Veiqaravi ena Soqoni ni Sakaramede

E vakarautaka na soqoni ni sakaramede na madigi eso meda sema ka veiqaravi kina vei ira na tani.

Na soqoni ni sakaramede esa gauna ni veivakabulabulataki vakayalo kei na railesuvi ni Nona Veisorovaki na iVakabula. Ni da vakaivotavota ena sakaramede ena veimacawa, eda sa vakatatataki vata (raica na Vunau kei na Veiyalayalati na 84:110). Ia eso ena noda tabanalevu kei na tabana e kauta vata mai kei ira na icolacola bibi se ka e sega sara ga ni tiko.

Oqo e vica na madigi ena sala eda rawa ni vakayagataka kina na auwa tabu oya meda veiqaravi vei ira na tani ka vakavu veisau ki na nodra bula.

Veivuke me Vakavinakataka Cake na Soqoni ni Sakaramede Kivei Ira O Qarava

Na imatai ni kalawa ena vulici ni walewale ni veiqaravi oya na nodra kilai taumada na tamata yadua se matavuvale kei na nodra gagadre. Ena rairai tiko na sala eso o rawa ni vakavinakataka kina na nodra sokalou ni sakaramede ena nomu saga mo kila e vica na ka me baleti ira.

O Mindy, e dua na tina ni drua lalai, na sasaga rawarawa nei tacina vakadauveiqaravi a vakavuna e dua na duidui levu sara ena nona soqoni ni sakaramede ena veimacawa.

“Ena vuku ni tuvaki vakacakacaka i watiqu, au dau kauti rau vakataki au na luvei keirau drua yalewa ki valenilotu ena veimacawa,” e vakamacalataka o Mindy. “E sa dau ka dredre dina sara na kena sagai me lako curumi vakataucoko na soqoni ni sakaramede vata kei rau na gonelalai sosa, ia na taciqu dauveiqaravi e sa taura vakataki koya na lewa me vukei au.

“E dau dabe vata kei keitou o koya ka vukei au ena nodrau qarauni na gone yalewa ena veimacawa. Na nona dau tiko tikivi au e vakaibalebale sara vakalevu ka vakamamadataka dina na noqu lomaleqa ena gauna e rau dau vakasosa se vakasausa kina. Au vakabauta ni na sega ni kila o koya na levu ni kena tarai au na veika esa vakayacora ena gauna oqo ni noqu bula. A raica o koya na noqu gagadre vaka tina ni gone, sinai tu ena nuiqawaqawa, ka veivuke me cakava na lotu me dua na vanua ni vakacegu kei na marau vei keitou kece sara.”

Vakasama Eso me Vukei Ira na Vakaleqai

Tukutuku lesu ki na kuoramu ni talatala qase kei na iliuliu ni Soqosoqo ni Veivukei me baleta na nodra gagadre na lewenilotu.
Era tuva na iliuliu na vosa ena soqoni ni sakaramede me veivuke ena kena sotavi na gagadre ni lewenilotu. Kevaka e yaga vei ira o veiqaravi kina me ra rogoca e dua na itukutuku e ganita me ra rogoca, wasea na kena vakasama vei ira na nomu iliuliu.
Kevaka o kila e dua e vakaleqai tu vakayago se tabu ena kakana vakavu leqa vua ka na rawa ni tarova na nodra marautaka na veivakalougatataki ni sakaramede, tarogi ira mera vakamacala taka kei na cava e rawa ni vakayacori me vakavinakataka na nodra sokalou. Wasea na itukutuku oqo vei ira na nomu iliuliu.
Kevaka esa tiko ga vakadua se vakawawa i vale, edua o qarava tiko se kila, kerea na nomu bisopi ke rawa ni soli vei ira na sakaramede e vale. Sa rawa talega ni o tauri tukutuku ena gauna ni sakaramede ka wasea yani ena talevoni, imeli, se kauta yani vakai iko.
Kevaka e dua o qarava tiko e vagone lailai, sa rawa ni o dolele yani movukei ira ena gauna ni sakaramede.
Kevaka era sega ni lako wasoma mai ki na sakaramede o ira o dau qarava, tovolea mo kila vakamatata ka navuca na sala eso o rawa ni veivuke kina. Kevaka era gadreva na sala ni veilakoyaki, dolele yani mo vakavodoki ira. Kevaka era vakila na tawaveitokoni ni nodra matavuvale, sa rawa ni o sureti ira mera ni dabe vata kei iko. Sa rawa ni o caka veisureti matalia me vukea na nodra vakila na nodra ciqomi ka taleitaki ena soqoni ni sakaramede.

Nanuma Tiko, na iVakaraitaki Rawarawa Eso E Dau Tatara Vakabalavu

Ni vosa tiko baleta na veiqaravi, a vakavulica o Sisita Jean B. Bingham, na Peresitedi Raraba ni Soqosoqo ni Veivukei: “Eso na gauna eda dau nanuma ni dodonu meda cakava e dua na ka cecere ka qaqa me ‘wili’ vaka veiqaravi vei ira na wekada. Ia na qaravi tavi rawarawa eso sa rawa ni vakavotukana sara ki vei ira e so tale—ka vakakina vei keda.”¹

Ena dua na tabanalevu lailai e Belgium, e dau dolele wasoma o Evita me vakadewa ena vosa vaka-Sipeni vei ira na vulagi kei na lewenilotu ena gauna ni soqoni ni Lotu. E na dua na gauna, a veivakilai taki o Evita ki na dua mai na Dominican Republic ka vakavulici tiko me baleta na Lotu. A kila tiko o koya eso na vosa vaka-Valagi, ia na nona vosa ni vanua e vaka-Sipeni. A mani dolele o Evita me vakadewa lo vua ena gauni ni soqoni ni sakaramede ka yalovakacegu sara kina o koya.

“Na vakavakadewa e rawa ni vakavu oca vakalailai toka ki na noqu Siga ni Vakacecegu ena so na gauna,” e kaya o Evita. “Ia na muri ni veivakauqeti mera tarogi na tani ke ra gadreva tu e dua na dauvakadewa vosa e solia vei au na yalo reki kei na lomavinaka niu kila niu sa rawa ni vukei ira mera vakila na Yalotabu ka marautaka na nodra soqoni.”

Veivakasama me Vukea na iVakaraitaki Rawarawa Eso

Veivosaki kei ira na nomu iliuliu mo raica o cei ena rairai gadreva e dua na veivuke lailai ena gauna ni sakaramede. Se kevaka o kila vakakina e dua, mo nanuma mo vakaraitaka vei iratou na nomu iliuliu.
Dabe vakadirorogo ni ko waraka tiko me tekivu na soqoni. Oqo ena vukea “na loma bibi kei na yalo rarawa tale eso e wavoliti keda”² ka gadreva tu na vakacegu e rawa ni basika mai ena rokovi ni dua na vanua tabu.
Ena Sigatabu ni lolo, navuca mo vagolea na nomu lolo kei na masumasu ki vua e dua o dau qarava ka rairai gadreva tu na veivakacegui.
Masulaka mo kila ke tiko e dua ka na rawa ni yaga vua na nomu dabe tikiva se volekati koya ena gauna ni sakaramede se dua tale beka na sala o rawa ni veivuke kina.

Na Soqoni ni Sakaramede sa Rawa ni dua na Vanua Veiciqomi ki na Tamata Kecega

A vakavulica o Peresitedi Joseph Fielding Smith (1876–1972), “Na soqoni ni sakaramede sa ka tabu, ka rokovi sara, mai na veisoqoni kece ni Lotu.”³ Ena tikina oqo, sa ka bibi me da veiciqomi vei ira kece ka tiko ena soqoni ni sakaramede ka me ra vakila ni ra ciqomi ka vakani vakayalo—vakabibi o ira na lewenilotu vou se lewenilotu ka sega tu ni basika ena dua na gauna.

O Merania mai New South Wales, Ositerelia, a veitokani kei na dua na marama ka vulica tiko na veika me baleta na Lotu ena nona tabanalevu. “Sa yaco tu oqo o koya me dua na noqu itokani vinaka,” e kaya o Merania. “Au dau taleitaka na dabe vata kei koya ena soqoni ni sakaramede ena veimacawa, kau dau taroga se sa vakacava tiko ka vakakina kevaka e tiko e dua na ka au rawa ni cakava meu vukei koya kina.” Ni oti tokaga vakalailai, sa papitaiso sara na itokani i Merania. Na nodra sasaga na lewe ni tabanalevu, vakakina na draki ni veiciqomi ena soqoni ni sakaramede, a vakauqeta vakalevu saraga na nona vakatulewa.

Vakasama Eso ena Veiqaravi vei Ira na Lewenilotu Vou se Lesumai

Ni o sa na vosa tiko ena soqoni ni sakaramede, sa rawa ni o sureti ira na itokani, matavuvale, kei na so tale mera lako mai ka rogoca na nomu itukutuku.
Sa rawa ni o vakaraici ka kidavaki ira na galili tu se rairai gadreva tu na veivuke. Kerea ke rawa ni o dabe vata kei ira se sureti ira mera dabe vata kei iko.
Ni sa cava na soqoni, sa rawa ni o sureti ira o dau qarava tiko kei na so tale ki na itaviqaravi ni Lotu eso ka tarava, ki na valetabu, se ki na dua na soqo ni veimaliwai.
Kevaka e tiko ena soqoni ni sakaramede e dua o dau qarava ka sa mai yali tu ena dua na gauna, sa rawa ni o tarogi koya kevaka e tiko e so na nona taro me baleta na veika e a vakavulici. Tukuna vei ira ni sa rawa tu mera gole mai vei iko ke tiko e dua na vosa, italanoa, se tiki ni vunau era sega ni kila vakamatata tu. Sa rawa ni drau raica vata na isaunitaro ke veiganiti.

© 2020 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. Vakadewa ni Ministering Principles, June 2020. Fijian. 16988 858