Usa ka grupo sa batan-ong mga lalaki ug batan-ong mga babaye nga nalingaw sa panag-uban sa usag usa samtang sila nag-uban sa pagbisita sa Paris France.
Si Pablo nagsulat sa mga Santos sa Corinto aron tabangan sila nga maila ang ilang panginahanglan nga mahiusa kang Kristo. Siya nagtudlo nga kon ang tanang mga miyembro makaila ug mogamit sa espirituwal nga mga gasa nga ilang nadawat gikan sa Ginoo, sila mahisama sa daghang mga parte sa usa ka lawas nga nagtinabangay sa hiniusa. Kini nga leksiyon gituyo aron matabangan ka nga maila ang espirituwal nga mga gasa nga gihatag sa Ginoo kanimo aron mopanalangin sa uban ug molig-on sa Iyang Simbahan.
Pagdawat og mga gasa
Unsa ang usa ka mahinungdanon nga gasa nga imong nadawat?
Unsa ang epekto niini nga gasa diha sa imong kinabuhi? Unsa ang gitugot niini nga imong buhaton?
Unsay imong gibati ngadto sa tawo nga mihatag sa gasa kanimo?
Sa imong pagtuon sa 1 Mga Taga-Corinto 12, imong makat-onan ang mahitungod sa espirituwal nga mga gasa nga gihatag sa Langitnong Amahan sa Iyang mga anak. Pangitaa kon nganong Siya naghatag niini nga mga gasa, ug tinguhaa ang inspirasyon gikan sa Espiritu Santo aron matabangan ka sa pag-ila sa gasa nga gihatag kanimo.
Ang Ginoo naghatag kanato og espirituwal nga mga gasa
“Ang espirituwal nga mga gasa mao ang mga panalangin o mga abilidad nga gihatag sa Dios ngadto sa Iyang mga anak pinaagi sa gahom sa Espiritu Santo” (Giya ngadto sa mga Kasulatan, “Spiritual Gifts [Espirituhanon nga mga Gasa],” topics.ChurchofJesusChrist.org).
Pagkat-on mahitungod sa espirituwal nga mga gasa pinaagi sa pagbasa sa 1 Mga Taga-Corinto 12:3–11. (Timan-i nga ang pulong nga “matag usa” diha sa bersikulo 11 nagpasabot nga “indibiduwal nga paagi” o “tinagsa tagsa.”)
Unsa ang pipila ka mga espirituwal nga mga gasa ang nalista niini nga mga bersikulo?
Adunay daghang lainlaing espirituwal nga mga gasa. Aron makat-on mahitungod sa uban, basaha ang Moroni 10:8–18; Doktrina ug mga Pakigsaad 46:11–26; ug ang mosunod nga pamahayag ni Elder Marvin J. Ashton (1915–94) sa Korum sa Napulog Duha ka Apostoles:
Imahe
Hulagway ni Marvin J. Ashton.
Tugoti ko sa paghisgot og pipila ka mga gasa nga dili kanunayng makita o nakitaan og importansiya apan importante kaayo … : ang gasa sa pagpangutana; ang gasa sa pagpaminaw; ang gasa nga pagdungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panagbingkil; … ang gasa sa pagpangita kon unsa ang matarong; ang gasa nga dili dayon mohukom; ang gasa sa pagpangayo sa Dios og giya; … ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod.
(Marvin J. Ashton, “There Are Many Gifts [Adunay Daghang mga Gasa],” Ensign, Nob. 1987, 20)
Kinsa ang gipanalanginan sa Ginoo niini nga espirituwal nga mga gasa?
Unsa ang natabang niini kanimo aron makasabot mahitungod sa Ginoo?
Usa ka kamatuoran nga lagmit nimong maila mao nga ang Ginoo naghatag sa matag miyembro sa Iyang Simbahan og labing menos sa usa ka espirituwal nga gasa aron mopanalangin sa uban.
Pamalandongi kon unsang espirituwal nga mga gasa ang imong gibati nga gipanalangin sa Dios kanimo. Kon naglisod ka sa pag-ila sa imong espirituwal nga mga gasa, mahimong mangutana sa usa ka ginikanan o lider. Ang imong patriyarkal nga panalangin mahimong magpadayag usab sa pipila sa imong espirituwal nga mga gasa.
1. Tubaga ang mosunod nga mga pangutana diha sa imong journal sa pagtuon:
Unsa ang imong gibati mahitungod sa Langitnong Amahan ug kang Jesukristo, sa pagkahibalo nga Ilaha kang gipanalanginan og espirituwal nga gasa?
Sa unsang paagi nga ang pagkahibalo nga ikaw gihatagan og usa ka espirituwal nga gasa nakaimpluwensiya kon giunsa nimo pagtan-aw ang imong balaan nga pagkatawo?
Ngano sa imong hunahuna ang Dios naghatag og espirituwal nga mga gasa ngadto sa matag miyembro sa Simbahan ug dili lamang ngadto sa pipila ka mga miyembro?
Gusto sa Ginoo nga kita mopanalangin sa usag usa
Basaha ang 1 Mga Taga-Corinto 12:14–20 aron makita ang pagtandi nga gigamit ni Pablo aron matabangan kita nga maila ang importansiya sa atong indibidwal nga mga kontribusyon.
Sa unsa man gitandi ni Pablo ang Simbahan niini nga tudling? Unsa ang gitudlo niini nga pagtandi kanimo mahitungod sa espirituwal nga mga gasa?
Sa unsang paagi nga kamo napanalanginan pinaagi sa espirituhanon nga mga gasa sa uban?
Aron makita ang ehemplo sa usa ka tawo kinsa mipakigbahin sa ilang espirituwal nga mga gasa ngadto sa uban, mahimo ka nga motan-aw sa bidyo “With All Your Heart [Sa Tibuok Mong Kasingkasing]” (3:26), anaa sa ChurchofJesusChrist.org, nga nagsulti mahitungod sa usa ka batan-ong lalaki kinsa gitawag sa paggamit sa usa ka gasa gikan sa Ginoo nga bag-ohay lang niya nga nadiskobre. Samtang motan-aw kamo, hatagi og pagtagad ang mga pag-aghat gikan sa Espiritu Santo mahitungod sa paagi nga kamo makagamit sa inyong mga gasa sa pagpanalangin sa uban.
Pamalandongi giunsa sa espirituwal nga mga gasa nga gihatag diha kanimo pagpanalangin kanimo ug unsaon nimo paggamit niini aron sa pagpanalangin sa imong pamilya, ward o branch, ug ang uban. Mahimo nimong irekord sa imong journal sa pagtuon ang bisan unsa nga mga impresiyon gikan sa Espiritu Santo mahitungod sa imong mga gasa.
2. Tubaga ang duha o labaw pa sa mosunod nga mga pangutana diha sa imong journal sa pagtuon:
Sa imong hunahuna unsa ang gusto sa Ginoo nga imong masabtan mahitungod sa imong kaugalingon ug sa imong espirituwal nga mga gasa?
Unsa nga pagdasig ang mahimo nimong ikahatag sa usa ka tawo nga mibati nga siya walay espirituwal nga gasa?
Unsa ang usa ka espirituwal nga gasa nga imong gitinguha? Unsa ang imong mabuhat aron sa pagpangita niini nga gasa? (Ang Ginoo nagdapit kanato aron mangita og espirituwal nga mga gasa; tan-awa ang 1 Taga-Corinto 12:31; 14:1; Doktrina ug mga Pakigsaad 46:7–9.)
Unsa ang pipila sa mga paagi nga imong magamit ang imong espirituwal nga mga gasa aron mopanalangin sa uban? Sa unsang paagi kini makatabang kanimo aron mahimong mas mahisama sa Manluluwas?
Opsiyonal: Gustong Makakat-on Pa og Dugang?
Sa unsang paagi nako magamit ang akong espirituwal nga mga gasa aron sa pag-alagad sa uban?
Si Presidente Dieter F. Uchtdorf, kanhi sa Unang Kapangulohan, mipaambit unsaon nato pagsunod sa ehemplo ni Jesukristo:
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Kon ako maghunahuna sa Manluluwas, Siya akong mahulagway sa kanunay nga ang Iyang mga kamot gituyhad, nagkab-ot aron sa paghupay, pag-ayo, pagpanalangin, ug paghigugma. Ug kanunay Siyang nakig-istorya [uban], dili gayod mopakaubos, sa mga tawo. Gihigugma Niya ang mga mapaubsanon ug ang mga maaghop ug naglakaw taliwala kanila, nangalagad ngadto kanila ug nagtanyag og paglaom ug kaluwasan.
Mao kana ang Iyang gihimo atol sa Iyang mortal nga kinabuhi; mao unta kana ang Iyang buhaton kon nagpuyo pa Siya uban kanato karon; ug mao kana ang kinahanglan natong buhaton isip Iyang mga disipulo ug mga miyembro sa Ang Simbahan ni Jesukristo sa mga Santos sa Ulahing mga Adlaw. …
Samtang kita mosunod sa Iyang hingpit nga ehemplo, ang atong mga kamot mamahimong Iyang mga kamot; ang atong mga mata, Iyang mga mata; ang atong kasingkasing, Iyang kasingkasing.
(Dieter F. Uchtdorf, “Kamo ang Akong mga Kamot,” Liahona, Mayo 2010, 68)
Si Elder David A. Bednar sa Korum sa Napulog Duha ka Apostoles nagtudlo:
Imahe
Elder David A. Bednar, Korum sa Napulog Duha ka Apostoles opisyal nga hulagway. 2020.
Nakadawat kita og espirituwal nga mga gasa aron makapanalangin sa ubang tawo. Kon ang atong gitinguha mao ang pagdawat og usa ka gasa tungod kay gusto nato kini, kita posibleng dili makadawat niini. Samtang kita magtinguha nga moalagad sa uban sigon sa mga pagtulon-an ni Jesukristo, nan kita gipanalanginan og espirituwal nga mga gasa ug gipataas nga kapasidad nga naghimong posible sa pagpangalagad.
Unsa ang akong mabuhat kon dili nako mabati nga ako adunay importanteng espirituwal nga gasa?
Tambag gikan ni Elder Jeffrey R. Holland sa Korum sa Napulong Duha ka Apostoles mahimong makit-an diha sa bidyo “Mga Awit nga Naawit ug Wala Maawit” (gikan sa time code 0:57 hangtod 2:57). Kini nga bidyo anaa sa ChurchofJesusChrist.org.
Si Elder John C. Pingree Jr. sa Seventy mipakigbahin og usa ka ehemplo bahin sa usa ka sister kinsa nakat-on nga siya adunay usa ka espirituwal nga gasa nga wala niya mabantayi:
Imahe
Opisyal nga Hulagway ni Elder John C. Pingree , Jr. Gilitratohan niadtong Marso 2017.
Usa ka adlaw, usa ka dismayado nga sister nangamuyo, “Ginoo, unsay akong personal nga pangalagad?” Mitubag Siya, “Tan-awa ang uban.” Usa kadto ka espirituhanong gasa! Sukad niadto, nakaplagan niya ang kalipay sa pagtagad niadtong kanunay nga makalimtan, ug ang Dios mitrabaho pinaagi kaniya sa pagpanalangin og daghan. Ang atong ubang mga gasa dili makapainila nato pinaagi sa mga sumbanan sa kalibotan, apan importante kini sa Dios ug sa Iyang buhat.
Unsa ang angay nakong buhaton kon ako mobati og kakulang alang sa akong mga buluhaton sa Simbahan?
Si Presidente Dieter F. Uchtdorf, kanhi sa Unang Kapangulohan, mitudlo:
Imahe
Opisyal nga litrato ni Elder Dieter F. Uchtdorf sa Korum sa Napulog Duha ka Apostoles, 2006. Gitawag isip Ikaduhang Magtatambag sa Unang Kapangulohan, 3 sa Pebrero 2008. Gihimong opisyal nga litrato niadtong 2008 nga gipuli sa litrato nga gikuha niadtong 2004.
Tingali kamo mobati nga anaay uban nga labawng makahimo o may labaw nga kasinatian nga mas makahimo sa inyong mga calling ug ubang mga buluhaton labaw kay sa inyong mahimo, apan ang Ginoo naghatag ninyo niini nga mga responsibilidad nga may hinungdan. Tingali may mga tawo ug mga kasingkasing nga kamo ang bugtong makakab-ot ug makatandog. Tingali wala lain nga makahimo niini sa ingon nga pamaagi.
(Dieter F. Uchtdorf, “Mangusog Diha sa Imong Gibarogan,” Liahona, Nob. 2008, 56)
