Na iVakavuvuli ni Veiqaravi, Janueri 2020

Sokumuni o Isireli ena Veiqaravi

Na veiqaravi sai koya e dua na madigi meda muria na ivakasala ni parofita me vakasoqoni o Isireli.

iVakavuvuli ni Veiqaravi, Janueri 2020

Sa sureti keda o Peresitedi Nelson meda veivuke ena vakasoqoni o Isireli—“na ka bibi duadua e yaco tiko e vuravura nikua.”¹

Vei kemuni o ni vinakata me tiki ni cakacaka oqo ni kena vakasoqoni vata o Isireli, na veiqaravi e rawa ni dua na madigi vinaka. Sa ikoya e dua na sala veivakauqeti me veisautaka na nodra bula na tamata. Kevaka eda veiqaravi vei ira na lewenilotu luluqa se sureti ira me ra vukei keda ena noda veiqaravi vei ira ena taudaku ni noda vakabauta, e vakarautaka na madigi me da sokomuni Isireli na veiqaravi.

Nodra Vueti na Lewenilotu Lesu Mai

“Ni sa igu ni veiqaravi na loloma, ena yaco na cakamana, ka da na kunea na sala meda kauti ira mai na tacida kei na ganeda era sa “yali” tiko ena veitikina kece me ciqomi kina na kosipeli i Jisu Karisito.” —Jean B. Bingham²

“Au sa luluqa tu vakalotu me ono na yabaki ena gauna au toki kina kei watiqu ki na dua na koro vou. A sikovi au na noqu peresitedi ni iSoqosoqo ni Veivukei, ka kerea kevaka me tala mai e dua na marama me mai sikovi au. Ena dela ni ririko, au vakadonuya. Na marama oqo a sikovi au ena veivula, dina ga ni dau lako vakaca vei koya ni tiko na koli—ka tiko vei au e dua na koli dauloloma sara! E tomana na nona veiqaravi me rua na yabaki, ka vakaitamera na kena revurevu vei au.

“E dina ni nona veisiko e dau veimaliwai ga, ena so na gauna a tarogi au na taro ka liutaki keirau ki na vei wasei vakayalo. Oqo e dau vakavuna meu logaloga ca vakalailai, ia era vakauqeti au me vakatulewataka se meu toso ki liu ena kosipeli se dei e na vanua au sa tu kina. Na vakatulewa oqo a dua na sasaga dredre vei au, ia au digitaka me sikovi au na daukaulotu yalewa.

“Ena siga au laki tiko ena soqoni ni sakaramede ena imatai ni gauna ena ono na yabaki, au sa rere meu lako ki loma. Niu curu yani ki na Lotu, na taciqu yalewa dauveiqaravi e a waraki au, ka a lako vata kei au ki na loma ni valenilotu. Ni oti na soqoni, keirau taubale vata ki na noqu motoka, ka taroga vei au na cava e rawa ni cakava o koya me vukei au meu toro voleka vua na iVakabula.

“Na gauna kei na loloma nei taciqu dauveiqaravi e vukea me dusimaki au lesu ki na Lotu, kau taura na nona sasaga me vaka e dua na isolisoli cecere e bau soli vei au. Au sa vakavinavinaka saraga ni a tu e yasaqu na noqu ilakolako lesu ki na nona Lotu na iVakabula.”

Sega ni tabaki na yaca, British Columbia, Kenada

iVakavuvuli me Vakasamataki

“Sikovi au ena veivula”

O na vakaraitaka vakacava ni o kauwaitaki ira o veiqaravi kina me levu cake mai na veika tale e so? (raica na Vunau kei na Veiyalayalati 121:44).

“Taro”

Taroga na taro dodonu ena rawa ni vakavuna me dikevi koya vakataki koya. Meda nanuma tiko na noda i naki ni veiqaravi sa dua ka dau ulabaleta yani na noda bula ni veimaliwai.³

“Waraki au”

Mera vakila na tamata kece ni ra sa kidavaki (raica na 3 Nifai 18:32).

“Era tiko e yasaqu ena noqu ilakolako lesu”

Noda veitokoni e rawa ni vakavuna e dua na veisau bibi vei ira era sa tarabe ka sasaga tiko me lesu vua na iVakabula me vakabulai (raica na Iperiu 12:12–13).

Veiqaravi kei na Vakasokumuni

“Se na ivakarau cava ga e matau ka rawarawa vei iko, wasea vei ira na tamata na vuna e bibi kina vei iko o Jisu Karisito kei na Nona Lotu. …

“… Nomu itavi mo wasea na veika e tu e yalomu ka bulataka dei tu na nomu vakabauta.” —Elder Dieter F. Uchtdorf⁴

Veiqaravi kei na kena wasei na kosipeli rau sala vata saraga. Oqo e so na sala eda rawa ni vakasoqoni ira na noda itokani kei ira na wekada ni da veiqaravi—se veiqaravi tiko meda vakasoqoni ira na noda itokani kei na wekada:

Veiqaravi vata. Vakasaqara na madigi mo sureti ira na itokani kei ira na tiko volekati iko me ra duavata kei iko ena veiqaravi ki na gagadre ni dua tale na tamata. Kerei ira me ra vukei iko mo vakarautaka na kakana vua e dua na tina vou, sikova e dua na wekamu sa qase, se samaka na nona vale e dua e tauvimate.
Vakavulica vata. Vakasamataka mo sureta e dua na itokani se na wekamu volekati iko era luluqa ena Lotu me dolava nodra vale me rawa ni sotava e dua na daukaulotu. Se nomu itokani e rawa ni tokoni iko ena dua na lesoni ena nomu vale se tiko vata kei iko ki na dua na lesoni ena dua tale na vale.
Dodo liga yani vei ira na tani ni o sa raica e dua na leqa. Lomasoli mo vakarautaka na ilakolako ki lotu. Sureti ira na gone ki na itaviqaravi ni Lalai se na itabagone. Na sala cava soti tale eso ena rawa mo veiqaravi ka vakasokumuni ira mai kina?
Vakayagataka na ivurevure sa vakarautaka tu na Lotu. E solia na Lotu e vuqa na ivurevure me baleti ira na lewenilotu me ra vukei ira ena kena wasei na kosipeli. E rawa ni o wilika na iwasewase “Missionary” na app ni Gospel Library ka sikova na ComeUntoChrist.org me baleta na vakasama ni kena na vakasokumuni ira vata na Isireli ena noda itikotiko raraba.

© 2020 by Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. Vakadewa ni Ministering Principles, January 2020. Fijian. 16984 858