Kasinatian sa Pagkat-on 1

Pagpakabuhi ug Pagtudlo sa Paagi sa Manluluwas

Kinatibuk-ang Pagpasabut

Kini nga kasinatian sa pagkat-on naglangkob sa mosunod nga mga konsepto:

• Ang pagtudlo, imong dakong responsibilidad

• Si Jesukristo, mao ang Bantugan nga Magtutudlo

• Pagpakabuhi ug pagtudlo sama sa gibuhat sa Manluluwas

Mahinungdanong mga Konsepto

Welcome sa Seminaries and Institutes of Religion (S&I). Sa programa sa seminary ug institute sa tibuok kalibutan, liboan ka mga magtutudlo ug mga lider ang nagtabang sa mga kabatan-onan ug mga young adult sa Simbahan nga makakat-on ug makagamit sa doktrina ug mga baruganan sa ebanghelyo ni Jesukristo. “Mapasalamaton kami sa inyong tinguha nga moserbisyo sa Ginoo niining importante nga buluhaton.

Ang Dakong Responsibilidad sa Pagtudlo sa mga Anak sa Dios

Si Elder Jeffrey R. Holland sa Korum sa Napulog Duha ka mga Apostoles mitudlo sa mosunod mahitungod sa responsibilidad sa pagtudlo sa mga anak sa Dios:

“Mapasalamaton kami kaayo sa tanang nagtudlo. Nahigugma kami kaninyo ug mapasalamaton kaninyo labaw sa among masulti. Dako ang among pagsalig kaninyo. “Ang motudlo sa epektibo nga paagi ug mobati nga kamo nagmalampuson usa gayud ka masuknaon nga trabaho. Apan dili kini kabayran. Wala kitay madawat nga ‘ingon ka labaw ka mahinungdanon nga tawag’ [Pagtudlo—Walay Labaw ka Mahinungdanon nga Tawag (kapanguhaan nga mga materyal alang sa paglambo sa magtutudlo, 1978)]. …

“Para ang matag usa kanato ‘‘makaduol ngadto kang Kristo’ [D&P 20:59], aron mohupot sa Iyang mga kasugoan ug mosunod sa Iyang ehemplo balik ngadto sa Amahan tinuod gayud nga mao ang pinakataas ug pinakabalaan nga katuyoan sa pagpakabuhi sa tawo.’ Aron sa pagtabang sa uban nga makahimo usab niana——motudlo, moawhag, ug mogiya kanila sa mainampoong paagi sa paglakaw sa dalan sa katubsanan usab——sa pagkatinuod kana mao gayud ang ikaduhang pinakamahinungdanon nga buluhaton sa atong kinabuhi. Tingali mao kana ang hinungdan ngano nga si Presidente David O. McKay miingon sa makausa, ‘‘Walay labaw nga responsibilidad ang maanha ni bisan kinsa nga lalaki [o babaye] kay sa mahimong usa ka magtutudlo sa mga anak sa Dios’ [David O. McKay, sa Conference Report, Okt. 1916, 57]” (“A Teacher Come from God,” Ensign, Mayo 1998, 25).

Si Jesukristo, ang Bantugan nga Magtutudlo

Makadawat ka og balaanong tabang samtang magtinguha ka nga mouswag ug molambo isip magtutudlo sa mga anak sa Dios ug maningkamot nga isunod ang imong kinabuhi ug pagtulun-an nianang sa Manluluwas.

Paggahin og panahon aron motan-aw sa video nga “The Master Teacher” (3:51), nga anaa sa churchofjesuschrist.org. Dinhi niini nga video, si Presidente Boyd K. Packer (1924–2015) sa Korum sa Napulog Duha ka mga Apostoles mihulagway sa piho nga mga aspeto sa pagtudlo sa ebanghelyo.

Samtang magtan-aw ka sa video, paminawa ang mahinungdanong mga rason nganong kinahanglan gayud kang magpakabuhi ug magtudlo sama sa gibuhat sa Manluluwas. Irekord ang imong mga hunahuna ug mga impresyon diha sa study journal o sa laing dapit diin maka-refer ka niini ug makahimo sa pagpakigbahin niini sa imong inservice leader o sa grupo.

Gospel Teaching and Learning Handbook Activity

Mahitungod sa Manluluwas isip maayong modelo alang sa mga magtutudlo, si Presidente Boyd K. Packer sa Korum sa Napulog Duha ka mga Apostoles nagtudlo:

“Unsa pa ang mas maayong ehemplo ang atong makit-an? Unsa pa ang mas maayong pagtuon nga atong mapahigayon kay sa pagsusi sa atong mga mithi ug mga tumong ug mga pamaagi ug itandi kini sa kang Jesukristo? (Teach Ye Diligently, rev. ed. [1991], 22).

Ang mosunod nga kalihokan makatabang sa pagpalambo sa imong panabut kon giunsa pagtudlo ug pag-impluwensya sa Manluluwas sa uban ug giunsa Niya pagtabang kanila nga makakat-on, molambo sa espirituhanong paagi, ug makabig ngadto sa Iyang ebanghelyo.

Tun-i ang pasiuna [preface] diha sa mga pahina v–vii sa Gospel Teaching and Learning: A Handbook for Teachers and Leaders in Seminaries and Institutes of Religion (2012). I-highlight o linyahi ang mga action word nga naghulagway sa lain-laing mga paagi sa pagtudlo ug pagpangalagad sa Manluluwas.

Human nimo matun-i kini nga mga pahina diha sa Gospel Teaching and Learning, irekord ang imong mga tubag sa mosunod nga mga pangutana diha sa mga margin sa imong handbook. (Giawhag ka nga magsulat og notes diha sa mga margin sa imong handbook sa kinatibuk-an niining mga leksyon.)

• Unsa ang imong nabantayan mahitungod sa paagi sa pagpakabuhi, pagtudlo, ug pagpangulo sa Manluluwas?

• Giunsa Niya pagtabang ang uban nga makakat-on, molambo sa espirituhanong paagi, ug makabig sa Iyang ebanghelyo?

Summary ug Paggamit [Application]

Mga Baruganan nga Angayang Hinumduman

• Walay mas dako pa nga responsibilidad nga madawat ni bisan kinsa nga tawo kay sa mahimong usa ka magtutudlo sa mga anak sa Dios.

• Si Kristo mao ang Bantugan nga Magtutudlo. Kinahanglang maningkamot kita sa pagpakabuhi ug sa pagtudlo sama sa Iyang gibuhat.

• Atong itudlo kon unsa kita, nga nagpasabut nga ang atong pagkadisipulo, atong mga kinaiya, atong mga pagpamatuod, ug atong pasalig [commitment] ngadto sa ebanghelyo makaimpluwensya sa uban sama sa atong mga pulong.

“Ang gasa sa pagtudlo kinahanglan nga maangkon, ug sa higayon nga maangkon na kini, kinahanglan gayud kining atimanon aron magpabilin kini” (Boyd K. Packer, Teach Ye Diligently, 345).

“Busa, Unsa Man?”

Si Presidente Boyd K. Packer sa Korum sa Napulog Duha ka mga Apostoles nailhan nga nangutana, “Busa, unsa man?” atol sa katapusan sa mga miting uban sa Korum sa Napulog Duha aron makapadasig og panaghisgot kon sa unsang paagiha nga ang hilisgutan nianang higayuna magamit aron mausab ang kinabuhi sa mga tawo (tan-awa sa Jeffrey R. Holland, “Therefore, What?” [CES Conference on the New Testament, Ago. 8, 2000], si.churchofjesuschrist.org). Sa katapusan sa matag kasinatian sa pagkat-on, pangutan-a ang imong kaugalingon “Busa, unsa man?” ug hunahunaa kon sa unsa kahang paagiha nga personal nimong magamit ang mga hilisgutan ug mga baruganan nga gihisgutan.

Sa pagtapos niining kasinatian sa pagkat-on, isulat ang pipila ka mga butang nga imong buhaton basi sa mga baruganan nga imong nakat-unan karon.