Atamai i Aoaoga Faavae: 1 Peteru 4:6

“[Na] Folafola Atu Ai le Talalelei i E Ua Oti”

I lau suesuega o le 1 Peteru 4, na e aoao ai na faatuina e le Faaola le galuega faafaifeautalai i le lalolagi o agaga ina ia mafai ai e fanau uma a le Tama Faalelagi ona maua se avanoa e maua ai le faaolataga. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le 1 Peteru 4:6. E mafai foi ona fesoasoani ia te oe e faamatala ai le aoaoga faavae o loo aoaoina i lena fuaitau. Ona e maua lea o le avanoa e faaaoga ai lena aoaoga faavae ma mataupu faavae o le mauaina o le malamalama faaleagaga i se ata faataitai moni.

Tauloto ma faamatala

Faaalu sina taimi e tusi ai se ata o le ata o le faaolataga.

1. Tali fesili nei i totonu o lau api faamaumau mo suesuega:

• Sa aoaoina fanau uma a le Atua i le talalelei i le muai olaga. O le a le mea na tupu ia i latou o e na taliaina le talalelei e ala i le filifilia o le fuafuaga a le Atua? O le a le mea na tupu ia i latou na teenaina?

• O faapefea ona aoaoina le talalelei iinei i le lalolagi?

• O le a le mea e tupu ia i latou o e e le maua lava le avanoa e aoao ai ia Iesu Keriso pe maua sauniga faatagaina o le perisitua i lenei olaga?

• O fea e mafai ona tatou faitau i ai e uiga i lenei mea i le Feagaiga Fou?

Tusi le mau faasino o le atamai i aoaoga faavae ma le fasifuaitau autu o le mau “ 1 Peteru 4:6: ‘[Na] folafola atu ai le talalelei i e ua oti’” i luga o se fasipepa. Tape pe ufiufi le tolu i le fa upu po o numera, ma taumafai e tauloto le mau faasino ma le fasifuaitau faatasi ai ma vaega o loo misi. Faaauau lenei faagasologa seia oo ina mafai ona e taulotoina atoa le mau faasino ma le fasifuaitau autu o le mau mai le mafaufau.

Faataitai le faaaogaaga

I le lesona ua mavae atu, sa e aoaoina ai le upumoni lenei mai le 1 Peteru 4:6: Ua folafola atu le talalelei i e ua maliliu ina ia latou maua avanoa lava e tasi e pei o i latou o e ua faalogo i le talalelei i le olaga nei.

Faaaoga le ata faataitai lenei e faataitai ai le faaaogaina o lenei upumoni ma mataupu faavae o le mauaina o le malamalama faaleagaga.

Ata Faataitai: Vaega 1

Vaai faalemafaufau e i ai sau uo e igoa ia Iasoni o loo feiloai ma faifeautalai. Ua talosaga Iasoni tou te o faatasi i le seminare e aoao atili ai e uiga i le talalelei. I lona aso muamua i le seminare, na fai atu ai lou faiaoga i le vasega e toefaamanatu ma se paga ia mataupu faavae o le mauaina o le malamalama faaleagaga. Ua liliu atu Iasoni ia te oe ma fesili, “O a mataupu faavae o le mauaina o le malamalama faaleagaga?”

• E faapefea ona e muai faailoa atu ia Iasoni ia mataupu faavae o le mauaina o le malamalama faaleagaga? (Mafaufau e toefaamanatu palakalafa 5–12 i le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) pe a e manaomia le fesoasoani i le taliina o lenei fesili.)

Ata Faataitai: Vaega 2

Mulimuli ane i lena vaiaso, na feiloai ai Iasoni ma faifeautalai i lo outou fale. Ua e fesoasoani i faifeautalai e aoao atu e uiga i uluai mataupu faavae ma sauniga o le talalelei, e aofia ai le faatuatua ia Iesu Keriso ma le papatisoga e ala i le faatofuina mo le faamagaloga o agasala. Ua faaaoga e faifeautalai le Ioane 3:5 e aoao atu ai o le papatisoga e ala i le pule tatau o le perisitua e alagatatau ai ina ia faaolaina ai i le malo o le lagi. Ua mafaufau Iasoni i lena mea mo sina taimi, ona foliga faanoanoa teisi lea. Sa fesili se tasi o faifeautalai pe aisea ua faanoanoa ai o ia, ma sa tali Iasoni, “E lei papatisoina lava lo‘u tamamatua, ae o ia o se tagata lelei tele o lē sa fai mai i taimi uma sa manao e ola i se olaga lelei ina ia mafai ai ona alu i le lagi. Pe o le a ia oo ea i ai?” Ua e faia se tatalo le leoa, ole atu i le Tama Faalelagi pe mafai faapefea ona e fesoasoani ia Iasoni. O le manatu e faaaoga mataupu faavae o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 ua oo mai i lou mafaufau.

2. Faamaea mea nei i totonu o lau api faamaumau mo suesuega:

Otooto pe mafai faapefea ona e faaaogaina mataupu faavae e tolu o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 e fesoasoani ai ia Iasoni ia ona maua tali i lana fesili ma lagona ai le toafilemu e uiga i lona tamamatua. A uma ona otooto atu, saunia se tali mo Iasoni. Mafaufau po o a fesili o le a e fai atu e fesoasoani ai ia te ia ia iloa ma lagonaina le moni o le aoaoga faavae. Ia mautinoa e aofia ai mataupu faavae uma e tolu o le mauaina o le malamalama faaleagaga ma le aoaoga faavae o loo aoao mai i le 1 Peteru 4:6 i lau tali.

Afai e manaomia, e mafai ona e faaaogaina nisi po o fesili uma nei e taiala ai oe.

• E mafai faapefea ona e fesoasoani ia Iasoni ia maua se vaaiga e faavavau? O le a se mea e te ta‘u atu ia Iasoni e uiga i le Tama Faalelagi ma Iesu Keriso e mafai ona tuuina atu ia te ia le toafilemu e uiga i lona tamamatua?

• E faaopoopo ai i le 1 Peteru 4:6, o a nisi o punaoa mamana filifilia e mafai ona e faasoa atu ia Iasoni e fesoasoani ai ia te ia ia lagona le faamoemoe e ala ia Iesu Keriso? E faapefea ona e faaaogaina nei fuaitau e fesoasoani ai ia Iasoni ia iloa le upumoni?

• O le a se foliga o le faatino i le faatuatua i le tulaga o Iasoni? O le a se mea e te valaaulia o ia e fai?

• O a ni aafiaga na e maua i le faia o galuega faalemalumalu po o talafaasolopito o aiga mo ou tuaa e mafai ona e faasoa atu ia Iasoni?

• O le a se mea o le a e molimau atu ai e fesoasoani ai i lau uo?