Templo ni Apollo, Corinto, natukod niadtong mga 600 B.C. Kini mao gayod tingali ang usa sa labing halangdong mga estraktura sa Corinto sa panahon ni Pablo. Ang mga templo ug balaang mga dapit [shrine] nga anaa ang mga imahe sa pagano nga mga dios-dios komon sa tibuok Greco-Romano nga kalibotan, ug ang mga miyembro sa Simbahan diha sa mga dakbayan sama sa Corinto lagmit nakasugat niini kada adlaw. Nahinumdoman ni Pablo nga sa wala pa ang mga santos sa Corinto nakabig, gipahisalaag sila ngadto sa mga diosdios nga amang [dili makasulti], gani sa nagkadaiyang paagi nga [sila] nadala (1 Mga Taga-Corinto 12:2).
Paghunahuna og negatibo nga epekto sa panagbingkil, garbo, bakak nga mga pagtulon-an, ug imoralidad nga anaa sa kalibotan karon. Ang mga miyembro sa nahaunang Simbahan kinsa nagpuyo sa Corinto nanglimbasog niining susama nga mga hagit. Samtang nagsangyaw sa Efeso panahon sa iyang ikatulong misyonaryo nga panaw, si Apostol Pablo misulat ngadto sa mga Santos sa Corinto aron lig-onon sila ug pahinumdoman sila nga mosalig kang Jesukristo. Kini nga leksiyon makatabang kanimo nga makasabot kon unsaon nga ang pagtukod sa atong mga kinabuhi sa pundasyon ni Jesukristo makatabang kanato nga mabuntog ang kalibotanong mga hagit.
Pagpabilin nga matinud-anon sa lisod nga mga sirkumstansiya
Hunahunaa nga usa ka suod nga higala kinsa nagpuyo sa lain nga lungsod nagpadala kanimo sa mosunod nga mensahe:
“Lisod kaayo ang mapalibotan og negatibong mga impluwensiya bisan asa. Daghan kaayong mga tawo dinhi ang wala nagsunod sa mga sugo, ug pipila kanila mga kritikal sa Simbahan. Nakaila ako sa uban kinsa nawad-an sa ilang mga pagpamatuod sa susamang mga sitwasyon ug dili ako gusto nga kini mahitabo nganhi kanako. Aduna ka bay tambag?”
Unsay imong isulti ngadto sa imong higala?
Unsa ang pipila sa negatibo ug makadaot nga mga impluwensiya ang imong namatikdan sa imong gipuy-an karon?
Sa unsang paagi nga kining mga impluwensiya makapahagit usahay sa pagpabiling matinud-anon sa imong hugot nga pagtuo?
Sa imong pagtuon niini nga leksiyon, paghunahuna kon unsa kamo kamatinud-anon kon ikaw mag-atubang og kalibotanong mga hagit o negatibong mga impluwensiya. Tinguhaa ang giya pinaagi sa Espiritu Santo aron mahibalo unsaon pagpalig-on sa imong pundasyon kang Jesukristo, ug pangitaa ang mga kamatuoran nga makatabang kanimo sa pagbuntog sa imong mga hagit. Sa iyang ikaduhang misyonaryo nga panaw, si Apostol Pablo nagsangyaw sa ebanghelyo sa Corinto sulod sa dul-an sa duha ka tuig (tan-awa sa Mga Buhat 18:1–18) ug nag-organisar og usa ka branch sa Simbahan didto. (Sa pagpangita sa dakbayan sa Corinto, tan-aw sa Mga Mapa sa Biblia, nu. 13, “ Ang Misyonaryo nga mga Panaw ni Apostol Pablo.”) Ang Corinto usa ka adunahang sentro sa pamatigayon ug ang kapital nga siyudad sa Romanhong probinsya nga Achaea. Daghang mga lungsoranon sa Corinto ang nagsimba sa mga diosdios ug mga imoral. Ang pipila usab makapabahin ug mabingkilon. Niini nga palibot, ang pagpabiling tinuod sa ebanghelyo sa Manluluwas nahimong lisod alang sa daghang mga miyembro sa Simbahan. Sa dihang si Pablo nagsulat sa mga Santos sa Corinto aron matabangan sila sa ilang mga hagit, siya namulong sa pundasyon nga iyang gibutang alang kanila.
Unsa kaha ang buot ipasabot sa pagtukod sa imong pundasyon diha kang Jesukristo?
Sa Basahon ni Mormon, si Helaman nag-awhag usab sa iyang mga anak nga lalaki sa pagtukod diha sa pundasyon ni Jesukristo. Basaha ang Helaman 5:12, nga mangita sa mga panalangin nga gisaad ni Helaman.
Unsa ang imong mapaambit sa imong higala gikan niining mga bersikulo nga lagmit makatabang?
Usa ka kamatuoran nga atong makat-onan gikan niini nga mga kasulatan mao nga kon atong itukod ang pundasyon sa atong kinabuhi diha ni Jesukristo, kita makabuntog sa impluwensya ni Satanas ug sa kalibotanong mga hagit.
Unsa ang imong nahibaloan, gibati, o gituohan mahitungod sa Manluluwas nga makatabang kanimo nga gustong makabaton Kaniya isip imong pundasyon?
1. Buhata ang mosunod diha sa imong journal sa pagtuon:
Pagdibuho og yanong balay o bilding nga adunay lig-on nga haligi o pundasyon. Sa palibot sa balay, pagsulat og pipila ka hagit o negatibong mga impluwensiya nga imong giatubang.
Sa sulod o sa palibot sa pundasyon, pagsulat og mga butang nga imong mabuhat aron ibase ang imong kinabuhi ngadto sa Manluluwas.
Tubaga ang mosunod nga mga pangutana: Sa unsang paagi nga kining mga lihok nakatabang nimo o sa unsang paagi kini nakatabang nimo sa dihang ikaw nag-atubang og mga hagit o negatibong mga impluwensiya?
Sa sulat ni Pablo ngadto sa mga Taga-Corinto, iyang gisulbad ang daghang mga isyu ug nagtudlo kon unsaon sa Manluluwas ug sa Iyang ebanghelyo nga adunay gahom sa pagtabang sa mga Taga-Corinto nga mabuntog ang ilang mga hagit (tan-awa sa 1 Mga Taga-Corinto 1:23–24). Ang mosunod nga mga kalihokan nagtutok sa duha niadto nga mga isyu. Basaha ang mosunod nga mga opsiyon ug pagpili og usa nga mahimong labing makahuluganon alang kanimo nga tun-an.
2. Kompletoha ang usa sa mosunod nga mga kalihokan diha sa imong journal sa pagtuon:
Opsiyon A: Mga pagkabahin ug panagbingkil
Usa ka hagit nga gisagubang sa mga Santos sa Corinto mao ang panagbingkil. Ang mga pagkabahin miuswag sa usa ka bahin tungod kay nagtuo sila nga ang ilang kahimtang sa Simbahan natino pinaagi sa kaimportante sa tawo kinsa nagbunyag nila (tan-awa sa 1 Mga Taga-Corinto 1:12).
Tupad sa imong gidibuho nga balay, mahimo kamong maglista og bisan unsang mga paagi nga imong atubangon nga mga pagkabahin o panagbingkil sa inyong ward, pamilya, o komunidad.
Unsa ang pipila ka sangpotanan sa pagkabahin ug panagbingkil?
Unsa ang imong nakita niini nga mga bersikulo nga mahimong makatabang sa mga tawo aron mabuntog ang mga pagkabahin ug panagbingkil?
Ngano sa imong hunahuna nga ang pagtukod sa imong kinabuhi kang Jesukristo makatabang nimo aron mahiusa ug dili kaayo makiglalis niadtong mga naglibot kanimo?
Opsiyon B: Ang kaalam sa kalibotan
Daghan sa mga nagpuyo sa Corinto naghatag og bili sa kalibotanong kaalam. Ang mensahe sa usa ka gilansang sa krus nga Mesiyas walay kahulogan sa kadaghanan sa mga Judeo ug mga Hentil. Sa Romanhong kalibotan, ang silot sa paglansang sa krus nagsimbolo sa kaulaw ug kapildihan. Ang ideya sa usa ka tawo nga andam mosakripisyo alang sa uban kay “binoang” ngadto sa mga Griyego (1 Mga Taga-Corinto 1:23). Alang sa mga Judeo, ang usa ka Mesiyas nga namatay diha sa krus usa ka “kapangdolan” (1 Mga Taga-Corinto 1:23) tungod kay ilang gilaoman nga ang Mesiyas nga mobuntog sa ilang mga kaaway.
Sa usa ka dapit sa imong gidibuho nga balay, paglista og mga paagi nga ang kaalam sa kalibotan mahimong makaapekto o makahagit sa imong pagpamatuod kang Jesukristo ug sa Iyang ebanghelyo.
Ngano kaha nga pipila sa mga tawo wala makasabot o makadayeg kang Jesukristo ug sa Iyang Pag-ula karon?
Unsa nga mga kausaban ang lagmit mahitabo kon ang usa ka tawo mahimong masayod ug mobati nga ang Manluluwas adunay tinuod gahom sa ilang kinabuhi? (tan-awa sa 1 Mga Taga-Corinto 1:24).
Sa unsang paagi nga ang pagtukod sa imong kinabuhi ngadto kang Jesukristo ug sa Iyang ebanghelyo makatabang kanimo sa pag-atubang sa mahagitong kalibotanon nga mga ideya?
Pagtukod sa atong mga kinabuhi diha kang Jesukristo
Paggahin og pipila ka minutos sa pagtimbang-timbang sa imong kaugalingong kinabuhi. Sa unsang mga paagi nimo gitukod ang imong pundasyon nganha kang Jesukristo? Sa unsang mga paagi kaha nga gusto nimo nga molambo? Sa unsang paagi nga mas matukod ang imong kinabuhi diha sa Manluluwas nga si Jesukristo ug sa Iyang ebanghelyo makatabang ninyo pag-atubang sa imong kaugalingong mga hagit ug negatibong mga impluwensya? Ikonsiderar ang pagsulat sa imong mga hunahuna ug mga tumong diha sa imong journal sa pagtuon.
Opsiyonal: Gustong Makakat-on Pa og Dugang?
Nganong kinahanglan man nga akong tukoron ang akong pundasyon diha ni Jesukristo?
Si Elder Chi Hong (Sam) Wong sa Seventy mipayahag:
Imahe
Opisyal nga Litrato ni Elder Chi Hong (Sam) Wong. Gilitratohan niadtong Marso 2017.
Kon kita motukod sa atong pundasyon diha kang Jesukristo, kita dili mapukan! Samtang kita matinud-anong molahutay hangtod sa kataposan, ang Dios motabang nato sa pag-establisar sa atong mga kinabuhi diha sa Iyang bato, “ug ang mga ganghaan sa impyerno dili makabuntog batok [kanato]” (Doktrina ug mga Pakigsaad 10:69). Tingali dili kita makahimo sa pag-usab sa tanan sa unsay umaabot, apan kita makapili unsaon nga kita makapangandam sa unsay umaabot.