O le a Tootuli Tulivae Uma, saunia e J. Kirk Richards

3

Amioga a Faifeautalai

3.0

Faatomuaga

O le vaega lenei o loo faamatala ai tulaga faatonuina faafaifeautalai ma uiga faa-Keriso. Ua faamoemoeina oe ia e faataitaia ma atiae nei tulaga faatonuina ma uiga lelei a o avea oe ma se soo tuuto sili atu o Iesu Keriso. E pei ona fautua mai le perofeta o Moronae, “Manatua le afioga a le Atua ua fetalai mai o a latou galuega tou te iloa ai i latou; aua afai ua lelei a latou galuega, ua lelei foi i latou” (Moronae 7:5).

3.1

Amioga Faa-Keriso

Tatalo ma galue e atiae amio faa-Keriso, po o uiga, e pei ona faamatalaina i tusitusiga paia ma i aoaoga a perofeta soifua. O nei amioga e aofia ai le lotofaafetai, agalelei, alofa, lotomaualalo, onosai, agaalofa, ma le usiusitai. Faatasi ai ma le fesoasoani a le Alii ma au lava taumafaiga faamaoni ma le maelega, e mafai ai ona e atiae uiga FaaKeriso (tagai Mosaea 3:19).

Ia agalelei, vaai i le itu lelei, ma faagaeetia. Ia manatunatu lelei i tulaga o tagata taitasi. O oe o se tagata asiasi atu i eria o loo e auauna atu ai ma e tatau ona faia tagata ma nofoaga i le faaaloalo ma le agaga faafetai.

A o auauna atu ai i totonu o le alalafaga, ia faaaloalo i tu masani, talitonuga faalelotu, ma faatinoga a isi i taimi uma. Alo ese mai le faatiga i isi. Manatua, o mea e te tautala atu ai ma mea e te faia i le taimi o au auaunaga atonu e lagonaina, matauina, ma faamaumauina. Po o fea lava e te auauna ai, o oe o se sui o Iesu Keriso ma Lana Ekalesia toefuataiina.

3.2

Agavaa mo le Malumalu

E manaomia ona agavaa faifeautalai mo le malumalu i le taimi atoa o a latou misiona.

Ua valaaulia oe e le Alii o Iesu Keriso e “saunia outou lava, ma faapaia outou lava, ioe, ia faamama o outou loto, ma faamama o outou lima ma o outou vae i o’u luma, ina ia mafai ona Ou faamamaina outou” (Mataupu Faavae ma Feagaiga 88:74). O se vaega o lenei sauniuniga e aofia ai le tausia o feagaiga o le malumalu pe afai ua e maua ou faaeega paia o le malumalu.

3.2.1

Feagaiga o le Malumalu (Pe Afai ua Maua Faaeega Paia)

O le tausia o feagaiga o le malumalu o le usiusitai, ositaulaga, ma le faapaiaina o le a faaeaina ai oe ma fesoasoani e avea atili ai oe e faapei o le Faaola.

E tusa pe leai se malumalu i le eria o lau misiona, ia tumau pea lou agavaa mo le malumalu. Talosaga i lou epikopo ma le peresitene o le siteki mo se faatalanoaga mo se pepa faataga o le malumalu ao lei mae’a le aogā o lou pepa faataga o i ai nei.

O le ofuina o ofusa o le malumalu o se avanoa paia mo i latou ua osia feagaiga o le faaeega paia. Tuu atu i le Agaga Paia e taitaia oe i le lauiliuina o au tautinoga patino i le laeiina o le ofusa.

3.2.2

Tapuai i le Malumalu

Afai e lata atu se malumalu, e uunaia oe e auai i le malumalu o se tagata ulu i le aluga atoa o lau misiona. O lenei auai atu e mafai foi ona avea o se tasi o ou avanoa atofaina e auauna atu ai.

O le auai i le malumalu e le tatau ona feteenai ma isi ou tofiga faafaifeautalai. Ao e auauna atu i le malumalu, ia faataunuu ou tofiga ma le mamalu, faaaloalo, ma le migao. Pe a e auai i le malumalu, ia manatua mea nei:

• Pe a tofia oe e le au peresitene o le malumalu e auauna atu o se tagata fai sauniga, o le a e galue i le malumalu e pei ona latou faatonuina.

• Aua nei aumaia ni meapueata, telefoni feaveai, po o tusi faitau (e aofia ai faamanuiaga faapeteriaka) e faaaoga i totonu o le malumalu.

• Aua nei faapotopoto o ni faifeautalai pe tootutuli e tatalo i le potu selesitila.

• E ala i le auina atu o igoa o aiga i le malumalu, e mafai ona e fesoasoani ai e faapotopoto Isaraelu i le isi itu o le veli ma faalautele ou aafiaga o le malumalu.

3.3

O Le Tulafono o le Legaviā

O se vaega taua o le avea ai ma se tagata agavaa o le malumalu o le usitaia lea o le tulafono o le legaviā. Fai mea uma e te mafai e puipuia ai oe lava mai faaosoosoga tauafinea’itane ia e ono oo atu ai i le solia o au feagaiga paia. O le faia o mea e solia ai le tulafono o le legaviā e ono oo atu ai i moliaga faasolitulafono i nisi eria.

Ia aloese mai soo se mafaufauga po o faatinoga e ono vavaeeseina ai oe mai le Agaga. E aofia ai i lenei vaega ae le na o le mulilua; faitaaga; amioga afinea’itane a itupa tutusa; afinea’itane i gutu; faaosofia o lagona tauafinea’itane; tagotago le talafeagai; auina atu po o le mauaina o ni feau tusitusia, ata, po o vitio e le mama ma tauafinea’itane lona natura; puleiletino; ma le matamata po o le faaaogaina o ponokalafi. Mo nisi faamatalaga, tagai i le Mo Le Malosi o le Autalavou, (tamaitusi, 2011), “Salamō,” 28–29.

Afai o loo e tauivi e tausia ia tulaga faatonuina, ole atu i le Alii mo se fesoasoani ma vave talanoa i lou peresitene o le siteki.

3.3.1

Aloese mai Ponokalafi

E tele ituaiga o ponokalafi. O le fuafua mamao ma le faia o filifiliga amiotonu e mafai ona fesoasoani ia oe e aloese ai mai ponokalafi. Afai e te vaaia, tilotilo ese, tape le masini, pe aluese mai lea tulaga.

Faaaoga fautuaga nei e fesoasoani ia oe e aloese ai mai ponokalafi:

• Aloese mai uepisaite, anomea, ma nofoaga e te ona faalogo ai, faitau ai, po o le vaai ai i mea e faaosoosoina ai po o ponokalafi.

• Aoao ina ia iloa taimi e ono faaosoosoina tele ai oe e faaaoga tekinolosi i auala le tatau, e pei o le taimi ua e lelava pe īvā.

• Fai se fuafuaga o mea e mafai ona e faia i na taimi. E mafai ona fesoasoani ou taitai misiona mo auaunaga. E mafai foi ona e maua faamatalaga i le ChurchofJesusChrist.org/addressing-ponography.

O soo se tasi o saili ina ia aloese pe faatoilalo ponokalafi e mafai ona maua le fesoasoani ma le faamalologa e ala i le Togiola a Iesu Keriso. Afai o e tauivi, talanoa ma lou peresitene o le siteki, o le e tatau ona tuuina atu fautuaga alofa ma le lagolago.

3.4

Faamaoni

Ua poloaiina i tatou ia faamaoni. O le agavaa mo le malumalu e aofia ai le tatau ona e faamaoni i au fegalegaleaiga uma ma isi. O le faamaoni e aofia ai le:

• Ta’u atu o le mea moni, aemaise lava i ou taitai misiona mo auaunaga ma le peresitene o le siteki e uiga i lau amio, molimau, mausa faalegaluega, ma le soifua maloloina faalelagona ma faaletino.

• Tuuina atu o lipoti faamaoni o lau auaunaga ma le auala na faaaluina ai lou taimi i le faagasologa o le vaiaso.

• Faatuatuaina ma le le tuuina atu lava o se lipoti sese po o ni faamatalaga le tonu e uiga i se tasi tagata po o ou tofiga o auaunaga.

• Faaaloalogia o isi e ala i le le nono mai, aveina, po o le faaaogaina o mea totino a se isi tagata (e aofia ai lavalava, tusi, masini faaeletonika, ma asoa ma teuga) e aunoa ma se faatagaga.

3.5

Fegalegaleaiga ma Isi

Na aoao mai le Faaola, “O la’u poloaiga lenei, ia outou fealofani, pei ona ou alofa atu ia te outou” (Ioane 15:12). Filifili e mulimuli i faataitaiga a le Faaola ma amio ai i uiga o le faaaloalo, saogalemu, ma talafeagai mo le tulaga.

3.5.1

Tulaga Faatonuina Lautele mo Fegalegaleaiga ma Aiga ma Uo

Avea ma se malosiaga ma se faataitaiga lelei i lou aiga ma uo. Faasoa atu tala musuia mai aafiaga o lau misiona.

E mafai ona fesoasoani tagata o le aiga ia oe i manaoga faaletino, i femalagaaiga, po o isi auala mo oe e auauna ai ma le manuia. O le a i ai ni fetuunaiga i olaga faaleaiga i le aluga o lau auaunaga faafaifeautalai. O oe ma lou aiga o le a manaomia ona faia ni osigataulaga e faamautinoa ai ua e maua se aafiaga anoa sili ma taua e tatau ai i le misiona.

3.5.2

Tulaga Faatonuina Lautele mo Fegalegaleaiga ma Tagata Matutua

Fausia le faatuatuaina ma ni sootaga anoa ma i latou e te auauna atu i ai. Ia atamai ma agalelei. Matau tulaga nei:

• Aloese mai tulaga e ono avea ma faafitauli faigata faaletino pe faaleagaga po o le le malamalama i ai.

• Aua le faatafai pe fegalegaleai lē talafeagai ma se soo se tasi.

• Tautuana ia tamalii lau gagana. Aloese mai le faaaogaina o ’anaga faaonaponei. Faaaoga faalagiga talafeagai pe a talanoa atu isi. Mo se faataitaiga, faaaoga le faalagiga “Elder” po o le “Sister” pe a faasino i isi faifeautalai mo auaunaga ma taitai misiona mo auaunaga e faailoa ai le faaaloalo mo o latou valaauga.

3.5.3

Tulaga Faatonuina Lautele mo Fegalegaleaiga ma Tamaiti ma Tagata Matutua e Afaina Gofie

Mo lou saogalemu, atoa ai ma le saogalemu o tamaiti ma tagata matutua e afaina gofie, ia tagai ma le totoa i tulaga faatonuina nei mo le galulue faatasi ma nei vaega:

• Aua lava nei tuua na o oe ma tamaiti po o tagata matutua e afaina gofie i soo se tulaga.

• Aua le vaavaaia i latou, faaofu i latou, faainuina a latou fualaau, pe taulimaina lo latou tumama patino.

• Ia faatoa auauna atu ia i latou i le taimi e i ai se isi tagata matua faatuatuaina. Mulimuli i tulafono faapitoa mo le Ekalesia po o le vaega o auaunaga alofa o loo e auauna i ai.

• Pe afai o le a e galue ma i latou i se faalapotopotoga agaalofa, e manaomia ona e faataunuuina muamua se siaki o talaaga.

Otagata matutua e afaina gofie o tagata e i ai ni faaletonu o le mafaufau pe faaletino ia e matuiā aafiaga i o latou gafatia e malamalama ai i tulaga ma puipuia i latou mai sauaga, tuulafoaiina, po o le puleeseaina. Otagata matutua lamatia e faatatau foi i tagata sulufai o e atonu e le malamalama i gagana po o ni eseesega faaleaganuu.

3.5.4

Tulaga Faatonuina Lautele mo Fegalegaleaiga ma Faafaifeautalai e Faia Aoaoga

I le avea ai o se tagata o le Ekalesia, e mafai ona tou o faatasi ma faifeautalai i asiasiga e fai ni aoaoga. E le tatau ona e faaalia atu o oe o se faifeautalai e faia aoaoga. Aua le faia lau pine o le igoa faafaifeautalai i asiasiga e aoao atu ai. E le tatau ona e faatasi atu i faifeautalai e faia aoaoga mo konafesi a itu ma sone sei vagana ua valaaulia oe e le peresitene o le misiona.

3.5.5

Tafaoga Faamasani

E le mafai ona e tafao faamasani ao avea oe ma faifeautalai. Ua uunaia oe e auai i gaoioiga a le YSA a le uarota, ae e le tatau ona e auai i siva. E tatau ona e faaeteete i le auai atu i soo se gaoioiga e ono foliga mai o ni tafaoga faamasani.

3.5.6

Faia o le Pine o le Igoa Faafaifeautalai

O se faamamaluga ma se faamanuiaga le fai o le pine o le igoa faafaifeautalai. Ia fai i taimi uma ao e agai atu ma toe foi mai i tofiga faafaifeautalai, i ou tofiga faafaifeautalai, ma i sauniga o le Ekalesia.

O tofiga faafaifeautalai e aofia ai fonotaga ma konafesi a faifeautalai, taimi e auauna atu ai i lou aiga, ma tofiga o le Ekalesia ma auaunaga alofa e fai mai i le fale. Afai e i ai se fesili e uiga i taimi e tatau ai ona fai lau pine o le igoa faafaifeautalai, faamolemole fesili i ou tatai misiona mo auaunaga.

3.5.7

Nofo i le Fale

I le tusi o lou valaauga, sa tofia oe e te galue o se faifeautalai mo auaunaga i lou alalafaga i le lotoifale, e tuuina atu auaunaga faaKeriso ao nofo ai i lou aiga.

3.5.8

Galuega ma le Aoga

Galuega ma le aoga—pe o le taimi atoa po o sina taimi—e le o ni vaega o le misiona mo auaunaga. E tatau ona e tuuto atu lou taimi, taleni, malosi, ma punaoa tau tupe i lau misiona. O se vaega lea o le tulafono o le faapaiaga.

E mafai ona e lesitala i le inisitituti ma le PathwayConnect pe a manaomia.

3.5.9

Taiala Saogalemu mo Gaoioiga

O taiala saogalemu mo gaoioiga e faatatau i le autalavou matutua nofofua, o lona uiga e faatatau ia te oe o se faifeautalai mo auaunaga. O loo i ai tapulaa i gaoioiga i po, asiasiga i le malumalu i fafo atu o le malumalu i lau itu atofaina, ma malaga mamao. O nei gaoioiga e manaomia ai ona fuafua mamao e ou taitai misiona mo auaunaga ma sailia se faatagaga mai taitai perisitua tofiaina. E manaomia ona faatumu e ou matua po o tagata o vaaia oe se Fomu mo le Faatagaina ona Faamatuu Atu ma Faamatalaga Faafomaʻi mo oe ina ia mafai ai ona e auai.

3.6

Gaoioiga Faafiafia ma Faafiafiaga

Filifili gaoioiga e siitia ai ma fesoasoani e maua ai le toafilemu. I faatalanoaga ma tagata tomai faapitoa o le soifua maloloina, ia faamalositino ma gaoioi ia faatumau ai le malosi o lou tino ma le mafaufau mo auaunaga. Aloese mai gaoioiga faafiafia e ono afua ai ni manuaga pe matua vaivai ai.

3.6.1

Taaloga, Tifaga ma le Televise

O gaoioiga i itula e te le o i ai i se tofiga auauna atu, e pei o taaloga vitio talafeagai, tifaga, ma polokalama i televise, e faatagaina faatasi ai ma le faamaoniga mai lou peresitene o le siteki ma taitai misiona mo auaunaga.

O nei ituaiga gaoioiga e le tatau ona faalavelave i au sauniuniga faaletagata lava ia, suesuega, po o taimi o auaunaga. Aloese mai soo se mea e faaitiitia ai le Agaga. Faamolemole ia faaaoga le faautautaga lelei i le faia o lau pine o le igoa i taimi o nei ituaiga o gaoioiga.

3.6.2

Auai i le Uarota ma le Inisitituti

I le taimi o lau auaunaga o se faifeautalai, o lou pepa faamaumau e tatau ona i ai pea i lau uarota tumau. Pe a faatagaina, e mafai ona e auai i le uarota a le autalavou matutua nofofua i lau eria.

Ua fautuaina oe e auai i vasega inisitituti ma gaoioiga. E mafai foi ona e auai i gaoioiga a le autalavou matutua nofofua ua lagolagoina e lau uarota po o le siteki e pei o afiafi faaleaiga, asiasi atu i le malumalu, faigalotu, taaloga, ma tafaoga, ae le aofia ai siva.

3.6.3

Gaoioiga Faafiafia ma Faaleaganuu

Manatua, o oe o se faifeautalai. O au gaoioiga e tatau lava ona lelei i taimi uma, faagaeetia, ma ogatusa ma tulaga faatonuina o lenei tusitaulima.

Ia maua pea le saogalemu ma faaaoga le faautautaga lelei pe a auai i gaoioiga faafiafia. I le aluga o lau misiona e le tatau ona e auai i gaoioiga e aofia ai le faateleina o avanoa lamatia.

E mafai ona e faatautaia pe auai i faatasiga faaagafesootai ma isi faifeautalai mo auaunaga pe afai e te le o i ai i au auaunaga atofaina. Peitai, o nei gaoioiga e tatau ona mulimuli i tulaga faatonuina a faifeaulatai mo auaunaga ma e le tatau ona faia i le po atoa.

E mafai ona e auai i tafaoga a le aiga ma se faailoaga na muai tuuina atu i ou taitai misiona mo auaunaga ma ou taitai o gaoioiga. Fai faatasi ma ou taitai misiona mo auaunaga se fuafuaga e faaleleia atili ai ou aafiaga o le misiona ao e i ai i tafaoga.

3.6.4

Musika

Faalogologo i musika e ogatusa ma lou valaauga paia. O musika e tatau ona valaaulia ai le Agaga, fesoasoani ia oe e taulai atu ai i le galuega, ma tataia ou manatu ma lagona i le Faaola.

Aua le faalogologo i musika e uunaia ai le ola le mama, pe faaviivii i faiga faatupu vevesi, e faaaogaina ai gagana le lelei, pe faaitiitia ai lou malamalama faaleagaga e ala i lona pa’ō, mea fai faili, leo, upu, po o le malosi.

3.6.5

Masini Eletonika ma Komepiuta

O soo se faaaogaina o masini eletonika ma auala faasalalau, e aofia ai telefoni ma komepiuta, e tatau ona ogatasi ma mataupu faavae o le talalelei. O le faaaogaina o mea faaeletonika e le tatau ona aveesea ai i soo se auala mai le agaga ma lou valaauga o le misiona.

Aloese mai soo se mea e tufanua, lē mamā, sauā, po o ponokalafi. Aua le faaaogaina lau telefoni feaveai i itula o galuega auauna atu.

3.6.6

Ala o faasalalauga

O ala o faasalalauga faaagafesootai e mafai ona avea ma se auala lelei e faasoa ai auala e mulimuli ai i le Faaola o se faifeautalai. O tusiga e faatatau i gaoioiga faafaifeautalai e tatau lava ona atagia ai le mamalu o lou valaauga o le misiona.

Filifili ma le poto pe a faaaogaina ala o faasalalauga faaagafesootai. Po o a lava mea e te faitauina, faalogologo i ai, pe tilotilo i ai e i ai se aafiaga ia oe. Filifili na o ala o faasalalauga e siitia ai oe.

Puipui lou saogalemu ma le saogalemu o isi e ala i le faaeteete e uiga i faamatalaga patino ma ata e te faasoa atu i tekinolosi. Aua nei faaaogaina le faalagiga “Elder” po o le “Sister” i lou igoa faaaoga. Aua nei talanoaina soo se mea i luga o le initoneti pe ala i feau tusitusia e le talafeagai ona faasoa atu faafesagai. Aua nei faasoa atu ni manatu faapolokiki. Usitai i tulaga o loo lima taitaiina ai le faasoa atu o musika, ata tifaga, ma isi aitema ua taofia aia tatau e faasalalau ai. Aua nei e manatu faapea o mea ua e faasalalau atu o ni fesootaiga aloaia a le Ekalesia.

O le tele naua o le taimi e faaalu i le initoneti, se telefoni feaveai, po o isi ala o fesootaiga e mafai ona taofia ai oe mai le faataunuuina o au matafaioi ma galuega faafaifeautalai.

Afai e te le mautinoa pe ua talafeagai se mea e matamata pe faalogologo i ai, talanoa i ou matua, epikopo, peresitene o le siteki, po o taitai misiona mo auaunaga. O le a tuuina mai e le Agaga Paia ia te oe le malosi e faia ai filifiliga sao.

3.7

Tuusaunoaga o Aiaiga Faavae

O soo se tuusaunoaga i tulaga faatonuina ua faamatalaina i nei tulaga faatonuina faafaifeautalai e le o se filifiliga e faia na o lou peresitene o le siteki, epikopo, matua, po o taitai misiona mo auaunaga. Afai e te lagona e tatau ona utagia se tuusaunoaga, talanoa i lou peresitene o le siteki ma taitai misiona mo auaunaga e faatalanoa nei tulaga. Ona mafai lea e taitai misiona mo auaunaga ona talanoa i le Ofisa o le Misiona mo Auaunaga ina ia utagia le talosaga.

3.8

Fesootaiga ma Taitai Misiona mo Auaunaga, Taitai Perisitua, ma Taitai o Auaunaga i Nofoaga

O le auauna atu o se faifeautalai e aofia ai se matafaioi e tali atu i le Alii ma ou taitai. E te faia lenei mea e ala i le tuuina mai o lipoti masani faafaifeautalai. O nei lipoti e mafai ona aofia ai:

• Ou tofiga faafaifeautalai ma taimi faatulagaina

• Lou soifua maloloina faaletino ma faalelagona

• Ou aafiaga faaleagaga ma atinaega

• Ou tulaga faamanuiaina ma luitau i le taimi nei

E tatau ona e faailoa i lou taitai mo auaunaga i lau eria ma ou taitai misiona mo auaunaga soo se taimi e le mafai ai ona e auai i ou tofiga o auaunaga. O lenei fesootaiga e tatau lava ona vave faia i le amataga pe a talafeagai ai.

I le taimi o lau misiona, faaaoga lau imeli faafaifeautalai atofaina na i lo o se isi lava imeli faaletagata lava ia.