Savali mai Le Au Peresitene Sili ma le Korama a Aposetolo e Toasefululua

Mo Faifeautalai mo Auaunaga Pelē:

Ua aoao mai le Tusi a Mamona, “Ma faauta, ou te tau atu nei mea ia te outou ina ia mafai ona outou aoaoina le poto; ina ia mafai ona outou aoaoina, pe a outou auauna atu i o outou uso-a-tagata, ua na o lo outou auauna atu lava lea i lo outou Atua” (Mosaea 2:17). Ua valaauina oe e le Atua e avea o se faifeautalai mo auaunaga e faatino se galuega taua i lenei taimi. E maeu lo matou lotofaafetai mo lou naunau e faia lena mea.

Matou te uunaia oe e “tatalo atu i le Tamā ma le malosi atoa o le loto,“ina ia faatumulia oe i le alofa mama o Keriso lea ua tuuina atu i “luga o i latou uma o e o soo moni” o Iesu Keriso (Moronae 7:47–48). Matou te valaaulia oe ina ia faalautele au taleni ma tomai mo le viiga o le Atua. O le a Ia fesoasoani ia oe e faamanuia Ana fanau a o e auauna atu ai ia i latou o se faifeautalai mo auaunaga.

O le Tulaga Faatonuina Faafaifeautalai mo Soo o Iesu Keriso—Misiona mo Auaunaga ua saunia e le Au Peresitene Sili ma le Korama a Aposetolo e Toasefululua e taiala ai lau auaunaga. Matou te uunaia oe ia faamasani i ai ma ola ai i tulaga faatonuina ua otooto atu ai. O nei tulaga faatonuina o le a fesoasoani ia oe i le faaletino, faaleagaga, ma faalelagona. O le a fesoasoani i a te oe ia avea o se soo moni o Iesu Keriso ma tuputupu ae e avea e faapei o Ia. Suesue e le aunoa i nei tulaga faatonuina ma taumafai ina ia usiusitai i ai. Afai e i ai ni au fesili, ole atu i le Alii i le tatalo e fesoasoani ia oe, ona fefautuaai lea ma lou peresitene o le siteki ma taitai misiona mo auaunaga pe a manaomia.

Matou te tatalo o le a e maua le filemu moni ma le olioli o se faifeautalai faamisiona mo auaunaga e auauna atu ai i le Alii o Iesu Keriso ma fanau a le Tama Faalelagi.

Ma le alofa ma le agaga talisapaia,

Au Peresitene Sili ma le Korama a Aposetolo e Toasefululua

O Le Ekalesia a Iesu Keriso o le Au Paia o Aso e Gata Ai