Mateu 3:13–17, Pjesa 1

Jezu Krishti u Pagëzua nga Gjon Pagëzori

Jezu Krishti erdhi te Gjon Pagëzori që të pagëzohej prej tij. Ky mësim mund të të ndihmojë të kuptosh dhe shpjegosh rëndësinë e pagëzimit në ungjillin e Jezu Krishtit.

Rëndësia e pagëzimit

Mendo për njerëz të cilët i do, që nuk janë anëtarë/e të Kishës së Jezu Krishtit të Shenjtorëve të Ditëve të Mëvonshme. Përfytyro sikur njëri/a prej tyre po takohej me misionarët. Si do të ndiheshe? Përfytyro sikur misionarët të kërkuan të shpjegosh rëndësinë e të qenit i/e pagëzuar. Mendo për atë që mund të thuash që mund ta ndihmojë njeriun tënd të dashur të ndërmarrë këtë hap thelbësor.

• Në një shkallë nga 1 deri në 10 (1 = i/e papërgatitur; 10 = jashtëzakonisht i/e përgatitur), sa i/e përgatitur do të ndiheshe për të shpjeguar rëndësinë e pagëzimit në një mënyrë që mund ta ndihmojë dikë të cilin e do që të dëshirojë të pagëzohet?

• Çfarë mund të duash të dish më shumë për pagëzimin që të ndihesh më i/e përgatitur për ta shpjeguar rëndësinë e tij?

Në mësimin e sotëm ti do të kesh mundësinë të studiosh doktrinën e pagëzimit dhe të bësh pyetje të ndryshme mbi temën. Ti gjithashtu do të kesh mundësinë të ushtrosh shpjegimin e asaj që mëson.

Jezu Krishti u pagëzua për të na treguar udhën

Jezusi udhëtoi nga Galilea në Betabara, me gjasë në këmbë, që të pagëzohej nga Gjon Pagëzori (shih Mateu 3:13 , Gjoni 1:28 , 1 Nefi 10:9). Gjoni mbante çelësat e Priftërisë Aarone dhe po pagëzonte njerëz në lumin Jordan (shih Udhëzuesi për Shkrimet e Shenjta, “ Gjon Pagëzori ”, scriptures.ChurchofJesusChrist.org). Duke përdorur një nga shkallët matëse në hartë, vlerëso distancën që përshkoi Shpëtimtari.

• Çfarë mund të të mësojë rreth Shpëtimtarit dhe pagëzimit përpjekja e Tij për t’u pagëzuar nga Gjoni?

Lexo te Mateu 3:13–17 dhe përfytyro sikur je i/e pranishëm/me në pagëzimin e Shpëtimtarit. Kërko hollësi të rëndësishme për Shpëtimtarin dhe pagëzimin që dëshiron të mbash mend.

1.

• Nëse do të ishe i/e pranishëm/me në pagëzimin e Shpëtimtarit, çfarë do të doje të mbaje mend nga përvoja?

• Çfarë mendon se do të kishe mësuar për Shpëtimtarin dhe pagëzimin?

Mendo për atë që mund t’i tregosh mikut ose pjesëtarit tënd të familjes për pagëzimin e Jezu Krishtit që mund ta ndihmojë.

Mund të jetë gjithashtu e dobishme të marrësh parasysh se çfarë pyetjesh mund t’i bësh mikut ose pjesëtarit tënd të familjes për pagëzimin. Disa nga pyetjet e tyre mund të marrin përgjigje te Mateu 3 . Përveç kësaj, Libri i Mormonit është një burim i frymëzuar që sqaron shumë të vërteta për pagëzimin. Pyetjet e mëposhtme janë shembuj të pyetjeve që mund të ketë dikush që nuk e kupton rëndësinë e pagëzimit. Zgjidh një pyetje që mendon se mund të ketë miku ose pjesëtari yt i familjes. Pastaj studio vargjet përkatëse në Librin e Mormonit dhe shiko se si mund të të ndihmojnë t’i përgjigjesh asaj pyetjeje.

• Edhe pse Jezusi u pagëzua, a duhet të pagëzohem edhe unë? Përse po ose përse jo? (Shih 2 Nefi 9:21, 23–24 ; 2 Nefi 31:5, 10–11 .)

• Pse do të doja të pagëzohesha? Çfarë bekimesh do të merrja? (Shih 2 Nefi 31:12–13, 17–18 .)

• Jezusi shkoi te Gjon Pagëzori për t’u pagëzuar. Kush mund të më pagëzojë mua? (Shih 3 Nefi 11:19–22 .)

• Jezusi u pagëzua në lumin Jordan dhe doli nga uji. A duhet të futem plotësisht në ujë ose a ka ndonjë mënyrë tjetër për t’u pagëzuar? (Shih 2 Nefi 31:13 ; 3 Nefi 11:23–26 .)

• Nëse unë pagëzohem për t’u pastruar nga mëkati, pse u pagëzua Jezusi? A nuk ishte Ai pa mëkat? (Shih 2 Nefi 31:5–11 .)

2. Shkruaje përgjigjen tënde për shtysën në vijim në ditarin tënd të studimit.

Duke përdorur atë që ke mësuar nga Mateu 3:13–17 dhe Libri i Mormonit, shkruaj se si do t’ia shpjegosh rëndësinë e pagëzimit pjesëtarit të familjes ose mikut tënd.

Nëse ndihesh i/e frymëzuar, merr parasysh t’ia thuash shpjegimin tënd një miku apo pjesëtari të familjes që nuk është pagëzuar si anëtar i Kishës së Jezu Krishtit të Shenjtorëve të Ditëve të Mëvonshme. T’ia thuash shpjegimin dikujt që tashmë është pagëzuar mund të ishte gjithashtu një veprimtari e vlefshme.

Fakultative: Dëshiron të Mësosh më Shumë?

Mateu 3:13 . Pse Jezusi shkoi te Gjoni për pagëzim?

Jozef Smithi shpjegoi autoritetin që kishte Gjon Pagëzori kur tha:

“Gjoni, në atë kohë, ishte i vetmi administrues i ligjshëm në çështjet e mbretërisë që ishte asokohe mbi tokë dhe i cili mbante çelësat e fuqisë. Judenjtë duhej t’u bindeshin udhëzimeve të tij ose të mallkoheshin, sipas vetë ligjit të tyre. … Biri i Zakarias mezi i mori çelësat, mbretërinë, fuqinë, lavdinë nga judenjtë, me vajosje të shenjtëruar dhe vendim të qiellit.”

(Mësimet e Presidentëve të Kishës: Jozef Smith [2009], f. 85; shih edhe Doktrina e Besëlidhje 84:23–28 .)

Si e di se pagëzimi është thelbësor?

Shpëtimtari dha mësim për natyrën thelbësore të pagëzimit kur i tha Nikodemit se kërkohej për të hyrë në mbretërinë e Perëndisë (shih Gjoni 3:5). Profeti Jozef Smith gjithashtu dha mësim se pagëzimi ishte vendimtar për shpëtimin:

“Pendohuni për gjithë mëkatet tuaja dhe pagëzohuni në ujë për heqjen e tyre, në emrin e Atit, dhe të Birit, dhe të Frymës së Shenjtë; dhe merrni ordinancën e vendosjes së duarve prej atij që është shuguruar dhe vulosur në këtë fuqi, që ju të mund të merrni Shpirtin e Shenjtë të Perëndisë; dhe kjo është sipas Shkrimeve të Shenjta dhe Librit të Mormonit; dhe mënyra e vetme se si një njeri mund të hyjë në mbretërinë çelestiale.”

(Mësimet e Presidentëve të Kishës: Jozef Smith [2009], f. 160–161.)

Si mund ta sqarojë Libri i Mormonit doktrinën e pagëzimit të dhënë mësim në Bibël?

Plaku Ted R. Kelister, i Presidencës së Të Shtatëdhjetëve, dha mësim:

“Libri i Mormonit vepron vazhdimisht si një dëshmitar vërtetues, qartësues e bashkues i doktrinave që jepen mësim në Bibël, në mënyrë që të jetë “një Zot i vetëm, një besim i vetëm, një pagëzim i vetëm. …

Ekzistojnë metoda të ndryshme pagëzimi në botë sot, megjithëse Bibla na e tregon mënyrën me të cilën u pagëzua Shpëtimtari, Shembulli ynë i madh: ‘[Ai] doli nga uji’ ( Mateu 3:16). A mund të dilte Ai nga uji nëse nuk ishte futur më parë në ujë? Që të mos ketë ndonjë mosmarrëveshje mbi këtë temë, Libri i Mormonit e largon atë me këtë thënie të drejtpërdrejtë për doktrinën lidhur me mënyrën e përshtatshme të kryerjes së pagëzimit: ‘Dhe atëherë do t’i zhytni në ujë dhe do të dilni përsëri nga uji’ ( 3 Nefi 11:26).”

(Ted R. Kelister, “Libri i Mormonit – një Libër nga Perëndia”, Ensign ose Liahona, nëntor 2011, f. 75–76.)