Aafiaga e Aoao ai 5

Aafiaga i le Mamanu e Aoao ai

Vaaiga Aoao

O lenei aafiaga e aoao ai e aofia ai vaega nei:

• Faailoaina o se mamanu e aoao ai

• Tuuina atu o le talalelei i loto o tamaiti aoga

• Malamalama i le mamanu e aoao ai

• Faaaogaina o le mamanu e aoao ai i le suesuega o le talalelei

Manatu Autu

O perofeta ma aposetolo o aso e gata ai ua tofia faiaoga i Seminare ma Inisitituti o Aoaoga Faalelotu i le aoaoina o tamaiti aoga e siitia ai, malamalama, ma faaaoga le talalelei ua maua i tusitusiga paia ma upu a perofeta. E tusa ai ma lenei valaauga, na aoao mai Peresitene J. Reuben Clark Jr. (1871–1961) o le Au Peresitene Sili:

“Ia outou aoao atu lenei talalelei, i le faaaogaina o a outou punaoa ma pule tatau i tusitusiga faavae a le Ekalesia ma upu a i latou na valaauina e le Atua e taitai Ona tagata i nei aso mulimuli” (The Charted Course of the Church in Education, rev. ed. [1994], 10).

Faailoaina atu o se Mamanu e Aoao ai

Ao aoao e tamaiti aoga le talalelei a Iesu Keriso e pei ona maua i tusitusiga paia ma upu a perofeta, e taua le goto ifo loloto i o latou loto aoaoga faavae ma mataupu faavae o le talalelei. Ina ia fesoasoani i lenei faagasologa ia tupu, e faamamafaina e Seminare ma Inisitituti o Mataupu Faalelotu se mamanu autu e aoao ai lea e faatagaina faiaoga ma tamaiti aoga e maua, malamalama, ma faaaoga upumoni o le talalelei i o latou olaga. O lenei mamanu e aofia ai faavae nei:

• Malamalama i le talaaga ma le anotusi.

• Faailoa aoaoga faavae ma mataupu faavae.

• Malamalama i aoaoga faavae ma mataupu faavae.

• Lagona le moni ma le taua o aoaoga faavae ma mataupu faavae.

• Faaaoga aoaoga faavae ma mataupu faavae.

O le tele ona e malamalama ma faaaoga nei faavae i lau lava suesuega o le talalelei, o le sili atu lea ona e mafai ona fesoasoani i tamaiti e faaaogaina i latou.

O le faamoemoega o lenei aafiaga e aoao ai o le tuuina atu o se vaaiga aoao o faavae e lima o le mamanu e aoao ai. O faavae taitasi o le a taua auiliili atu i aafiaga e aoao ai 6-8.

Maimoa le vitio “The Parable of the Gems” (6:47), e maua i le LDS.org. Ao e maimoa i le vitio, fesili ia te oe lava, “E mafai faapefea e le suesueina ma le mauaina o maa taua i le oneone ona faatusatusa i le suesueina ma le aoao mai tusitusiga paia?”

A uma ona e maimoa i le vitio, tusi ou manatu ma lagona i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai o le aoaoga po o le vaega.

Faaaoga le Faataoto i le Mamanu e Aoao ai

O le faataoto i maa taua e fesoasoani ia i tatou e malamalama ai i faavae o le mamanu e aoao ai. Faitau faamatalaga i lalo e aoao atili ai e uiga i faavae taitasi.

Malamalama i le talaaga ma le anotusi:O le tamaitai talavou o loo saili mo maa taua i le oneone e faatusa i se tagata aoao o loo saili mo upumoni e faavavau i tusitusiga paia ma i aoaoga a perofeta. O le oneone e suitulaga i faamatalaga o tusitusiga paia po o aoaoga—o le laina o le tala, tagata, nofoaga, aso, ma isi. O le tamaitai talavou o loo faamamaina le oneone mo maa taua e pei o le tagata aoao o loo faamamaina faamatalaga o tusitusiga paia i le sailiga o aoaoga faavae, mataupu faavae, ma isi upumoni autu. O lenei faagasologa e faatatau i le malamalama i le talaaga ma le anotusi.

Faailoa aoaoga faavae ma mataupu faavae:O le tamaitai talavou na mauaina maa taua i le oneone e faatusa i le faagasologa o le faailoaina o aoaoga faavae ma mataupu faavae i tusitusiga paia ma i upu a perofeta. E pei lava o nisi maa taua e taatitia latalata i luga ma o isi e maua i le oneone e loloto atu, o nisi o upumoni e faavavau i tusitusiga paia e faigofie ona faailoaina, ao isi e manaomia ai se taumafaiga sili atu e maua ai.

Malamalama i aoaoga faavae ma mataupu faavae:E iloiloina ma le faaeteete e le tamaitai talavou maa taua taitasi e suitulaga i se tagata aoao o loo suesueina ma le filiga ina ia sili atu ona loloto le malamalama i aoaoga faavae ma mataupu faavae.

Lagona le moni ma le taua o aoaoga faavae ma mataupu faavae:O le tamaitai talavou o loo lagonaina le faafetai mo le tulaga ese ma le taua o maa taua taitasi e mafai ona faatusatusa i se tagata aoao ua lagonaina le upumoni i tusitusiga paia ma upu e perofeta.

Faaaoga aoaoga faaavae ma mataupu faavae:E pei o mafaufauga o le tamaitai talavou na liliu atu i ni auala faapitoa e mafai ona ia faaaogaina ai maa taua taitasi, o tagata aoao e tatau ona mafaufau foi pe faapefea ona faapatino ma faaaoga aoaoga ma mataupu faavae e pei ona tuuina atu e le Agaga taitaiga patino i o latou mafaufau ma loto.

Faaaoga le Mamanu e Aoao ai i le Suesuega o le Talalelei

O fuaitau nei o ni faataitaiga pe faapefea ona fesoasoani lenei mamanu e aoao ai i tamaiti aoga moni e faaaoga tusitusiga paia ia maua, malamalama, ma faaaoga upumoni o le talalelei i o latou olaga:

• “Ua sili atu lou malamalama i tusitusiga paia. Ua ou iloa pe faapefea ona fai atu fesili ma maua tali. O lenei ua ou faitau ia maua le upumoni ma mo se malamalama sili atu pe faapefea ona ou amio ai.”

• “Ou te lei nofo lava au i lalo ma faitau tusitusiga paia, ao lenei ua ou maua le masani o le faia i po uma. O se lagona matuai maoae lava le mauaina ma malamalama i upumoni na e pai atu ia te oe ma alu sao lava i lou loto.”

• “Sa masani ona ou le faitauina soo tusitusiga paia ona sa ou le malamalama i ai. Ae o lenei ua ou iloa e tumu i mataupu faavae na e mafai ona ou suesue i ai mo tali. O lenei tausaga ua ou faia ai e sili atu nai lo se isi lava taimi i lou olaga atoa.”

• “O le mea e tasi ua fesoasoani mai ai le seminare ia te au toetoe a sili atu nai lo se isi lava mea o le faateleina lea o le fiafia ma le malamalama i tusitusiga paia. Ua matuai tele lava au tatalo ua taliina mai. Ua faamalosia foi lau sootaga ma lou Faaola, ma ou te faafetai tele mo lena mea. E faapefea ona ou manao atu mo nisi mea?”

• “Ua ou matuai aoao lava pe faapefea ona sili atu le suesue i tusitusiga paia, ma o lenei ua le toe foliga mataga mai ia te au. Ua ou manao moni lava e suesueina ma mafaufau loloto pe faapefea ona ou ola e toe foi atu ai i lou Tama oi le Lagi.”

• “O nisi taimi i le faitauina e foliga mai e le gata ou te lagonaina le lofituina i le alofa ma le mafanafana ae o itulau ma le faavaa ua toeitiiti lava a mumu pei se afi i le malamalama.”

Aotelega ma le Faaaogaina

O Mataupu Faavae ia Manatua

• I le avea ai ma faiaoga i seminare ma inisitituti, ua tofia oe e aoao tamaiti aoga i aoaoga faavae ma mataupu faavae o le talalelei e pei ona maua i tusitusiga paia ma upu a perofeta.

• O faiaoga ma tamaiti aoga e tatau ona aoao pe faapefea na maua le talalelei mai itulau o tusitusiga paia ma upu a perofeta ua goto ifo loloto i o latou loto.

• O Seminare ma Inisitituti o Mataupu Faalelotu o se mamanu e aoao ai autu lena e valaaulia faiaoga ma tamaiti aoga ia maua, malamalama, ma faaaoga upumoni o le talalelei i o latou olaga.

• O le tele lava ona e malamalama ma faaaoga faavae o le mamanu e aoao ai i lau lava suesuega o le talalelei, o le sili atu foi lea ona e mafai ona fesoasoani i tamaiti aoga e faaaoga foi i latou.

“Pe a faatusatusa i faapotopotoga a le lalolagi, ia o loo aoaoina ai i tatou ia iloa se mea, o le talalelei a Iesu Keriso o loo luitauina i tatou ia avea i tatou faapei o se tasi” (Dallin H. Oaks, “O le Luitau ia Avea ma se Tasi,” Liahona, Ian. 2001, 40).

“Ona, a lea?”

Ina ia faaiu lenei aafiaga e aoao ai, tusi i lalo nisi o mea o le a e faia e faalagolago i mataupu faavae ua e aoaoina i le aso.