Sukda ang Imong Nakat-onan 8

Mga Taga-Roma 1–16; 1 Mga Taga-Corinto 1–7

Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug sa personal nga pag-uswag nga imong nasinati sa panahon sa imong pagtuon sa Bag-ong Tugon.

Pagkahimong usa ka disipulo ni Jesukristo

• Kon ikaw makabiyahe sa bag-ong dapit, asa man nimo gustong moadto?

• Samtang nagbiyahe, nganong importante man kini nga masusi kon ikaw anaa pa sa hustong dalan? Unsa kaha ang mahitabo kon ikaw nawala na?

Importante usab nga matimbang-timbang ang atong espirituhanong panaw. Si Presidente M. Russell Ballard sa Korum sa Napulog Duha ka Apostoles mitudlo sa importansiya sa pagpaningkamot sa pagkab-ot sa espirituhanong mga tumong ug dayon midugang:

Akong nabantayan nga aron makapabilin nga magtutok … , kinahanglan kong kanunayng mangutana sa akong kaugalingon, “Kumusta na man ko?”

Sama kini sa pagbaton og personal, pribado nga interbiyo sa inyong kaugalingon. …

Sa umaabot nga semana, paggahin og panahon sa pagribyo sa mga tumong sa inyong kinabuhi ug sa inyong mga plano, ug siguroa nga nahiangay kini sa mahinungdanong plano sa atong Langitnong Amahan alang sa atong kalipay. Kon kamo kinahanglan nga maghinulsol ug mag-usab, nan hunahunaa ang pagbuhat sa ingon karon. …

Ako mopamatuod nga walay molabaw pa nga tumong dinhi sa mortalidad kay sa mopuyo sa kahangtoran uban sa atong Langitnong mga Ginikanan ug sa atong minahal nga Manluluwas, si Ginoong Jesukristo. Apan labaw pa kini kay sa ato lang nga tumong—kini Ila usab nga tumong. Sila dunay hingpit nga gugma alang kanato, mas gamhanan kay sa unsay masugdan nato sa pagsabot. Sila sa kinatibuk-an, sa hingpit nga paagi, mahangtorong nahiangay kanato. Kita Ilang buhat. Ang atong himaya Ilang himaya. Labaw pa sa bisan unsang butang, gusto Nila nga makapauli kita.

(M. Russell Ballard, “Mobalik ug Modawat,” Liahona, Mayo 2017, 64–65)

Paggahin og pipila ka minuto sa pagpangutana sa imong kaugalingon sa mosunod nga mga pangutana, ingon nga ikaw adunay personal, pribadong interbiyo sa imong kaugalingon. Ikonsiderar ang pagsulat sa imong mga tubag diha sa imong journal sa pagtuon.

• Unsa man ang akong nabuhat bag-o lang aron makakuha og usa ka pagmatuod sa piho nga mga kamatuoran pinaagi sa Espiritu Santo? Unsa man ang akong nakat-onan kabahin sa pagdawat og pagpadayag pinaagi sa Espiritu Santo? (Malagmit nakahigayon ka sa paghunahuna niini samtang nagtuon sa 1 Mga Taga-Corinto 2.)

• Unsa nga mga tumong ang akong nahimo aron mas mahiduol sa Manluluwas ug mahimong Iyang tinun-an? Unsa nga mga kalamposan ang akong nasinati? Unsa nga mga babag ang akong giatubang? Unsa ang kinahanglan nakong buhaton aron mangita sa panabang sa Ginoo ug makapadayon sa pag-uswag sa akong espirituhanong panaw?

Pagpasabot sa grasya ni Jesukristo

Aron matabangan ka sa pagsukod sa imong pagsabot sa usa ka importanteng kamatuoran sa ebanghelyo nga bag-o lang nimong natun-an, buhata ang mosunod nga kalihokan:

Handurawa nga ikaw gikontak sa mga misyonaryo. Sila nagtudlo sa imong kaedad kinsa naglisod pagsabot sa grasya ni Jesukristo. Ang mga misyonaryo naghangyo kanimo nga ubanan sila sa ilang sunod nga gitakda nga pagtudlo aron mahimo ka nga mopakigbahin sa unsa ang imong nahibaloan mahitungod sa grasya sa Manluluwas ug sa unsang paagi ang pagsunod kang Jesukristo nakapanalangin sa imong kinabuhi.

Paggahin og higayon sa pagsiksik sa mga kasulatan aron makakita og mga bersikulo ug mga kamatuoran nga mahimong makatabang. Ang pagbasa sa pipila sa mosunod nga mga bersikulo mahimong makatabang:

• Mga Taga-Roma 3:10–12, 20–28

• Mga Taga-Roma 4:16 (lakip ang Hubad ni Joseph Smith sa Mga Taga-Roma 4:16)

• Mga Taga-Roma 5:1–2, 21

1. Kompletoha ang mosunod nga kalihokan diha sa imong journal sa pagtuon:

1. Isulat unsaon nimo pagpasabot sa grasya sa Manluluwas sa imong kaugalingong mga pulong.

2. Gamit ang usa ka kasulatan gikan sa Mga Taga-Roma, pagpakigbahin og usa ka kamatuoran mahitungod sa grasya sa Manluluwas ug unsaon nato kini pagdawat sa atong kinabuhi. Ikonsiderar ang paglakip kon sa unsang paagi nga ang pagkahibalo niini nga mga kamatuoran nagdala kanimo nga mas mahiduol sa Manluluwas.

Pagpataas sa imong tinguha nga mahiusa kang Kristo

Ang pagkahiusa mao ang lain nga importanteng konsepto sa mga sulat ni Pablo ngadto sa mga Taga-Roma ug sa mga Taga-Corinto.

2. Kompletoha ang mosunod diha sa imong journal sa pagtuon:

1. Pangita og usa ka bersikulo nga imong natun-an sa Mga Taga-Roma o sa 1 Mga Taga-Corinto nga nagtudlo kanimo og usa ka makahuluganon nga kamatuoran mahitungod sa pagkahiusa ngadtp sa uban diha kang Kristo. Ang pipila ka ehemplo mahimong makita sa Mga Taga-Roma 12:10–21; 14:10–13, 19; 15:1–7 ug diha sa 1 Mga Taga-Corinto 1:10–13; 3:3–9. Unsa nga kamatuoran ang gitudlo niining bersikulo nga imong gipili?

2. Paghunahuna og usa ka higayon diin imong nasinati unsa ang gitudlo ni Pablo sa bersikulo nga imong gipili. Unsa sa imong hunahuna ang dakong nakatampo ngadto sa imong mga paningkamot aron mahiusa kang Kristo?

3. Tubaga ang duha sa mosunod nga mga pangutana:

   • Unsa ang kalahian tali sa yanong pagtinabangay ug sa pagkahiusa pinaagi ni Jesukristo ug sa Iyang ebanghelyo?

   • Nganong ang kamatuoran nga imong napili sa aytem a mahinungdanon man alang kanimo?

   • Sa miaging bulan, giunsa nimo pagpalambo ang imong pagsabot sa pagkahiusa ug sa imong tinguha nga mahiusa sa uban?

   • Unsa man ang imong gihimo aron mas mahiusa sa uban diha kang Kristo?

   • Unsa nga mga hagit ang imong giatubang samtang naningkamot ka nga mahimong mas mahiusa sa uban?

Tinguhaa ang giya sa Espiritu Santo aron matabangan ka sa pagkahibalo sa mga paagi nga gusto sa Ginoo kanimo aron mas mahiusa sa uban diha ni Kristo. Tinguhaa usab ang pagpadayag kon unsaon pagbuntog ang bisan unsang hagit nga mahimo nimong atubangon.

Padayon sa pag-uswag sa unahan sa imong espirituhanong panaw, mas mahiduol sa Langitnong Amahan ug kang Jesukristo. Sayri nga Sila nahigugma kanimo ug andam nga motabang kanimo sa imong mga paningkamot.