Mga Buhat 27–28

Sunda ang Propeta

ngitngit nga unos sa lawod nga adunay kilat ug mga balod sa kagabhion

Human gilutos, giabuso, ug dili makataronganong gibilanggo didto sa Jerusalem ug Cesaria, si Apostol Pablo mihangyo nga iapelar ang iyang kaso atubangan ni Cesar sa Roma. Sa iyang pagpaingon sa Roma, si Pablo ug kadtong mga uban niya nakahinagbo og makusog nga mga bagyo, pagkalunod sa barko, ug uban pang mga katalagman. Niining mga kahimtanga, si Pablo mihatag og makadasig nga tambag ug mga pasidaan aron ipabiling luwas ang tanan. Kini nga leksiyon gituyo aron matabangan ka nga mabati ang importansiya sa pagsunod sa tambag sa propeta.

Pagsunod sa propeta

Basaha ang mosunod nga mga pamahayag sa propetikanhong tambag o pasidaan nga nagagikan sa booklet nga Alang sa Kalig-on sa mga Kabatan-onan (2011).

“Pagpakita og gugma sa mga sakop sa imong pamilya matag adlaw” (pahina 14).

“Ang edukasyon usa ka importante nga bahin sa plano sa Langitnong Amahan sa pagtabang kaninyo aron mahimong mas mahisama Kaniya. … Ang edukasyon nga imong naangkon mahimong mahinungdanon alang kanimo niining kinabuhia ug sa umaabot nga kinabuhi” (pahina 9).

“Ayaw pagtambong, pagtan-aw, o pag-apil sa kalingawan nga hilas, imoral, mapintas, o law-ay nga talan-awon sa bisan unsa nga paagi [pornograpiya]” (pahina 11).

“Kon ang inyong mga higala moawhag kaninyo sa pagbuhat sa mga butang nga sayop, barog alang sa katarong, bisan kon kamo mobarog nga nag-inusara” (pahina 16).

Unsa nga nagkalainlain nga kinaiya ang imong nakita nga gipakita sa mga tawo mahitungod sa pagsunod sa tambag sa mga propeta?
Ngano kaha nga ang ubang kabatan-onan magdumili man sa pagtuman sa tambag sa mga propeta?
Unsa lagmit ang pipila sa mga sangpotanan sa dili pagtuman sa tambag sa mga propeta?

Pamalandong kon giunsa nimo personal nga gisanong ang tambag ug pagdirekta sa propeta. Samtang magtuon ka sa Mga Buhat 27, pangayo og inspirasyon gikan sa Langitnong Amahan pinaagi sa Espiritu Santo aron makadawat og mga impresyon nga makatabang sa pagpalig-on sa imong pasalig sa pagtuman sa tambag sa propeta sa Ginoo.

Ang propetikanhong tambag ni Pablo

Sa iyang pagpaingon sa Roma aron iapelar ang iyang kaso atubangan ni Cesar, si Pablo mihatag og tambag ug mga pasidaan aron ipabiling luwas ang mga biyahero sa ilang panaw.

Magsulat diha sa piraso sa papel gamit ang ballpen o lapis.

Ang paglawig ni Pablo ngadto sa Roma

Ang Romano nga mga sundalo midala kang Pablo ug sa uban pang mga piniriso ngadto sa usa ka barko nga adunay dul-an sa 300 ka tawo. Ang ilang paglawig hinay, lisod ug peligro tungod kay ulahi na kadto sa tinglarag, diin ang mapintas nga mga bagyo kasagaran nga mahitabo.

Basaha ang Mga Buhat 27:9–13.

Panahon sa makalisang nga bagyo, daghang mga pagsulay ang gihimo aron sa pag-ayo sa barko ug sa pagpagaan sa karga.

Basaha ang Mga Buhat 27:20–26.

Human sa 14 ka adlaw nga makalisang nga bagyo, gisulayan nila ang usa ka delikado nga pamaagi sa pagdunggo. Ang mga marino mihagbong sa angkla ug buot mobiya sa barko tungod sa ilang pagtuo nga kini madasmag ngadto sa mga bato.

Basaha ang Mga Buhat 27:30–36.

Human sa mas pagpagaan sa barko, ilang gisulayan pagpadunggo ang barko.

Basaha ang Mga Buhat 27:41–44.

Unsa sa imong hunahuna ang imong reaksiyon sa mga panudlo ni Pablo kon ikaw anaa pa sakay sa barko? Ngano man?
Unsa nga mga kamatuoran ang imong nakat-onan gikan sa imong gitun-an?

Unsa ang imong nahibaloan mahitungod sa mga propeta nga naghatag kaninyo og pagsalig sa ilang mga tambag ug mga panudlo?

Ang Ginoo nagtudlo nga pinaagi sa propeta kita makadungog sa Iyang tingog (tan-awa sa Doktrina ug Mga Pakigsaad 1:37–38) ug nga ang Iyang mga pasidaan kasagaran moabot pinaagi sa Iyang piniling mga propeta (tan-awa sa Doktrina ug Mga Pakigsaad 1:1–4). Sa atong panahon, kita mipaluyo sa tanan nga sakop sa Unang Kapangulohan ug sa Korum sa Napulog Duha ka Apostoles isip mga propeta, mga manalagna ug mga tigpadayag. Paggahin og gamay nga panahon sa pagpamalandong ngano nga ang Ginoo mitabang kanato pinaagi sa mga propeta ug unsa ang gipakita niini mahitungod sa Iyang mga pagbati ngari kanato.

Unsa ang imong nakat-onan mahitungod sa Ginoo gikan sa tambag ug mga pasidaan nga Iyang gihatag pinaagi sa Iyang mga propeta?
Unsa ang mga kasinatian nimo o sa uban nga imong nailhan bahin sa pagpili kon mosunod o mobalewala ba sa tambag gikan sa propeta?

Paggahin og pipila ka minuto aron sa pagpangita ug pagtuon sa labing bag-o nga tambag o mga pasidaan nga gihatag sa Ginoo kanato pinaagi sa Iyang mga propeta. Pipila sa mga dapit diin kini mapangita naglakip sa bag-ong mga pakigpulong sa kinatibuk-ang komperensiya, sa Alang sa Kalig-on sa mga Kabatan-onan nga magasin, o sa Alang sa Kalig-on sa mga Kabatan-onan nga booklet. Mahimo nimong ilakip ang mga pamahayag gikan sa mga propeta nga gihatag sa sinugdanan sa leksiyon.

Pagsunod sa propetikanhong tambag sa imong kinabuhi

Unsa ang pipila sa mga hinungdan nga ikaw mapasalamaton sa propetikanhong tambag ug mga pasidaan sa imong kinabuhi?

Tinguhaa ang inspirasyon gikan sa Langitnong Amahan pinaagi sa Espiritu Santo aron matabangan ka nga maila ang mga paagi nga ang Ginoo nagpakita nga Siya nahimuot sa imong pagkamasulondon ngadto sa Iyang mga propeta, ingon man usab sa mga paagi nga Siya mahimong moawhag kanimo sa paglambo. Isulat ang mga hunahuna ug mga impresyon nga mosantop sa hunahuna, ug pagsaad nga sundon kini. Mahimong makatabang ang pagpakigbahin sa imyong mga impresyon ngadto sa usa ka suod nga miyembro sa pamilya o gisaligang lider sa Simbahan ug dapita sila nga tabangan ka nga masunod ang maong mga impresyon.

Opsiyonal: Gustong Makakat-on Pa og Dugang?

Sa unsang paagi nga ang pagsunod sa tambag sa mga propeta nakaapekto kanako?

Si Presidente Henry B. Eyring sa Unang Kapangulohan mitudlo sa mosunod:

Ang pagpili nga dili modawat sa propetikanhong tambag nag-usab sa mismong dapit nga atong gibarogan. Nahimo kining mas makuyaw. Ang kapakyas sa pagsunod sa propetikanhong tambag makapahuyang sa atong gahom sa pagdawat sa dinasig nga tambag sa umaabot. Ang labing maayong panahon nga mohukom sa pagtabang ni Noe sa pagbuhat sa arka mao ang unang higayon nga siya mihangyo. Matag higayon nga siya mihangyo human niana, matag kapakyas sa pagsanong makapaminos sa pagkasensitibo sa Espiritu. Ug mao nga matag higayon nga ang iyang hangyo nga mura og binuang, hangtod miabot ang ulan. Ug dayon ulahi na kaayo.

Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay labot [exception], akong nahibaloan nga akong gibutang ang akong kaugalingon sa kamot sa peligro. Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngonan nga ako nagpaingon ngadto sa kahilwasan.

(Henry B. Eyring, “Finding Safety in Counsel,” Ensign, Mayo 1997, 25)

Tungod kay ang [Ginoo] mabination, Siya mitawag og mga sulugoon aron sa pagpasidaan sa mga katawhan sa kuyaw. Kana nga tawag sa pagpasidaan nahimong mas kusog ug mas importante tungod sa kamatuoran nga ang labing bililhon nga mga pasidaan mao ang mahitungod sa mga kuyaw nga wala pa mahunahuna sa mga katawhan nga mga tinuod.

(Henry B. Eyring, “Atong Ipasaka ang Atong Tingog sa Pagpasidaan,” Liahona, Ene. 2009, 3)

Mga Buhat 27:9. Unsa ang gipasabot nga “ang tingpuasa milabay na”?

“Ang tingpuasa” tingali gipasabot sa Judio nga balaan nga adlaw nga gitawag nga Adlaw sa Pag-ula, nga nagtimaan sa sinugdanan sa panahon nga sa kasagaran giisip kini nga dili luwas sa paglawig sa Dagat sa Mediterania tungod sa dagkong mga unos. Ang Adlaw sa Pag-ula kasagaran mahitabo sa hinapos sa Septiyembre o sayong bahin sa Oktubre.

Mga Buhat 27:28. Unsa kadako ang usa ka “dupa”?

Ang usa ka dupa mao ang distansya gikan sa kinatas-an nga tudlo sa usa ka kamot ngadto sa kinatas-an nga tudlo sa lain pang kamot kon ang mga bukton gituy-od. Ang usa ka dupa katumbas sa mga upat ka maniko [cubits].