1 Peteru 3:18–22; 4:1–6

O Le Galuega o le Faaolataga mo E Ua Maliliu

O tagata o le aiga i Taiuani o loo tilotilo i tusiata tuai.

O le a le mea o le a tupu i le faitau piliona o fanau a le Tama Faalelagi o e sa ola ma maliliu e aunoa ma le avanoa e faalogo ai ia Iesu Keriso pe taliaina sauniga faatagaina i Lona suafa? Na aoao mai le Aposetolo o Peteru e faapea, sa talai atu e Iesu Keriso le talalelei i le lalolagi o agaga ina ua mavae Lona maliu, ma mafai ai ona avanoa faamanuiaga o le talalelei i fanau uma a le Tama Faalelagi. O lenei lesona o le a fesoasoani e te saili ai auala e fesoasoani ai i le Faaola i Lana galuega o le faaolaina o e ua maliliu.

O se fesili faafaigata

Na saunoa mai Elder D. Todd Christofferson o le Korama a Aposetolo e Toasefululua:

Ua leva ona tauivi le au failotu Kerisiano [tagata atamamai] ma le fesili, O le a le taunuuga o le anoano o piliona o tagata o e na ola ma maliliu e aunoa ma se malamalama e uiga ia Iesu?

(D. Todd Christofferson, “The Redemption of the Dead and the Testimony of Jesus,” Ensign, Nov. 2000, 9)

E ono faapefea ona e tali atu i se tagata e fesili atu ia te oe i le fesili lenei?

Sa faaauau le saunoaga a Elder Christofferson:

Faatasi ai ma le Toefuataiga o le talalelei a Iesu Keriso, ua oo mai ai le malamalama i le auala e faaolaina ai i latou na maliliu ae lei papatisoina ma le avea ai o le Atua o “se Atua ua atoatoa, faamasinotonu, ma o se Atua alofa mutimutivale foi” [Alema 42:15].

(D. Todd Christofferson, “The Redemption of the Dead and the Testimony of Jesus,” 9)

O le Faaola i le lalolagi o agaga

E ui ina toefuatai mai le malamalama o le faaolataga mo e ua maliliu e ala mai i le Perofeta o Iosefa Samita, ae o loo i ai i le Tusi Paia ia fuaitau o loo faaali mai ai ia i tatou o na upumoni sa malamalama i ai ma aoaoina e Aposetolo anamua. Mo se faataitaiga, na aoao mai le Aposetolo o Peteru e uiga i le mea na faia e Iesu Keriso mo i latou o e na maliliu e aunoa ma se malamalama i le talalelei.

Faitau le 1 Peteru 3:18–20,” 4:6 e vaai po o le a le mea na aoao mai e Peteru e uiga i le ala na faaauau ai e Iesu Keriso Lana galuega e laveai fanau a lo tatou Tama Faalelagi, e oo lava ina ua mavae Lona maliu. Maitau le eseesega o nei fuaiupu i le Faaliliuga a Iosefa Samita (tagai 1 Peteru 3:20, vaefaamatalagaa, ma le 1 Peteru 4:6, vaefaamatalagaa).

O le1 Peteru 4:6 o se fuaitau o le atamai i aoaoga faavae.  Mafaufau e maka fuaitau o le atamai i aoaoga faavae i se ala iloga ina ia mafai ai ona e mauaina gofie.

O a ni mea o aoao mai e nei fuaiupu ia te oe e uiga i le galuega a le Faaola i le lalolagi o agaga?
E tusa ai ma le 1 Peteru 4:6, aisea ua talaiina atu ai le talalelei ia i latou o e ua maliliu?
E faapefea ona avea le aoaoga faavae o le faaolataga mo e ua maliliu, o se faaaliaina o le agaalofa ma le alofa mutimutivale o le Atua mo Lana fanau?

Faaaliga i ona po nei e uiga i le lalolagi o agaga

O faaaliga i ona po nei e mafai ona fesoasoani ia i tatou e aoao atili ai e uiga i mea na faia e le Faaola a o i ai o Ia i le lalolagi o agaga.

A o faitau ma mafaufau loloto Peresitene Iosefa F. Samita (1838–1918) i nei lava fuaiupu i le 1 Peteru, sa ia maua se faaaliga o le galuega a le Faaola i e ua maliliu. O lenei faaaliga o loo tusia i le Mataupu Faavae ma Feagaiga 138 ma o loo aofia ai faamatalaga auiliili sa lei iloaina muamua e tagata o le Ekalesia. Mafaufau e tusi se mau fesootai po o se sootaga a le 1 Peteru 4:6 i le Mataupu Faavae ma Feagaiga 138 i au tusitusiga paia.

Faitau le Mataupu Faavae ma Feagaiga 138:29–34, 57–58, ma vaavaai mo ni malamalamaaga faaopoopo e uiga i le galuega a le Faaola i le lalolagi o agaga.

Tusitusi i luga o se fasipepa i se peni po o se penitala.

O lo tatou tiutetauave

Na saunoa Elder Dale G. Renlund o le Korama a Aposetolo e Toasefululua e uiga i le tiutetauave ua ia i tatou e fesoasoani ai i le Faaola i Lana galuega o le faaolaina o e ua maliliu. Atonu e te manao e matamata le vitio “Galuega o Talafaasolopito o Aiga ma le Malumalu: Faamauga ma le Faamalologa,” o loo maua i luga o le ChurchofJesusChrist.org, mai faailo taimi 3:01 i le 3:47, pe faitau le faamatalaga lenei:

Talafaasolopito o Aiga ma le Galuega o Malumalu: Faamauga ma le Faamalologa
Ua aoao mai Elder Renlund a tatou faia galuega mo talafaasolopito o aiga ma le malumalu mo o tatou tuaa, o le a faaee mai e le Atua faamanuiaga i itu uma e lua o le veli.

I le avea ai ma tagata o le Ekalesia, ua i ai ia i tatou se tiutetauave paia e saili o tatou tuaa ma tuufaatasi talafaasolopito o aiga. E sili mamao atu lenei nai lo o se mausa faaosofia, ona o sauniga o le faaolataga e tatau mo fanau uma a le Atua. E ao ona tatou faailoaina o tatou lava tuaa o e na maliliu e aunoa ma le mauaina o sauniga o le faaolataga. E mafai ona tatou faia ia sauniga e fai ma sui i totonu o malumalu, ma e ono mafai ona filifili o tatou tuaa e talia ia sauniga. Ua uunaia foi i tatou ia fesoasoani atu i tagata o le uarota ma le siteki i o latou igoa faaleaiga. E maofa ma ofoofogia e faapea, e ala atu i talafaasolopito o aiga ma galuega o le malumalu, e mafai ai ona tatou fesoasoani e togiola e ua maliliu.

(Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46–47)

Na faapefea e le auai i talafaasolopito o aiga ma galuega faalemalumalu ona aafia ai lou olaga po o olaga o isi? Afai e te lei auai lava i ai, o le a sou manatu e faapefea ona ono aafia ai lou olaga?

Faaaoga se taimi nei lava e auai pe aoao atili ai e uiga i le galuega o le faaolataga mo e ua maliliu. E fuafua i le taimi ma punaoa o loo avanoa i la outou eria ma le gagana, filifili se tasi pe sili atu foi o filifiliga nei mo lenei gaoioiga:

Asiasi i le FamilySearch.org pe faaaoga le polokalama o le Gafa o le Aiga i le FamilySearch. Vaai pe mafai ona e mauaina igoa o tuaa o loo manaomia pea ona faia a latou sauniga o le perisitua. A le o le faaleoleo o nei igoa ma ave e oe lava ia i le malumalu pe auina atu igoa i le malumalu ina ia mafai ai e se isi tagata ona faia sauniga mo i latou. E mafai ona faaaoga le vaega o Sauniga ua Saunia e fesoasoani ia te oe e iloa vave ai tuaa o e manaomia sauniga o le perisitua. (Mo faatonuga o le auala e faaaoga ai lenei matapule, tagai i le “Polokalama o le Gafa o le Aiga: Sauniga ua Saunia,” New Era, Ian. 2019, 45.)

Asiasi i le vaega “Talafaasolopito o Aiga” i Autu o le Talalelei (topics.ChurchofJesusChrist.org) e sue ai faamatalaga, mau, savali o konafesi aoao, ma vitio e uiga i talafaasolopito o aiga.

Asiasi i vitio ua tuufaatasia o le “Talafaasolopito o Aiga” i le Potutusi o Ala o Faasalalauga (videos.ChurchofJesusChrist.org) e sue ai vitio musuia e uiga i le auai i galuega o malumalu ma talafaasolopito o aiga.

Fai se lisi o fesili e uiga i ou tuaa e mafai ona e fesili atu ai i ou matua po o isi tagata o lou aiga. I se taimi talafeagai, fai atu au fesili ma talanoaina pe mafai faapefea e lou aiga ona auai faatasi i le galuega o le malumalu ma talafaasolopito o aiga.

I le avanoa o i lalo, faamatala po o le fea filifiliga na e filifilia ma mea sa e aoaoina pe lagonaina a o e faia lenei gaoioiga.

Tuu i le faitalia: O e Manao e Aoao Atili?

O le a lo’u tiutetauave i o’u tuaa ua maliliu?

Na aoao mai Elder Quentin L. Cook o le Korama a Aposetolo e Toasefululua:

O Aa ma Lala
Ua aoao mai e Quentin L. Cook le taua o le faanatinatiina o le galuega faalemalumalu ma talafaasolopito o aiga i o tatou aso, e aofia ai e ala i tekinolosi o nei ona po.

Ua manino le aoaoga faavae o le aiga e faatatau i talafaasolopito o aiga ma galuega o le malumalu. Na faatatau le Alii i uluai faatonuga faafaaaliga i le “papatisoga mo o outou tagata maliliu” [Mataupu Faavae ma Feagaiga127:5; ua faaopoopoina le faamamafa]. O la tatou matafaioi faaleaoaoga faavae ua faatatau lea i o tatou lava tuaa. E mafua lenei mea ona o le faatulagaga faaselesitila o le lagi e faavae lea i aiga. Ua uunaia e le Au Peresitene Sili le au paia, aemaise lava le autalavou ma talavou nofofua matutua, ia faamamafa galuega o talafaasolopito o aiga ma sauniga mo igoa o o latou lava aiga po o igoa o tuaa o tagata o a latou uarota ma siteki. E manaomia ona tatou fesootai atu i o tatou aa ma lala uma.

(Quentin L. Cook, ““O A’a ma Lala,”,” Liahona, Me 2014, 45)

Na aoao mai Peresitene Thomas S. Monson (1927–2018):

E lei ta’uina mai lava e le Alii, i lo’u malamalama, e faapea o Lana galuega e gata i le olaga faaletino. Peitai, o Lana galuega e aofia ai le faavavau. Ou te talitonu o loo Ia faanatinatiina Lana galuega i le lalolagi o agaga. Ou te talitonu foi o le Alii, e ala i Ana auauna iina, o loo sauniaina le tele o agaga e talia le talalelei. O la tatou galuega o le sailia lea o o tatou tagata ua maliliu ona o atu lea i le malumalu ma faatino ia sauniga paia o le a tuuina atu ai ia i latou o i tua atu o le veli ia avanoa lava e tasi o loo tatou maua. …

Ou uso e ma tuafafine, ou te molimau atu o le a faamanuiaina i tatou e le Alii ao tatou taliaina ma tali atu i lenei lu’i.

(Thomas S. Monson, “Hastening the Work,” Ensign, Iuni 2014, 4–5)

E mafai faapefea ona ou aafia i galuega faalemalumalu ma talafaasolopito o aiga?

Ina ia vaai i mea ua aoao mai e Elder David A. Bednar o le Korama a Aposetolo e Toasefululua e uiga i lenei galuega taua, matamata i le “The Time Is Now” (3:19), o loo maua i le ChurchofJesusChrist.org.

The Time Is Now
O loo talanoa Elder Bednar ma le autalavou e uiga i le faiga o suesuega o talafaasolopito o aiga ma le taua o le auai i le galuega o le malumalu.

Na folafola mai e Peresitene Russell M. Nelson:

Soo se taimi e te faia aisoo se mea e fesoasoani ai isoo se tasi—po o le fea lava le itu o le veli—e laa agai i luma i le osia o feagaiga ma le Atua ma mauaina o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. E faapena lona faigofie.

(Russell M. Nelson ma Wendy Nelson, “Faamoemoe o Isaraelu” faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, 15, ChurchofJesusChrist.org)

E mafai faapefea e galuega o le malumalu ma talafaasolopito o aiga ona faamanuiaina a‘u?

I lana savali o le konafesi aoao ia Aperila 2018, sa lisi mai ai e Elder Dale G. Renlund o le Korama a Aposetolo e Toasefululua le tele o faamanuiaga e mafai ona tatou maua mai le auai i galuega o le malumalu ma talafaasolopito o aiga. Matamata i le fuaitau lenei pe faitau le savali atoa (Dale G. Renlund, “Galuega o Talafaasolopito o Aiga ma le Malumalu: Faamauga ma le Faamalologa,” Liahona, Me 2018, 46–49).

Matamata i le “Faaolaina o E Ua Maliliu ua Togiolaina A‘u” (4:57), o loo maua i le ChurchofJesusChrist.org, e vaai ai pe na faapefea ona faamanuiaina se tasi o alii e ala i le faia o lenei galuega.