Sukda ang Imong Nakat-onan 7

Batan-ong mga babaye nga gilingaw ilang kaugalingon didto sa Ghana.

Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug sa nakat-onan ug pag-uswag nga imong nasinati samtang nagtuon sa Bag-ong Tugon.

Mahimo bang magbag-o ang tawo?

Hunahunaa nga ang imong higala nagsulti kanimo nga adunay mga butang nga gusto niyang usbon mahitungod sa iyang kaugalingon, apan dili siya motuo nga mahimo niya ang maong mga kausaban.

Unsaon nimo kini sa pagtubag?
Sa unsang paagi makaapekto sa imong kinabuhi ang pagkasayod nga ikaw mabag-o pinaagi sa Pag-ula ni Jesukristo?

Pamalandong sa mga sugilanon gikan sa basahon sa Mga Buhat nga naghulagway unsaon pagbag-o sa mga tawo alang sa mas maayo samtang sila mopaduol ngadto kang Kristo ug mahimong Iyang mga tinun-an.

Kon gikinahanglan, ikonsiderar ang pagrebyo og usa o daghan pa sa mosunod nga mga pananglitan.

Mga tawo nga mipasakop sa Simbahan: Mga Buhat 2:14, 36–47
Ang Ethiopianhon nga eunuch: Mga Buhat 8:26–40
Si Saulo (kinsa nahimong si Pablo): Mga Buhat 9:1–22
Si Cornelius: Mga Buhat 10:1–8, 24–25, 44–48
Ang magbalantay sa prisohan nga nagbantay kang Pablo ug Silas: Mga Buhat 16:25–36

Magsulat diha sa piraso sa papel gamit ang ballpen o lapis.

Ang imong pagkakabig ngadto kang Jesukristo

Pamalandongi ang imong kaugalingong pagkakabig ngadto kang Jesukristo. Paghunahuna mahitungod sa mga pagdapit sa pagbag-o o paglambo nga imong nabati gikan sa Ginoo samtang ikaw nagtuon sa basahon sa Mga Buhat. Tubaga ang mosunod nga mga pangutana diha sa imong journal sa pagtuon.

Unsa ang imong nahibaloan mahitungod kang Jesukristo nga nagdasig kanimo nga mahigugma ug mosunod Kaniya sa mas hingpit?
Sulod sa miaging bulan o sobra pa, unsang mga kabag-ohan ang imong nabati nga angay nga himoon pinaagi sa Espiritu Santo? Giunsa nimo sa pagsanong?
Giunsa ka pagpanalangin sa Langitnong Amahan tungod sa imong mga paningkamot? Unsa ang imong gibuhat nga nakahimo og labing dako nga kalahian?
Unsa kaha, kon aduna, nga nakapahimo nga malisod ang pagdawat og mga pagdapit sa pagbag-o ug paglambo? Unsaon nimo sa pagpangita og dugang nga tabang gikan sa Langitnong Amahan?

Ipadayon ang pagtinguha og inspirasyon gikan sa Langitnong Amahan pinaagi sa Espiritu Santo samtang magtuon ka niini nga leksiyon. Sulayi pag-ila unsa ang Iyang gusto nga imong buhaton aron mabag-o ug mahimong mas makakabig ngadto kang Jesukristo. Pagpili og usa sa mosunod nga mga kalihokan nga kompletohon samtang ikaw mamalandong unsaon nga mas magpaduol kang Kristo.

Kalihokan A: Ang unang mga baroganan ug mga ordinansa sa ebanghelo ni Jesukristo

Sa Mga Buhat, daghang tawo ang nakadawat og langitnong tabang aron magbag-o ug mas mahimong nakabig ngadto kang Jesukristo pinaagi sa pagdawat sa unang mga baroganan ug mga ordinansa sa ebanghelyo.

Ang Giya ngadto sa mga Kasulatan nagpasabot kon sa unsang paagi kini nga mga baroganan ug mga ordinansa nakatabang kanato aron mahimong mas nakabig kang Jesukristo.

Ang paghinulsol, pagbunyag alang sa kapasayloan sa mga sala, ang pagdawat sa Espiritu Santo pinaagi sa pagpandong sa mga kamot, ug ang nagpadayong hugot nga pagtuo sa Ginoong Jesukristo makakompleto sa pagkakabig. Ang usa ka natural nga tawo mabag-o ngadto sa bag-ong tawo kinsa mao ang gibalaan ug giputli, natawo pag-usab kang Kristo Jesus (2 Taga-Cor. 5:17: Mosiah 3:19).

(Giya ngadto sa mga Kasulatan, “ Pagkakabig, Kinabig,” scriptures.ChurchofJesusChrist.org)

Pamalandongi ang asoy nga imong gipili nga naghulagway sa usa ka tawo nga nabag-o tungod sa panabang sa Ginoo.

Hunahunaa ang imong mga tubag sa mosunod nga mga pangutana:

Unsa ang papel sa unang mga baroganan ug mga ordinansa sa ebanghelyo sa ilang pagkakabig?
Sa unsang paagi nga ang unang mga baroganan ug mga ordinansa sa ebanghelyo nakatabang kanimo o sa uban aron mahimong mas nakabig ngadto sa Manluluwas?

Hunahunaa nga ang lokal nga mga misyonaryo naghangyo sa imong tabang alang sa usa ka tawo nga ilang gitudloan. Gusto nila nga ikaw mopakigbahin kon sa unsang paagi ang unang mga baroganan ug mga ordinansa sa ebanghelyo makatabang sa pagpalig-on sa pagkakabig ngadto kang Jesukristo ug modapit sa Iyang panabang sa paghimo og gikinahanglang mga kausaban sa atong kinabuhi. Pagsulat og pagpasabot alang niining tawhana sama nga ikaw nakigsulti direkta kanila. Gamit og labing menos usa ka pananglitan gikan sa Mga Buhat ug bisan unsang personal nga kasinatian nga pamati nimo mahimong makatabang.

Kalihokan B: Pagtuon sa kasulatan ug pagkakabig

Usa ka importanteng lihok nga atong mabuhat aron pagpalig-on sa atong pagkakabig ngadto kang Jesukristo mao ang makanunayong pagtuon sa mga kasulatan. Hunahunaa kon sa unsang paagi ang mosunod nga mga asoy gikan sa basahon sa Mga Buhat nagpakita sa importansiya sa pagtuon sa kasulatan sa pagkakabig.

Si Felipe ug ang Ethiopianhong tawo: Mga Buhat 8:26–40
Si Pablo ug ang mga Santos sa Tesalonica ug Berea: Mga Buhat 17:1–14

Pamalandongi kon sa unsang paagi ang pagtuon sa kasulatan nakatabang kanimo sa imong pagkakabig ngadto sa Manluluwas.

Handurawa nga ang imong lider sa Young Men o Young Women mihangyo kanimo nga tabangan ang kabatan-onan sa imong ward o branch nga magtuon sa mga kasulatan ug mapalig-on ang ilang pagkakabig ngadto kang Jesukristo. Unsa nga kapanguhaan ang imong mabuhat aron sa pagdasig kanila? Paggahin og pipila ka minuto sa paglatid sa imong kapanguhaan diha sa imong journal sa pagtuon. Kini mahimong usa ka bidyo, usa ka artikulo, usa ka pakigpulong, usa ka website, o lain pang kapanguhaan.

Ang imong kapanguhaan mahimong maglakip sa bisan asa sa mosunod:

Usa ka pananglitan gikan sa Mga Buhat o lain pang basahon sa kasulatan nga nagpakita og importansiya sa pagtuon sa kasulatan.
Usa ka pananglitan o modelo sa kahanas sa kasulatan nga imong gigamit nga nakatabang kanimo, o usa ka paghulagway kon giunsa nimo pagtuon.
Usa ka paghulagway sa usa ka kasinatian diin ang pagtuon sa kasulatan nakatabang nimo o sa imong kaila nga mas nakabig ngadto sa Manluluwas.
Ang imong personal nga pagpamatuod sa gahom sa pagtuon sa kasulatan.

Pangayoa ang panabang sa Langitnong Amahan pinaagi sa Espiritu Santo samtang isulat nimo ang bisan unsa nga mga buhat nga pamati nimo nga gikinahanglan nimo buhaton aron mas mahimong makabig kang Jesukristo. Ang Manluluwas motabang kanimo sa imong pagpaningkamot nga mosunod niini nga mga impresyon. Ikonsiderar ang pagpakigbahin sa imong mga impresyon ngadto sa usa ka ginikanan o sinaligan nga lider sa Simbahan. Hangyoa sila nga tabangan kang masunod kini nga mga impresyon.