Na iVakavuvuli ni Veiqaravi, Sepiteba 2019

Na Sala E Rawa kina Vua na Yalo me Vukei Iko Mo Veiqaravi

Na ilesilesi vakamatabete ni dauveiqaravi, e lesi ruarua vei ira na tagane kei na yalewa, e okati kina na dodonu meda ciqoma na ivakatakila.

iVakavuvuli ni Veiqaravi, Sepiteba 2019

iYaloyalo mai na Getty Images

Na kaci ki na veiqaravi kei na cakacaka kei na loloma me vaka a cakava na iVakabula sa vaka me dau veibolei ena so na gauna—vakabibi na gauna e da dodoliga yani kina vei ira eda sega beka ni kilai ira vakavinaka sara. Ni tiko e milioni na sala me da veiqaravi kina, eda vakataroga tiko se da na kila vakacava na sala uasivi duadua meda veitaratara kina kei ira era sa lesi tu vei keda meda qarava.

E sega ni dodonu meda vakatataro tale vakadede, baleta na noda sasaga ena yalodina ena rawa ni dusimaki mai vua na Yalo Tabu.

“Na nomuni ilesilesi tabu ni veiqaravi e solia vei kemuni na dodonu vakalou mo ni vakayarayarataki,” e kaya o Sister Bonnie H. Cordon, na Peresitedi Raraba ni Goneyalewa. “E rawa ni ko ni vakasaqara ena yalodei na veivakayarayarataki.”¹

Ni da vakasaqara meda veiqaravi me vakataka na iVakabula, sa rawa meda dusimaki mai na Yalo vata ga ka a dusimaki Koya. Oqo e ka dina sara ni da veiqaravi tiko ena ilesilesi, me vaka na veiqaravi, ka vakayacori ena veivakadonui ni idola ni matabete mai vei bisopi. Oqo e ono na vakatutu me baleta na veiqaravi vata kei na Yalo.

Ena Rawa vakacava me Tiko Vata kei Au na Yalo niu Veiqaravi tiko?

• Kerea na Veidusimaki. Na Tamada Vakalomalagi e gadrevi keda meda veivosaki vata kei Koya ena masu. Na Masu e sega walega ni vakatara meda toro vakavoleka ki Vua, ia e vakadeitaka “na veivakalougatataki eso mai vua na Kalou ka sa lomasoli tu me solia ia sa vakatautaki ena noda kerekere.”² “Ni da masu ka vakasaqara meda kila na lomadra,” a kaya o Sister Cordon, “Au vakadinadinataka ni na dusimaki keda na Tamada Vakalomalagi ka na lako vata kei keda na Yalona.”³

• Kakua ni Waraka e dua na Veivakauqeti. Mo cakacaka ni bera ni o vakauqeti. Me ra “gumatua ena cakacaka” (Vunau kei na Veiyalayalati 58:27), ka o na raica ni nomu sasaga ena dusimaki ka vakalevulevui. “Na toso ki liu ena noda veiqaravi kei na cakacaka e dua na sala bibi ni kena rawati na ivakatakila,” a kaya Peresitedi Dallin H. Oaks, na iMatai ni Daunivakasala ena Mataveiliutaki Taumada. “Ena noqu vulica na ivolanikalou au dau raica ni vuqa nai vakatakila vei ira na luve ni Kalou e basika ni ra cakacaka tiko, ka sega ena nodra dabe tale tiko ena nodra itikotiko ka waraka me tukuna vei ira na Turaga na imatai ni kalawa mera cakava.”⁴

Au na Kila Vakacava na Veivakauqeti meu Veiqaravi?

• Taura na iVakasala nei Momani. Eda sega ni gadrevi meda gade voli ka nuiqawaqawataka tiko e dua na vakanananu se a dua na veivakauqeti se sega. Sega, ni sa tiko vei keda na idola rawarawa nei Momani meda kila: Kevaka e tiko vei iko e dua na vakanananu ka sureti iko mo caka vinaka ka vakabauta se vukei eso mera vakabauti Karisito, dou na kila vakaidina ni sa mai vua na Kalou (raica na Moronai 7:16).

• Kakua ni Lomaleqataka. “Lade ga yani ki na tobu ka qalo,” e kaya o Elder Jeffrey R. Holland ena Kuoramu ni iApositolo Le Tinikarua. “Golevi ira era vakaleqai tu. Kakua ni tuvakadua ka vakasamataka mo tagato vakatadraicake se qalo vakoli. Kevaka eda muria ga na ivakavuvuli taumada sa vakavuvulitaki, vakataudonutaki iko ki na idola vakamatabete, ka segata me dusimaki iko na Yalo Tabu, eda na sega ni rawa ni cala.”⁵

Na cava na Sala Vinaka Duadua meda Muria kina e dua na Veivakauqeti?

• Gauna vata ga. O Sister Susan Bednar (na wati Elder David A. Bednar ena Kuoramu ni iApositolo Le Tinikarua) e dua na ivakaraitaki cecere ni muria na veivakauqeti. Ni oti na masuti ni “mata vakayalo me ra laurai kina o ira ka tiko na nodra leqa,” e raici ira wavoki na ivavakoso ka vakavuqa e dau “vakila e dua na veivakauqeti vakayalo me ra veitalanoa se veivosaki ena talevoni vakatabakidua vata kei na dua na tamata,” a wasea o Elder Bednar. “Ia ni ciqoma o Sister Bednar e dua na veivakauqeti vaka oya, e totolo sara na nona vakamuria ka talairawarawa kina. Edau vakavuqa sara ni oti ga na kena cavuti na ‘emeni’ ena isogo masu, ena veitalanoa vata kei na dua na itabagone se mokota e dua na marama, se ena nona yaco ki vale, ena taura cake sara na talevoni ka cakava e dua na qiri.”⁶

• Ena yaloqaqa. Na rere ni da na sega ni ciqomi kei na vakilai ni madua, yalolailai, se da na vakalatilati e rawa ni tarovi keda mai na noda muria edua na veivakauqeti me da veiqaravi. “Ena vuqa na gauna kei na ituvaki, eda na vakila na vakaloloma, veilecayaki, se takiveiyaga,” e kaya o Elder Gerrit W. Gong ena Kuoramu ni iApositolo Le Tinikarua. “Ni da sasaga ena yalodina meda lomana na Kalou ka veiqaravi vei ira na wekada, eda na vakila na loloma ni Kalou ka gadreva meda uqeti vata kei wekada ena noda bula ena sala vou ka savasava cake.”⁷

  E dua na tacida a wasea na nona a tuvakasuka me dodoliga yani vua e dua na watini dua na marama ka a saga me vakamatei koya vakaikoya. Ia e muri a qai mani sureta na turaga oya me rau laki vakasigalevu. “Ia niu kaya yani, ‘O watimu a via vakamatei koya vakataki koya. Sa dua beka na icolacola bibi vei iko. O vinakata beka mo veitalanoataka?’ a tagi e matanalevu.” a wasea o koya. Keirau veitalanoa malumu ka veivolekati yani ka vakatubura e dua na veiwekani voleka sara ka veivakabauti ena vica ga na miniti.”⁸

© 2019 by Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, September 2019. Fijian. 15770 858

iDusidusi

1. Bonnie H. Cordon, “Mo Yaco me Dua na iVakatawa,” Liaona, Nove. 2018, 76.

2. Bible Dictionary, “Prayer.”

3. Bonnie H. Cordon, “Mo Yaco me Dua na iVakatawa,” 76

4. Dallin H. Oaks, “In His Own Time, In His Own Way,” Liahona, Aug. 2013, 24.

5. Jeffrey R. Holland, “Na Veiqaravi ni Veivakaduavatataki,” Liaona, Nove. 2018, 77.

6. David A. Bednar, “Quick to Observe,” Liahona, Dec. 2006, 17.

7. Gerrit W. Gong, “Noda Bukawaqa ni Keba ena Vakabauta,” Liaona, Nove. 2018, 42.

8. Bonnie H. Cordon, “Mo Yaco me Dua na iVakatawa,” 76

Nona iVakaraitaki na iVakabula

Na iVakabula a vakarautaki ki na nona veiqaravi. “Na Kalou sa lumuti Jisu na kai Nasareci ena Yalo Tabu,” na Karisito sa qai “ lako voli ka daucaka vinaka” (Cakacaka 10:38). A sa “sinai ena Yalo Tabu” ka vakawasoma sa dau “tuberi ena Yalo” (Luke 4:1). Sa dina sara ni lako voli o Karisito ka dau caka vinaka ni bera ni lumuti ena Yalo Tabu, ia na ciqomi ni Yalo Tabu kei na dodonu ni ciqomi ni veivakauqeti e a dua na tiki bibi ni Nona veiqaravi—ka sa vaka tale ga kina na noda.

Veisureti meda Cakava

Ena nomu toso tiko ena nomu veiqaravi ena veisiga, vakasaqara ena yalomasumasu ka vakamuria na veiuqeti ni Yalo Tabu. Nanuma tiko ni Tamada Vakalomalagi ena vakalougatataki iko kei ira o qaravi ira ni o vakayacora tiko!