Sii i Luga Lima ua Tautau i Lalo, saunia e J. Kirk Richards

5

Pule o le Perisitua ma Sauniga

5.0

Faatomuaga

O le perisitua o le pule ua tuuina mai e le Atua i Ana fanau e aumaia ai le faaolataga i tagata uma. O taitai perisitua ua maua ma faaaogaina ki o le perisitua ua i ai le pule o le perisitua ma ua mafai ona tuuina atu le pule o le perisitua i isi. Talu ai “o isi pule uma [ma] tofi i le ekalesia o ni faaopoopoga i lenei perisitua [Mekisateko]” (Mataupu Faavae ma Feagaiga 107:5), o mea uma e faia i lalo o le taitaiga o ki o le perisitua e faia i le pule o le perisitua.

Pe a vaetofiaina se tamaitai e avea o se faifeautalai, e galue o ia i lalo o le pule o le perisitua e faatino ai se matafaioi faaleperisitua. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina.

Afai o loo e umia le Perisitua Mekisateko, o le a e maua avanoa e auai ai i sauniga ma faamanuiaga faaleperisitua.

Faaaoga taiala lautele nei mo le faatinoina o sauniga ma faamanuiaga o le perisitua. O faamatalaga i lenei vaega o se aotelega mai le mataupu 18 o le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai.

Manatua: E pei ona faamatalaina atu i vaega o loo mulimuli mai, o nisi o sauniga e tatau ona faamaonia e le taitai perisitua pulefaamalumalu o loo umia ki talafeagai.

5.1

Taitaiga i le Perisitua: Taiala Lautele mo E Umia le Perisitua Mekisateko

E tatau ia i latou ua umia le Perisitua Mekisateko ona taumafai ina ia agavaa ma ia taialaina e le Agaga Paia. E tatau ona latou faatinoina ia sauniga taitasi ma faamanuiaga i se faiga mamalu, ia mautinoa e ogatasi ma tulaga manaomia nei:

1. E ao ona faatinoina i le suafa o Iesu Keriso.

2. E ao ona faatinoina i le pule o le perisitua.

3. E ao ona faatinoina i soo se faasologa e tatau ai, e pei o le faaaogaina o upu patino po o le suauu paia.

4. Pe a talafeagai, e ao ona faatagaina e le taitai pulefaamalumalu o lē o loo umia ia ki e tatau ai (e masani lava o le epikopo, peresitene o le siteki, po o le peresitene o le misiona), e tusa ai ma faatonuga i lenei mataupu.

O i latou e tuuina atu faamanuiaga o le perisitua e tautatala atu i upu o le faamanuiaga (“Ou te [po o le matou te] faamanuia ia te oe ina ia …”) ae le o le faia o se tatalo (“Le Tama Faalelagi, faamolemole ia faamanuia lenei tagata ina ia …”).

Afai e toatele ni uso e auai i se sauniga po o se faamanuiaga, e tuu faamama e tagata taitoatasi lona lima taumatau i luga o le ulu o le tagata (po o lalo ifo o le pepe o loo faamanuiaina) ma lona lima tauagavale i luga o le tauau o le uso o loo i lona itu tauagavale.

E na o i latou o loo umia le perisitua e tatau ai ma o loo agavaa, e mafai ona faatinoina ia se sauniga po o se faamanuiaga. E pei ona taialaina ai e le Agaga, e mafai ona valaaulia e epikopo ma peresitene o siteki i latou e umia le perisitua, o ē e le o atoatoa ona agavaa mo le malumalu e faatino pe auai foi i nisi o sauniga ma faamanuiaga (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 18.3, ChurchofJesusChrist.org).

E le fautuaina le valaaulia o ni tagata se toatele o le aiga, uo, ma taitai e fesoasoani atu i se sauniga po o se faamanuiaga ona e ono foliga ese i isi. O se vaega toatele o tagata e ono mafai ai foi ona faafaigata ona faatino le sauniga.

5.2

Papatisoina

I lalo o le taitaiga a le taitai pulefaamalumalu, e mafai e se ositaulaga agavaa po o se tasi o loo umia le Perisitua Mekisateko ona faatinoina le sauniga o le papatisoga. Ina ia faia lea mea, e tatau ona ia mulimuli i laasaga nei:

1. E tu o ia i totonu o le vai faatasi ma le tagata o le a papatisoina.

2. Na te uuina le tapulima taumatau o le tagata i lona lima tauagavale (mo le faafaigofieina ma le saogalemu). O le tagata o loo papatisoina na te uuina le tapulima tauagavale o lē e umia le perisitua, i lona lima tauagavale.

3. E sii ae lona lima taumatau i le sikuea.

4. Na te ta’u le igoa atoa o le tagata ma faapea atu, “Ona ua tofia a’u e Iesu Keriso, ou te papatiso ia te oe i le suafa o le Tamā, ma le Alo, ma le Agaga Paia. Amene” (Mataupu Faavae ma Feagaiga 20:73).

5. Na te tuu atu i le tagata e uu lona isu i lona lima taumatau (ina ia faafaigofie). Ona tuu lea o le lima taumatau o le perisitua ia faamaualuga i le tua o le tagata ma faatofu atoa le tagata i lalo, e aofia ai ma lavalava o le tagata.

6. Na te fesoasoani e toe faatu a’e le tagata mai le vai.

E pei ona faamatalaina i le Tusitaulima Aoao, 18.7.6, o molimau e toalua e faamautinoaina ua faataunuuina ma le tatau papatisoga taitasi. E tatau ona toe faia se papatisoga pe afai e le o sa’o lelei le ta’uga o upu e pei ona tuuina mai i le Mataupu Faavae ma Feagaiga 20:73. E tatau foi ona toe faia le papatisoga pe afai e le’i lilofia atoa i le vai se vaega o le tino pe lei lilofia atoa foi laei o le tagata i le vai.

5.3

Faamauina

E toatasi pe sili atu i latou e umia le Perisitua Mekisateko e mafai ona auai i se faamauga. Latou te tuu faamama o latou lima i luga o le ulu o le tagata. Ona faia lea e le tagata o loo faatinoina le sauniga o mea nei:

1. Na te ta’u le igoa atoa o le tagata.

2. Na te ta’u atu o loo faatinoina le sauniga i le pule o le Perisitua Mekisateko.

3. Na te faamauina le tagata o se tagata O Le Ekalesia a Iesu Keriso o le Au Paia o Aso e Gata Ai.

4. Na te faaaoga ia upu “Talia le Agaga Paia” (ae lē o le “Talia le meaalofa o le Agaga Paia”).

5. Na te tuuina atu se faamanuiaga e pei ona taitaiina ai e le Agaga.

6. Na te faaiu i le suafa o Iesu Keriso.

5.4

Faapaiaina o le Suauu

E toatasi pe sili atu i latou e umia le Perisitua Mekisateko e tatau ona faapaiaina le suauu olive a o lei faaaogaina e faauuina ai e mama’i pe o mafatia foi. E leai se isi suauu e mafai ona faaaogaina. Ina ia faapaiaina le suauu, e mulimuli le ua umia le perisitua i laasaga nei:

1. Na te uuina se fagu o le suauu olive o matala.

2. Na te faalupe le Tama Faalelagi.

3. Na te ta’u atu o loo ia faia i le pule o le Perisitua Mekisateko.

4. Na te faapaiaina le suauu (ae le o le fagu) ma vaetofia mo le faauuina ma le faamanuiaina o ē mama’i ma ē mafatia.

5. Na te faaiu i le suafa o Iesu Keriso.

5.5

Faauuina o ē Mama’i ma Puapuagatia.

Na tuuina atu e Iesu le pule o le perisitua i Ana Aposetolo “e faamalolo ai ma’i, ma tutuli ai temoni” (Mareko 3:15). O e umia le Perisitua Mekisateko o loo i ai le pule lava lea. Faaaoga ma le tatau lenei meaalofa i soo se taimi e manaomia ai.

E na o e umia le Perisitua Mekisateko e mafai ona faauuina e mama’i pe mafatia. E masani lava e toalua pe sili atu i latou o loo umia le perisitua e faauuina faatasi le ma’i, ae mafai e le toatasi ona faatinoina uma na o ia le faauuga ma le faamauga o le faamanuiaga pe afai e tatau ai.

Afai e le o i ai se suauu ua faapaiaina, e mafai lava ona tuuina atu se faamanuiaga e ala i le pule o le perisitua e aunoa ma le faauuina.

O se tane po o se tamā agavaa o loo umiaina le Perisitua Mekisateko e masani lava ona ia faauuina tagata mama’i o lona aiga.

E tatau i uso o loo umia le perisitua ona faauu i e mama’i pe a talosaga mai le tagata ma’i po o se tasi o i latou e latalata tele i le tagata ina ia faamanuiaina e tusa ai ma lo latou faatuatua. O e umia le Perisitua Mekisateko e asiasi atu i le falemai, e le tatau ona talosagaina ni avanoa e faauu ai e mama’i.

Afai e talosagaina e se tagata ni faamanuiaga e sili atu i lo le tasi mo le ma’i lava e tasi, e le manaomia e le o umia le perisitua ona toe faauuina i le suauu pe a mae’a le faamanuiaga muamua. Nai lo o lena, na te tuuina atu se faamanuiaga i le faaee atu o lima ma i le pule o le perisitua.

O le faauuina o e mama’i e lua ona vaega: (1) faauuina i le suauu paia ma le (2) faamauina o le faauuga.

Faauuina i le Suauu Paia

O le faauuina o le suauu e faia e se tagata e toatasi o loo umia le Perisitua Mekisateko.

1. Na te tuu se matāua o le suauu ua faapaiaina i luga o le ulu o le tagata.

2. Na te tuu faamāmā ona lima i luga o le ulu o le tagata ma ta’u le tagata i lona igoa atoa.

3. Na te ta’u atu o loo ia faia i le pule o le Perisitua Mekisateko.

4. Na te ta’u atu ua ia faauuina i le suauu ua faapaiaina mo le faauuina ma le faamanuiaina o ē mama’i ma e mafatia.

5. Na te faaiu i le suafa o Iesu Keriso.

Faamauina o le Faauuga

E masani lava, e toalua pe sili atu i latou e umia le Perisitua Mekisateko e tuu faamāmā o latou lima i luga o le ulu o le tagata ina ia faamauina le faauuga. Ae peitai, e mafai e se toatasi ua umia le Perisitua Mekisateko ona faia na o ia lenei sauniga pe a tatau ai. Pe a faamauina le faauuga, e faia e le o umia le Perisitua Mekisateko mea nei:

1. Na te ta’u le tagata i lona igoa atoa.

2. Na te ta’u atu o loo ia faamauina le faauuga e ala i le pule o le Perisitua Mekisateko.

3. Na te tuuina atu upu o le faamanuiaga e pei ona taitaiina ai e le Agaga.

4. Na te faaiuina i le suafa o Iesu Keriso.

5.6

Tuuina Atu o Faamanuiaga o le Faamafanafanaga ma Fautuaga

E mafai e i latou o loo umia le Perisitua Mekisateko ona tuuina atu faamanuiaga o le faamafanafanaga ma fautuaga i isi tagata e talosagaina mai. Mo nei faamanuiaga, e tuu faamāmā e se toatasi pe sili atu o i latou o loo umia le perisitua, o latou lima i luga o le ulu o le tagata. Ona faia lea e le ua umia le perisitua o loo faia le faamanuiaga mea nei:

1. Na te ta’u le tagata i lona igoa atoa.

2. Na te ta’u atu o loo faia le faamanuiaga i le pule o le Perisitua Mekisateko.

3. Na te tuuina atu upu o le faamanuiaga e pei ona taitaiina ai e le Agaga.

4. Na te faaiuina i le suafa o Iesu Keriso.

O faifeautalai e tuuina atu faamanuiaga i tagata e ao ona lipoti sao atu faamanuiaga i le epikopo o tagata pe ala atu i le peresitene o le korama a toeaina po o le taitai misiona a le uarota, o le na te tauina atu i le epikopo.