Aafiaga e Aoao ai 7

Faailoaina o Aoaoga Faavae ma Mataupu Faavae

Vaaiga Aoao

O lenei aafiaga e aoao ai e aofia ai vaega nei:

Faailoa aoaoga faavae ma mataupu faavae ua taua
Faailoa aoaoga faavae ma mataupu faavae ua faaataata mai
Tusia o fuaitau o mataupu faavae

Manatu Autu

O le mamanu e aoao ai ua folasia i le aafiaga e aoao ai 5 ua saunia faavae na e fesoasoani e faatumauina le talalelei i o tatou mafaufau ma loto. I lenei aafiaga e aoao ai, o le a tatou vaai i le faailoaina o aoaoga ma mataupu faavae.

O le faamoemoega o lenei aafiaga e aoao ai o le saunia o se folasaga puupuu i vaega o le mamanu e aoao ai. Ao e auauna atu o se faiaoga seminare po o le inisitituti, o le a tele atu ou avanoa e aoao ai e uiga i [tomai] ma faataitai nei tomai.

Faailoaina o Aoaoga Faavae ma Mataupu Faavae

: I le faataoto i maa taua, ua miti se tamaitai talavou e uiga i le mauaina o maa taua e taugata tele.
: E faapena foi, pe a tatou suesueina tusitusiga paia e mafai ona tatou mauaina ni maa taua faaletusipaia na e mafai ona faamanuiaina o tatou olaga.

Na aoao mai Elder Neal A. Maxwell (1926-2004) o le Korama a Aposetolo e Toasefululua:

“Uso e ma Tuafafine, e tele mataupu faataimane ua tuuina mai ia i tatou e tusitusiga paia. A oo le malamalama o le Agaga i o latou vaega eseese, e tumu i uiga faaselesitila ma e faapupula ai le ala tatou te savavali ai.(“ E Tusa ai ma o [Matou] Manao,” Liahona, Ian. 1997, 23).

O maa taua i le oneone o le faatusa o aoaoga ma mataupu faavae taua o upumoni e maua i tusitusiga paia ma upu a perofeta.

Aoaoga Faavae ma Mataupu Faavae: Ua Taua e faasaga i Ua Faaataata Mai

I le faataoto i maa taua, ua saili e le tamaitai talavou ia maua maa taua taugata. Ao ia sailiili, ua ia maua nisi e latalata i luga ma isi e loloto atu i le oneone. E faapena foi, o le a e maua o nisi o aoaoga ma mataupu faavae e taua soo i tusitusiga paia ma e faigofie ona faailoa. O isi e le ta’ua tuusa’o mai i tusitusiga paia, ae nai lo o lena ua faaataata mai. O nei mea e manaomia ai le taumafaiga e sili atu ia mauaina.

Aoaoga Faavae ma Mataupu Faavae ua Taua	Aoaoga ma Mataupu Faavae ua Faaataata mai
O aoaoga ma mataupu faavae ua taua manino ma faatele i tusitusiga paia.	O aoaoga ma mataupu faavae e le o taua tuusao e tusitala i tusitusiga paia ae nai lo o lena ua faaataata mai i le tusiga.

Pe a talanoa i le faailoaina o aoaoga faave ma mataupu faavae, na aoao mai Elder Richard G. Scott (1928–2015) o le Korama a Aposetolo e Toasefululua:

“Ia saili atu mo mataupu faavae. Ia tuueseese ma le faaeteete mataupu faavae, ma faamatalaga ua faaaoga e faamalamalama ai” (“Ausia o le Malamalama Faaleagaga,” Liahona, Ian. 1994, 101).

O le vaega o totoe o lenei aafiaga e aoao ai o le a fesoasoani i le atiina ae o lou malosiaga e faailoa mai aoaoga faavae ma mataupu faavae na taua ma ia na faaataata mai i au suesuega. (Tagai foi i le Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 27.)

Faailoa Aoaoga Faavae ma Mataupu Faavae ua Taua

O aoaoga faavae ma mataupu faavae ua Taua o i latou na ua manino ma taua soo i tusiga i tusitusiga paia.

Faitau tusitusiga paia nei e iloa ai faataitaiga o le taua manino o aoaoga ma mataupu faavae (ua faamamafaina i mataitusi matatetele).

Ioane 15:10—“Afai tou te tausia au poloaiga, ona tumau lea o outou i lou alofa ; pei ona ou tausia poloaiga a lou Tama, ma ou tumau i lona alofa.”
Kenese 1:27—“Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine.”
Mataupu Faavae ma Feagaiga 59:23—“Ae ia iloa o ia o lē e faia galuega o le amiotonu o le a maua lona taui, o le filemu lea i le lalolagi lenei ma le ola e faavavau i le lalolagi a sau.”
Helamana 3:27—“ Ua faapea ona mafai ona tatou vaai ai e alofa mutimutivale le Alii ia te i latou uma o e e valaau atu i lona suafa paia, ma le faamaoni o o latou loto.”
Iopu 36:5—“Faauta, ua silisili ese le Atua, ae le inoino o ia i se tasi, ua silisili ese le malosi o lona finagalo.”

Faailoa Aoaoga Faavae ma Mataupu Faavae Ua Faaataata Mai

: I le faataoto i maa taua, e lei gata le fiafia o le tamaitai talavou i maa taua i lalo o oneone pito i luga. Na ia aoao faapea o le eliina ia loloto atu i le oneone ma le faamamaina ma le faaeteete, e mafai ai ona ia maua isi maa taua e taugata tele.
: E faapena foi, ao e suesue tusitusiga paia, e mafai ona e aoao e “eli” ma “faamama” ia talaaga ma le anotusi o mau ina ia maua ai aoaoga faavae ma mataupu faavae ua faaataata mai. E masani o nisi nei o mea e sili ona pele ma taua e mafai ona maua o le a e mauaina i lau suesuega o mau. O le mauaina o aoaoga faavae ma mataupu faavae ua faaataata mai e manaomia ai le taimi ma le mafaufau ma le faaeteete.

Fautuaga mo le Faailoaina o Aoaoga Faavae ma Mataupu Faavae Ua Faaataata Mai

O le tusitaulima Aoao Atu ma le Aoaoina Mai o le Talalelei ua tuuina mai fautuaga nei e fesoasoani i faiaoga ma tamaiti aoga e faailoa aoaoga faavae ma mataupu faavae ua faaataata mai:

Vaavaai mo sootaga o mafuaaga-ma-aafiaga

“E ala i le iloiloina o faatinoga, uiga, ma amioga [mafuaaga] a tagata taitoatasi po o vaega i tala faatusitusiga paia, ma faailoaina ia faamanuiaga po o taunuuga ia e oo mai ona o se taui [aafiaga], o le a tele ai ina iloagofie ia mataupu faavae o le talalelei” (Aoao Atu ma le Aoaoina Mai o le Talalelei, 30).

“Ao faitauina le Mataio 4:1–11, na amata ona ou taulai atu i faatinoga a le Faaola ma le ala na Ia anapogi ma tatalo ai i se taumafaiga ia ‘faatasi ma le Atua.’ Ona ou vaai lea i le ala na Ia faaaoga ai mau e tuliese ai faaosoosoga na faasagatau atu ia te Ia e le fili. O Lana anapogi, tatalo, ma le faaaogaina o mau (mafuaaga) na saunia ai le malosi ia lava e manumalo ai i faaosoosoga (aafiaga). Ao ou iloaina lenei mea, na ou tusia lenei fuaitau faigofie o le mataupu faavae i lau api o talaaga:Pe a tatou anapopogi, tatalo, ma malamalama i mau, e mafai ona tatou maua le malosi faaleagaga e sili atu e manumalo ai i faaosoosoga.”

“Na ou mauaina se mataupu faavae maoae na faaataata mai i le 1 Nifae 18:3. Na alu Nifae ‘i le mauga, ma sa ou tatalo soo atu i le Alii.’ O se taunuuga, na faaali atu e le Alii ia te ia mea maoae. Ao ou mafaufau i lenei savali, na ou tusia lenei mataupu faavae i le laina i autafa o lau mau: O le tele ona ou saili e fesootai atu i le Alii i le tatalo patino, o le tele foi lea ona Ia faaalia mai ia te au o mea maoae.”
Fai ni fesili

O mataupu faavae ua faaataata mai e mafai foi ona faailoaina e ala i le faia o fesili e pei o:
- O le a le uiga, po o le aano o le tala?
- Aisea na faaaofia ai e le tusitala nei mea na tutupu po o savali?
- O le a se mea na faamoemoe le tusitala ina ia tatou aoaoina?
- O a nisi o upumoni autu o loo aoaoina mai i lenei fuaitau?
“Ao faitauina le Mataupu Faavae ma Feagaiga 9, lea e maua ai le fautuaga a le Alii ia Oliva Kaotui, o le na le faamanuiaina i se taumafaiga e fesoasoani e faaliliu le Tusi a Mamona, na ou fesili, ‘O le a le savali po o le lesona o lenei tala?’ O se mataupu faavae na faaataata mai na oo mai i lou mafaufau o le O le mauaina ma iloaina o faaaliga e manaomia ai le taumafaiga i la tatou vaega.”

“I le Alema 17–18, na ou faitau ai e uiga ia Amona o auauna atu i le Tupu o Lamonae e aunoa ma se manatu i se taui ma le ofo o le Tupu o Lamonae i le faamaoni o Amona. Na ou mauaina au lava ua mafaufau, ‘Aisea na faaaofia ai e le tusitala nei faamatalaga i nei mataupu?’ I le tali atu i lenei fesili, na ou tusia ai lenei mataupu faavae i lau mau: Ao tatou auauna atu i isi ma le faamaoni, e mafai ona tatou fesoasoani ia i latou e saunia e maua upumoni o le talalelei.”
Tau manino ma faigofie aoaoga faavae ma mataupu faavae

O le tusitaulima Aoao Atu ma le Aoaoina Mai o le Talalelei ua aoao mai faapea “o le faailoaina o [aoaoga faavae ma] mataupu faavae na faaataata mai e aofia ai le iloaina o upumoni na faaalia i se tala faaletusi paia ma taua manino ma puupuu” (Aoao Atu ma le Aoaoina Mai o le Talalelei, 27). O le tusia ma le manino ma le maea o fuaitau o aoaoga faavae ma mataupu faavae e fesoasoani ia i tatou e faaleoina ai o tatou manatu ma pueina se savali faaletusipaia e finagalo le Alii e tuuina mai ia i tatou.

Na aoao mai Elder B. H. Roberts (1857–1933) o le Fitugafulu:

“Afai e ao ona iloa e tagata le upumoni, e ao ona faaupuina, ma o le sili atu o le manino ma le atoatoa o le faamatalaga, o le lelei atu foi lena o le avanoa o le Aaga Paia e molimau atu ai i agaga o tagata e moni le galuega” (New Witnesses for God, 3 vol. [1909], 2:vii, upusii i le James E. Faust, “O Mea ou te Manao ia Iloa e Lou Atalii, ao Lei Tuua mo Lana Misiona,” Liahona, Iulai 1996, 47).

Na faamamafa mai e Elder Richard G. Scott (1928–2015)o le Korama a Aposetolo e Toasefululua:

“E aoga lava se taumafaiga tele e faatulaga upumoni tatou te aoina mai i ni faamatalaga faigofie o mataupu faavae(“Ausia o le Malamalama Faaleagaga,” Liahona,Ian. 1994, 101).

Ao e faia e pei ona fautuaina mai e Elder Scott—“faatulaga upumoni [tou te] aoina mai i ni faamatalaga faigofie o mataupu faavae”—o le a e iloaina o fuaitau e sili ona fesoasoani o aoaoga po o mataupu faavae e i ai nisi o uiga nei:

O ni fuaitau atoatoa.
E faigofie, manino, ma tuu sao.
O upumoni latou te faaleoina e mautu, le ma suia, ma e fetaui i taimi uma.
Latou te masani ona fautuaina mai faatinoga faapea foi ma taunuuga e talafeagai.
E fetaui lelei faaletagata lava ia.

O fea o nei uiga e mafai ona e vaaia i fuaitau taitasi o aoaoga faavae ma mataupu faavae?

O le tele ona ou saili e fesootai atu i le Alii i tatalo patino, o le tele foi lea ona Ia faaalia mai ia te au mea maoae.
Pe a ou anapogi, tatalo, ma malamalama i mau, e mafai ona ou maua le malosi faaleagaga sili atu e manumalo ai i faaosoosoga.
Na puapuagatia Iesu Keriso mo a’u agasala.
O le mauaina ma le iloaina o faaaliga e manaomia ai le taumafaiga i lau vaega.
Ao ou auauna atu ma le faamaoni i isi, e mafai ona ou fesoasoani ia i latou e saunia e maua upumoni o le talalelei.

Maimoa i le vitio “Identifying Doctrine and Principles” (7:09), e maua i le LDS.org. I lenei vitio, o loo talanoaina e faiaoga e toatolu a latou taumafaiga e faailoa aoaoga faavae ma mataupu faavae i le Luka 5:1-11 e faaaoga ai fautuaga e tolu ua otootoina i luga.

7:9

Tusi ni manatu se lua pe tolu na e tulagaese ia te oe mai le vitio i se api o talaaga e suesue ai po o se isi nofoaga e mafai ona e toe maua ai ma faasoa atu i lou taitai o le aoaoga po o le vaega.

O le Taua o le Faailoa o Aoaoga Faavae ma Mataupu Faavae

Maimoa le vitio “Identifying Doctrine and Principles: Students’ Testimonies” (2:39), e maua i le LDS.org. I lenei vitio, o ni nai tamaiti aoga seminare ma inisitituti e faasoa mai le taua o le aoaoina e faailoa aoaoga faavae ma mataupu faavae i a latou suesuega o mau. Ao e maimoa, mafaufau i le taua o lenei tomai e mafai ona i ai i lau suesuega o le mau ma le aoao atu ma le aoaoina mai lena o le a tupu i lou potuaoga.

2:39

Aotelega ma le Faaaogaina

O Mataupu Faavae ia Manatua

O se faamoemoega tutotonu o le mau o le aoao atu o aoaoga faavae ma mataupu faavae o le talalelei a Iesu Keriso.
O le Aoaoga Faavae e aofia ai upumoni autu, ma le le masuia o le talalelei a Iesu Keriso.
O se mataupu faavae o se upumoni tumau po o se tulafono e mafai ona tatou faaaogaina e taiala ai i tatou i le faia o faaiuga.
O nisi o aoaoga faavae ma mataupu faavae ua taua manino ma tuusao i le talaaga o le mau, ao isi ua na ona faaataata mai.
Faailoaina o aoaoga faavae ma mataupu faavae na faaataata mai e aofia ai le taua manino ma tuusao o i latou.
O le faailoaina o aoaoga faavae ma mataupu faavae o loo i mau e manaomia ai ni taumafaiga magafagafa ma se faiga masani.

“E le mafai e se tasi ona suesue faamaoni tusitusiga paia e aunoa ma le aoaoina o mataupu faavae o le talalelei ona o tusitusiga paia na tusia e faasaoina mataupu faavae mo lo tatou lelei.” (Marion G. Romney, “The Message of the Old Testament” [Church Educational System symposium on the Old Testament, Aok. 17, 1979], 3, si.lds.org).

“Ona, a lea?”

Ina ia aofia ai lenei aafiaga, tusi i lalo nisi o mea o le a e faia e faalagolago i mataupu faavae ua e aoaoina i le aso.