Marrja e Njohurisë Shpirtërore, Pjesa 3

Kërko Kuptueshmëri të Mëtejshme nëpërmjet Burimeve të Caktuara në Mënyrë Hyjnore

Njëri prej qëllimeve të zotërimit doktrinor është të të ndihmojë të mësosh dhe zbatosh parimet për marrjen e njohurisë shpirtërore. Ky mësim mund të të ndihmojë të kuptosh rëndësinë e kërkimit të së vërtetës nëpërmjet burimeve që Ati Qiellor dhe Jezu Krishti kanë ofruar me dashuri.

Ku kërkon për përgjigje?

Për një minutë, përpiqu të gjesh informacionin e mëposhtëm.

Motin për fundjavën e ardhshme
Emrin e kryeqytetit të Groenlandës
Një recetë gatimi me makarona ose oriz

Merr parasysh pyetjet që vijojnë.

Çfarë burimesh përdore (apo do të përdorësh normalisht) për të kërkuar informacion?
Pse u beson këtyre burimeve për informacion në lidhje me këto lloj pyetjesh?

Ku mund të gjejmë përgjigje nga Perëndia?

Ku do të sugjeroje që njerëzit të kërkojnë përgjigje për pyetjet e rëndësishme rreth Perëndisë, Kishës apo planit të shpëtimit?

Mendo për çdo pyetje që ke për Perëndinë, Kishën ose planin e shpëtimit. Kjo mund të përfshijë informacione që i ke lexuar ose dëgjuar për të cilat pyet veten apo të duken shqetësuese. Kërko që të të udhërrëfejë Fryma e Shenjtë për të mësuar parimet në këtë mësim të cilat mund të të ndihmojnë.

Lexoji fragmentet e mëposhtme, duke kërkuar se si burimet e së vërtetës që jepen mësim në këto fragmente mund të na bekojnë.

Efesianëve 4:11–14
2 Timoteut 3:15–17
Jakob [Bibël] 1:5–6
Paragrafi 11 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2022)

Po sikur të mos jem i/e sigurt se sa i besueshëm është një burim informacioni?

Një nga mënyrat më të zakonshme për të kërkuar informacione sot është duke përdorur internetin. Nëpërmjet internetit, ne kemi qasje te shumë burime të mira informacioni. Në të njëjtën kohë, interneti na ekspozon ndaj shumë burimeve jo të besueshme dhe të pavërteta informacioni. Plaku Nil L. Andersen, i Kuorumit të Dymbëdhjetë Apostujve, paralajmëroi:

“Informacioni në internet nuk ka një filtër ‘të së vërtetës’. Disa informacione, pavarësisht se sa bindëse duken, thjesht nuk janë të vërteta.”

(Nil L. Andersen, “Jozef Smithi”, Liahona, nëntor 2014, f. 29)

Lexoje paragrafin 12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor. Merr parasysh të mbash shënim arsyen përse është e rrezikshme t’i kërkosh përgjigjet për pyetjet shpirtërore nga burime të panjohura ose të pasigurta.

Kur has informacione të reja për Perëndinë, Kishën ose planin e shpëtimit, është e dobishme t’i bësh vetes pyetje si ato në vijim në lidhje me burimin e informacionit. Ndërsa i lexon më thellësisht këto pyetje, kërko ato që mendon se do të ishin më të dobishme kur vendos a do t’i besosh ose jo një burimi. (Gjithashtu mund të studiosh secilën prej referencave shoqëruese të shkrimeve të shenjta.)

Disa pyetje për vlerësimin e informacionit të ri

Çfarë ndjeva nga Fryma e Shenjtë kur e lexova apo e dëgjova këtë informacion? (Shih te Doktrina e Besëlidhje 50:23–24.)
A më sjell ky informacion më afër Jezu Krishtit dhe Kishës së Tij? (Shih te Moroni 7:15–17.)
A më nxit ky informacion që t’i zbatoj urdhërimet e Perëndisë?
A pajtohet me atë që na mësohet në shkrimet e shenjta dhe nga profetët bashkëkohorë? (Shih te 2 Timoteut 3:15–17; Doktrina e Besëlidhje 1:38.)
A e pohon atë që kam ndier tashmë të më thotë Fryma e Shenjtë se është e vërtetë apo a më nxit t’i vë në dyshim të vërtetat e ungjillit? (Shih te Moroni 10:5.)
A vjen informacioni nga një burim që Shpëtimtari ose udhëheqësit e Kishës së Tij do ta konsideronin të besueshëm?
Çfarë do të thoshin prindërit apo udhëheqësit e mi të Kishës për këtë informacion? (Nëse ndihem i/e tunduar të mos ua tregoj, çfarë më tregon kjo për burimin në fjalë?)

Cila nga këto pyetje mendon se do të ishin më të dobishme për ty? Përse?
Çfarë pyetjesh të tjera mendon se duhet të bëjë dikush për informacionin që has?

Zgjidh një pjesë të informacionit që ke dëgjuar ose një pyetje që ke për Perëndinë, Kishën ose planin e shpëtimit. Pastaj gjej disa minuta për të ushtruar kërkimin për përgjigjet duke përdorur burimet e caktuara në mënyrë hyjnore. Ndër të tjera, mund të marrësh parasysh

lutjen;
kërkimin e shkrimeve të shenjta duke përdorur Udhëzuesin për Shkrimet e Shenjta ose fragmentet e zotërimit doktrinor;

kërkimin e bisedave të konferencave të përgjithshme, faqen Gospel Topics [Temat e Ungjillit] në ChurchofJesusChrist.org ose programin kompjuterik Gospel Library [Biblioteka e Ungjillit];
leximin e pjesëve që kanë lidhje me materialet e Kishës të tilla si te Për Forcën e Rinisë (broshurë, 2011) ose Gospel Topics [Temat e Ungjillit], topics.ChurchofJesusChrist.org;
vënien në kontakt me dikë që njeh dhe i mirëbeson, si një prind, peshkop, udhëheqës të të rinjve ose të rejave në lagjen apo degën tënde, ose mësues/e seminari, për të të ndihmuar të gjesh përgjigje.

Fakultative: Dëshiron të Mësosh më Shumë?

Çfarë duhet të bëj nëse nuk mund të gjej një përgjigje për një pyetje përmes burimeve të caktuara në mënyrë hyjnore?

Plaku Nil L. Andersen, i Kuorumit të Dymbëdhjetë Apostujve, dha mësim:

“Jo të gjitha përgjigjet do të vijnë menjëherë, por shumica e pyetjeve mund të gjejnë zgjidhje nëpërmjet studimit të sinqertë dhe kërkimit të përgjigjeve nga Perëndia. …

Besimi nuk kërkon kurrë një përgjigje për çdo pyetje, por kërkon sigurinë dhe guximin që të shkojmë përpara, ndonjëherë duke e pranuar: ʻUnë nuk di çdo gjë, por di mjaftueshëm që të vazhdoj në udhën e dishepullimitʼ.

Zhytja e vetes në dyshime të vazhdueshme, e ushqyer me përgjigje nga ata që janë pa besim dhe jo besnikë, e dobëson besimin e një njeriu te Jezu Krishti dhe Rivendosja.”

(Nil L. Andersen, “Besimi Nuk Vjen nga Rastësia, por nga Zgjedhja”, Liahona, nëntor 2015, f. 66)

Pse duhet të jem i/e kujdesshëm/me për të kërkuar përgjigje për Kishën nga ata që janë larguar prej saj?

Plaku Nil A. Maksuell (1926–2004), i Kuorumit të Dymbëdhjetë Apostujve, tha:

“Disa ngulin këmbë që ta studiojnë Kishën vetëm nëpërmjet syve të braktisësve të saj – është si të intervistosh Judën për të kuptuar Jezusin. Braktisësit përherë na tregojnë më shumë për veten sesa për atë nga e cila janë larguar.”

(Neal A. Maxwell, “All Hell Is Moved” [takim shpirtëror në Universitetin “Brigam Jang”, 8 nëntor 1977], f. 3, speeches.byu.edu)

Si mund të ndikojnë tek unë shpirtërisht burimet e informacionit që unë zgjedh?

Shih materialin filmik “Burime të Caktuara në Mënyrë Hyjnore” (9:16), që gjendet në ChurchofJesusChrist.org. Shih se si të rinjtë në materialin filmik u ndikuan nga ajo që zgjodhën të dëgjojnë dhe se ku zgjodhën të kërkonin për përgjigje.

Divinely Appointed Sources
There is a lot we have to filter through to get to the truth, but Heavenly Father has given us divinely appointed sources to help us improve our understanding.

Materiali filmik “In Search of Truth” [“Në Kërkim të së Vërtetës”] (3:03), në dispozicion në ChurchofJesusChrist.org, mund të jetë i dobishëm gjithashtu.