Hibaloi nga ang mga hagit sa mental nga kahimsog adunay daghang nakatampo nga mga hinungdan.

Sa Juan 9:2 ang mga disipulo sa Manluluwas nangutana Kaniya mahitungod sa buta nga tawo: “Rabi, kinsa may nakasala, kini bang tawhana, o ang iya bang mga ginikanan, nga nahimugso man siyang buta?” Si Jesus mitubag, “Dili nga nakasala siya, o ang iyang mga ginikanan: kon dili aron ang mga buhat sa Dios ikapadayag diha kaniya” (Juan 9:3). Gikan niining mubo nga pagbinayloay makakat-on kita nga daghang mga kasakit, lakip ang mga hagit sa mental nga kahimsog, dili resulta sa sala ug nga kita mahimong mamaayo. Daghang elemento ang makahatag og mga hagit sa mental nga kahimsog—kaliwat, palibut, makadaot nga mga aksidente, mga kahimtang sa kinabuhi, ug, usahay, mga pagpili. Walay pagsapayan sa mga elemento nga nakatampo, kita makakuha og kalig-on gikan sa Manluluwas alang sa paglaum ug pagkaayo. Kinahanglan kita dili dayon mohukom nga ang usa ka hagit sa mental nga kahimsog nahimo gyud pinaagi sa sala o kana usa ka kinaiyahan sa huyang nga pagkatawo.