Doktrinal nga Kahanas: 1 Mga Taga-Corinto 11:11

Ang mga Lalaki ug mga Babaye Parehas nga Mahinungdanon sa Plano sa Langitnong Amahan

Batan-ong magtiayon nagbarog sa gawas sa Ogden Utah Temple. Nagtan-aw sila sa templo diha sa luyo uban ni Anghel Moroni nga hapit diha sa kinababwan sa tunga sa imahe. Nagsul-ob siya [ang bana] og usa ka lubos nga asul nga suit nga adunay puti nga shirt nga may kwelyo. Siya [ang asawa] nagsul-ob og puti nga sinena. Kilom-kilom na padulong sa gabii.

Sa imong pagtuon sa 1 Mga Taga-Corinto 11, imong nakat-onan ang mahitungod sa giunsa sa Dios pagtan-aw ang talagsaon ug balaanong mga papel sa mga babaye ug mga lalaki. Ang tuyo niini nga leksiyon mao ang pagtabang kanimo nga madugangan ang imong kahanas niini nga mga pagtulon-an samtang imong memoryahon ang pakisayran ug ang mahinungdanong hugpong sa mga pulong sa kasulatan alang sa 1 Mga Taga-Corinto 11:11, sa pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Ipasabot ug isag-ulo

Tan-awa ang imong mga kamot. Obserbari giunsa nila pagkaparehas sa usag usa ug giunsa nila pagkalahi.

1. Tubaga ang mosunod nga mga pangutana diha sa imong journal sa pagtuon:

• Kon ang matag usa ka kamot makahimo sa paglihok sa tinagsa, ngano sa imong hunahuna gidisenyo sa Langitnong Amahan nga ang Iyang mga anak adunay duha ka mga kamot?

• Sa unsang paagi nga ang mga kalahian sa imong mga kamot nakatabang kanimo nga matuman ang mga tahas o magamit ang imong mga talento?

• Sa unsang paagi nga ang imong obserbasyon mahitungod sa imong mga kamot may koneksiyon sa 1 Mga Taga-Corinto 11:11?

Ang mosunod nga kalihokan makatabang nimo sa pagsag-ulo sa pakisayran sa doktrinal nga kahanas nga 1 Mga Taga-Corinto 11:11 ug sa iyang mahinungdanong hugpong sa pulong sa kasulatan, “Ang babaye nagkinahanglan sa lalaki ug ang lalaki nagkinahanglan usab sa babaye.”

Isulat ang mahinungdanong hugpong sa mga pulong sa kasulatan ug pakisayran sa kasulatan. Basaha o i-recite ang hugpong sa mga pulong ug pakisayran sa makadaghang higayon, nga papason o tangtangon ang mga pulong sa matag higayon. Padayon hangtod nga ikaw komportable na sa pagbalik og litok sa mahinungdanong hugpong sa mga pulong sa kasulatan ug pakisayran nga dili magtan-aw sa mga pulong.

Bansaya ang paggamit

Sa imong journal sa pagtuon, irekord ang mosunod nga mga baroganan sa pag-angkon og espirituhanong kahibalo:

1. Molihok inubanan sa hugot nga pagtuo

2. Susiha ang mga konsepto ug mga pangutana inubanan sa mahangtorong panglantaw

3. Tinguhaa ang dugang nga panabot pinaagi sa balaanong gitudlo nga mga tinubdan

Ihulagway ang matag baroganan sa duha o tulo ka mga kapahayag [sentence]. Mahimo sab kang modangop sa mga parapo 5–12 diha sa Mahinungdanong Dokumento sa Doktrinal nga Kahanas (2022) aron pagsusi sa imong kahibalo ug pagdugang og bisan unsang importanteng impormasyon nga lagmit imong nataligam-an.

Sa 1 Mga Taga-Corinto 11:11, imong nakat-onan nga sa plano sa Langitnong Amahan, ang mga babaye ug mga lalaki parehong mahinungdanon.

• Sa unsang paagi nga kining kamatuoran wala masabti o gibalewala sa katilingban?

• Unsa ang pipila sa mga sitwasyon sa imong kinabuhi diin lagmit aduna kay kahigayonan sa pagtudlo o pagdepensa niini nga kamatuoran?

Pagpili og usa sa mosunod nga mga senaryo, ug paghunahuna mahitungod sa unsaon nga ang paggamit sa mga baroganan sa pag-angkon og espirituhanong kahibalo makatabang sa usa ka tawo nga makasabot sa kamatuoran gikan sa 1 Mga Taga-Corinto 11:11 mahitungod sa mga papel sa mga lalaki ug mga babaye sa plano sa Langitnong Amahan.

1. Ang manghod nga babaye ni Kalee nga si Elle nakadungog sa pipila sa mga lalaki sa tulunghaan nga nagsulti nga ang mga lalaki mas importante kaysa mga babaye. Si Elle nangutana kang Kalee, “Dili ba ako bililhon sama sa mga lalaki?”

2. Si Reid nabalaka tungod kay siya nakadungog sa pipila sa iyang kaubang mga miyembro sa korum nga nag-istorya nga walay pagtahod mahitungod sa mga babaye.

3. Human makatan-aw og usa ka sikat nga salida, usa ka grupo sa mga higala nagbiay-biay sa kataw-anan nga mga aksiyon sa karakter nga amahan. Ang pipila miuyon nga ang amahan wala kinahanglana, ug usa ka higala miingon, “Kini mao ang hinungdan nga dili nimo kinahanglan ang usa ka lalaki aron pagtukod og usa ka malipayon nga pamilya.”

4. Sila si Esteban ug si Klara nag-andam nga kaslon sa templo. Ang ilang mga ginikanan nagsugyot nga sila mag-istorya mahitungod sa unsaon sa matag usa pagtuman sa lainlaing mga papel ug mga responsibilidad sa ilang umaabot nga pamilya.

2. Tubaga ang tulo sa mosunod nga mga pangutana diha sa inyong journal sa pagtuon:

Molihok inubanan sa hugot nga pagtuo

• Unsa ang mga paagi nga ikaw o ang indibidwal sa senaryo mahimong molihok inubanan sa hugot nga pagtuo agig tubag sa isyu nga gipasaka?

• Sa unsang paagi nga ang paghatag og bili sa talagsaon ug importanteng mga papel sa mga babaye ug mga lalaki nakatabang kanimo sa pagsunod kang Jesukristo?

Susiha ang mga konsepto ug mga pangutana inubanan sa mahangtorong panglantaw

• Unsa ang imong nasayran mahitungod sa Langitnong Amahan ug sa Iyang plano nga mahimong makatabang kon ikaw makahinagbo og usa ka sitwasyon sama niini?

• Unsa ang pipila sa mga papel sa mga lalaki ug mga babaye sa plano sa Langitnong Amahan?

Pangita og dugang nga impormasyon pinaagi sa balaanong gipili nga mga tinubdan

• Sa unsang paagi nga ang imong pagsabot ug pagpamatuod sa mga kamatuoran nga gitudlo sa 1 Mga Taga-Corinto 11:11 nakatabang kanimo sa pagtubag niini nga sitwasyon?

• Unsa ang lain pang dinasig nga mga pagtulon-an gikan sa mga kasulatan o sa mga lider sa Simbahan ang mahimong makatabang kanimo aron matinud-anong motubag?