Kasinatian sa Pagkat-on 5

Pagsinati sa Sumbanan sa Pagkat-on

Kinatibuk-ang Pagpasabut

Kini nga kasinatian sa pagkat-on naglangkob sa mosunod nga mga konsepto:

• Pagpaila og usa ka sumbanan sa pagkat-on

• Pagtabang sa mga estudyante nga mobati gayud ug makasabut sa ebanghelyo

• Pagsabut sa sumbanan sa pagkat-on

• Paggamit sa sumbanan sa pagkat-on diha sa pagtuon sa ebanghelyo

Mahinungdanong mga Konsepto

Ang mga propeta ug mga apostoles sa ulahing mga adlaw mihatag og responsibilidad sa mga magtutudlo sa Seminaries and Institutes of Religion sa pagtudlo sa mga estudyante sa pag-ila, pagsabut, ug paggamit sa doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta. Kalabut niini nga responsibilidad, si Presidente J. Reuben Clark Jr. (1871–1961) sa Unang Kapangulohan nagtudlo:

President J. Reuben Clark

“Kamo kinahanglang motudlo niining ebanghelyo, gamit ang sumbanan nga mga basahon sa Simbahan ug ang mga pulong niadtong kinsa gitawag sa Dios sa pagdumala sa Iyang katawhan niining ulahing mga adlaw isip inyong mga tinubdan ug basihanan” (The Charted Course of the Church in Education, rev. ed. [1994], 10).

reading scriptures

Pagpaila og usa ka Sumbanan sa Pagkat-on

Samtang ang mga estudyante nagkat-on sa ebanghelyo ni Jesukristo sigun sa makita diha sa mga kasulatan ug sa mga pulong sa mga propeta, mahinungdanon nga ang doktrina ug mga baruganan sa ebanghelyo motuhop og maayo sa ilang kasingkasing. Aron matabangan nga mahitabo kini nga proseso, ang Seminaries and Institutes of Religion mihatag og gibug-aton sa sukaranang sumbanan sa pagkat-on nga magtugot sa mga magtutudlo ug sa mga estudyante sa pagdiskubre, pagsabut, ug paggamit sa mga kamatuoran sa ebanghelyo diha sa ilang kinabuhi. Kini nga sumbanan naglangkob sa mosunod nga mahinungdanong mga butang:

• Sabta ang konteksto ug ang sulod.

• Ilha ang doktrina ug mga baruganan.

• Sabta ang doktrina ug mga baruganan.

• Batia ang kamatuoran ug kaimportante sa doktrina ug mga baruganan.

• Gamita ang doktrina ug mga baruganan.

Kon mas masabtan ug maggamit nimo kini nga mahinungdanong mga butang diha sa imong kaugalingong pagtuon sa ebanghelyo, mas makatabang ka sa mga estudyante nga maimplementar kini.

Ang katuyoan niining kasinatian sa pagkat-on mao ang paghatag og kinatibuk-ang pagpasabut sa lima ka mahinungdanong mga butang sa sumbanan sa pagkat-on. Ang matag mahinungdanong butang hisgutan sa dugang nga detalye diha sa mga kasinatian sa pagkat-on 6–8.

Tan-awa ang video nga “The Parable of the Gems [Ang Sambingay sa mga Bahandi” (6:47), nga anaa sa churchofjesuschrist.org. Samtang magtan-aw ka sa video, pangutan-a ang imong kaugalingon, “Sa unsa kaha nga paagi nga ang pagpangita ug pagkakita sa mga bahandi diha sa balas matandi ngadto sa pagtuon ug pagkat-on gikan sa mga kasulatan?”

Human nimo matan-aw ang video, irekord ang imong mga hunahuna ug mga impresyon diha sa study journal o sa laing dapit diin maka-refer ka niini ug makahimo sa pagpakigbahin niini sa imong inservice leader o sa grupo.

Gamita ang Sambingay ngadto sa Sumbanan sa Pagkat-on

Ang sambingay bahin sa mga bahandi makatabang nato aron masabtan ang mahinungdanong mga butang sa sumbanan sa pagkat-on. Basaha ang mga paghulagway sa ubos aron makakat-on og dugang bahin sa matag mahinungdanong butang.

hands, reading scriptures

Sabta ang konteksto ug ang sulod:Ang batan-ong babaye nga nangita og mga bahandi diha sa balas nagsimbolo sa tigkat-on nga nangita sa mahangturong mga kamatuoran diha sa mga kasulatan ug sa mga pagtulun-an sa mga propeta. Ang balas nagrepresentar sa mga detalye sa mga kasulatan o mga pagtulun-an—sa dagan sa istorya, mga tawo, mga dapit, mga petsa, ug uban pa. Ang batan-ong babaye nga nangaykay og mga bahandi diha sa balas sama sa usa ka tigkat-on nga nangaykay sa mga detalye sa mga kasulatan sa pagpangita og doktrina, mga baruganan, ug uban pang sukaranang mga kamatuoran. Kini nga proseso nailhan nga mao ang pagsabut sa konteksto ug sa sulod.

hand and gem, marking scriptures

Ilha ang doktrina ug mga baruganan:Ang batan-ong babaye nga nakadiskubre og mga bahandi diha sa balas nagsimbolo sa proseso sa pag-ila sa doktrina ug mga baruganan diha sa mga kasulatan ug sa mga pulong sa mga propeta. Ingon nga ang ubang mga bahandi anaa ra sa dapit sa ibabaw ug ang uban nakit-an sa mas ilawom nga dapit sa balas, ang pipila ka mahangturong mga kamatuoran diha sa mga kasulatan dali rang mahibaloan, samtang ang uban nagkinahanglan og dugang paningkamot aron madiskubrihan.

looking at gem, scriptures on mobile phone

Sabta ang doktrina ug mga baruganan:Ang batan-ong babaye nga mainampingong misusi sa matag bahandi nagrepresentar sa usa ka tigkat-on nga makugihong nagtuon aron makasabut og maayo sa doktrina ug mga baruganan.

young women

Batia ang kamatuoran ug kaimportante sa doktrina ug mga baruganan:Ang batan-ong babaye nga mibati og pagdayeg sa katalagsaon ug kamahinungdanon sa matag bahandi mahimong matandi ngadto sa usa ka tigkat-on nga mibati sa kamatuoran ug kaimportante sa doktrina ug mga baruganan nga makita diha sa mga kasulatan ug sa mga pulong sa mga propeta.

two people on beach, sharing pass-along card

Gamita ang doktrina ug mga baruganan:Ingon nga ang mga hunahuna sa batan-ong babaye naadto sa pihong mga paagi nga iyang magamit ang matag bahandi, ang mga tigkat-on kinahanglan usab nga mokonsiderar kon unsaon sa paghimo nga personal ug paggamit ang doktrina ug mga baruganan ingon nga ang Espiritu mohatag og personal nga direksyon ngadto sa ilang mga hunahuna ug kasingkasing.

seminary class

Paggamit sa Sumbanan sa Pagkat-on diha sa Pagtuon sa Ebanghelyo

Ang mosunod nga mga pamahayag mga ehemplo kon sa unsang paagi nga kining sumbanan sa pagkat-on makatabang sa aktwal nga mga estudyante sa paggamit sa mga kasulatan aron sa pagdiskubre, pagsabut, ug paggamit sa mga kamatuoran sa ebanghelyo diha sa ilang kinabuhi:

• “Mas nakasabut ko sa mga kasulatan. Nasayud ko unsaon sa pagpangutana ug pagpangita sa mga tubag. Karon mobasa ko aron makakita og kamatuoran ug alang sa maayong panabut kon unsaon nako sa paglihok.”

• “Wala pa gyud ko makalingkod nga ako ra aron mobasa sa mga kasulatan, pero karon naanad na ko sa pagbuhat niini kada gabii. Nindot kaayo ang pamati nga makakita ug makasabut sa mga kamatuoran nga makapatandog nimo ug modiretso dayon sa imong kasingkasing.”

• “Naanad ko nga dili magbasa pirme sa mga kasulatan tungod kay wala ko makasabut niini. Pero karon nasayud ko nga puno kini sa mga baruganan ug nga mahimo kong mosiksik niini alang sa mga tubag. Karong tuiga ako kanang nabuhat sobra pa sa akong nahimo sa tibuok nakong kinabuhi.”

• “Ang usa ka butang nga natabang sa seminary nako labaw pa kay sa unsang butang mao ang paglambo sa paghigugma ug pagsabut sa mga kasulatan. Daghan kaayo ko og mga pag-ampo nga natubag. Napalig-on usab nako ang akong relasyon ngadto sa akong Manluluwas, ug mapasalamaton kaayo ko alang niana. Unsa pa may akong pangayuon?”

• “Nakakat-on gyud ko kon unsaon nga mas makatuon pa sa mga kasulatan, ug karon dili na kini makapalaay nako. Ganahan gyud kong magtuon niini ug mamalandong kon unsaon nako sa pagpakabuhi aron makabalik sa akong Amahan sa Langit.”

• “Usahay diha sa pagbasa morag dili lang kay mibati ko nga napuno sa gugma ug kainit sa pagbati pero ang mga pahina ug hugpong niini napuno sa daghan kaayong kahibalo nga ang gahum niini hilabihan gayud.”

Summary ug Paggamit

Mga Baruganan nga Angayang Hinumduman

• Isip mga magtutudlo sa mga seminary ug insitute, kamo adunay responsibilidad sa pagtudlo sa doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta.

• Ang mga magtutudlo ug mga estudyante kinahanglan gayud nga makakat-on kon unsaon pagkuha sa ebanghelyo gikan sa mga pahina sa mga kasulatan ug sa mga pulong sa mga propeta paingon ngadto sa ilang kasingkasing.

• Ang Seminaries and Institutes of Religion mihatag og gibug-aton sa sukaranang sumbanan sa pagkat-on nga magdapit sa mga magtutudlo ug sa mga estudyante sa pagdiskubre, pagsabut, ug paggamit sa mga kamatuoran sa ebanghelyo diha sa ilang kinabuhi.

• Kon mas masabtan ug maggamit nimo ang mahinungdanong mga butang sa sumbanan sa pagkat-on diha sa imong kaugalingong pagtuon sa ebanghelyo, mas makatabang ka sa mga estudyante nga maimplementar usab kini.

Elder Dallin H. Oaks

“Sukwahi sa mga institusyon sa kalibutan, nga nagtudlo kanato nga mahibalo og butang, ang ebanghelyo ni Jesukristo mohagit kanato nga mahimo kon unsa kita” (Dallin H. Oaks, “The Challenge to Become,” Ensign, Nob. 2000, 32).

“Busa, Unsa Man?”

Sa pagtapos niining kasinatian sa pagkat-on, isulat ang pipila ka mga butang nga imong buhaton basi sa mga baruganan nga imong nakat-unan karon.