Aafiaga e Aoao ai 14

Faatomuaga i le Atamai i Aoaoga Faavae

Vaaiga Aoao

O lenei aafiaga e aoao ai e aofia ai manatu nei:

• Malamalama i faamoemoega ma taunuuga manaomia o le Atamai i Aoaoga Faavae

• Aoaoina ma le faaaogaina o mataupu faavae paia mo le mauaina o le malamalama faaleagaga i le Atamai i Aoaoga Faavae

• Malamalama lelei i aoaoga faavae o le talalelei a Iesu Keriso

• Faaaogaina o le Atamai i Aoaoga Faavae i totonu o le potuaoga

Faamatalaga: O lenei aafiaga e aoao ai ua tuuina atu ai se vaaiga aoao o mataupu faavae ma faataitaiga o le Atamai i Aoaoga Faavae. Mo se iloiloga loloto, faamolemole tagai i le Pepa Autu o le Atamai i Aoaoga Faavae, ma le pepa e tufa atu o le “Vaaiga Aoao o le Atamai i Aoaoga Faavae”, ma le doctrinalmastery.lds.org.

Manatu Autu

Aisea e Faaaoga ai le Atamai i Aoaoga Faavae?

I le avea ai ma faiaoga i le Seminare ma Inisitituti o Mataupu Faalelotu, tatou te taumafai ai e fesoasoani i tagata aoga e atinae o latou faavae i luga o Iesu Keriso e ala i le fesoasoani ia latou malamalama, talitonu, ma ola e tusa ai ma Ana aoaoga faavae (tagai Helamana 5:12). Ae peitai, o aso nei ua fetaiai ai faiaoga e pei foi o tagata aoga ma luitau maoae i le atinaeina o le faatuatua ia Iesu Keriso. Mafaufau i nisi o faataitaiga o nei luitau i lou olaga ma i olaga o au tagata aoga. Na faapupula mai e Elder M. Russell Ballard o le Korama a Aposetolo e Toasefululua nisi o tulaga luitauina e fetaiai ma tagata aoga ma faiaoga:

“Ua uma na aso sa puipuia ai tagata aoga mai tagata sa osofaia le Ekalesia. …

“… E le o o tatou tagata aooga uma e i ai le faatuatua e manaomia e fetaiai ai ma luitau o le lumanai. …

“[Ua tatou ola i vaitaimi] ua vave ai ona maua e tagata aoga le toetoe o mea uma e uiga i le Ekalesia mai i soo se manatu e mafai ona i ai. I le aso, o mea ua latou vaaia i a latou masini feaveai atonu e luitauina ai le faatuatua pei foi ona faamalosia ai le faatuatua. …

“O le malamalama ai i nei luitau, ua faamaonia talu ai nei e le Faatonu o Aoga a le Ekalesia se fuafuaga taulamua i le seminare ua ta’ua o le Atamai i Aoaoga Faavae. … O lenei taulamua e taulai i le fausiaina ma le faamalosia o faatuatua o a tatou tagata aoga ia Iesu Keriso ma faamalolosia i latou i le tomai faateleina e ola ma faaaoga le talalelei i o latou olaga. …

“O lenei taulamua ua musuia ma fetaui tonu lava le taimi [ua oo mai ai]. O le a i ai sona faatosinaga matagofie i o tatou tagata talavou” (M. Russell Ballard, “O Avanoa ma Tiutetauave a Faiaoga o le OAE i le Seneturi 21” [saunoaga i faiaoga faalelotu a le Ofisa o Aoga a le Ekalesia, Fep. 26, 2016]).

O le a le Atamai i Aoaoga Faavae?

Ina ia fesoasoani ia e malamalama lelei i le fuafuaga taulamua o le Atamai i Aoaoga Faavae, maimoa i le vitio “What Is Doctrinal Mastery?” (3:53), o loo maua i le LDS.org. Ao e maimoa, manatua fesili nei:

• Aisea ua musuia ai ma fetaui tonu le taimi e oo mai ai le Atamai i Aoaoga Faavae mo o tatou tagata talavou i aso nei?

• O a taunuuga manaomia o le Atamai i Aoaoga Faavae?

O Taunuuga Manaomia o le Atamai i Aoaoga Faavae

E lua ni taunuuga o loo taulai atu i ai le Atamai i Aoaoga Faavae:

• Aoaoina ma le faaaogaina o mataupu faavae paia mo le mauaina o le malamalama faaleagaga

• Malamalama lelei i le aoaoga faavae o le talalelei a Iesu Keriso ma fuaitau o mau lea e aoaoina ai lena aoaoga faavae

O nei taunuuga e lua e o faatasi lava ma e mafai ona fesoasoani i tagata aoga e atinae o latou faavae i luga o Iesu Keriso ma Ana aoaoga faavae. A o ausia e tagata aoga nei taunuuga, e faapea ona faalolotoina ai lo latou liua ma mafai ai ona fesoasoani atu i isi ia faia foi faapea.

I lenei aafiaga faaleaoaoga, o le a tatou vailia auiliili atili ai ia taunuuga taitasi o le Atamai i Aoaoga Faavae, vaavaai pe o faapefea ona faaaoga i totonu o se faatulagaga o se potuaoga, ma malamalama lelei ai i auala e mafai ona faamanuiaina atoatoa ai tagata aoga e Iesu Keriso ma Ana aoaoga faavae.

Mauaina o le Malamalama Faaleagaga

O le taunuuga muamua ia fesoasoani i au tagata aoga e aoao ma faaaoga mataupu faavae paia mo le mauaina o le malamalama faaleagaga. Ua silafia e le Atua mea uma, ma o le punavai o upumoni uma. Ona e alofa o Ia ia i tatou, ua Ia finagalo ai e fesoasoani ia i tatou ia maua upumoni a o tatou taumafai e iloa ma malamalama i Ana aoaoga faavae a o tatou sailia tali i a tatou fesili ma atugaluga.

A o e galue i le vaega lenei, mafaufau i nisi o fesili ma atugaluga atonu o loo i ai a au tagata aoga, e pei o le: “Aisea ua tele naua ai puapuaga i le lalolagi?” “Pe sa faia e Iosefa Samita ni autaunonofo?” ma le “Pe alofa ea le Atua ia te a’u?”

O mataupu faavae nei e tolu o le mauaina o le malamalama faaleagaga e mafai ona taiala ai faiaoga faapea tagata aoga a o latou saili e aoao ma malamalama i upumoni e faavavau, foia ai fesili ma atugaluga, ma fai ai faaiuga i o latou olaga i aso taitasi:

• Faatino i le faatuatua

• Iloilo manatu ma fesili ma se vaaiga e faavavau

• Saili le malamalama atili e ala i punavai paia ua atofaina

O nei mataupu faavae taitasi o loo faamalamalamaina ma faaalia atili i vaega nei.

Faatino i le Faatuatua

A tatou faatino i le faatuatua, tatou te talitonu i le Atua ma liliu atu muamua ia te Ia e ala i le tatalo faamaoni, suesue, ma le usiusitai. Tatou te faalagolago i mea ua uma ona tatou iloa e moni ma faaauau pea ona saili i tali. Tatou te faamoemoe o le a taliina a tatou fesili ma atugaluga ma foia i le taimi a le Alii.

Maimoa i le vitio “Act in Faith: The Stonemason” (4:58), e maua i le LDS.org. Ao e maimoa i lenei vitio, vaavaai mo auala e mafai ona foia ai a tatou fesili ma atugaluga i le aluga o le taimi e ala i le faaauau pea ona faatino i le faatuatua.

Filifili Manatu ma Fesili ma se Vaaiga e Faavavau

E ala i le iloiloina o fesili, atugaluga, faafitauli faaleagafesootai ma mea na tutupu anamua i le anotusi o le ata o le faaolataga ma aoaoga a le Faaola, ua tatou valaaulia ai le Agaga Paia e fesoasoani ia tatou vaai i mea e pei o le ala e silasila i ai le Alii. Tatou te taulai atu i vaega taua o le talalelei ma ia le faalavelaveina e faamatalaga e leai se taua.

Maimoa i le vitio “Examining Questions with an Eternal Perspective” (2:56), o loo maua i le LDS.org. A o e maimoa i le vitio lenei, vaavaai mo auala e mafai ona tatou toe faaupuina ai fesili ma atugaluga (po o le vaai i ai i se isi ala) ma vaai i manatu e faavae i le tulaga faatonuina o le upumoni a le Alii nai lo le taliaina o manatu ma masalosaloga a le lalolagi. Ao e maimoa, manatua le fesili lenei:

• O a ni auala e mafai ai e le malamalama i le ata o le faaolataga a le Tama Faalelagi ma Ana aoaoga faavae, ona fesoasoani i au tagata aoga e vaai lelei atu i a latou fesili ma atugaluga ma se vaaiga e faavavau?

Tusi au tali i nei fesili i se api o talaaga e suesue ai po o se isi nofoaga e mafai ona e toe tagai i ai ma faasoa atu i lou taitai mo aoaoga faafaiaoga po o le vaega.

Saili le Malamalama Atili e ala i Punavai Paia ua Atofaina

Pe a tatou sailia le malamalama atili e ala i punavai paia ua atofaina, tatou te maua le malamalama faaleagaga e ala i le Agaga Paia, tusitusiga paia, perofeta, matua, taitai o le Ekalesia, ma isi punavai faatuatuaina. A o tatou aoao mai nei punavai, ona tatou iloa lea ona maitau ma iloatino mea moni mai mea sese.

Mafaufau i punavai paia ua atofaina e mafai ona outou faaaogaina ma au tagata aoga e saili ai le malamalama atili, e pei o tusitusiga paia ma savali mai le konafesi aoao. Ia mafaufau foi i isi punavai faatuatuaina e mafai ona e faaaogaina, e pei o punavai o loo i le itulau “Gospel Topics, Essays, and Other Resources” i le LDS.org.

Gaoioiga o le Pepa Autu o le Atamai i Aoaoga Faavae

Suesue i le vaega “Mauaina o le Malamalama Faaleagaga” i le Pepa Autu o le Atamai i Aoaoga Faavae e toe iloilo ma faamasani atili ai i mataupu faavae o le mauaina o le malamalama faaleagaga. Toe iloilo mataupu faavae e tolu o le mauaina o le malamalama faaleagaga o loo faataatia atu i le vaega lenei, ma vase lalo o isi vaega taua o le mauaina o le malamalama faaleagaga.

Malamalama Lelei i le Aoaoga Faavae

O le taunuuga lona lua o le Atamai i Aoaoga Faavae, o le atamai lea i aoaoga faavae o le talalelei a Iesu Keriso. O le atamai i aoaoga faavae, e mafai ai e tagata aoga ona popoto i le faaaogaina o mataupu faavae o le mauaina o le malamalama faaleagaga i a latou sailiga mo le upumoni.

O elemene taua nei e tolu o le atamai i aoaoga faavae:

• Malamalama i autu faaleaoaoga faavae ma faamatalaga taua o le aoaoga faavae

• Iloa fuaitau o le atamai faaleaoaoga faavae

• Faamalamalama ma faaaoga aoaoga faavae

Malamalama i Autu Faaleaoaoga Faavae ma Faamatalaga Taua o Aoaoga Faavae

E faaopoopo atu i mataupu faavae o le mauaina o le malamalama faaleagaga, o le a suesue foi e tagata aoga ni autu faaleaoaoga faavae se iva. O autu faaleaoaoga faavae taitasi ua aofia ai ni fuaitau o le aoaoga faavae ia e taua ona malamalama, talitonu, ma faaaoga e tagata aoga. O nisi o nei faamatalaga o aoaoga faavae mai le Pepa Autu o le Atamai i Aoaoga Faavae ua faaigoaina o faamatalaga taua o aoaoga faavae. O nei faamatalaga taua o le aoaoga faavae e fesootai ma fuaitau o le atamai i aoaoga faavae, ia e fesoasoani e aoao atu ai itu patino o faamatalaga o aoaoga faavae.

Iloa Fuaitau o le Atamai i Aoaoga Faavae

E 25 fuaitau o le atamai i aoaoga faavae mo kosi aoaoina taitasi (o le aofaiga e 100 fuaitau). O nei fuaitau o mau e fesoasoani e aoao atu ai vaega o faamatalaga taua e fesootai ma autu taitasi faaleaoaoga faavae. Mo se faataitaiga, o le faamatalaga taua lenei o le aoaoga faavae e fesootai ma le fuaitau o le aoaoga faavae mai le autu faaleaoaoga faavae “O le Togiola a Iesu Keriso”: “O le taulaga a [Iesu Keriso] ua manuia ai i tatou taitoatasi, ma faaalia ai le taua e le gata i fanau taitoatasi a le Tama Faalelagi (tagai MFF 18:10–11)” (Pepa Autu o le Atamai i Aoaoga Faavae [2016], 6). O le fesoasoani i tagata aoga ia manatua nei fuaitau, sue ia fuaitau, ma ia malamalama pe faapefea ona aoao mai e nei fuaitau le aoaoga faavae a le Faaola, o se vaega taua lea o lau galuega o se faiaoga.

Faamalamalama ma Faaaoga Aoaoga Faavae

O se vaega taua o le atamai i aoaoga faavae o le talalelei a Iesu Keriso, o le mafai lea ona faamalamalama atili atu ia faamatalaga taua taitasi o aoaoga faavae ma ia malamalama pe faapefea ona fesoasoani fuaitau faaleaoaoga faavae e aoao atu na faamatalaga taua. A malamalama tagata aoga i le aoaoga faavae ma mafai ona sue ma manatua fuaitau o aoaoga faavae ma o latou faamatalaga taua o aoaoga faavae e fesootai i ai, e mafai ona lelei atu ona latou faaaogaina le aoaoga faavae ma faamalamalama atu i isi. E pei ona aoao mai Peresitene Boyd K. Packer (1924–2015) o le Korama a Aposetolo e Toasefululua, “O le aoaoga faavae moni, pe a malamalama i ai, e na te suia uiga ma amioga” (“Little Children,” Ensign, Nov. 1986, 17).

Gaoioiga o le Pepa Autu o le Atamai i Aoaoga Faavae

Ia tagai vave i autu e iva o aoaoga faavae i le Pepa Autu o le Atamai i Aoaoga Faavae e vaai ai pe o faapefea ona faatulagaina i latou. Suesue i le parakalafa muamua i lalo o le autu faaleaoaoga faavae 3, “O Le Togiola a Iesu Keriso,” ma vaavaai pe o faapefea ona tuufaatasia fuaitau o le atamai i aoaoga faavae i totonu o autu faaleaoaoga faavae ma fesoasoani e aoao ai faamatalaga taua o le aoaoga faavae o loo muamua tonu atu ia i latou. Mafaufau pe mafai faapefea ona fesoasoani lenei aoaoga faavae i tagata aoga e atinae ai o latou faavae i luga o Iesu Keriso ma amata ai ona tali a latou lava fesili ma atugaluga, e pei o le “Pe e alofa le Atua ia te au?”

Atamai i Aoaoga Faavae i totonu o le Potuaoga

O lea la ua e malamalama i taunuuga o Aoaoga Faavae ma le auala e mafai ona latou fesoasoani ai i tagata aoga e atinae o latou faavae i luga o Iesu Keriso, o le a tatou suesueina pe o le a faapefea ona faaaoga ma aoaoina i totonu o le potuaoga.

E fesoasoani mataupu aoaoina o le Atamai i Aoaoga Faavae i faiaoga ma tagata aoga e aoao ma faaaoga mataupu faavae e fesootai i le mauaina o le malamalama faaleagaga ma autu faaleaoaoga faavae e iva. O vaega taua o le mataupu aoaoina e aofia ai le:

• Malamalama i le aoaoga faavae: O se faasologa o gaoioiga e aoao ai po o vaega e fesoasoani i tagata aoga e atinae ai se malamalamaaga loloto i autu taitasi faaleaoaoga faavae, o faamatalaga taua o le aoaoga faavae e fesootai i ai, ma fuaitau o le atamai i aoaoga faavae e faatatau i ai.

• Faatinoga faataitai: O faatinoga e i ai mataupu suesue, faatinoga o matafaioi, tulaga o ni vaaiga, ma fesili e fesoasoani i tagata aoga e faaaoga ia mataupu faavae o le mauaina o le malamalama faaleagaga ma le aoaoga faavae i tulaga i onaponei ma fesili talafeagai.

• Iloiloina o le Atamai i Aoaoga Faavae: O gaoioiga e fesoasoani ai i tagata aoga e sue, manatua, ma malamalama lelei i fuaitau o le atamai i aoaoga faavae ma faamatalaga autu o le aoaoga faavae.

Anomea o le Gaoioiga mo le Faiaoga o le Atamai i Aoaoga Faavae

Ina ia vaai i le foliga ai o le Atamai i Aoaoga Faavae i totonu o le potuaoga, susue au anomea faafaiaoga o le Atamai i Aoaoga Faavae i le lesona ua faaautuina “O Le Togiola a Iesu Keriso.” I le lesona, sailiili i faatinoga nei i le potuaoga: (1) malamalama i le aoaoga faavae, (2) faatinoga faataitai, ma le (3) Iloiloina o le Atamai i Aoaoga Faavae. Ia matau, i faatinoga o le malamalama i le aoaoga faavae, o faamatalaga taua o le aoaoga faavae o loo faamamafa ma e fesootai ma fuaitau o le atamai i aoaoga faavae e fesoasoani i tagata aoga ia malamalama lelei ai i le aoaoga faavae. Ia maitau i faatinoga faataitai, e valaaulia ai tagata aoga e faamatala ma faaaoga aoaoga faavae i fesili ma atugaluga mai o latou lava olaga ma olaga o isi. A o auai tagata aoga i faatinoga faataitai, e taua le faaaoga o mataupu faavae o le mauaina o le malamalama faaleagaga. Ma le mea mulimuli, ia maitau, o le iloiloina o le Atamai i Aoaoga Faavae ua fuafuaina e fesoasoani i tagata aoga e sue, manatua, ma malamalama lelei i fuaitau taua o le atamai i aoaoga faavae ma fuaitau o le atamai i aoaoga faavae e fesootai i ai.

Gaoioiga o Anomea mo le Faiaoga o le Atamai i Aoaoga Faavae

Ina ia vaai i le foliga ai o le Atamai i Aoaoga Faavae i totonu o le potuaoga, susue au anomea faafaiaoga o le Atamai i Aoaoga Faavae i le lesona ua faaautuina “O Le Togiola a Iesu Keriso.” Galulue i se faatinoga faataitai. Vaai faalemafaufau po o a ni mea atonu e faia ma lagonaina e au tagata aoga i le taimi o le vasega, ma po o a ni auala o le a latou faaaogaina ai mea ua latou aoaoina e uiga i mataupu faavae o le mauaina o le malamalama faaleagaga ma elemene o le malamalama lelei i le aoaoga faavae. Mafaufau i fesili nei:

• E mafai faapefea ona fesoasoani le Atamai i Aoaoga Faavae i tagata aoga e faamalosia ai o latou faatuatua ia Iesu Keriso ma malamalamaaga i Ana aoaoga faavae?

• E mafai faapefea ona faalauteleina e le Atamai i Aoaoga Faavae ia fesili ma atugaluga a tagata aoga (i le tulaga lenei, “Pe e alofa le Atua ia te au?”)?

Tusi au tali i nei fesili i se api o talaaga e suesue ai po o se isi nofoaga e mafai ona e toe tagai i ai ma faasoa atu i lou taitai mo aoaoga faafaiaoga po o le vaega.

O le a faamanuiaina ou tagata aoga a o latou faaaofia ai mataupu faavae ma faiga masani o le Atamai i Aoaoga Faavae i o latou olaga atoa.

Maimoa i le vitio “Mauaina o le Malamalama Faaleagaga: O le Tala a Madison” (8:36), e maua i le LDS.org. I le vitio lenei, o loo faaaoga ai e se tamaitai talavou e igoa ia Madison ia mataupu faavae o le mauaina o le malamalama faaleagaga ia maua ai tali i ana fesili, ma ia aoao atu ma fesoasoani i isi ia iloa le upumoni. Ao e maimoa, manatua fesili nei:

• E mafai faapefea ona fesoasoani le Atamai i Aoaoga Faavae i au tagata aoga e fausia ai o latou faavae i luga o Iesu Keriso ma Ana aoaoga faavae?

• E mafai faapefea e mataupu faavae o le mauaina o le malamalama faaleagaga ona fesoasoani ia te oe e te taitaia ai se tagata aoga ia aoao i le upumoni ma iloa tali i ana fesili?

• E mafai faapefea e mataupu faavae o le Atamai i Aoaoga Faavae ona fesoasoani i tagata aoga i le fesoasoani atu i isi ia maua le malamalama faaleagaga?

Mea Faaopoopo e Mafaufau i ai o le Atamai i Aoaoga Faavae

O mea nei e mafaufau i ai, o le a fesoasoani ia sili ai lou faaaogaina o le Atamai i Aoaoga Faavae i totonu o lou potuaoga. Saili le fesoasoani a le Alii ma le taitaiga a lou taitai faamaopoopo i le lotoifale e iloa ai po o le a le auala sili ona lelei e faaaoga ai le Atamai i Aoaoga Faavae i lou tofiga ma mo au tagata aoga.

• Faaaoga le pepa e tufa atu “Vaaiga Aoao o le Atamai i Aoaoga Faavae” o loo tuuina atu i le faaiuga o le tusi lesona lenei e toe iloilo ma manatua ai vaega taitasi o le Atamai i Aoaoga Faavae ma auala e lagolago ai e vaega taitasi ia isi vaega.

• O le aoaoina atu o le Atamai i Aoaoga Faavae ma le faasologa o mau, e eseese ma tulaga ese, ma o ni elemene taua uma ia i le aafiaga a le tagata aoga i le seminare. Ina ia mafai ona manuia le aoaoina atu o ia vaega e lua, o le a manaomia ona e fuafuaina ma le faaeteete au lesona e faaaoga ai le taiala fautuaina o le saoasaoa, ma faapaleni ma manaoga i lou lotoifale.

• Ae peitai, o manatu ma mataupu faavae o le Atamai i Aoaoga Faavae, e mafai lava ona faaaogaina i le taimi o lesona faasolosolo po o isi faatulagaga i le tausaga atoa pe a tulai mai ni fesili po o atugaluga i totonu o le vasega. O le faamamafaina o fuaitau o le atamai i aoaoga faavae pe a e tau i ai i le faasologa o lou suesueina o tusitusiga paia, o le a fesoasoani i tagata aoga e maua ai se malamalama sili atu o le anotusi ma anomea o fuaitau taitasi, ma faapea foi ona faalautele ai le taua o upumoni e aoao mai i fuaitau taitasi.

• O le Atamai i Aoaoga Faavae ua fausia i luga ma suia ai le polokalama o Mau Tauloto. O anomea o mau tauloto i lomiga sa i ai muamua e tatau ona suia i gaoioiga o le atamai i aoaoga faavae ma fuaitau o mau.

• Mo ni malamalamaaga atili ma le taitaiga, asiasi i le doctrinalmastery.lds.org.

Aotelega ma le Faaaogaina

O Mataupu Faavae ia Manatua

• O le Atamai i Aoaoga Faavae o se taumafaiga taulamua musuia e manuia ai o tatou tagata aoga a o latou agai i luma ma fetaiai ma luitau faigata.

• O le Atamai i Aoaoga Faavae e taulai atu i taunuuga e lua: (1) aoaoina ma le faaaogaina o mataupu faavae paia mo le mauaina o le malamalama faaleagaga ma le (2) malamalama lelei i aoaoga faavae o le talalelei a Iesu Keriso ma fuaitau o mau lea e aoaoina ai lena aoaoga faavae.

• O le fesoasoani i tagata aoga ia ausia taunuuga o le Atamai i Aoaoga Faavae, o le a fesoasoani latou te atinae ai o latou faavae i luga o Iesu Keriso, a o faapea ona latou malamalama, talitonu, ma ola e tusa ai ma Ana aoaoga faavae.

“O le Atamai i Aoaoga Faavae o se polokalama i le seminare ua i ai ni ona faamoemoega se tolu: muamua, ia fesoasoani i o tatou tagata aoga e aoao i auala e maua ai le malamalama faaleagaga; lona lua, ia fesoasoani i tagata aoga ia iloa ma malamalama i le aoaoga faavae a le Faaola—o lona uiga, ia iloa le aoaoga faavae moni i o latou mafaufau ma ia malamalama i le aoaoga faavae moni i o latou loto, e manao ia gotoifo i o latou loto; ma lona tolu, ia fesoasoani i tagata aoga ia aoao pe faapefea ona faaaoga le aoaoga faavae i o latou olaga, ia ola ai i latou lava ma ia faaaoga e tali ai ni fesili e ono i ai a o latou uo pe ia aoao ma fesoasoani ai i isi ia iloa le upumoni” (Kim B. Clark, “Doctrinal Mastery and Deep Learning” [saunoaga i faiaoga o mataupu faalelotu a le Ofisa o Aoga a le Ekalesia, Fep. 17, 2017]).

Ona ā Lea?

Ina ia faaiuina lenei aafiaga e aoao ai, tusi i lalo nisi o mea o le a e faia e faalagolago i mataupu faavae na e aoaoina i le aso.