1

O Lou Aafiaga Faafaifeautalai

1.0

Faatomuaga

O lau misiona e le’i amataina moni i le aso na vaetofia ai oe. E le mae’a i le aso e faamalolo ai oe. O le misiona mo auaunaga e sili atu nai lo nao le faamaulu o se togiga i le taeao ma toe aveese pe a uma le aso.

O lau misiona mo auaunaga e faaalia ai lou tuuto ia Iesu Keriso ma lou naunau e auauna i isi i Lona suafa. Mai lava i le taimi o lou papatisoga, ua e i ai i luga o le ala o le feagaiga e taitai atu ai i le fiafia, olioli, ma le filemu e faavavau. O lou aafiaga i le misiona e mafai ona suia ai oe, ma e tatau ona e tauaveina na suiga i lou olaga atoa.

Mai se vaaiga loloto faavavau, o lau misiona e sili atu nai lo na o ni pusa e faailoga faasa’o o mea ua uma ona faia. O se auala e fesoasoani ai ia te oe i lau savaliga ia avea ma soo o Iesu Keriso i le olaga atoa. Na saunoa mai Peresitene Marion G. Romney, “O le auauna atu e le o se mea tatou te onosaia i lenei lalolagi ina ia mafai ona tatou maua ai le aia tatau e nonofo ai i le malo selesitila. O le auauna atu o le mea tonu lea ua faia ai se olaga faaeaina i le malo selesitila” (“O Le Natura Selesitila o le Faalagolago o le Tagata ia te Ia Lava,” Ensign, Nov. 1982, 93).

Na fetalai mai le Alii, “O lea, afai ua ia te outou le manao e auauna atu i le Atua, ua valaauina outou i le galuega” (Mataupu Faavae ma Feagaiga 4:3). Pe na tofia muamua oe e avea ma se faifeautalai mo auaunaga pe na suia e avea ma se faifeautalai mo auaunaga, pe na toe vaetofia o se faifaeautalai mo auaunaga, ua ia te oe le avanoa taua e ofoina atu ai lenei taimi o lou olaga e auauna atu i le Alii e ala i le auauna atu i isi i Lona suafa. I lenei valaauga, o le a e maua ai avanoa e tuuina atu ai auaunaga e faamanuiaina ai isi tagata, lou lava olaga, lou aiga, le Ekalesia, ma faalapotopotoga e te auauna i ai.

Ua auina mai i tatou uma taitoatasi i lenei lalolagi ma ni gafatia ma taleni eseese. Faatasi ai ma au taleni ma gafatia maoae, e mafai ai ona e faia se saofaga anoa i le galuega a le Atua i le lalolagi. O lau auaunaga faamaoni o se faifeautalai o se taulaga lea ua taliaina e le Alii.

Ia olioli i lou aafiaga faamisiona a o e alofa i le Atua ma lē lua te tuaoi. O le taimi lenei e olioli ai ma maua aafiaga o le fiafia e faavavau ma le filemu e ala ia Iesu Keriso.

1.1

Usiusitai

O soo moni o Iesu Keriso e usiusitai. Na aoao mai le Faaola, “Afai tou te alofa mai ia te au, ia outou tausi mai i a’u poloaiga” (Ioane 14:15). O le tausia o poloaiga o lona uiga e te naunau ma le faamaoni e faia mea ua poloaiina ai oe e le Alii ona e te alofa ia te Ia. O le usiusitai foi o lona uiga o lou tausia lea o poloaiga ma le “olioli” (Kolose 1:11) ma le “fiafia ma le loto faamaoni” (Galuega 2:46).

O Iesu Keriso o le faataitaiga o le usiusitai atoatoa. O mea uma na Ia faia o le finagalo lea o le Tama. Mulimuli ia te Ia e ala i lou faia o le mea silisili e tausia Ana poloaiga uma ma ola ai i tulaga faatonuina o le misiona. O le usiusitai ma le faamaoni o lona uiga foi o lou taumafai lea e suesue, tuputupu ae, ma alualu i luma. Faasa’o vave mea sese. Faaali atu e te faamaoni ma usiusitai e ala i le taulimaina lelei o au lava faatinoga.

O le a faamanuiaina oe pe a e mulimuli i poloaiga ma tulaga faatonuina faafaifeautalai ma faaaoga le faautautaga lelei. Faamolemole ia silafia, e tusa lava pe e te tausia poloaiga, o le a ono i ai puapuaga, ma’i, po o luitau e te lua feagai (tagai i le Ioane 16:33). Na o’o le Faaola i nei mea uma (tagai i le Alema 7:11–12; Mataupu Faavae ma Feagaiga 122:8). Ua Ia folafola mai, “Ou te le tuua outou o matuaoti: ou te sau ia te outou” (Ioane 14:18).

E alofa le Atua ia te outou. Filifili e tausi i poloaiga ona e te alofa i le Atua. Aua le taumafai e fai ni feutagaiga ma le Alii pe faamoemoe e maua ni faamanuiaga faapitoa e ala i le fetuunai o mea e manaomia ona e faia.

1.2

Faitalia

O le faitalia, po o le gafatia e filifili ma galue ai mo oe lava, o se tasi lea o meaalofa sili a le Atua i Ana fanau. O lo tatou alualu i luma e faavavau e faalagolago lea i le ala tatou te faaaoga ai lenei meaalofa. E tatau ona tatou filifili pe mulimuli ia Iesu Keriso ma Ana aoaoga. O le faitalia e faatagaina oe e aoao, alualu i luma, ma mulimuli i le Faaola. Faatasi ai ma lena mea, ua outou “saoloto e filifili le saolotoga ma le ola e faavavau, e ala i le Puluvaga sili o tagata uma” (2 Nifae 2:27).

E te tali atu oe lava ia mo filifiliga e te faia. O oe o se atalii/afafine o le Atua ua i ai se malosi maoae. Ua ia te oe le gafatia e filifili ai le amiotonu ma le fiafia e tusa lava poo a tulaga o loo e i ai.

Ua ia te oe foi se matafaioi mo le atinaeina o gafatia ma taleni na tuuina atu e le Atua ia te oe. O lau misiona o se taimi lea e aoao ai ia tali atu ia te Ia mo mea e te faia i ou gafatia ma le ala e faaaoga ai ou taimi. Aua le faama’umauina le taimi e ala i le paiē. Ia naunau e galue malosi. Filifili e tumau ma ia faatuatuaina, ma fai le tele o mea lelei i lau lava faitalia.

1.3

Faamoemoega o Faifeautalai mo Auaunaga

O le auaunaga a le Faaola o loo faaalia mai ai ia poloaiga sili e lua: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” ma “E te alofa atu i lē lua te tuaoi, ia pei o oe lava ia te oe” (Mataio 22:37, 39). Tatou te faailoa atu lo tatou alolofa mo o tatou tuaoi pe a tatou auauna atu ia i latou. Pe a tatou auauna atu i isi, ua tatou faaalia foi lo tatou alolofa i le Atua: “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).

Ua saunia e le Au Peresitene Sili se faamoemoega faafaifeautalai mo auaunaga e taiala ai oe i lou valaauga paia e auauna atu:

“O lo tatou faamoemoega o le fesoasoani lea i isi ia o mai ia Keriso e ala i le auauna atu ia i latou e pei o le Faaola. Tatou te auauna atu ma le lotomalie i faalapotopotoga o auaunaga alofa, gaoioiga a le Ekalesia, ma i totonu o alalafaga. O le a tatou auauna atu i Lona suafa i le tagata e toatasi, e pei ona sa Ia faia, i le faailoa atu o Lona alofa agalelei.”

Ia manatua o le auala e te auauna atu ai i le Faaola e sili atu ona taua nai lo o le nofoaga e te auauna atu i ai po o mea e te faia. Na tautino mai e Peresitene Russell M. Nelson, “E ala i auaunaga i le olaga atoa i lenei Ekalesia, ua ou iloa ai e le afaina lava po o fea e auauna ai se tasi. O le mea e sili ona taua i le Alii o le auala e auauna atu ai se tasi” (“Auauna Atu i le Mana ma le Pule a le Atua,” Liahona, Me 2018, 68). O lau auaunaga e mo le Matai, ma ua valaaulia oe e auauna atu e pei o Ia!

1.4

Tulaga Faamoemoeina Faafaifeautalai

Ua saunia ma tuuina mai foi e le Au Peresitene Sili faamoemoega nei o le misiona mo auaunaga:

• E tuuina atu ai se avanoa mo tamaitai ma alii talavou uma e naunautai e auauna i le Alii ma faateleina a latou molimau ia te Ia.

• E fesoasoani i faifeautalai taitoatasi mo auaunaga e saunia ai mo se auaunaga i le olaga atoa.

• Tuuina atu ai auaunaga manaomia ma le taua i le Alii e ala i le auauna atu i le Ekalesia ma faalapotopotoga i alalafaga.

Ao e auauna atu ma le faamaoni i le Faaola i Lona suafa ma i Lana ala ao faagasolo po o le mae’a ai foi o lau misiona, o le a faapea ona e atinaeina ai ni uiga faaKeriso. O nei uiga, po o amio, o le a fesoasoani ia oe e ausia ai ou faamoemoega faafaifeautalai.

Ua ia te oe le avanoa e fausia ai ni tomai fou faaleagaga, faaagafesootai, faaletino, ma faaleatamai ia o le a faamanuiaina ma uunaia ai oe i tulaga uma o lou olaga.

1.5

Tulaga Faatonuina mo le Olaga

Ua valaaulia oe e le Atua e tuuto atu oe lava ia te Ia i lou olaga atoa. O tulaga faatonuina o le misiona e pei o suesuega faaletagata lava ia, faatuina o sini, ma le faaaogaina ma le amiotonu o tekinolosi o le a faamanuiaina ai oe i lau misiona ma lou olaga atoa.

Ia avea poloaiga i totonu o tusitusiga paia ma nei tulaga faatonuina faafaifeautalai o ni mataupu faavae taiala i le olaga atoa. A o e mulimuli i poloaiga a le Atua ma tulaga faatonuina, o le a Ia faatonutonu, faamanuia, ma taiala oe i lou olaga atoa.