaga

Faia sauniuniga ae le i taitai oo i le faatalanoaga e ala i le faia o mea nei:

1. Tusi i lalo fesili e te manao e fesiligia. O fesili e sili atu nai lo se tali o le “ioe” po o le “leai” e masani lava e sili atu ona aoga. Tagai faaopoopoga E mo fesili faataitai.

2. Ao mai ia faamatalaga ua uma ona e maua e uiga i le aiga po o le tagata e te manao e aoao atili i ai, e pei o talafaamaumau o vaega faaleaiga ma pepa o le faasologa o gafa ua faatumuina. Fuafua e faasoa atu lenei faamatalaga ma fesiligia pe ua sa’o lea.

3. Afai e te fuafua e asiasi atu i le tagata, ia saunia soo se sapalai po o masini e te ono manaomiaina. Fuafua e faamaumau mea ua e aoaoina e faaaoga ai le penitala ma le pepa, se laau pu’eleo, se mea pueata, po o se mea pu’eata vitio.

4. Afai o e faatalanoaina se failauga o le talafaasolopito po o se toeaina o le nuu, aoao i auala talafeagai e galulue ai ma ia.

Faatautaia le Faatalanoaga

Faaaoga ia taiala nei e fesoasoani ai ia te oe e faia le faatalanoaga e sili ona aoga:

1. Aumai pe auina atu ia atapue o le aiga, ma fesili atu i le tagata pe mafai ona ia faailoa mai soo se tagata e te le o masani ai o i totonu o ata ia.

2. Aua le faanatinatia. Tuu atu i le tagata se taimi e mafaufau ai i mea na te manao e ta’u mai. Tuu atu i le tagata ia pule lava o ia i le vave e tali mai ai.

3. Fesili atu e uiga i faamaumauga faaleaiga, tusi faamaonia, po o atapue. A o tauina atu ia te oe, tusi i lalo ia faamatalaga. Fesili mo se faatagaga e fai ai ni kopi o faamaumauga. Pue ni ata po o ni faamatalaga faaopoopo o vitio o aitema pe a mafai ai.

4. Afai o le tagata o se tasi o le aiga e sili ona vavalalata ma soo se isi o ou tuaa ua maliu na fanau i totonu o le 95 tausaga talu ai, fesili i le tagata mo se faatagaga mo tuaa e maua ai ia sauniga o le malumalu.

5. Faailoa atu lou talisapaia o faamatalaga ua e mauaina. Ia saunia e toe foi atu i ai pe auina atu i ai ni tusi faaopoopo.

Faaaoga ia Faamatalaga

Pe a maea le faatalanoaga, ia mautinoa e faaaoga le faamatalaga ua e aoina mai:

1. Faafou au faamaumauga i soo se faamatalaga fou.

2. Fai se tusiga po o se lipoti o lau faatalanoaga, ia mautinoa e faamaumau le aso ma le nofoaga o le faatalanoaga. Fesili atu i le tagata ua e faatalanoaina e faitau le lipoti ma faia ni faasa’oga. Fesili atu mo se faatagaga e kopi ai le lipoti ma tufatufa atu i tagata o le aiga. Tuu atu se kopi i le tagata na e faatalanoaina.

3. Faafesootai isi tagata o le aiga ua e iloaina.

4. Tagai pe o lava au faamatalaga e faatino ai ia sauniga o le malumalu.

Galuega Faatino

• Fai se lisi o tagata o le aiga atonu o i ai ni faamatalaga e uiga i ou tuaa. Faafesootai se tasi po o le sili atu o i latou i le vaiaso a sau ma tagai pe o i ai ni faamatalaga e mafai ona faaopoopo atu i au faamaumauga.

• Faamaumau ia faamatalaga fou i le new.familysearch.org po o luga o fomu.

• Afai o e auai i le vasega o le Malumalu ma le Talafaasolopito o Aiga, saunia mo le isi vasega e sosoo ai e ala i le faitauina o le mataupu 6.

Punaoa Faaopoopo

• Lorie Nicoles-Davis, “That Happened to You?” Ensign, Aug. 2003, 26–29.

• Barbara Jean Jones, “Idea List: Making History,” New Era, May 1999, 15.

• James E. Faust, “O Oe o le Mea Sili Ona Ofoofogia,” Liahona, Nov. 2003, 53–56.