9:

Makig-istorya: Mohangyo ug Maminaw

Report:Daklit nga ipaambit sa grupo kon sa unsang paagi nga miserbisyo kamo og usa ka tawo sa miaging semana.

Pamalandungi:Kanus-a man ang Langitnong Amahan mitubag sa akong mga pag-ampo?

Tan-awa:“Creating Lift [Pagpasaka],” anaa sa srs.lds.org/videos. (Walay video? Basaha ang pahina 23)

Pagpasaka

Kon dili mo makatan-aw sa video, basaha kini nga script.

Presidente Dieter F. Uchtdorf: Aron ang eroplano malayo sa yuta, kinahanglan nga imo kining pasakaon. Sa aerodynamics, ang pagsaka mahitabo kon ang hangin moagi sa pako sa eroplano sa paagi nga ang gikusgon niini ubos sa pako mas kusog kay sa gikusgon ibabaw sa pako. Kon ang pagpasaka sa ibabaw mas kusog kaysa gibug-aton nga mobitad paubos [gravity], ang eroplano mosaka gikan sa yuta ug molupad.

Sa sama nga paagi, kita makahimo sa pagbayaw sa atong espirituhanong kinabuhi. Kon ang pwersa nga motulod kanato padulong sa langit mas kusog kaysa mga pagtintal ug kahasol nga mobira kanato paubos, kita makasaka ug makaadto sa gingharian sa Espiritu.

Bisan og daghang mga baruganan sa ebanghelyo ang makatabang kanato aron makab-ot ang pagkabayaw, ako gusto nga mopokus og usa ka piho nga butang.

Pag-ampo!

Ang pag-ampo mao ang usa sa mga baruganan sa ebanghelyo nga makatabang sa pagpabayaw. Ang pag-ampo adunay gahum sa pagbayaw kanato gikan sa kalibutanong mga tinguha. Ang pag-ampo makapasaka nato gikan sa mga panganod sa kaalautan o kangitngit ngadto sa kahayag ug klaro nga kapunawpunawan.

Usa sa dakong mga panalangin ug mga pribilehiyo ug mga oportunidad nga atong naangkon isip mga anak sa atong Langitnong Amahan mao nga kita mahimong makig-istorya Kaniya pinaagi sa pag-ampo. Kita mahimong makig-istorya Kaniya sa atong mga kasinatian sa kinabuhi, mga pagsulay, ug mga panalangin. Kita mahimong maminaw ug makadawat og celestial nga giya gikan sa Balaang Espiritu sa bisan unsang panahon ug sa bisan unsang dapit.

(Tan-awa sa Dieter F. Uchtdorf, “Pag-ampo ug ang Asul nga Kapunawpunawan,” Ensign o Liahona, Hunyo 2009, 5–6)

Balik sa pahina 22.

Hisguti:Unsaon man nato sa pag-ila sa mga tubag sa atong mga pag-ampo? Nganong ang pagpaminaw importante man nga bahin sa pag-ampo?

Basaha:Doktrina ug mga Pakigsaad 8:2 ug ang kinutlo gikan ni Presidente Russell M. Nelson (naa sa tuo)

“Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing.”

Doktrina ug mga Pakigsaad 8:2

“Ang inyong kalag mapanalanginan samtang magkat-on kamo sa pagpaminaw, dayon maminaw aron makakat-on gikan sa mga anak, mga ginikanan, mga kauban, mga silingan, ug mga lider sa Simbahan, kining tanan makapalambo sa kapasidad sa pagpaminaw sa tambag gikan sa kahitas-an.”

Russell M. Nelson, “Listen to Learn,” Ensign, Mayo 1991, 24

Hisguti:Nganong ang pagpaminaw importante man nga kahanas? Sa unsang paagi nga ang pagpaminaw og maayo makatabang kanato sa atong trabaho?

Kalihokan

Step 1: Isip grupo, basaha ang mga lakang sa ubos ug hisguti kini sa daklit.

Step 2: Hangyoa ang usa o duha ka sakop sa grupo nga sultihan ang uban bahin sa usa ka hagit o pangutana nga aduna sila. Ang tanan kinahanglang maningkamot sa pagpaminaw, magsunod niining mga lakang.

Step 3: Kon mahuman, pangutan-a ang mga sakop sa grupo nga namulong kon unsay ilang gibati sa dihang ang grupo naningkamot gayud sa pagpaminaw.

Basaha:Mga kinutlo gikan ni Presidente Henry B. Eyring ug Elder Robert D. Hales (naa sa tuo)

“Ang atong Langitnong Amahan naminaw sa mga pag-ampo sa Iyang mga anak sa tibuok yuta nga nangamuyo sa mga pagkaon aron kaunon, sa mga sinina aron itabon sa ilang mga lawas, ug sa dignidad nga magagikan sa pagkahimong makasangkap sa ilang kaugalingon.”

Henry B. Eyring, “Mga Oportunidad sa Paghimo og Maayo,” Ensign o Liahona, Mayo 2011, 22

“Kinahanglan kita nga mangayo og panabang sa atong Langitnong Amahan ug magtinguha og kusog pinaagi sa Pag-ula sa Iyang Anak, nga si Jesukristo. Diha sa temporal ug espirituhanong mga butang, [kini] makahimo kanato nga madaginuton nga tigsangkap sa atong mga kaugalingon ug sa uban.”

Robert D. Hales, “Pagkahimong Madaginuton nga mga Tigsangkap sa Temporal ug Espirituhanong Paagi,” Ensign o Liahona, Mayo 2009, 7–8

I-commit:I-commit nga himoon ang mosunod nga mga buluhaton sa semana. I-tsek ang box kon makompleto ninyo ang matag buluhaton.

• Pag-ampo sa tinagsa ug isip pamilya matag buntag ug gabii. Paggahin og panahon human sa matag pag-ampo nga matinahurong maminaw alang sa giya.

• Ipaambit ang inyong nakat-unan karon mahitungod sa komunikasyon ngadto sa inyong pamilya o mga higala.