1 Peteru 2–3

“O Outou o le Tupulaga Filifilia”

A group of young woman sit outside and socialize.

Pe ua fesiligia ea oe pe aisea ua e talitonu ai i ni upumoni faapitoa o le talalelei? Sa fautuaina e le Aposetolo o Peteru le Au Paia ina ia saunia i taimi uma e molimau atu i le upumoni ma faamanatu atu ia i latou lo latou tofi paia (tagai i le 1 Peteru 2:9 ; 3:15). O lenei lesona e mafai ona fesoasoani ia te oe ia malamalama i le taua o le avea ai ma se faataitaiga faamaoni o Iesu Keriso ma maua ai avanoa e faataitai ai ona e tali atu i isi e uiga i lou faatuatua.

Upu e faamatala ai soo o Iesu Keriso

Pe sa i ai ea se tasi sa ona maitauina e ese au faatinoga o ni mea ona o oe o se tagata o Le Ekalesia a Iesu Keriso o le Au Paia o Aso e Gata Ai?
O a ni ou aafiaga i lenei tulaga?
E faapefea sou lagona e uiga i le ese mai o oe nai le toatele o isi tagata i le lalolagi?

A o e suesue i le aso, mafaufau loloto pe aisea ma pe faapefea ona finagalo le Alii i Ona soo ia ilogagofie ma tulaga ese.

O le nuu na faatauina mai

Faitau le 1 Peteru 2:9 , ma vaavaai pe na faapefea ona faamatala e Peteru le Au Paia i ona aso.

O le a se mea o tulagaese ia te oe?
O a ni mea o faaali mai e nei upu e uiga i lagona o le Tama Faalelagi e faatatau ia te oe?

I aso nei, o le faaupuga faatauina mai e masani ona faauigaina o le “ese” po o le “tulaga ese.” E ui lava e finagalo le Alii i Ona soo ina ia ese mai le lalolagi, ae i ona po o Peteru o le faatauina mai atonu e ese se uiga na i ai.

Na aoao mai Peresitene Russell M. Nelson:

I le Feagaiga Tuai, o le upu Eperu na faaliliuina mai ai le faatauina mai o le segullah, o lona uiga “o se meatotino taua,” po o le “oa.” I le Feagaiga Fou, o le upu Eleni na faaliliuina mai ai le faatauina mai o le peripoiesis, o lona uiga “o se mea ua umia,” po o le “mauaina.”

O lea, ua tatou vaai i upu o tusitusiga paia faatauina mai ua ta’u mai ai ni “oa taua,” “faia” po o le “filifilia e le Atua.” Mo i tatou ua faailoaina e auauna a le Alii o lona nuu na faatauina mai o se faaeaea lea i se faatulagaga pito sili ona maualuga.

(Russell M. Nelson, “Children of the Covenant,” Ensign, Me 1995, 34)

E faapefea sou lagona i le iloaina ai e silatonu le Atua ia te oe o se oa tulaga ese ma taua?

Faitau le 1 Peteru 2:9–12 , ma vaavaai mo malamalamaaga i auala e mafai ona ese ai oe mai le lalolagi.

O le a se mea na e mauaina?
E tusa ai ma le fuaiupu 12 , e mafai faapefea ona tatou faatosinaina isi?

O se tasi upumoni e mafai ona tatou faailoa mai nei fuaiupu e faapea, e valaauina e le Atua Lana Au Paia ia tulaga ese mai le lalolagi ina ia mafai ai e isi ona vaai i a latou faataitaiga ma viia ai le Atua.

Mafaufau loloto le leoa i faamatalaga nei ma faatulaga oe lava mai le 1 i le 5, o le uiga o le 5 ua e ioe atoatoa i ai.

1. E faigofie ona iloa au e isi o se soo o Iesu Keriso.

2. I le avea ai ma se soo o le Faaola, ua ou malie ia ou ese mai le lalolagi atoa.

Aisea e faigata ai i ni isi taimi ona ese mai ia i latou o siomia oe?
O a ni isi o mea e mafai ona tatou faia e fesoasoani ai ia i tatou ia lagona atili le toamalie i le avea ai ma e e ilogagofie ma le tulaga ese mai le lalolagi?
O a ni isi o faataitaiga mai lou olaga po o tusitusiga paia o loo faaalia ai le ala na fesoasoani ai le tu ese mai le lalolagi i isi e latalata atili atu ai i le Atua?

Afai o iai, matamata le vitio “Unto All the World: Despoina’s Story” (3:12) or “Something Different About Us: Example” (2:51), o loo maua i le ChurchofJesusChrist.org, e iloa ai pe na faapefea ona fesoasoani se tagata talavou i isi ia faalatalata atili atu ia Iesu Keriso e ala i le tulaga ese mai le lalolagi.

Unto All The World: Despoina's Story
Unto All the World: Despoina's Story

Something Different About Us: Example
Luis sets an example for his friend who is not a member of the Church. He said of fulfilling his duties of the Aaronic Priesthood, “I’m representing Jesus Christ, and that’s amazing."

Ia saunia i taimi uma

Sa tusia e Peteru lana tusi i se taimi o sauaga matuia ma le liliuese. Sa faigata ona avea o se Kerisiano i lena taimi, e pei foi ona faigata ona avea ma se soo o Iesu Keriso i aso nei. Peitai, e mafai ona tatou fesoasoani i isi ia lagona le olioli o le ola ai i le talalelei pe a tatou naunau e faasoa atu mea ua tatou iloa ma lagonaina. I le faaaogaina o faamatalaga nei e lua, iloilo au tapenapenaga e faasoa atu lou faatuatua i isi. Faaaoga le fua lava e tasi o le 1 i le 5.

1. Ou te manao e faasoa atu i isi lo’u faatuatua ia Iesu Keriso ma [la’u] molimau.

2. Ou te talitonu i lo’u gafatia e faamalamalama atu ai lo’u faatuatuaga ma tali fesili e uiga i le talalelei a le Faaola.

Faitau le 1 Peteru 3:14–15 , ma vaavaai mo le fautuaga a Peteru i le faasoa atu o lo tatou faatuatuaga i isi.

E faapefea ona e aoteleina aoaoga a Peteru i au lava upu?
E faapefea ona e mauaina le faamoemoe ia Iesu Keriso ma Lana talalelei?

E mafai faapefea e le saunia ma le naunau e talanoa e uiga i le Faaola ma Lana talalelei ona faamanuiaina ai isi?

O se tasi o auala aoga e “saunia ai pea” ( 1 Peteru 3:15) o le faataitai lava pe faapefea ona e tali atu i fesili ma maitauga e uiga i au amioga, talitonuga, po o le Ekalesia lava ia.

1. Faamaea laasaga nei i lau api faamaumau mo suesuega:

Laasaga 1: Filifili ia le itiiti ifo ma le lua ni fesili nei e te fiafia i ai pe tusi ni fesili na fesiligia ai oe e uiga i lou faatuatua talu ai nei.

Ua ou faalogo i tagata o fai mai “E laveai e Iesu.” O le a le uiga o lena mea?
Aisea e tetee ai lau Ekalesia i le inuina o le kofe ma le lauti?
Aisea e te alapo ai e alu i se vasega seminare?
Aisea e popole ai Iesu Keriso po o le a le ituaiga gagana tatou te faaaogaina? O le a se eseesega o iai?
Aisea e tatau ai ona tatou tausi le Aso Sapati ia paia? Pe le o le Aso Sa ea ua na o se tasi o aso masani?

Laasaga 2: Mafaufau pe faapefea ona e tali atu i au fesili filifilia, ona fatu lea o se tali mo fesili taitasi. Ia aofia ai mafaufauga pe faapefea e lou faatuatua ma le faamoemoe ia Iesu Keriso ona aafia ai lau tali.

Laasaga 3: Tusi pe aisea e te manatu ai e taua le tulai matila ma tautala atu i isi e uiga i lou faatuatua ia Iesu Keriso. Afai e te lagona le le mautonu, mafaufau ma le agaga tatalo pe faapefea ona e saunia oe lava e faia o lea.

Faitalia pe Fai: O e Manao e Suesue Atili?

1 Peteru 2:9 . E faapefea ona fesootai aoaoga a Peteru i tagata o le Ekalesia i lo tatou tisipenesione?

Na faasoa mai e Peresitene Gordon B. Hinckley (1910–2008) le ala e fesootai ai aoaoga a Peteru i tagata o le Ekalesia i la tatou tisipenesione. Maimoa i le “O Se Tupulaga ua Filifilia,” o loo maua i le ChurchofJesusChrist.org, mai le faailotaimi 13:47–17:37.

“A Chosen Generation”
President Gordon B. Hinckley delivers a message titled "A Chosen Generation."

Na faapea mai Sister Becky Craven o le Au Peresitene Aoao o Tamaitai Talavou:

Tatou te lē tuua i lalo o tatou tulaga faatonuina ina ia tatou ofi faatasi ma isi pe ia faatoamalie ai se isi tagata. O tatou o soo o Iesu Keriso, ma i le avea ai ma soo, o le tatou tiute o le faamapu’e o isi, siitia i latou i se nofoaga maualuga atu ma paia atu lea e mafai foi ona latou selesele ai i faamanuiaga silisili. …

E mafai ea e isi ona vaaiagofie Ona fofoga i o tatou foliga ma iloa po o ai o tatou sui ai e ala i le auala tatou te faatautaia ai ma le faaeteete o tatou olaga?

I le avea ai ma ni tagata osifeagaiga, e le o faamoemoe tatou te milo fefiloi ma le lalolagi. Ua ta’ua i tatou o le “nuu na faatauina mai” ( 1 Peteru 2:9)—e ma’eu lava lea faamamaluga! A o faateleina ona opogi e faatosinaga a le lalolagi o mea leaga, e tatau ona tatou taumafai ma le filiga atoa ia tumau mausali i luga o le ala lea e taitai atu ai i tatou ma le saogalemu i le Faaola, ma le faalauteleina le va o lo tatou olaga osifeagaiga ma faatosinaga faalelalolagi.

(Becky Craven, “Faaeteete faasaga i le Faasamasamanoa,” Ensign po o le Liahona, Me 2019, 10)

E mafai faapefea ona ou saunia ma tali atu ma le mataalia pe a fesiligia a’u e uiga i o’u talitonuga?

Na aoao mai Peresitene Russell M. Nelson:

I le avea ai ma soo o Iesu Keriso, e mafai e outou taitoatasi ona ola e tusa ai ma Ana aoaoga. E mafai ona ia te oe le “loto ma lima mama”; e mafai ona “iloa fofoga o le Atua i ou [foliga].”O le a iloagofie e isi tagata a outou galuega lelei. E mafai ona susulu mai le malamalama o le Alii mai o outou mata. Faatasi ai ma lena malamalama, ua tatau ai ona e saunia e tali ni fesili. Na fautua mai le Aposetolo o Peteru e faapea, “Ia saunia pea lava outou e tali atu ia i latou taitasi o e fesili mai ia te outou i le uiga o le faamoemoe o loo ia te outou” ( 1 Peteru 3:15).

Ia avea lau tali o se tali agalelei ma le fiafia. Ma ia talafeagai lelei lau tali ma lena tagata. Manatua, o ia foi o se atalii/afafine o le Atua, o lena lava Atua e finagalo ia agavaa lena tagata mo le ola faavavau ma ia toe foi atu ia te Ia i se aso. Atonu o oe le tagata tonu lava e tatalaina le faitotoa i lona faaolataga ma le malamalamaaga i le aoaoga faavae a Keriso.

(Russell M. Nelson, “Ia Fai Oe ma Faaaoao i e ua Faatuatua,” Ensign po o le Liahona, Nov. 2010, 48)

Ae a pe afai ou te ma e tulai atu mo o’u talitonuga?

I le vitio “Dare to Stand Alone” (4:20), o loo maua i le ChurchofJesusChrist.org, ua faasoa mai ai e Peresitene Thomas S. Monson (1927–2018) se tala mai lana aoaoga faamiliteli e uiga i le mauaina o le lototele e tulai atu ai mo ona talitonuga, e tusa lava pe na ia lagonaina le tuuatoatasi.