Galuega 11, 15

E Taitaia e le Faaola Lana Ekalesia e ala i Faaaliga

Ua talanoa atu Peteru ma Iakopo i aposetolo, o toeaina ma isi tagata o le ekalesia i Ierusalema e uiga i le mataupu o le peritomeina. Vaega ua aveesea mai le ata: e aofia ai nisi o tagata o loo pueina le ata, o vaaiga eseese o le vaega o tagata o loo faalogologo.

Sa ta’u atu e Iesu i Ana Aposetolo o le a tala’i atu le talalelei i atunuu uma. Peitai, o le faia o lenei mea, o le a manaomia ai ni suiga faigata i tu ma aga masani faa-Iutaia ua loa ona tausisia. I le Afio A’e ai o Iesu i le lagi, na manaomia loa ona faia nei suiga e ala i faaaliga. O le faamoemoega o lenei lesona o le faalolotoina lea o lou malamalama i le ala e taitaia ai e le Faaola Lana Ekalesia e ala i faaaliga i Ana perofeta ma aposetolo

O se fesili a se uo

Vaai faalemafaufau e faapea, ua iloa e se uo e lē auai i lau ekalesia e uiga i ou talitonuga i perofeta ma aposetolo o aso nei. E ui e talitonu lau uo i perofeta ma aposetolo o le Tusi Paia, ae e faigata ia te ia ona taliaina le manatu faapea e galue le Atua e ala mai ia i latou i aso nei. Ua ia fesili atu ia te oe, “E faapefea ona fetalai mai Iesu i le perofeta ma aposetolo?”

O le a lou mautinoa i lou gafatia e tali atu ai i lenei fesili?
O le a sau tala o le a fai i lau uo?

E ui e tele ni auala e tali atu ai, ae o le Galuega 11 ma le15 o loo faapupula mai ai ni auala se lua e taitaia ai e Iesu Keriso Lana Ekalesia e ala i faaaliga.

Faaaliga i le perofeta

Ina ua mavae le faaaliga ma le aafiaga o Peteru ia Konelio (tagai i le Galuega 10), sa malaga o ia i Ierusalema ma aoao atu nei upumoni fou faatoā faaalia mai i isi taitai o le Ekalesia.

Ina ua taunuu Peteru i Ierusalema, sa [ia] toe faamatalaina lana faaaliga vaaia ma le aafiaga ma Konelio (tagai i le Galuega 11:1–18).

Faitau le Galuega 11:4–18, ma vaavaai mo auala o e vaaia ai le taialaina e le Atua o le Ekalesia.

O le a se mea o e aoaoina mai lenei tala e uiga i le ala e taitaia ai e le Alii Lana Ekalesia?

Mai le aafiaga o Peteru ua tatou aoao ai e taitai e Iesu Keriso Lana Ekalesia e ala i faaaliga i Lana perofeta, le Aposetolo sinia.

E mafai faapefea e le iloaina o lenei upumoni ona fesoasoani e faamalosia ai lau molimau ia Iesu Keriso ma Lana perofeta?
Aisea e te talitonu ai ua taialaina le Ekalesia i aso nei e ala i faaaliga i le perofeta a le Alii?

Faaaliga e ala mai i aufono

O se isi faataitaiga o le ala e tuuina mai ai e le Faaola faaaliga i Ana perofeta ma aposetolo o loo faapupula mai i le Galuega 15.

Sa aoao atu ma papatisoina e faifeautalai o Paulo ma Panapa le toatele o tagata Nuuese. O nisi tagata Kerisiano Iutaia na o mai i Anetioka ma aoao atu faapea, o tane o tagata Nuuese ua liliu mai e manaomia ona tausia le tulafono a Mose e ala i le peritomeina e faaopoopo i le ola ai i le talalelei na aoao mai e Iesu Keriso ma Ana Aposetolo (tagai i le Galuega 15:1,5; tagai foi i le Taiala i Tusitusiga Paia, “ Peritomeina,” scriptures.ChurchofJesusChrist.org).

Faitau le Galuega 15:2 e iloa ai pe na faapefea ona saili Paulo ma Panapa e foia le faafitauli.

Aisea e te manatu ai na sailia e Paulo ma Panapa le taitaiga mai taitai o le Ekalesia i Ierusalema?

O le upumoni e tasi o loo faapupula mai i le Galuega 15 o le, fefautuaai faatasi ma le sailia o faaaliga mai le Atua, e maua ai e taitai o le Ekalesia musumusuga e uiga i faafitauli faigata. A o fefautuaai faatasi Peteru ma isi taitai o le Ekalesia, sa latou maua le taitaiga mai le Atua. Sa latou auina atu ni tusi e faailoa atu ai i tagata o le Ekalesia a latou faaiuga musuia e aua nei faamalosia le peritomeina o tagata Nuuese liliu mai, ma sa latou faaaofia ai se valaaulia e usitai i isi poloaiga.

O se aufono o se vaega o tagata e o mai faatasi e talanoaina mataupu e taua ma auala e tali atu ai i na mataupu. Ina ia malamalama atili e uiga i le auala e galueaina ai se aufono i le Ekalesia, faitau mea nei mai le Tusitaulima Aoao:

O le taitai [o se aufono] e uunaia sui tōfia ia tautatala tuusaoloto ma le faamaoni. O tulaga eseese, o tausaga, poto masani, ma manatu faaalia o sui auai o le aufono e faamauoa ai le aufono. E fefaasoaai e sui auai ia fautuaga ma faalogologo le tasi i le isi ma le faaaloalo. A o latou saili ia iloa le finagalo o le Alii, e mafai ona manumalo ai se agaga o musumusuga ma le lotogatasi.

(Tusitaulima Aoao: Auauna atu i le Ekalesia a Iesu Keriso o le Au Paia o Aso e Gata Ai, 4.4.3, ChurchofJesusChrist.org)

E faapefea ona e aoteleina pe o le a le mea e ta’u o le aufono i le Ekalesia?

O Le Aufono a Ierusalema

Faitau le Galuega 15:6–15, 22–28, ma vaavaai mo faamaoniga o vaega eseese o se aufono. Kopi le siata lenei i lau api faamaumau mo suesuega. I le koluma taumatau, tusi ai upu po o fasifuaitau mai fuaiupu e o faatasi ma fasifuaitau i le koluma agavale.

Galulue i lalo o ki o le perisitua
Taula’i atu i le lelei o tagata taitoatasi ma aiga
Faataga manatu faaalia mai sui auai o le aufono
Taitai atu i le lotogatasi

E faaaoga foi e taitai o aso nei ia aufono e valaaulia ai le taitaiga a le Alii i mataupu o le Ekalesia. Sa faasoa mai e Peresitene Russell M. Nelson le mea lenei:

Faaaliga mo le Ekalesia, Faaaliga mo o Tatou Olaga
Molimau mai Peresitene Nelson o loo taitaia e le Alii le Ekalesia e ala i faaaliga ma e maua e tagata uma faaaliga faaletagata lava ia.

A matou potopoto o se Aufono a le Au Peresitene Sili ma le Korama a le Toasefululua, e avea a matou potu fono ma potu o faaaliga. E faalogoina le afio ai o le Agaga. A matou tauivi ai ma ni mataupu lavelave, e matala mai se faagasologa faagaeetiaina a o faaalia ma le saoloto e Aposetolo taitoatasi ona mafaufauga ma manatu. E ui atonu e eseese i matou i o matou uluai manatu, ae o le alofa matou te lagonaina mo le tasi ma le isi e tumau. E fesoasoani lo matou lotogatasi ia i matou e iloatino le finagalo o le Alii mo Lana Ekalesia.

I a matou fonotaga, e matua le mafai lava ona pule tutu le itu e toatele. Matou te faalogo ma le agaga tatalo i le tasi ma le isi ma talanoa ma le tasi ma le isi seia oo ina matou autasi. A oo loa ina matou ausia le tasi atoatoa, o le faatosinaga autasi a le Agaga Paia e matua faamaniti tino lava! Matou te oo i le mea na iloa e le Perofeta o Iosefa Samita ina ua ia aoao mai, “O le tuufaatasia o lagona tatou te maua ai le mana faatasi ma le Atua” [Aoaoga a Peresitene o le Ekalesia: Iosefa Samita (2007), 393–94]. E leai se uso o le Au Peresitene Sili po o le Korama a le Toasefululua na te faia ni faaiuga mo le Ekalesia a le Alii i sana ia lava faaiuga sili na o ia!

(Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 95.)

Tusitusi i luga o se fasipepa i se peni po o se penitala.

Tuu i le faitalia: O e Manao e Aoao Atili?

Faaaliga i taitai o le Ekalesia

I lana saunoaga “O Le Mataupu Faavae a Keriso,” na faaaoga ai e Elder D.Todd Christofferson o le Korama a Aposetolo e Toasefululua ia tala o loo tusia i le Galuega 11 ma le15 e aoao atu ai e uiga i faaaliga i taitai o le Ekalesia. Mafaufau e suesue le lauga atoa pe matamata le vitiō lenei mai le faailotaimi 6:10 seia oo i le 11:34.

O Le Mataupu Faavae a Keriso
I le Ekalesia i aso nei, e pei lava o le ekalesia anamua, o loo faamautuina le mataupu faavae a Keriso po o le faasa’oina o mea sese faalemataupu faavae, o se mataupu lea o faaaliga faalelagi.

O a ni faataitaiga o faaaliga faaauau pea?

O Elder Quentin L. Cook, o le Korama a Aposetolo e Toasefululua, na aoao mai e uiga i le mauaina o faaaliga mo le Ekalesia. Matamata le “The Blessings of Continuing Revelation to Prophets and Personal Revelation to Guide Our Lives” mai le faailotaimi 4:55 e oo i le 6:42, o loo maua i le ChurchofJesusChrist.org.

O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga
Ua aoao mai Elder Cook e faapea o loo faaauau pea e perofeta ona maua faaaliga e taitai ai le Ekalesia ma e mafai ona tatou mauaina faaaliga e taitai ai o tatou olaga.

Na aoao mai foi Elder Cook e faapea e maua e le perofeta ma aposetolo musumusuga mai le Agaga ma faaaliga tuusa’o mai le Faaola. Matamata i le “Prepare to Meet God” mai le faailotaimi 13:37 seia oo i le 14:15.

Saunia e Feiloai ma le Atua
Ua aoao mai e Elder Cook e faapea tatou te saunia e feiloai ma le Atua e ala i le faataunuuina o tiutetauave paia ua tuuina mai i le galuega faafaifeautalai, galuega o le malumalu, ma le faamalolosia o tagata o le Ekalesia.

E mafai faapefea ona galulue aufono i totonu o se aiga?

Sa aoao mai Peresitene M.Russell Ballard o le Korama a Aposetolo e Toasefululua e uiga i aufono faaleaiga i lana lauga “Aufono Faaleaiga” (Liahona, Me 2016, 63–65).