Unsa nga kalibotanon nga mga ideya ang nagpalibot nimo nga usahay makapalisod pag-ila sa kamatuoran? Ang mga Santos sa Corinto naglibog sa kalibotanon nga mga ideya, ug si Apostol Pablo misulay sa pagtabang kanila aron makita unsaon nila pagkat-on sa malungtaron nga espirituwal nga mga kamatuoran. Kini nga leksiyon makatabang nimo nga madapit ang Espiritu Santo aron matabangan ka nga makat-on sa espirituhanon nga mga butang.
“Sultihi kuno ko giunsa nimo pagkasayod”
Si Presidente Boyd K. Packer (1924–2015) sa Korum sa Napulog Duha ka Apostoles mipakigbahin sa mosunod nga asoy:
Imahe
Kataposang opisyal nga hulagway ni Elder Boyd K. Packer, Presidente sa Korum sa Napulog Duha ka Apostoles, 2000. Mitaliwan niadtong 3 sa Hulyo 2015.
Naglingkod ako sakay sa usa ka eroplano tupad sa usa ka tawo nga dali nga miangkon nga usa siya ka atiyesta kinsa nangusog gayod sa iyang dili pagtuo sa Dios mao nga ako mipadayag sa akong pagpamatuod ngadto kaniya. “Sayop ka,” miingon ko, “adunay Dios. Ako nasayod nga Siya buhi!”
Miprotesta siya, “Wala ka masayod. Walay usa nga nasayod niana! Dili kana nimo masayran!” Sa dihang dili gayod ko motugyan, ang atiyesta, kinsa usa ka abogado, nangutana sa tingali labing lisod nga pangutana kabahin sa pagpamatuod. “Sige kuno,” siya miingon sa bugal-bugal, matamayon nga paagi, “ingon nimo nasayod ka. Sultihi kuno ko giunsa nimo pagkasayod.”
(Boyd K. Packer, “The Candle of the Lord,” Ensign, Ene. 1983, 51)
Sa unsang paagi nimo nakita kining klase sa pagpangutana sa kalibotan karon?
Unsaon kaha nimo pagtubag ang pangutana sa tawo?
Samtang ikaw magtuon, pamalandongi kon unsa ka maayo ang imong pagsabot sa unsaon pagkat-on sa espirituwal nga mga kamatuoran ug pagpangita sa mga panabot nga mahimong makatabang kanimo aron mas makat-on og dugang.
Pagkat-on og espirituwal nga mga kamatuoran
Ang mga Santos sa Corinto naglibog sa kalibotanong mga ideya ug mga binuhatan sa pagpuyo sa ebanghelyo. Isip usa ka resulta, sila mihimo og daghang sayop nga mga pagpili. Si Pablo misulat kanila aron matabangan sila nga makasabot unsaon pagkat-on sa espirituwal nga mga butang.
Basaha ang 1 Mga Taga-Corinto 2:9–14, mangita sa mga panabot nga makatabang kanato sa pagkat-on og espirituwal nga mga kamatuoran.
Timan-i nga ang “natural nga tawo” sa bersikulo 14 mao ang “usa ka tawo kinsa mopili nga maimpluwensya pinaagi sa mga kahilayan, mga tinguha, mga kagana, ug mga pagbati sa unod kay sa pinaagi sa mga pag-awhag sa Balaan nga Espiritu” (Giya ngadto sa mga Kasulatan, “Kinaiyanhon nga Tawo,” scriptures.ChurchofJesusChrist.org).
Unsa nga mga bersikulo o mga hugpong sa mga pulong ang nagpatigbabaw diha kanimo? Unsa ang imong nagustohan mahitungod niini?
Unsa ang imong nakat-onan mahitungod sa Langitnong Amahan ug sa Iyang gugma alang kanimo diha sa bersikulo 9?
Unsa nga mga kamatuoran ang imong nakita mahitungod sa giunsa sa Langitnong Amahan pagpadayag sa kahibalo ngadto sa Iyang mga anak?
Usa ka kamatuoran nga gitudlo niini nga mga bersikulo mao nga kita masayod ug makasabot sa mga butang sa Dios pinaagi lamang sa Iyang Espiritu.
Isip usa ka posibleng pananglitan sa wala pagkasabot kon unsaon pagkat-on sa espirituwal nga kamatuoran, basaha unsa ang nahitabo dihang si Presidente Packer misulay pagpasabot kon giunsa niya pagkasayod nga ang Dios tinuod ngadto sa ateyista diha sa eroplano:
Imahe
Kataposang opisyal nga hulagway ni Elder Boyd K. Packer, Presidente sa Korum sa Napulog Duha ka Apostoles, 2000. Mitaliwan niadtong 3 sa Hulyo 2015.
Sa dihang akong gigamit ang mga pulong nga Espiritu ug saksi, ang atiyesta mitubag, “Wala ko kahibalo kon unsa kana imong gihisgotan.” Ang mga pulong nga pag-ampo, pag-ila [discernment], ug hugot nga pagtuo, sama ra nga walay kahulogan alang kaniya.
(Boyd K. Packer, “The Candle of the Lord,” Ensign, Ene. 1983, 51)
Pagkat-on pinaagi sa Espiritu
1. Paghimo og listahan sa mga kamatuoran sa imong journal sa pagtuon sama sa giingon sa mosunod nga parapo. Unya tubaga ang duha ka pangutana nga mosunod.
Sa imong journal sa pagtuon, paglista og pipila ka mga espirituwal nga mga kamatuoran nga imong nakat-onan pinaagi sa Espiritu Santo. Paglista usab og pipila ka kamatuoran nga gusto nimong makabaton og saksi. Pipila ka ehemplo mahimong maglakip sa mosunod: Ang Langitnong Amahan tinuod ug nahigugma kanako, si Jesukristo mao ang akong Manluluwas, ug si Joseph Smith mao ang usa ka propeta sa Dios.
Pagpili og usa sa mga kamatuoran nga imong naila ug tubaga ang mosunod:
Giunsa sa kalibotan pagsulti kanimo aron madiskobre ang kamatuoran mahitungod niining hilisgotan?
Unsa ang imong gibuhat, o unsa ang imong mabuhat, aron makahibalo niining kamatuoran pinaagi sa Espiritu Santo?
Kon gusto ka nga makahibalo og dugang mahitungod sa pagkat-on sa kamatuoran pinaagi sa Espiritu Santo, ikonsiderar ang pagtuon sa pipila sa mosunod nga mga kapanguhaan:
mga pakigpulong ug mga artikulo mahitungod sa pagkat-on pinaagi sa Espiritu, sama sa David A. Bednar, “Pagkat-on sumala sa Pamaagi sa Ginoo,” Liahona, Okt. 2018, 50–53
Pagtabang sa uban nga makakat-on pinaagi sa Espiritu
Basaha ang mosunod aron kompletohon ang sugilanon ni Presidente Packer. Sa dihang ang tawo diha sa eroplano misalikway sa mga pagpasabot ni Presidente Packer, si Presidente Packer mibati og kadasig sa pagpangutana sa tawo nga ihulagway ang lami sa asin:
Imahe
Kataposang opisyal nga hulagway ni Elder Boyd K. Packer, Presidente sa Korum sa Napulog Duha ka Apostoles, 2000. Mitaliwan niadtong 3 sa Hulyo 2015.
Human sa pipila ka mga pagsulay, siyempre, dili siya makahimo niini. Dili siya makahulagway, pinaagi sa mga pulong lamang, sa ordinaryo kaayo nga kasinatian sama sa pagtilaw sa asin. Sa makausa pa mipadayag ako kaniya og pagpamatuod ug miingon, “Ako nasayod nga adunay Dios. Imong gibugal-bugalan kana nga pagpamatuod ug miingon nga kon nasayod pa gayod ko, makasulti unta gayod ako kanimo kon giunsa nako pagkasayod. Akong higala, sa espirituhanong pagkasulti, nakatilaw na ako og asin. Dili pod ko makahulagway kanimo pinaagi sa mga pulong kon sa unsang paagi kini nga kahibalo miabot sama nga ikaw makasulti kanako kon unsa ang lami sa asin. Apan sultihan ko ikaw pag-usab, adunay Dios! Buhi gayod Siya! Ug tungod lamang kay wala ka masayod, ayaw ko’g sultihi nga ako wala masayod, kay ako nasayod gayod!” …
Sukad niana nga kasinatian, wala na gayod ako maulawi o naulaw nga dili ako makapasabot pinaagi sa mga pulong lamang sa tanan nakong nasayran sa espirituhanong paagi.
(Boyd K. Packer, “The Candle of the Lord,” Ensign, Ene. 1983, 52)
2. Tubaga ang mosunod nga mga pangutana diha sa imong journal sa pagtuon:
Nganong ang Espiritu Santo usa ka mas maayong tinubdan sa kahibalo kaysa sa kaalam ug pangatarongan sa kalibotan?
Unsa ang imong mabuhat sa pagpangita og kahibalo gikan sa Langitnong Amahan?
Ikonsiderar ang pagsulat diha sa imong journal sa pagtuon unsa ang gusto nimong buhaton aron makapadayon sa pagkat-on og kamatuoran pinaagi sa gahom sa Espiritu Santo.
Opsiyonal: Gustong Makakat-on Pa og Dugang?
Unsay akong mahimo aron makakat-on og espirituwal nga mga butang?
Si Elder Paul V. Johnson sa Seventy mipahayag:
Imahe
Elder Paul V. Johnson sa Korum sa Seventy nagpakuha og opisyal nga hulagway, 2021.
Ang mga tubag sa espirituwal nga mga pangutana gihatag ngadto sa mga indibidwal kinsa wala magpatig-a sa ilang mga kasingkasing; kinsa nangutana nga may hugot nga pagtuo, nagtuo nga sila makadawat; ug kinsa matinud-anong mosunod sa mga sugo.
Ang mga butang ba sama sa siyantipikong pamaagi ug lohika lamang magamit sa pagsabot sa mga kamatuoran sa ebanghelyo?
Si Presidente Dallin H. Oaks sa Unang Kapangulohan mipahayag:
Imahe
Opisyal nga Hulagway ni Presidente Dallin H. Oaks nga gikuha niadtong Marso 2018.
Kon mangita kita sa kamatuoran mahitungod sa relihiyon, kinahanglan natong gamiton ang espiritwal nga mga paagi niana nga pagsiksik: pag-ampo, saksi sa Espiritu Santo, ug pagtuon sa mga kasulatan ug sa mga pulong sa mga propeta. Kanunay kong magsubo kon dunay moreport nga may tawong nawad-an og relihiyosong pagtuo tungod sa sekyular nga mga pagtulon-an. Kadtong nakasinati na og espiritwal nga panan-awon posibling mag-antos sa tinuyo nga espiritwal nga pagkabuta. Sama sa giingon ni Presidente Henry B. Eyring, “Ang ilang problema wala mag-agad unsay ilang nasabtan; kon dili unsay dili nila masabtan.” [Henry B. Eyring, To Draw Closer to God: A Collection of Discourses (1997), 143].
Ang pamaagi sa siyensya motultol kanato ngadto sa gitawag nato og siyentipikanhong kamatuoran. Apan “ang siyentipikanhong kamatuoran” dili maoy kinatibuk-ang tuyo sa kinabuhi. Kadtong dili magkat-on “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118) nag-limit sa ilang panabot sa kamatuoran ngadto sa pwede nilang mapamatud-an sa siyentipikanhong mga pamaagi. Nagbutang kini og artipisyal nga mga kinutoban sa ilang pagtinguha sa kamatuoran.
Sa unsang paagi lagmit ang Espiritu Santo makigsulti sa kamatuoran kanako?
Si Elder Richard G. Scott (1928–2015) sa Korum sa Napulog Duha ka Apostoles mipahayag:
Imahe
Kataposang opisyal nga hulagway ni Elder Richard G. Scott sa Korum sa Napulog Duha ka Apostoles, 2004. Mitaliwan niadtong 22 sa Septyembre 2015.
Makakat-on ka og hilabihan kaimportante nga mga butang pinaagi sa unsay imong madungog ug makita ug, mas gani, pinaagi sa unsay imong mabati, ingon nga giaghat sa Espiritu Santo. Daghang mga indibidwal naglimita sa ilang pagkat-on sa unsa lamang ang ilang napaminaw o nabasa. Pagmaalamon. Pagpalambo usab sa kahanas sa pagkat-on pinaagi sa unsa ang imong nakita ug ilabi na sa unsay giaghat sa Espiritu Santo kanimo nga mabati. Mahunahunaon ug makanunayong mangita aron makat-on pinaagi sa unsa ang imong nabati. Ang imong kapasidad sa pagbuhat sa ingon modako pinaagi sa pagbalik-balik nga pagbansay. Mahinungdanong hugot nga pagtuo ug paningkamot ang gikinahanglan aron makat-on pinaagi sa unsa ang imong nabati gikan sa Espiritu. Pangayo inubanan sa hugot nga pagtuo alang sa samang tabang. Pagkinabuhi nga takos sa maong giya.
(Richard G. Scott, “How to Learn by the Spirit,” New Era, Sept. 2014, 48)
