Galuega 12:1–19

Sa fesoasoani se agelu ia Peteru i lona tatalaina mai le falepuipui. Ua matāpogia leoleo o le falepuipui i luga o le eleele.

Sa feagai Aposetolo ma faatauteega a o latou taumafai e faagasolo i luma le galuega a le Faaola. Sa faamāturo Iakopo i le faatonuga a Herota, a o faafalepuipuiina Peteru ae sa laveaiina o ia e se agelu o se tali i tatalo a tagata o le Ekalesia. O lenei lesona ua faamoemoe e fesoasoani ia te oe e atiina ae ai se faatuatuaga sili atu i le Tama Faalelagi ma Ana tali mai i talosaga.

Taunuuga eseese

Mafaufau i ni auala eseese e ono tali atu ai tagata i tulaga nei:

Ua tatalo ma le naunautai se alii talavou mo le tele o tausaga mo lona tamā ina ia faamaloloina mai le kanesa, ae e lei toe malosi lona tamā.

Ua tatalo faatauanau se tamaitai talavou mo lona tina ina ia faamaloloina mai le kanesa, ma i le mavae ai o tausaga o tauiviga, sa toe malosi faavavega lona tina.

O anafea na i ai ai ni au tatalo po o tatalo a nisi e le’i taliina i le ala na faamoemoe i ai?
Na faapefea ona e tali atu?
Na faapefea ona avea le tulaga o lou faatuatua i le Tama Faalelagi e aafia ai lau tali?

I lau api faamaumau mo suesuega, faailoa mai ni vavega po o ni faamanuiaga o loo e sailia. Mafaufau pe mafai faapefea e le tuuina atu o le faalagolago sili atu i le Atua ona aafia ai lou olaga mo le lelei e sili atu. A o e suesue, vaavaai mo upumoni ma faataitaiga e mafai ona fesoasoani ia te oe e atiina a’e ai le faalagolago sili atu i le Tama Faalelagi ma Ana tali mai i tatalo.

Sauāina o tagata o le Ekalesia

A o faaauau pea ona tupu le talalelei, sa sauāina tagata ma taitai o le Ekalesia e taitai Roma ma Iutaia. O nisi o taitai o le Ekalesia, e pei o Peteru ma Ioane, sa laveaiina faavavega e le Atua (tagai i le Galuega 5:17–21), ae o isi, e pei o Setefano, sa lei laveaiina (tagai i le Galuega 7:54–60).

Vaai faalemafaufau e faapea, o oe o se tagata o le Ekalesia i le taimi o nei mea na tutupu a o e faitauina le Galuega 12:1–4. O le upu faasaua o lona uiga o le sauaina pe faatigā. O le uiga o le fuaiupu 4 na tuu e Herota ni fitafita se to’a 16 e leoleo ia Peteru a o fuafua e faatino faalauaitele le fasiotiga o ia i se taimi mulimuli ane.

O a ni lagona ma ni fesili atonu e i ai ia te oe i le avea ai ma se tagata o le Ekalesia i lea taimi?

Faitau le Galuega 12:5, ma vaavaai pe na faapefea ona tali atu tagata o le Ekalesia.

Aisea atonu na faigata ai ona faatino le faatuatua e ala i le tatalo ai mo Peteru?
O le a sou manatu i mea na malamalama ai tagata o le Ekalesia e uiga i le Tama Faalelagi lea na uunaia ai i latou e faia lenei mea?

Faitau le Galuega 12:6–11, ma vaavaai pe na faapefea ona taliina tatalo a tagata o le Ekalesia.

Tusitusi i luga o se fasipepa i se peni po o se penitala.

Tatalo faamaoni ma le faatauanau

O se tasi o upumoni e mafai ona tatou aoaoina mai lenei tala e faapea o a tatou tatalo faamaoni ma le faatauanau e valaaulia ai vavega ma faamanuiaga a le Atua i o tatou olaga ma olaga o isi.

O vavega e mafua mai i tatalo faamaoni e masani lava ona itiiti ma faatauvaa ae le tetele ma maoa’e.

Atonu e te manao e matamata i le “Ia Outou Mataala ma Tatalo e le Aunoa” mai le faailotaimi 12:17 seia oo i le 13:07, o loo maua i le ChurchofJesusChrist.org, pe faitau le faamatalaga lenei e vaai ai i vavega mai le tatalo i le olaga o Peresitene M. Russell Ballard o le Korama a Aposetolo e Toasefululua.

Ia Outou Mataala ma Tatalo e Le Aunoa
Ua aoao mai Peresitene Ballard ia i tatou ina ia tatalo mo le saogalemu ma le filemu mo o tatou atunuu, aiga, ma taitai o le Ekalesia.

Ua ou iloa le mamana o le tatalo mai i o’u lava aafiaga. Talu ai nei, sa ou i ai na o a’u i lo’u ofisa. E le’i leva ona uma se togafitiga faafoma’i o lo’u lima. Sa uno’oa ma totolia, fula, ma sa tiga tele. A o ou saofai ai i la’u kesi, sa le mafai ona ou taula’i atu i mataupu taua ma le tatau aua sa faalavelave mai le tiga lea.

Sa ou tootuli i le tatalo ma ole atu i le Alii e fesoasoani mai ia mafai ona ou taula’i atu e faatino la’u galuega. Sa ou tu a’e i luga ma toe foi i le faaputuga o pepa sa i luga o la’u kesi. Toetoe o le taimi lava lea, sa oo mai le manino ma le matala o lo’u mafaufau, ma sa mafai ona ou faamae’aina mataupu fitā sa i o’u luma.

(M. Russell Ballard, “Ia Outou Mataala ma Tatalo e le Aunoa,” Liahona, Nov. 2020, 79)

Faalagolago i le Atua

Faitau le Galuega 12:12–17 e iloa ai pe faapefea ona faaiuina lenei tala. Ia manatua o le Iakopo o loo ta’ua i le fuaiupu 17, e lē o le Iakopo lea o loo ta’ua i le fuaiupu 2.

O nisi taimi e lē taliina ai tatalo i le ala tatou te faamoemoe i ai. O le faamaturoina o Iakopo atonu o se tasi lea o faataitaiga faapena. Atonu sa tatalo foi le Au Paia i le taimi lea mo Iakopo, ae sa fasiotia lava o ia e Herota (tagai i le Galuega 12:2).

Mafaufau i tulaga faataitai mai le amataga o le lesona ma i taimi i lou lava olaga sa lē tali mai ai le Atua i au tatalo i le ala sa e faamoemoe i ai.

O le a se mea ua e iloa e uiga i le Tama Faalelagi e mafai ona fesoasoani ia te oe e faalagolago ai ia te Ia i nei tulaga?

Na aoao mai e Peresitene Dallin H. Oaks o le Au Peresitene Sili se mea e mafai ona fesoasoani pe a lē taliina mai a tatou tatalo i le ala tatou te faamoemoe i ai. Atonu e te manao e matamata i le “Healing the Sick” mai le faailotaimi 15:19 seia oo i le 16:55 pe faitau i le faamatalaga lenei.

Healing the Sick
We have this priesthood power, and we should all be prepared to use it properly.

I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Sa ou lagonaina lena talitonuina i se lauga na tuuina atu e lo’u tausoga i le maliu o se tamaitai talavou ona o se gasegase tigaina. Sa ia tautalagia upu nei na muai faateia ai au ona faatoa faagaeetia ai lea o au: “Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia ni faamanuiaga faaperisitua. Sa tusia lona igoa i lisi tatalo i le malumalu. O ia o le faatumutumuga o le faitau selau o talosaga mo le toe faafoisia mai o lona malosi. Ma ou te iloa, ua lava ma totoe le faatuatua o lenei aiga e ao ai lava ona faamaloloina o ia, vagana ai o le finagalo o le Alii e foi atu o ia i le taimi nei.” Na ou lagonaina foi lena talitonuina i upu a se tamā o se isi teineitiiti lelei na maliu ona o le kanesa, i tausaga o lona talavou. Sa ia tautino mai: “O le faatuatua o lo matou aiga o loo ia Iesu Keriso, ae e lē faalagolago i ni taunuuga.” Ou te lagonaina le moni o na aoaoga Tatou te faia mea uma tatou te mafaia mo le faamaloloina o sē e pele, ona tatou faalagolago lea i le Alii mo le taunuuga.

(Dallin H. Oaks, “Faamaloloina o e Mama’i,” Liahona, Me 2010, 50)

O le a le mea na aoao mai e Peresitene Oaks e te lagona o le a taua pe a manatuaina? Aisea?

Tusitusi i luga o se fasipepa i se peni po o se penitala.CONTD

Tuu i le faitalia: O e Manao e Aoao Atili? 

O le a se mea e manaomia ona tatou malamalama i ai pe a foliga mai e lē oo mai tali o tatalo?

Na faamatala mai e Elder Richard G. Scott o le Korama a Aposetolo e Toasefululua:

A foliga mai e le maua tali i tatalo faanatinati, atonu tatou te le o malamalama i nisi o mea moni e uiga i le tatalo, pe ona tatou te le o iloaina ia tali pe a oo mai. …

… E faafofoga o Ia i tatalo uma ma tali mai i Lana lava ala.

(Richard G. Scott, “Learning to Recognize Answers to Prayer,” Ensign, Nov. 1989, 30–31)

E mafai faapefea e a’u tatalo ona faamanuiaina taitai o le Ekalesia i aso nei?

I tusitusiga paia ua tatou aoao ai o le Au Peresitene Sili e lagolagoina e “le talitonuga, faatuatua, ma le tatalo a le ekalesia” (tagai i le Mataupu Faavae ma Feagaiga 107:22). A o avea ai ma Peresitene o le Ekalesia, sa faasoa mai Thomas S. Monson (1927–2018), “E pei ona sa ou ta’ua i konafesi ua mavae, ou te faafetai atu mo a outou tatalo mo a’u. Ou te manaomia lava na tatalo; Ou te lagonaina foi” (“Ia Mafuta le Atua ma Outou Se’ia Tatou Toe Feiloai,” Liahona, Nov. 2012, 111).