Ngāue 10–15

Vakai Fakalūkufuá

Hili e Toetuʻu ʻa Sīsū Kalaisí, naʻá Ne fekau ʻEne kau ʻAposetoló ke nau akoʻi mo papitaiso e kakai ʻi he puleʻanga kotoa pē (vakai, Mātiu 28:19). Naʻe kamata ke fakahoko ʻa e fekau ko ʻení ʻi he taimi naʻe maʻu ai ʻe ha Senitaile angatonu ko Koniliusi mo e ʻAposetolo ko Pitá ha ngaahi fakahā pea naʻe tataki fakalangi kinaua ke na fetaulaki. Naʻe papitaiso ʻe Pita ʻa Koniliusi, pea naʻe mafola mei ai ʻa e ongoongoleleí ki he kau Senitailé. Ka naʻe kei fakafepakiʻi pē ʻe ha niʻihi e ngāue ʻa e kau ʻAposetoló, ʻa ia ko e meʻa ia naʻe hoko ʻi he taimi naʻe fakapoongi ai ʻa e ʻAposetolo ko Sēmisí pea tuku pōpula ʻa Pitá. Hili ha ngaahi lotu lahi ʻa e kau māʻoniʻoní, naʻe fakatauʻatāinaʻi ʻa Pita mei he fale fakapōpulá ʻe ha ʻāngelo. ʻI he fakaʻamu ʻa e ongo ʻAposetolo ko Paula mo Pānepasá ke tokoni ki hono fakahoko e fekau ke akoʻi e ngaahi puleʻanga kotoa peé, naʻá na mavahe ai ʻo ngāue fakafaifekau. Ne na fehangahangai foki mo ha fakafepaki lahi ka naʻe tāpuekina kinaua ʻaki ha lavameʻa lahi; naʻe tali ʻe he tokolahi ʻo e kau Senitaile ne na akoʻí ʻa e ongoongolelei ʻo Kalaisí. Naʻe tupu ha ngaahi fehuʻi fekauʻaki mo e fiemaʻu ke kamu e kau papi ului Senitailé pea tauhi ki he fono ʻa Mōsesé. Naʻe ʻave ʻa e fehuʻí kia Pita mo e kau taki kehe ʻo e Siasí, ʻa ia naʻa nau fealēleaʻaki fakataha mo maʻu ha fakahā fekauʻaki mo e meʻa ko iá.