1 Peteru 1–5

“Silisili Ona Aoga i le Auro”

Atonu e te manatua lou aoao ai e uiga i le faatuatua ma le filiga o le Aposetolo o Peteru a o e suesueina le afa muamua o le Feagaiga Fou. O le tusi muamua a Peteru sa tusia agai atu i le faaiuga o le soifuaga o Peteru, i le tele o tausaga talu ona la savavali ma talanoa ma Iesu Keriso i le taimi o le galuega a le Faaola i le lalolagi. I lana tusi muamua, sa taulai atu ai Peteru, o lē sa avea ma Aposetolo sinia, i auala e mafai ona faamalosia ai le Au Paia a o feagai ma tofotofoga ogaoga i lima o tagata Roma. O lenei lesona e mafai ona fesoasoani e te malamalama atili ai i faamoemoega a le Atua i le faatagaina o oe e oo i tofotofoga ma mafai ona faamalosia ai lau taulaigamau e onosaia ma le faamaoni ia tofotofoga.

Aisea tatou te oo ai i faigata i le olaga?

Sa faamalamalama mai e Elder Dale G. Renlund o le Korama a Aposetolo e Toasefululua le auala o le a oo ai ia i tatou uma aafiaga e foliga mai e le fetaui. Matamata i le vitio “Faaituau Faaosolilivau,” o loo i le ChurchofJesusChrist.org, mai le taimi faailo 3:19 i le 4:12, pe faitau le faamatalaga lenei:

Faapito’au Faaosolilivau

Ua aoao mai Elder Renlund e faapea e le tatau ona tatou faatagaina le faapito’au tatou te lilivau ai pe faavaivaia ai lo tatou faatuatua ae e ao ona ole atu i le Atua mo se fesoasoani ma ia faateleina lo tatou faalagolago i le Faaola.

O ni isi faaitu’au e le mafai ona faamatalaina, o faaitu’au e aunoa ma ni mafuaaga e faaosolilivau. O le faaitu’au e mafua mai i le ola faatasi ma tino e le atoatoa, faamanu’alia, pe faama’ia. O le natura lava o le olaga faitino e oo mai ai le faaitu’au. E i ai ni isi tagata e fananau mai i le tele o le tamaoaiga; o isi e leai. O ni isi e i ai matua alolofa; o isi e leai. O ni isi e tele tausaga e ola ai; o isi e laiti. Ma faapena ai pea lava pea. O ni isi tagata e faia ni measese faataumaoi, e ui lava o loo latou taumafai e fai mea lelei. O ni isi e filifili e ’aua nei faaitiitia le faaitu’au pe a latou mafaia. Ma le faaonoono lava, o ni isi ua faaaogaina lo latou faitalia na tuuina mai e le Atua e faatiga ai i isi e ui lava ina sa matua le tatau ona latou faia.

(Dale G. Renlund, “Faapito’au Faaosolilivau,” Liahona, Me 2021, 42)

• Aisea e te manatu na faaaoga ai e Elder Renlund le upu “faaosolilivau” e faamatala ai ni isi o mea faaitu’au tatou te oo i ai i le olaga?

• O ai e te iloa o loo feagai pe sa feagai ma se tofotofoga e lagona ai le faaitu’au faaosolilivau? Aisea e te manatu ai ua faatagaina e le Alii lenei mea e tupu?

I le TA 64, sa faatamaia ai e le afi vaega tetele o le aai o Roma. Sa tuuaia e tagata lauiloa o Roma ia tagata o le Ekalesia i le amataina o le afi, lea na oo ai i sauaga tetele o tagata Kerisiano i le Malo atoa o Roma. E foliga mai na tusia e Peteru lana tusi muamua i se taimi ina ua mavae lenei mea e faamalosia ai le faatuatua o le Au Paia ma faamanatu atu ai ia i latou lo latou taui e faavavau mo le onosaia ma le faamaoni o tofotofoga. A o e suesue, ia gauai atu i uunaiga a le Agaga Paia lea e mafai ona fesoasoani ia te oe e malamalama ai i ni isi o mafuaaga mo ou lava tofotofoga ma le ala e mafai ai ona e faalagolago ia Iesu Keriso e fesoasoani ia te oe e onosaia ma le faamaoni na tofotofoga.

O le afi a le tunu auro

Faitau le 1 Peteru 1:3–9, ma vaavaai mo mea na aoao mai e le Aposetolo o Peteru e uiga i faamanuiaga o loo faatalitali mai mo i latou o e onosaia ma le faamaoni o latou tofotofoga. O le upu tofotofoga i le fuaiupu 6 e faatatau i luitau ma puapuaga (tagai 1 Peteru 1:6, vaefaamatalaga e).

• O a upu po o fasifuaitau mai nei fuaiupu e te manatu e ono fesoasoani e manatua pe a feagai oe po o isi ma tofotofoga? Aisea?

• Aisea e te manatu na faatusa ai e Peteru le tofotofoina o le faatuatua o le Au Paia i auro lea e faamamaina i le afi?

O se ata lenei o se faatanoa e faausi ai uamea. O se faatanoa o se koneteina lea e faausi ai uamea e pei o le auro. A faamamaina uamea, e faavevelaina ma faausiina e aveese ai otaota ma faaleleia ai le oloa faaiu.

• O a ni auala e ono avea ai le faatuatua ua suesueina, pe tofotofoina e “silisili ona aoga i le … auro”? ( 1 Peteru 1:7).

O se tasi upumoni e mafai ona faailoa mai fuaiupu na faatoa e suesueina e faapea, a o tatou onosaia ma le faamaoni ia tofotofoga, e faamamaina ma faamalosia o tatou faatuatua ia Iesu Keriso. Mafaufau e tusifaamaumau lenei upumoni i au tusitusiga paia po o lau api faamaumau mo suesuega.

• O le a le mea e faatatau i le oo i tofotofoga faigata lea e mafai ona faamalosia ai lo tatou faatuatua ia Iesu Keriso?

E ui o le feagai ai ma faigata e mafai ona faamamaina faaleagaga mo le toatele o tagata, ae e i ai isi ua tiga pe ua faamaaaina o latou loto i le mavae ai o se tofotofoga faigata (tagai i le Alema 62:41).

• E te manatu o le a se mea e mafai ona fesoasoani ia i tatou e liliu ai o tatou tofotofoga i ni faamanuiaga nai lo aafiaga e faaitiitia ai lo tatou faatuatua?

• O a ni aafiaga na e oo i ai, po o a ni aafiaga ua e iloa, ina ua faamalosia lou faatuatua po o le faatuatua o se isi tagata e ala i le onosaia ma le faamaoni o tofotofoga faigata?

• O a ni mea o aoao atu e nei aafiaga ia te oe e uiga i le Alii?

Matamata i le vitio “The Refiner’s Fire” (5:02), o loo maua i le ChurchofJesusChrist.org, e vaai ai i se tasi o faataitaiga o se tagata sa faamalosia e le Faaola a o ia onosaia ma le faamaoni ona tofotofoga.

The Refiner's Fire

The refiner’s fire is not a comfortable place to be. It involves intense heat and repeated hammering. But it is in the refiner’s fire we are purified and prepared to meet God.

O Peteru o loo fautuaina le Au Paia

O se autu o loo maua i le tusi muamua atoa a Peteru, o auala e mafai e soo o Iesu Keriso ona onosaia ma le faamaoni puapuaga ma sauaga. O le fautuaga a Peteru e mafai ona tuuina atu ai le faamoemoe, faamalosiauga, ma le malosi i soo se tasi o loo feagai ma se tofotofoga o le olaga faitino.

1. Faamaea le gaoioiga lenei i lau api faamaumau mo suesuega:

Tusi se ata faigofie o se faatanoa [e faausi ai uamea], e pei o le ata na e vaai muamua ai i le lesona. I totonu o le faatanoa, lisi ai ni isi o tofotofoga ma puapuaga na feagai ma oe pe o loo feagai nei ma oe.

A o e suesue atili i upu a Peteru, vaavaai mo aoaoga e mafai ona fesoasoani ia te oe i tofotofoga na e lisiina i lau ata. Tusifaamaumau nei aoaoga i fafo ane o lau ata o se faatanoa.

Filifili ia le itiiti ifo ma le lua ni seti o fuaiupu nei e suesue ai a o e vaavaai mo mataupu faavae e mafai ona e faaopoopo i lau ata. A o e faia, mafaufau loloto i le fesili lenei: E mafai faapefea e nei aoaoga ona fesoasoani ia te au po o se isi tagata o feagai ma se tofotofoga faigata?

• 1 Peteru 2:20–25—O le faataitaiga a Iesu Keriso o le onosaia o tofotofoga

• 1 Peteru 4:12–19—Mafuaaga e olioli ai i o tatou tofotofoga

• 1 Peteru 5:6–11—Mauaina o le malosi o le Alii e onosaia ai o tatou tofotofoga

Tuu i le faitalia: O e Manao e Aoao Atili?

1 Peteru 2:20. Aisea na aoao mai ai Peteru e tatau ona tatou puapuagatia ma le onosai i o tatou tofotofoga?

Na aoao mai e Elder Neal A. Maxwell (1926–2004) o le Korama a Aposetolo e Toasefululua le mea lenei:

O le onosai e fesootai vavalalata lava i le faatuatua i lo tatou Tama Faalelagi. O le mea moni, pe a tatou soona le onosai ua tatou faapea ane, ua tatou iloa le mea e sili ona lelei—e sili atu nai lo o le Atua. Pe ua tatou tautino atu o lo tatou taimi faatulagaina e sili atu nai lo Lana taimi. … O le mea lea, e pei ona faailoa mai, o le onosai o se uiga mama taua faaleolaga nei e fua i lo tatou faatuatua, lo tatou faitalia saoloto, o o tatou uiga faaalia i le olaga, o lo tatou lotomaualalo, ma o tatou mafatiaga. … E leai lava se isi auala faigofie e maua ai le tuputupu ae moni.

(Neal A. Maxwell, “Patience” [faigalotu a le Iunivesite o Polika Iaga, Nov. 27, 1979], 1, 4, speeches.byu.edu)

E mafai faapefea ona ou faatoilaloina tofotofoga o loo feagai ma au?

Na aoao mai e Elder Neil L. Andersen o le Korama a Aposetolo e Toasefululua le mea lenei:

I totonu o le faatanoa o faigata o tofotofoga faalelalolagi, ia agai pea i luma ma le onosai, ma o le a aumaia ia te oe e le mana faamalolo o le Faaola le malamalama, mafaufau manino, filemu, ma le faamoemoe. Tatalo ma lou loto atoa. Faamalosia lou faatuatua ia Iesu Keriso, i Lona moni a’ia’i, i Lona alofa tunoa. … Vaai i luma. O o outou mafatiaga ma faanoanoaga e moni lava, ae o le a lē tumau e faavavau.  O le a mou atu lou po pogisa, ona [sa toetu mai] le Atalii … ma le faamalologa i ona apaau.

(Neil L. Andersen, “Manu‘a,” Liahona, Nov. 2018, 85)

E mafai faapefea ona ou maua le fiafia a o ou puapuagatia ai i tofotofoga?

Na saunoa Elder Joseph B. Wirthlin (1917–2008) o le Korama a Aposetolo e Toasefululua e uiga i le mauaina o le fiafia i taimi o faigata ma le manatuaina o le fautuaga a lona tina e faapea, “Ia tuu po o le a lava se mea e tupu, ma fiafia pea.”

E mafai faapefea ona tatou fiafia i aso ua faatumulia i le faanoanoa? Tatou te le mafaia—i le taimi lava lea. Ou te le manatu na fautua mai lo’u tina matou te taofia le lotovaivai pe faafitia le moni o le tiga. Ou te le manatu sa ia fautua mai ia matou ufiufi upumoni faalemanuia i lalo o se ofutalaloa o le fiafia taufaaoleole. Ae ou te talitonu o le ala tatou te tali atu ai i faigata e mafai ona avea o se vaega taua tele i le auala e mafai ai ona tatou fiafia ma faamanuiaina i le olaga. Afai tatou te taulimaina ma le atamai ia puapuaga, o o tatou taimi sili ona faigata e mafai ona avea ma taimi o le tuputupu ae silisili, lea e mafai ona oo atu ai i taimi o le fiafiaga silisili. …

A o tatou vaavaai mo tala malie, saili mo le vaaiga e faavavau, malamalama i le mataupu faavae o le toe tauia, ma faalatalata atu i lo tatou Tama Faalelagi, e mafai ai ona tatou onosaia faigata ma tofotofoga. E mafai ona tatou faapea atu, e pei ona faia e lo’u tina, “Ia tuu po o le a lava se mea e tupu, ma fiafia pea.”

(Joseph B. Wirthlin, “Ia Tuu Po o le A Lava se Mea e Tupu, Ia Fiafia Pea,” Liahona, Nov. 2008, 26–28)