Kasinatian sa Pagkat-on 10

Pagdesisyon kon Unsay Itudlo: Paggamit sa mga Kasulatan ug sa Manwal sa Magtutudlo

Kinatibuk-ang Pagpasabut [Overview]

Kini nga kasinatian sa pagkat-on naglangkob sa mosunod nga mga konsepto:

• Ang pasiuna sa manwal sa magtutudlo

• Pasunod ug pagpahiangay sa kurikulum

• Paggamit sa manwal sa magtutudlo ug sa mga kasulatan aron sa pag-andam og leksyon

Mahinungdanong mga Konsepto

Nalingaw si Sister Murray sa pagtudlo og klase sa Gospel Doctrine kaduha sa usa ka bulan diha sa iyang ward. Samtang naghinam-hinam siya nga bag-ong natawag nga seminary teacher, naghunahuna siya kon unsaon niya sa pag-andam og epektibo nga leksyon matag adlaw: “Ang pag-andam ug pagtudlo og leksyon matag adlaw morag usa ka dakong commitment. Unsa nga mga kapanguhaan ang available aron sa pagtabang nako?”

Pasiuna sa Manwal sa Teacher

Ang pag-andam og leksyon matag adlaw morag usa ka bug-at ug makahurot sa oras nga buluhaton.

Tan-awa ang video nga “Introduction to the Teacher Manual” (4:01), nga available sa churchofjesuschrist.org. Dinhi niini nga video, makakat-on ka unsaon paggamit sa mga kasulatan ug sa manwal sa magtutudlo sa pag-andam og mga leksyon sa epektibo ug sa maayo nga paagi.

Pahinumdom: Kon wala pa ka makadawat og manwal sa magtutudlo, kontaka ang imong supervisor. Makit-an usab nimo ang tanang manwal diha sa churchofjesuschrist.org/manual/institute alang sa mga manwal sa institute ug churchofjesuschrist.org/manual/seminary alang sa mga manwal sa seminary.

Kalihokan diha sa Manwal sa Magtutudlo

Pahinumdom: Ang matag leksyon diha sa mga manwal sa seminary ug institute teacher giorganisar aron makatabang nimo nga makaandam sa epektibo nga paagi. Dili tanang manwal sa magtutudlo giorganisar o gilabelan sa samang paagi, pero ang susama nga materyal available sa tanang manwal sa magtutudlo. Ang mga kalihokan niini nga kasinatian sa pagkat-on gibasi diha sa labing bag-o nga mga manwal sa seminary.

Ablihi ang imong manwal sa magtutudlo sa bisan unsa nga leksyon o gamita ang handout nga giulohan og “Sample Lesson—3 Nephi 11:1–17” nga gihatag diha sa apendiks niini nga manwal.

Basaha ang leksyon ug pangitaa ang mosunod nga mga elemento: Kon maila na nimo ang matag elemento, tseki kini diha sa mosunod nga lista:

• Ulohan sa leksyon

  Ang ulohan sa leksyon nagpakita sa mga kapitulo sa kasulatan nga nalangkob diha sa leksyon.

• Pasiuna sa scripture block

  Ang pasiuna sa scripture block naghatag og tibuok nga pagpasabut sa konteksto ug sa sulod sa scripture block.

• Mga verse grouping ug mga contextual summary statement

  Ang mga verse grouping namahayag og piho nga gidaghanon sa mga bersikulo nga nakatutok sa partikular nga hilisgutan o aksyon. Ang mga contextual summary statement nag-summarize sa mga panghitabo o mga pagtulun-an sulod sa usa ka verse grouping.

• Sulod sa leksyon

• Mga pamahayag sa doktrina o baruganan

  Ang mga pamahayag sa doktrina o baruganan mubo nga mga pamahayag sa mga kamatuoran sa kasulatan.

• Komentaryo ug background nga impormasyon ug dugang nga mga ideya sa pagtudlo (mahimong wala kini sa matag leksyon)

  Ang komentaryo ug background nga impormasyon naghatag og dugang nga mga kinutlo ug mga pagpasabut sa makasaysayanong konteksto o sa mga tudling sa kasulatan. Ang dugang nga mga ideya sa pagtudlo naghatag og mga sugyot alang sa pagtudlo sa doktrina ug mga baruganan nga mahimong wala maila o mahatagi og gibug-aton diha sa sulod sa leksyon. Mahimo usab kining maghatag og mga sugyot sa paggamit og visual media, sama sa mga DVD presentation o mga video nga makita sa churchofjesuschrist.org.

Mahinungdanong mga Butang sa Pagtudlo ug Pagkat-on sa Ebanghelyo [Fundamentals of Gospel Teaching and Learning] sa Manwal sa Magtutudlo

Ang mga manwal sa seminary ug institute teacher gitumong aron matabangan ka nga malakip ang Mahinungdanong mga Butang sa Pagtudlo ug Pagkat-on sa Ebanghelyo samtang mangandam ug magtudlo ka sa matag leksyon.

Tan-awa ang video nga “The Fundamentals in the Curriculum” (2:15), nga available sa churchofjesuschrist.org. Samtang magtan-aw ka, pangitaa kon sa unsang paagi nga ang mga manwal sa seminary ug institute teacher makatabang sa mga magtutudlo nga malakip ang Mahinungdanong mga Butang sa Pagtudlo ug Pagkat-on sa Ebanghelyo sa matag leksyon.

Pagsunod ug Pagpahiangay sa Kurikulum

Si Elder Dallin H. Oaks sa Korum sa Napulog Duha ka mga Apostoles nagtudlo sa mosunod kon unsaon paggamit sa mga magtutudlo ang kurikulum nga mga materyal:

“Mosunod una kita, dayon atong ipahiangay. Kon tinud-anay kitang nakatutok sa gitakda nga leksyon nga atong ihatag, nan makasunod kita sa Espiritu nga mopahiangay niini” (“A Panel Discussion with Elder Dallin H. Oaks” [satellite broadcast sa Seminaries and Institutes of Religion, Ago. 7, 2012], si.churchofjesuschrist.org).

Isip mga seminary ug institute teacher, atong sundon ang kurikulum diha sa manwal sa magtutudlo ug ipahiangay kini aron matubag ang mga panginahanglan sa atong mga estudyante.

Mosunod	Mopahiangay
Ang pagsunod sa kurikulum nagpasabut sa pagbasa ug pagtutok sa tanan nimong pagtagad diha sa mga kasulatan ug sa gitakda nga leksyon diha sa imong manwal sa magtutudlo. Ang kurikulum makatabang nimo nga masabtan ang mga kasulatan, ang tinguha sa dinasig nga mga tagsulat, ang makapakabig nga mga baruganan, ug sukaranang doktrina. Saligi ang sulod [content] ug gamita kini diha sa inyong classroom.	Ang pagpahiangay sa kurikulum nagpasabut nga i-customize ang leksyon sumala sa paggiya sa Espiritu aron matubag ang mga panginahanglan sa indibidwal nga mga estudyante ug matabangan sila nga molampus.

Paggamit sa mga Kasulatan ug sa Manwal sa Magtutudlo sa Pag-andam og Leksyon

Samtang mogamit ka sa imong manwal sa matutudlo sa epektibong paagi, makaandam ka og makapalig-on nga mga leksyon nga wala magkinahanglan og daghang oras sa pagpangandam.

Tan-awa ang video nga “Curriculum Overview” (4:45), nga available sa churchofjesuschrist.org. Kini nga video nag-summarize kon unsaon nimo paggamit ang imong mga kasulatan ug ang imong manwal sa magtutudlo aron matabangan ka nga makaandam og epektibo nga mga leksyon alang sa imong mga estudyante.

Tan-awa ang video nga “Using the Scriptures and the Teacher Manual” (5:11), nga available sa churchofjesuschrist.org. Dinhi niini nga video, gipakigbahin ni Sister Wilson ang importanteng tambag bahin sa paggamit sa mga kasulatan ug sa kurikulum diha sa pagpangandam og leksyon. Samtang magtan-aw ka, pangitaa ang importante nga mga ideya nga angayang hinumduman samtang mangandam ka sa imong mga leksyon.

Kalihokan sa Pagpangandam og Leksyon

Karon imo nang higayon sa paggamit sa imong mga kasulatan ug sa imong manwal sa magtutudlo aron makapraktis sa pag-andam og leksyon. Ablihi ang imong manwal sa magtutudlo sa bisan unsa nga leksyon o gamita ang handout nga giulohan og “Sample Lesson—3 Nephi 11:1–17,” nga gihatag diha sa apendiks niini nga manwal.

Sa pagkompleto nimo sa mosunod nga mga lakang, tseki kini aron makita nga imong nakompleto kanang bahina sa imong pagpangandam.

• Basaha ang ulohan sa leksyon ug paklia ngadto sa scripture block diha sa imong mga kasulatan.

• Basaha ang pasiuna sa scripture block.

• Itutok ang tanan nimong pagtagad diha sa scripture block pinaagi sa pagbasa, pagtuon, pagpamalandong, ug pag-ampo alang sa inspirasyon.

• Tun-i ang sulod sa leksyon, nga maghatag gayud og pagtagad sa mga pamahayag sa doktrina ug baruganan.

• Ikonsiderar ang mga panginahanglan sa imong mga estudyante ug desisyuni kon unsa nga mga baruganan ang mas gikinahanglan nila.

• Itino kon unsa nga gibug-aton ang imong ihatag sa nagkadaiyang mga baruganan, basi sa mga panginahanglan sa imong mga estudyante.

• Basaha ang bisan unsa nga dugang nga materyal nga gihatag diha sa leksyon ug ikonsiderar kon unsaon nimo paggamit niini nga materyal diha sa imong leksyon.

Pangandam sa paghisgot niini nga kasinatian ngadto sa imong inservice leader o sa grupo.

Summary ug Paggamit

Mga Baruganan nga Angayang Hinumduman

Ang mga kasulatan mao ang imong tinubdan alang sa materyal sa pagtudlo, ug ang manwal sa magtutudlo mao ang imong kapanguhaan alang sa pag-andam sa imong leksyon.

• Ang kurikulum giorganisar sa paagi nga matabangan ka sa pag-andam og mga leksyon sa epektibo ug sa maayo nga paagi.

• Masunod ug mapahiangay nimo ang kurikulum aron matubag ang mga panginahanglan sa mga estudyante.

• Samtang ipahiangay nimo ang kurikulum, ikonsiderar og maayo ang mga panginahanglan sa imong mga estudyante ug ang mga pag-aghat sa Espiritu Santo.

• Matubag nimo ang mga panginahanglan sa mga estudyante samtang mangandam ka sa mga leksyon gamit ang kurikulum sa epektibong paagi.

“Kadtong gitawag sa propeta aron sa pagsiguro sa kaeksakto sa doktrina nga gitudlo diha sa Simbahan moribyu sa matag pulong, matag hulagway, matag diagram diha sa kurikulum nga inyong madawat. Atong mabuksan ang gahum sa kurikulum pinaagi lamang sa paglihok basi sa atong pagtuo nga kini dinasig sa Dios. …

“Ang pagpabilin diha sa sulod [content] sa kurikulum ingon man usab sa sequence niini mobukas sa talagsaon natong mga gasa sa pagtudlo, dili mopugong niini” (Henry B. Eyring, “The Lord Will Multiply the Harvest” [usa ka gabii kauban si Elder Henry B. Eyring, Peb. 6, 1998], 4, 5, si.churchofjesuschrist.org).

“Busa, Unsa Man?”

Sa pagtapos niining kasinatian sa pagkat-on, isulat ang pipila ka mga butang nga imong buhaton basi sa mga baruganan nga imong nakat-unan karon.