Aafiaga e Aoao ai 8: Malamalama, Lagonaina, ma le Faaaogaina o Aoaoga Faavae ma Mataupu Faavae
Aafiaga e Aoao ai 8
Malamalama, Lagonaina, ma le Faaaogaina o Aoaoga Faavae ma Mataupu Faavae
Vaaiga Aoao
O lenei aafiaga e aoao ai e aofia ai vaega nei:
Mauaina o le talalelei i o tatou loto
Malamalama i Aoaoga Faavae ma Mataupu Faavae
Lagonaina le moni ma le taua o aoaoga faavae ma mataupu faavae
Faaaogaina o aoaoga faavae ma mataupu faavae
Manatu Autu
O le mamanu e aoao ai ua saunia faavae na e fesoasoani e faatumauina le talalelei i o tatou mafaufau ma loto. I lenei aafiaga e aoao ai, o le a tatou talanoaina le malamalama, lagonaina le moni ma le taua o, ma faaaogaina aoaoga faavae ma mataupu faavae.
O le faamoemoega o lenei aafiaga e aoao ai o le saunia o se folasaga puupuu i vaega o le mamanu e aoao ai. Ao e auauna atu o se faiaoga o le seminare po o le inisitituti, o le a e maua le tele o avanoa e aoao ai e uiga i [tomai] ma faataitai tomai nei.
Malamalama, Lagonaina le Moni ma le Taua o, ma Faaaoga Aoaoga Faavae ma Mataupu Faavae
O le faataoto o le maa taua o se tala faatusa mo le suesueina o tusitusiga paia. O elemene nei e tolu e fesoasoani ia i tatou e malamalama ai i mea e mafai ona tatou faia i la tatou suesuega pe a uma ona tatou faailoaina upumoni taua o le talalelei.
Malamalama i aoaoga faavae ma mataupu faavae
Na suesue e le tamaitai talavou maa taua taitasi na ia mauaina, ma iloilo ma le faaeteete lona siepi ma foliga.
Ao tatou mauaina maa taua o le upumoni i le tulaga o aoaoga faavae ma mataupu faavae, tatou te suesueina ma le faaeteete i latou taitasi ina ia malamalama atili i lona uiga ma le taua.
Lagona le moni ma le taua o aoaoga faavae ma mataupu faavae
Na lagona e le tamaitai talavou le loto faafetai mo maa taua taitasi ua tupu ae i lona loto.
Ao tatou maua se malamalama sili atu o upumoni tatou te mauaina, tatou te lagonaina lo latou taua, talafeagai, ma le manaomia vave.
Faaaoga Aoaoga Faavae ma Mataupu Faavae
Na valaaulia e le tama o le tamaitai talavou o ia e mafaufau i mea e mafai ona ia faia i maa taua na ia mauaina.
O le mauaina o se molimau o ma faafetaia se aoaoga faavae po o se mataupu faavae, e tatau ona tatou mafaufau i ni auala faapitoa e mafai ona tatou faaaoga ai i o tatou lava olaga.
Ua faamamafaina mai e perofeta ma aposetolo o aso e gata ai le taua o le teuina loloto o le talalelei i o tatou loto. Malamalama i le talaaga ma le anotusi o tusitusiga paia ina ia faailoa ai le taua o aoaoga faavae ma mataupu faavae o le talalelei o se amataga lelei e maua ai le malamalama o upumoni o le talalelei. Ae ina ia fesoasoani i mea ua tatou iloa i o tatou mafaufau ina ia loloto le goto ifo i o tatou loto, e masani ona tele atu mea e tatau ona tatou faia. E tatau ona tatou saili ia:
Malamalama i aoaoga faavae ma mataupu faavae ua tatou faailoaina.
Lagona lo latou moni ma le taua.
Faaaoga loa i o tatou olaga.
O nei elemene e tolu o le mamanu e aoao ai e galulue faatasi e valaaulia le Agaga Paia, lea e fesoasoani ia i tatou e faaloloto ai le talalelei i o tatou loto.
Faaaogaina o le Mamanu e Aoao ai
Maimoa i le vitio “Understand, Feel, and Apply Principles” (7:12), e maua i le LDS.org. I lenei vitio, e talanoaina e faiaoga e toatolu a latou taumafaiga ia malamalama, lagonaina le moni ma le taua o, ma faaaoga aoaoga faavae po o mataupu faavae i le Luka 5:1-11.
Tusi ni manatu se lua pe tolu na taua ia te oe ao e maimoa i lenei talanoaga i se api o talaaga suesue po o se isi nofoaga e mafai ona e toe vaai i ai ma faasoa atu i lau taitai o aoaoga po o le vaega.
Gaoioiga Faataitai e Taialaina
Ata
vaa i le sami
I le Eteru 6:1–12, tatou te faitau ai faapea na faia e le Alii le matagi e taitaia vaa o sa Iareto i le nuu folafolaina. O se tasi o mataupu faavae e tatau ona tatou faailoaina i lenei savali: Pe a tatou faatuatuaina le Alii ma faia Lona finagalo, o le a Ia taitaiina le ala o o tatou olaga. Mulimuli i laasaga i lalo i se taumafaiga e malamalama, lagonaina le moni ma le taua o, ma faaaoga lenei mataupu faavae. Tusi au tali ma manatu i au tusitusiga paia po o lau api o talaaga patino.
Atiina ae lou malamalama o le mataupu faavae
Iloilo le uiga o le mataupu faavae i le faia o fesili e pei o [fesili] nei ma saili mo ni tali:
O le a le uiga o le faalagolago?
O le a le uiga o le faalagolago i le Alii?
Aisea e mafai ai e le Alii ona taitaia olaga o i latou e faalagolago ia te Ia?
E faapefea e le Alii ona taitaia le ala o le olaga o se tagata?
Saili e lagona le moni ma le taua o le mataupu faavae
Mafaufau i le taua o le mataupu faavae i lou olaga po o olaga o isi, e aofia ai tagata mai tusitusiga paia po o le talafaasolopito o le Ekalesia.
O a auala ua faaalia ai e lou olaga ma le molimau le moni o lenei mataupu faavae?
O a auala ua faaalia ai e olaga ma molimau a isi e te mafaufau i ai le moni o lenei mataupu faavae?
Faaaoga le mataupu faavae
Mafaufau i se faatinoga faapitoa e tatau ona e faia e faaaoga ai le aoaoga faavae po o le mataupu faavae i lou olaga.
Gaoioiga e Faataitai e Oe Lava ia
Ata
Faamaloloina e Keriso se alii supa
Filifili se mataupu faavae na e faailoaina i lau suesuega o le Luka 5:12–26 i le aafiaga e aoao ai 7 pe filifili se mataupu faavae i le vaega 3.2 (“Luka 5: O se Faataitaiga”) i le itulau 46 o le tusitaulima Aoao Atu ma le Aoaoina Mai o le Talalelei. Ona fai lea o le mea lenei:
Atiina ae lou malamalama i le mataupu faavae.
Iloilo le uiga o le aoaoga faavae po o le mataupu faavae i le faia o fesili ma saili mo ni tali.
Saili e lagona le moni ma le taua o le mataupu faavae.
Mafaufau i le taua o le mataupu faavae i lou olaga po o olaga o isi.
Faaaoga le Aoaoga Faavae.
Mafaufau i se faatinoga faapitoa e tatau ona e faia e faaaoga ai le aoaoga faavae po o le mataupu faavae i lou olaga.
Tusi nisi o ou manatu ma lagona mai lenei gaoioiga i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai o le aoaoga po o le vaega.
Aotelega ma le Faaaogaina
O Mataupu Faavae ia Manatua
O le faamoemoega o le aoaoina o le talalelei o le valaaulia lea o le Agaga Paia e fesoasoani ia i tatou ia aumaia aoaoga faavae ma mataupu faavae o le talalelei mai o tatou mafaufau i totonu o o tatou loto.
O le malamalama i se aoaoga faavae po o se mataupu faavae e aofia ai le iloaina e le gata i lona uiga ae faapea foi le ala e aafia ai o tatou olaga.
O se malamalama manino i se aoaoga faavae po o se mataupu faavae e saunia ai i tatou e lagona lona moni ma le taua.
O le lagonaina o le moni ma le taua o se aoaoga faavae po o se mataupu faavae e faateleina ai lo tatou manao e faaaoga i o tatou olaga.
O le faaaogaina e tupu pe a tatou tautatala, mafaufau, ma ola e tusa ai ma mea ua tatou aoaoina.
Ata
Elder Robert D. Hales
“O se faiaoga moni, afai loa ua na aoaoina atu mea moni [o le talalelei ], … ua na aveina atu tamaiti aoga i se laasaga sili atu ia mauaina se molimau faaleagaga ma le malamalamaaga i o latou loto lea na te aumaia le galueaiina ma le faia” (Robert D. Hales, “Teaching by Faith” [o se afiafi faatasi ma Elder Robert D. Hales, Fep. 1, 2002], 5, si.lds.org).
“Ona, a lea?”
Ina ia faaiuina lenei aafiaga e aoao ai, tusi i lalo nisi o mea o le a e faia e faalagolago i mataupu faavae na e aoaoina i le aso.