Seminare
Galuega 10, Vaega 1

Galuega 10, Vaega 1

“E Lē Faailogaina Tagata e Le Atua”

Ua faafeiloai e Konelio ia Peteru i fafo o lona fale. O va’aiga e le faaaogina e aofia ai Konelio o loo tootutuli, o Peteru o loo faatula’i mai ia Konelio mai le eleele, o laufanua o siomia ai, ma isi na aofia ai i le pueina o le ata.

Ina ua faaali atu Iesu i Ona soo ina ua mavae Lona Toetu, sa Ia poloaiina i latou e talai atu le talalelei i le lalolagi atoa (tagai Mataio 28:19–20). O le taimi muamua sa tele ina faasoa atu le talalelei i tagata Iutaia, ma sa faaauau pea e Peteru ma isi soo ona taulai atu a latou taumafaiga faafaifeautalai ia i latou. O Konelio, o se tagata Nuu Ese sa alofa i le Atua ma sailia Lana taitaiga, sa faatonuina e ala i se avefeau faalelagi e saili le Aposetolo o Peteru. I le taimi lava lea, sa maua ai e Peteru se faaaliga lea na fesoasoani ia te ia e malamalama atili ai i lagona o le Tama Faalelagi e uiga i Ana fanau uma. O lenei lesona e mafai ona fesoasoani ia te oe e vaai atili ai i isi tagata e faapei o le silasila a le Tama Faalelagi ma Iesu ia i latou.

O a mea o loo ua e vaaia?

O ao i se lagi susulu

Vaai atu i ao (i fafo po o le ata lenei) ma faamatala mea o loo e vaaia.

  • Aisea e ono tilotilo ai ni tagata se toalua i ao lava e tasi ae eseese mea la te vaaia?

  • Aisea e ono tilotilo atu ai ni tagata se toalua i se isi tagata ae eseese la laua vaaiga i lena lava tagata?

  • O le a se mea ua e iloa e uiga i le silasila a le Tama Faalelagi ma Iesu Keriso ia i tatou taitoatasi?

A o e suesue, manatua o le ala e te vaai atu ai i tagata atonu e ese i nisi taimi mai le silasila a le Tama Faalelagi ma Iesu Keriso ia i latou. Faataga le Agaga Paia e taiala oe i mea atonu e manaomia ona e faia ina ia atili faaōgatusa atoatoa ai au vaaiga ma le silafaga a le Tama Faalelagi ma Iesu Keriso.

Ua aoao atu e Peteru ia Konelio, o se tagata Nuuese

E oo mai i le taimi lea i ona po o le Feagaiga Fou, sa folafola atu le talalelei, ma ni nai tuusaunoaga, ia tau lava na o tagata Iutaia, e pei ona faatonuina ai e le Faaola (tagai i le Mataio 10:5–6). Sa i ai ni nai tagata o le Ekalesia a Keriso na fananau mai o ni tagata Nuuese (e le o ni tagata Iutaia), ae ua uma ona latou liliu atu i le talitonuga faa-Iutaia a o le’i mulimuli ia Keriso. Peitai, sa ta’u atu e le Faaola i Ona soo a afio ifo le Agaga Paia i luga ia te i latou, ona latou folafola atu lea o le talalelei “i le tulu’iga o le lalolagi” (Galuega 1:8). I le Galuega 10 tatou te faitau ai i se suiga maoae i le ala na faagaoioia ai le Ekalesia ina ia faataunuu ai lenei mea.

Faitau le Galuega 10:1–8 e aoao ai e uiga ia Konelio. Vaavaai mo faailoga o le ala na silasila ai le Tama Faalelagi ia Konelio.

  • O le a se mea sa e aoaoina e uiga ia Konelio mai nei fuaiupu?

  • O le a se mea na e maua e ta’u mai ai lagona o le Tama Faalelagi e uiga ia Konelio?

A o malaga atu auauna a Konelio e su’e le Aposetolo o Peteru, sa aoao e le Alii ia Peteru e uiga i Lana silafaga i tagata uma. Faitau le Galuega 10:9–16 ma tusi se ata o le mea e te manatu atonu na foliga i ai le faaaliga a Peteru.

  • Aisea na popole ai Peteru e uiga i le mea na faatonuina o ia e fai i le faaaliga?

Sa ola ae Peteru o se tagata Iutaia, ma mulimuli i poloaiga ma uputuu o le tulafono a Mose. O lenei tulafono o loo i ai ni tuutuuga mamafa i mea e mafai ma e lē mafai ona aai ai tagata (tagai i le Levitiko 11). O manu sa faatagaina tagata Iutaia e aai ai sa taua e “mamā,” a o manu sa faasa e le Atua ia tagata Iutaia ona aai ai sa taua e “lē mama.”

Sa lei malamalama muamua Peteru i le uiga atoa o le faaaliga. A o ia mafaufau loloto i ai, sa taunuu mai auauna na auina mai e Konelio. Na ta’u atu e le Agaga ia Peteru e o atu ma nei alii i le fale o Konelio (tagai i le Galuega 10:17–20).

Faitau le Galuega 10:25–29, 34–35, ma vaavaai mo mea na oo ina aoaoina ai Peteru i le uiga o le faaaliga vaaia na ia mauaina. Pe mafai fo’i ona e matamata i le vitio “Peter’s Revelation to Take the Gospel to the Gentiles” (o loo maua i le ChurchofJesusChrist.org) mai le faailotaimi 3:29 i le 5:29.

9:7

Peter's Revelation to Take the Gospel to the Gentiles

Peter follows the commandment of the Lord to take the gospel to the Gentiles. Acts 10:1–48; 11:1–18

Vaavaai i le fuaiupu 34 mo le upumoni na aoaoina e Peteru e uiga i le silasila a le Tama Faalelagi i Ana fanau uma. Mafaufau e faailoga le upumoni na e mauaina.

Tusitusi i luga o se fasipepa i se peni po o se penitala. 1. Tusi i lau api faamaumau mo suesuega le uiga ia te oe o le “E lē faailogaina tagata e le Atua.”

  • O le a sou manatu na faapefea ona suia e le faaaliga a le Tama Faalelagi le loto ma le vaaiga a Peteru? E mafai faapefea e le malamalama ai i lenei faaaliga ona suia loto o tagata i aso nei?

Ina ua malamalama Peteru sa finagalo le Atua ia aoao atu le talalelei i tagata uma, sa ia talai atu le sāvali a Iesu Keriso ia Konelio ma ona aiga ma uo (tagai i le Galuega 10:36–43).

Atonu e te manao e matamata le vitio “Peter’s Revelation to Take the Gospel to the Gentiles,” o loo maua i le ChurchofJesusChrist.org, mai le faailotaimi 5:30 i le 7:44.

9:7

Peter's Revelation to Take the Gospel to the Gentiles

Peter follows the commandment of the Lord to take the gospel to the Gentiles. Acts 10:1–48; 11:1–18

Tusitusi i luga o se fasipepa i se peni po o se penitala. 2. Tali fesili nei i totonu o lau api faamaumau mo suesuega:

  • O le a sou manatu e faapefea e le soifuaga ma le misiona a Iesu Keriso ona faaalia ai le alofa o le Atua mo tagata uma?

  • E mafai faapefea e le manatua e faatauaina e le Tama Faalelagi ma Iesu Keriso tagata uma ona aafia ai lau vaai ma le taulimaina o isi?

  • O le a se mea e mafai ona e faia e saili ai le fesoasoani a le Tama Faalelagi e vaai atu ai i isi e pei ona Ia faia?

A o molimau atu Peteru e uiga ia Iesu Keriso, sa afio ifo le Agaga Paia i luga o Konelio ma lona aiga. Ona valaaulia lea o i latou e Peteru ina ia papatisoina (tagai i le Galuega 10:44–48). O le faaaliga a le Atua ia Peteru na suia ai faiga masani a le Ekalesia, ma sa amata ona talai atu le talalelei i tagata uma.

Tusitusi i luga o se fasipepa i se peni po o se penitala. 3. Faamaea le vaega lenei i totonu o lau api faamaumau mo suesuega:

Mafaufau pe o le a faapefea ona ese le lalolagi po o lou atunuu, lotoifale, aoga, po o le aiga pe afai o le a vaai atu fanau uma a le Tama Faalelagi, i le tasi ma le isi, i le ala e silasila mai ai o Ia ia i tatou.

Filifili se tasi o nei siosiomaga. Faamatala po o a eseesega e te ono vaaia pe ana vaai tagata o i lenei siosiomaga i isi e pei o le ala e silasila mai ai le Tama Faalelagi ma Iesu Keriso ia i latou.

Tuu i le Faitalia: O e Manao e Aoao Atili?

O ai o le a talia e Iesu Keriso i Lana Ekalesia ma Lona mālo?

Na faamatala mai e Peresitene Russell M. Nelson:

18:51

Ia Faamuamua le Atua

Ua faamatalaina e Peresitene Nelson ia feagaiga a Isaraelu o aso e gata ai e pei o i latou o e o loo faamuamua le Atua i o latou olaga. Ua ia valaaulia i tatou e avea le Atua ma faatosinaga sili ona taua i o tatou olaga.

Ata aloaia o Peresitene Russell M. Nelson na pu’e ia Ianuari 2018

E tofu i tatou ma se gafatiaga paia ona o tagata taitoatasi o se atalii po o se afafine o le Atua. E tutusa tagata taitoatasi i Lana silafaga. O faatatauga o lenei upumoni e loloto. Uso e ma tuafafine, faamolemole faalogo ma le toto’a i le mea o le a ou fai atu ai. E le sili le alofa o le Atua i le tasi ituaiga [tagata] nai lo le isi. Ua manino Lana aoaoga faavae i lenei mataupu. Ua Ia valaaulia tagata uma e o mai ia te Ia, “uliuli ma le paʼepaʼe, e pologa ma le saoloto, o tane ma fafine” [2 Nifae 26:33].

Ou te faamautinoa atu ia te outou o lo tou tulaga amanaia i luma o le Atua e le o filimaotiina i le lanu o lou pa’u. O le fiafia po o le le fiafia i le Atua e faamoemoe i lou tuuto atu i le Atua ma Ana poloaiga ae e le o le lanu o lou pa’u.

(Russell M. Nelson, “Ia Faamuamua le Atua,” Liahona, Nov. 2020, 94.)

Galuega 10:45. O le a le uiga o le “alofa o le Agaga Paia”?

I le Galuega 10:45, o le fasifuaitau “o le alofa o le Agaga Paia” e faasino i le mana o le Agaga Paia, lea na afio ifo i luga o nei tagata o Nuuese. E ese mai lea mai i le meaalofa o le Agaga Paia, lea tatou te maua e ala i le sauniga o le faamauga pe a uma le papatisoga (tagai Galuega 8:14–17; tagai foi i Aoaoga a Peresitene o le Ekalesia: Iosefa Samita [2007], 97).

Na faapefea ona suia e le faaaliga vaaia a Peteru ia faiga masani a le Ekalesia?

Na faamalamalama mai e Elder D. Todd Christofferson o le Korama a Aposetolo e Toasefululua:

Atatosi o Elder D. Todd Christofferson. Pueina ia Mati 2020.

E ala i lenei aafiaga ma le faaaliga na oo ia Peteru, sa fetuunai ai e le Alii le faiga masani a le Ekalesia ma faaali mai ai se malamalamaga atoatoa faaleaoaoga faavae i Ona soo. Ma o lea na faalautele atu ai le talaiina o le talalelei ina ia faaaofia ai fanauga a tagata uma lava.

(D. Todd Christofferson, “O le Aoaoga Faavae a Keriso,” Liahona, Me 2012, 88)

O a ni mea e tutusa ai le faaaliga vaaia a Peteru i le faaaliga e tuuina atu le perisitua i alii agavaa uma o le Ekalesia?

E mafai ona fesoasoani punaoa nei pe afai e te manao ia malamalama atili e uiga i le faaaliga i le 1978 lea na tuuina mai ai e le Tama Faalelagi le faaeega o le perisitua i alii agavaa uma o le Ekalesia: