5:

Gamita ang Panahon sa Maalamon nga Paagi

Report:Daklit nga ipaambit sa grupo ang usa ka panalangin nga inyong nadawat sa miaging semana tungod kay nagmasulundon kamo.

Pamalandungi:Ngano nga ang panahon usa man sa labing mahinungdanong mga gasa sa Dios?

Tan-awa:“The Gift of Time [Ang Gasa nga Panahon],” anaa sa srs.lds.org/videos. (Walay video? Basaha ang pahina 15)

Ang Gasa nga Panahon

Kon dili mo makatan-aw sa video, pagpili og mga tahas [role] ug basaha kini nga script.

Kofi: Hello, Sister Benkosi. Kumusta ka?

Sister Benkosi: Okey ra ka, Kofi?

Kofi: Oh, Sister Benkosi. Busy kaayo ko. Kinahanglan kong motrabaho ug moserbisyo ug motabang sa akong pamilya … ug unya ang football pa nako. Wala koy panahon!

Sister B.: Kofi, naa nimo ang tanang panahon.

Kofi: Unsa?

Sister B.: Dong, gihatagan kita sa Dios og dakong gasa—ang atong panahon. Kinahanglan ato kining gamiton sa mga butang nga labing importante.

Kofi: Pero unsaon man, Sister Benkosi? Pirme kang dunay daghan kaayong nahimo. Nagmalampuson ka sa imong pamilya, sa imong negosyo. Nakaserbisyo ug nakapanalangin ka og daghan, sama nako. Wala ko kahibalo kon giunsa nimo kini paghimo.

Sister B.: Gusto ba gyud ka nga masayud? Kon molingkod lang ka ug maminaw, sultihan ka nako sa akong sekreto.

Kada buntag mobangon ko sa di pa mosubang ang adlaw. Mag-ilis ko ug manghilam-us ug manghugas sa kamot.

Magbasa ko sa mga kasulatan. Dayon maghimo ko og lista kon unsay akong buhaton nianang adlawa.

Maghunahuna ko kon kinsa kaha ang akong maserbisyuhan. Mag-ampo ko aron masayud sa kabubut-on sa Dios. Ug ako maminaw.

Usahay ang mga ngalan o mga nawong sa mga tawo mosantup sa hunahuna. Idugang nako sila sa akong lista.

Kofi: Kana ba ang paagi nga kanunay ka nga nakahibalo kon si kinsa ang nagkinahanglan sa imong serbisyo?

Sister B.: Oo, Kofi. Ug nag-ampo ko alang sa kalig-on ug kaalam. Nag-ampo ko nga ang Dios “mopahinungod sa [akong] binuhatan.” Giingon kini diha sa 2 Nephi 32.

Nagpasalamat ko Kaniya. Misaad ko nga akong buhaton ang akong pinakamaayo. Nangayo ko nga Iyang buhaton ang unsay dili nako mabuhat.

Dayon motan-aw ko sa akong lista. Akong butangan og 1 ang labing importante nga butang, dayon 2.

Kofi: Giunsa nimo pagkahibalo sa mga prayoridad?

Sister B.: Maminaw ko kon mag-ampo ko! Dayon ipadayon nako ang akong gibuhat. Akong tan-awon ang numero 1 ug mosulay sa pagbuhat niini og una, dayon ang numero 2.

Usahay ang mga butang mausab. Ang Espiritu Santo mosulti nako sa pagbuhat og laing butang. Maayo kana.

Nagtrabaho ko og maayo, pero duna koy kalinaw. Nasayud ko nga ang Dios motabang nako.

Mao nga, gamit ang akong lista ug ang Espiritu, akong buhaton kon unsay importante, Kofi.

Kofi: Morag sayon ug lisud kana sa samang higayon.

Sister B.: Husto ka! Kon mangandam na ko aron mohigda, mag-ampo ko. Moreport ko sa Langitnong Amahan. Sultihan nako siya kon unsay nahitabo nianang adlawa. Mangutana ko. Mangutana ko kon unsay mahimo nako nga mas maayo. Maminaw ko. Gibati nako pirme ang Iyang gugma. Nasayud ko nga palamboon Niya ang unsay gisulayan nako pagbuhat. Dayon duna koy kalinaw, Kofi, ug matulog na ko.

Kofi: Maayo kana, Mamma Benkosi. Gusto ko niini nga kalinaw. Gusto nakong gamiton ang akong panahon. Gusto nakong mas maayo nga motrabaho ug moserbisyo.

Balik sa pahina 14.

Hisguti:Unsay inyong nakat-unan gikan ni Sister Benkosi?

Basaha:Alma 34: 32 ug ang kinutlo gikan ni Presidente Brigham Young (naa sa tuo)

“Kay tan-awa, kini nga kinabuhi mao ang panahon alang sa mga tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw alang sa mga tawo sa paghimo sa ilang mga buluhaton.”

Alma 34:32

“Ang panahon mao ang tanang puhunan nga ania sa yuta. … Kon gamiton sa hustong paagi, magdala kini nianang unsay modugang sa inyong kahamugaway, kaharuhay, ug katagbawan. Ato kining hunahunaon, ug dili na molingkod nga mangiyugpos, mag-usik sa panahon.”

Brigham Young, sa Mga Pagtulun-an sa mga Presidente sa Simbahan: Brigham Young, pahina 156

Kalihokan

Step 1: Kauban ang partner, basaha ang lima ka mga lakang nga inyong mahimo kada adlaw aron magamit og maayo ang inyong panahon.

➊ Paglista og mga Buluhaton	➋ Pag-ampo	➌ Paghimo og mga Prayoridad	➍ Paghimo og mga Tumong, Lihuka	➎ Pag-report
Kada buntag, paghimo og lista sa mga buluhaton. Idugang ang mga ngalan sa mga tawo nga serbisyuhan.	Pag-ampo alang sa giya. Ribyuha ang inyong lista sa mga buluhaton. Paminaw. Ipasalig nga himoon ang inyong pinakamaayo.	Sa inyong lista sa mga buluhaton, butangi og 1 ang labing importante, butangi og 2 ang sunod nga importante, ug ipadayon.	Paminaw sa Espiritu. Paghimo og mga tumong. Paningkamot. Sugdi sa labing importante nga buluhaton ug trabahoa padulong sa ubos sa lista.	Kada gabii, report ngadto sa Langitnong Amahan pinaagi sa pag-ampo. Pangutana. Paminaw. Paghinulsol. Batia ang Iyang gugma.

Step 2: Sa lahi nga piraso nga papel, ilista ang inyong buluhaton. Kinahanglang mga importante gayud kini nga mga buluhaton alang sa inyong trabaho, sa eskwela, sa simbahan, o sa pagserbisyo sa pamilya—dili kay basta inadlaw lang nga buluhaton. Pag-ampo mahitungod niini ug butangi og prayoridad ang inyong lista.

Step 3: Ugma kinahanglang mohimo kamo og mga tumong, molihok, ug moreport kon giunsa ninyo sa paggamit ang inyong panahon.

I-commit:I-commit nga himoon ang mosunod nga mga buluhaton sa semana. I-tsek ang box kon makompleto ninyo ang matag buluhaton:

• Praktisa kini nga mga lakang kada adlaw sa paggamit sa inyong panahon sa mas maalamong paagi. Report matag gabii ngadto sa Langitnong Amahan pinaagi sa inyong mga pag-ampo.

• Ipaambit ang inyong nakat-unan karon mahitungod sa maalamon nga paggamit sa panahon ngadto sa inyong pamilya o mga higala.