Na Veiqaravi Sai Koya na Noda Raici Ira Tale Eso Me Vaka e Cakava na iVakabula

E a vakayagataka vakalevu o Jisu na Nona gauna kivei ira era raici tu ni ra duidui; ni sa raica o Koya na nodra rawa ni rawata vakalou.

Ena noda sasaga me da veiqaravi me vaka na iVakabula, eda rawa ni kerei me veiqaravi kina vua e dua e duidui mai vei keda. Oqo e vakaraitaka e dua na madigi me da vuli ka tubu.

Na veika vakavanua, vuli, kawatamata, bulavakailavo, yabaki ni bula, itovo taumada se enagauna oqo, se so tale na duidui ena rawarawa sara movakalewa kina e dua ni bera mada ga ni da kilai ira. Na noda vakalelewa taumada oqo sa uto tiko ni lewa vakatani, ka sa veivakaroti kina na iVakabula (raica na 1 Samuela 16:7; Joni 7:24).

Ena rawa beka meda raibaleta na duidui taumada ka raici ira na tani, me vaka e cakava na iVakabula? Eda na vulica vakacava meda lomani ira na tamata ena kedra ituvaki ena gauna oqo kei na ituvaki era rawa ni yacova?

Raica ka Lomana

Na iVola Tabu e tukuna na italanoa kilai levu ni cauravou vutuniyau ka a taroga na sala cava me rawata kina na bula tawamudu: “A sa vakaraici koya ko Jisu, a sa lomana, a sa kaya vua, E dua na ka sa sega vei iko: mo lako, ka volitaka na ka kecega sa tu vei iko, ka solia vei ira sa dravudravua, ko na qai vakaiyau mailomalagi: ia mo lako mai, ka muri au”(Marika 10:21).

Ena gauna a wilika kina o Elder S. Mark Palmer ena Vitusagavulu na ivolanikalou oqo ena vica na yabaki sa oti, a vakauqeti koya sara e dua na tiki vou niitalanoa oqo.

“‘A sa vakaraici koya ko Jisu, a sa lomana.’

“Niu rogoca na veivosa oqo, au raitayalotaka rawa ena noqu vakasama ni sa tu vakadua na Turaga ka vakaraica na cauravou oqo. Na vakaraica—mevakadikeva vakatitobu ka vagumatua na yalona, karaica rawa na nona vinaka kei na ka ena rawani rawata, ka kila rawa talega na veika bibi e gadreva tu.

“Sa qai muria mai na vosa rawarawa sara—sa lomani koya o Jisu. Sa vakila o Koya ni sa lomana ka vinakata sara vakalevu na cauravou oqo, ia ena vuku ni loloma oqo vata kei na loloma oqo, sa qai tarogi koya tale o Jisu. Au raitayalotaka rawa na ituvaki ni yaloi cauravou oqo me solegi ena loloma vakaoqori ena nona kerei me cakava e dua na ka sa rui dredre sara o ya me volitaka kece nona iyau ka laki solia vei ira na dravudravua. …

“[Au a tarogi au] ‘Ena rawa vakacava meu vakasinaiti ena loloma va-Karisito me na rawa kina [vei ira eso] mera vakila na loloma ni Kalou mai vei au ka gadreva mera na veisau?’ Ena rawa vakacava meu raici [ira na tamata yadua era tu voliti au] ena sala vata ga a raica kina na Turaga na cauravou vutuniyau, ka raici ira ena kedra ituvaki dina kei na kedra ituvaki mera na yacova, ka sega ni veika walega era sa cakava tiko se sega tiko ni cakava? Ena rawa vakacava meu vakataka sara na iVakabula?”¹

Noda Vulica Meda Raici Ira na Tamata

Na noda vulica meda raici ira na tamata me vaka e cakava na iVakabula ena kauta mai na veika cecere vinaka. Oqo eso na vakasama me vukea noda rawa ni cakacakataka yani na ilalawa oqo.

Meda Kilai Ira
Sasagataka mo kilai ira vakalevu cake na tamata mai na kedra ituvaki matailalai vakayago. Me kilai tiko ni kena tarai cake na veimaliwai ena taura na gauna kei na sasaga ena yalodina. (Me veivuke raica na Yavu ni iVakavuvuli ni Veiqaravi ni Okosita 2018 “Tarai Cake ni Veimaliwai e Vakaibalebale Cake”)
Vakadikevi Iko
Vakaraicamatua na vakalelewa o rawa ni cakava tiko ena nomu lewa ga se ena nomu vakanananu. Raica tiko na veika o dau nanuma me baleti ira na tamata ka tovolea mo kila vinaka na vuna o nanuma tiko kina vakaoya me baleti ira.
Kakua ni Vakalelewa
Me kilai tiko ni tuvaki era sotava na tamata e sega ni vakadeitaka na kilikili ni dua na tamata. Biuti iko mada ki na veika era sotava ka vakasamataka na sala o na gadreva kina e dua me raici iko ke o sotava na veika vata ga o ya. Na wasei tani ni nona digidigi kei na itovo e dua mai na nodra yavunibula dina kei na nodra gugumatua vakalou ena rawa ni vukea meda raici ira me vaka e cakava na iVakabula.
Masulaka mo Lomani Ira
Masulaka vakawasoma na yacadra kei na yalovosota me tarai cake kina e dua na veitokani dina. Dikeva ena masumasu na nomu veiqaravi. E tiko beka e dua na luluqa ena veika o cakava tiko kei na veika era gadreva dina?

E dau vakayagataka o Jisu na nona gauna vei ira na veimataqali tamata: o ira na vutuniyau, na dravudravua, ira na iliuliu, kei ira na tamata tawa vanua. A dau vakacacani ena vakatulewa cala mai vei ira eso ni ra raici Koya kei na Nona bula dravudravua se ituvaki duatani. “Ia ni da sa raici koya, sa sega ni matavinaka ko koya meda qoroi koya kina. … Sa beci koya ka biuta ko ira na tamata”(Aisea 53:2 – 3).

Na Raivotu Vakarisito

E wasea na italanoa oqo e dua na marama ena nona vulica me raica e dua na wekana ena rai sa Vakarisito:

“E tiko volekati au o Julia (sa veisau na yacana) ka vaka me sega tu na nona itokani. E dau rairai rarawa ka cudrucudru. Dina ni yaco tiko oqo, au sa mani lewa meu sa nona itokani. Sega ni itokani wale tu ga, ia meu nona itokani dina sara. Au dau vosa vua niu raici koya ka vakaraitaka niu taleitaka na veika cava ga e cakava tiko. Toso na gauna, au sa tauyavutaka e dua na ivau ni veitokani, ka kauta mai na reki e lomaqu.

“Ena dua na siga, au a laki sikovi Julia ka vakataroga na nona lewa tiko me kakua ni mai lotu.

“Au a kila kina ni sega ni dua na nona matavuvale se wekana e tiko voleka e kea. E dua walega na tacina, e ganena e tiko vakayawa sara, e dau veitaratara mai vua vakadua ga ena veiyabaki ena talevoni. Niu vakarogoca nona sa talaucaka mai na nona rarawa, cudru, kei na veilecayaki baleta na nona matavuvale kei na Lotu, sa sega ni vakabekataki na kena sa sobuti au sara vakabibi na yalololoma kei na noqu lomana na marama oqo. Au a vakila na nona mosi kei na veilecayaki. Au a raica rawa ni sa galili sara na nona bula. Sa vaka meu rogoca kina e dakuqu e dua na malanivosa rogomalua: ‘Au lomani koya talega. Mo lomana ka dokai koya.’

“Au a dabe ka vakarorogo me yacova ni sa sega tale na ka me kaya. Au vakila niu sa lomana ka kauwai na yaloqu vua. Oqo e dua na marama a sega sara tu ga ni bau kila e vakacava tu beka me dua e lomani koya. Sa yaco sara meu kilai koya vakatitobu sara. Au a vakavinavinaka vua ni a vakadonuya meu sikovi koya, kau a mokoti koya ena loloma kei na noqu dokai koya. Ena sega vakadua ni na kila o koya na bibi ni nona tara na yaloqu ena veisiko o ya. Sa dolava kina na mataqu na Tamaqu Vakalomalagi ka vakavulici au ni sa tu vei au na yalo ni loloma vata kei na veikauwaitaki levu. Au sa vakadeitaka ena noqu yalayala meu kakua walega ni nona itokani ia meu sa nona matavuvale talega.”

Sa ka tabu vakalou meda sureti ki na nona bula e dua na tamata. Ena masu, vosota, kei na veivuke mai vua na Yalotabu, sa rawa ni da vulica meda vakayacora vakakina ena dua na raivotu sa Vakarisito e cecere cake.

© 2019 by Intellectual Reserve, Inc. All rights reserved. Printed in the USA Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, June 2019. Fijian. 15767 858