Pagkat-on sumala sa Pamaagi sa Ginoo
Ni Elder David A. Bednar
Sa Korum sa Napulog Duha ka mga Apostoles
Gikan sa usa ka pakigpulong nga gihatag sa seminar para sa bag-ong mga presidente sa misyon niadtong Hunyo 25, 2014.
Ang pagdapit sa Espiritu Santo nga mahimong magtutudlo maoy usa ka importanting katuyoan sa tanang mga sundanan sa Ginoo sa pagkat-on.
Ang pagpadali sa Ginoo sa Iyang buhat nagkinahanglan kanato nga padayon nga magkat-on, mag-usab, ug mopadayon sa unahan uban sa pagtuo diha sa Manluluwas.
Usa ka Sumbanan sa Tanan nga mga Butang
Sa usa ka pinadayag nga gihatag pinaagi ni Propeta Joseph Smith niadtong Hunyo 1831, ang Ginoo mideklarar: “Ako mohatag nganha kaninyo og sumbanan sa tanan nga mga butang, nga kamo dili malimbungan; kay si Satanas anaa sa tanan nga bahin niini nga yuta, ug siya naglihok aron sa paglimbong sa mga nasud” (D&P 52:14).
Makapaikag, ang Ginoo mihatag kanato og “usa ka” ug dili “ang” sumbanan sa tanan nga mga butang. Dili ko motuo nga ang Ginoo nagsugyot sa pinulongan nga “usa ka sumbanan sa tanan nga mga butang” nga aduna Siyay usa lamang ka sumbanan nga gamiton sa matag sitwasyon. Hinoon, ang pamaagi sa Ginoo naglakip sa nagkalain-laing mga sumbanan nga gamiton aron makakab-ot og lain-laing espiritwal nga mga tumong.
Ang atong kinatas-ang tumong sa bisan unsa nga kasinatian sa pagkat-on ug pagtudlo mao ang pagtino ug paggamit sa sumbanan o mga sumbanan nga labing makatubag sa atong mga panginahanglan ug makakab-ut sa gitinguha nga mga resulta sa pagkat-on.
Ang Espiritu Santo Mao ang Magtutudlo
Ang Espiritu Santo mao ang ikatulo nga sakop sa Dios nga Kapangulohan ug usa ka Tigpadayag, Magtutudlo, Maghuhupay, Tigbalaan, ug Siya ang magapahinumdom kanato sa tanan nga mga butang (tan-awa sa Juan 14:16–17, 26; 3 Nephi 27:20). Si Elder James E. Talmage (1862–1933) sa Korum sa Napulog Duha ka mga Apostoles mipasabut, “Ang Katungdanan sa Espiritu Santo sa Iyang pagpangalagad sa mga tawo gihulagway diha sa kasulatan. Siya usa ka magtutudlo nga gikan sa Amahan; ug ngadto niadtong kinsa adunay katungod sa Iyang panudlo Iyang ipadayag ang tanang mga butang nga gikinahanglan alang sa kauswagan sa kalag.”1 Ang pagdapit sa Espiritu Santo aron mao ang magtutudlo mao ang usa sa importante nga katuyoan sa tanan nga mga sumbanan sa Ginoo sa pagkat-on ug pagtudlo.
Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo—ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on uban ug pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Diha sa kinasingkasing ug pagkamakanunayon sa atong paglihok nga dinasig sa hugot nga pagtuo, mapakita nato sa atong Amahan sa Langit ug sa Iyang Anak nga si Jesukristo sa atong pagkaandam nga makat-on ug pagdawat og panudlo gikan sa Espiritu Santo.
Hunahunaa kon sa unsa nga paagi nga ang mga misyonaryo motabang sa mga investigator nga makat-on pinaagi sa hugot nga pagtuo. Ang paghimo ug pagtuman sa espirituhanong mga pasalig, sama sa pagtuon ug pag-ampo mahitungod sa Basahon ni Mormon, pagsunod sa mga sugo, ug pagtambong sa mga miting sa Simbahan nagkinahanglan nga ang investigator mopakita og pagtuo ug molihok. Kini nga baruganan magamit usab sa tanang mga miyembro, lakip sa mga ginikanan, mga magtutudlo, ug mga lider.
Ang pagtudlo, pag-awhag, ug pagpasabut—bisan importante—dili makahatag og saksi ngadto sa investigator, sa usa ka bata, sa usa ka estudyante, o sa usa ka miyembro sa kamatuoran sa gipahiuli nga ebanghelyo. Gawas lamang kon ang ilang hugot nga pagtuo mosugod sa paglihok ug moabli sa dalan ngadto sa mga kasingkasing nga ang Espiritu Santo mohatag og makapanghimatuod nga saksi. Ang mga misyonaryo, mga ginikanan, mga magtutudlo, ug mga lider kinahanglan gayud nga makat-on sa pagtudlo pinaagi sa gahum sa Espiritu. Sa sama nga importansya, bisan pa niana, mao ang ilang responsibilidad sa pagtabang sa uban nga makat-on sa ilang kaugalingon pinaagi sa hugot nga pagtuo.
Ang pagkat-on nga akong gihulagway mosangpot sa mas labaw pa sa mental nga panabut ug sa paghinumdom sa impormasyon. Ang matang sa pagkat-on nga akong gihisgutan makapahimo kanato nga mahigmata ngadto sa Dios (tan-awa sa Alma 5:7), sa pagsalikway sa kinaiyanhon nga tawo (tan-awa sa Mosiah 3:19), sa pag-usab sa atong mga kasingkasing (tan-awa sa Mosiah 5:2), ug makabig ngadto sa Ginoo ug dili gayud mopahilayo (tan-awa sa Alma 23:6). Ang pagkat-on pinaagi sa hugot nga pagtuo nagkinahanglan sa kasingkasing ug andam nga hunahuna (tan-awa sa D&P 64:34) ug mao ang resulta sa Espiritu Santo nga nagdala sa gahum sa pulong sa Dios padulong ug pasulod sa kasingkasing. Ang pagkat-on pinaagi sa hugot nga pagtuo dili mabalhin gikan sa magtutudlo ngadto sa estudyante, gikan sa misyonaryo ngadto sa investigator, pinaagi sa pagtudlo, sa pagpakita, o sa pagpasinati; hinoon, ang usa ka estudyante kinahanglang mopakita og pagtuo ug molihok aron makaangkon og kahibalo alang sa iyang kaugalingon.
Usa ka Sumbanan sa Pagkat-on ug Pagtudlo
1. Pangandam sa pagkat-on. Kon motambong ka sa imong klase sa Sunday School ug maminaw sa imong magtutudlo nga mopresentar og usa ka hilisgutan, maayo kana. Apan kon naningkamot ka ug nangandam, kon naghunahuna ka sa mga butang nga gidapit ka sa imong magtutudlo sa pagbasa, pagpamalandong, ug pag-ampo sa dili pa magklase, mahimo nga adunay usa ka kusganon nga pagbubu sa Espiritu, ug ang Espiritu Santo mahimo nimo nga magtutudlo. Ang pagpangandam nagdapit og pagpadayag.
2. Pakigsulti aron makalig-on. Gusto nakong dad-on ang imong pagtagad ngadto niini nga bersikulo. “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayunan.” (D&P 88:122).
Kini mao ang usa sa gamhanan nga mga sumbanan sa Ginoo alang sa pagkat-on ug pagtudlo. Mosugyot ko og laing paagi sa pagtan-aw niini nga bersikulo: “Pagtudlo diha sa inyong mga kaugalingon og usa ka magtutudlo.” Kinsa man ang magtutudlo? Ang Espiritu Santo. Dili kaha nga kon gusto nimo ang Espiritu Santo nga mao ang magtutudlo, nan “dili ang tanan magdungan sa pagpamulong, apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan”? Ang bugtong makamugna niana nga kaayohan mao ang Espiritu Santo.
Ang pakigsulti aron makalig-on makadapit og pagpadayag. Sa pagkakaron diha sa Simbahan, kita nagkat-on ug naggamit sa mas sensitibo sa espiritwal, mahagiton, ug lisud nga mga sumbanan sa pagkat-on ug pagtudlo. Kanunay ba natong buhaton ang unsay kanunay natong gibuhat ug makakuha sa samang mga resulta nga kanunay natong makuha, o maghinulsol ba kita ug magkat-on ug mag-usab ug mouswag sa pagtudlo sumala sa pamaagi sa Ginoo?
3. Dapita sa paglihok. Usa lang ka yano nga pangutana ang makatabang sa pagkab-ot niini nga tumong. Unsay imong buhaton sa unsay imong nakat-unan? Ang paglihok sumala sa pinadayag nagdapit og dugang nga pagpadayag.
Nag-ampo ko nga makaapas kita sa pagpadali sa Ginoo, nga dili lamang kita mobuhat sa unsay kanunay natong gibuhat sa paagi sa atong pagbuhat niini.
Akong ideklarar ang akong pagsaksi sa buhing reyalidad ni Ginoong Jesukristo. Mosaksi ko nga Siya buhi. Siya nabanhaw. Siya ang nangulo niini nga Simbahan ug nagdumala sa mga kalihokan niini. Naghangyo Siya kanatong tanan nga moapas sa gipaspason sa Iyang pagpadali ug mosunod sa mga sumbanan nga Iyang gihan-ay alang sa atong paglambo ug pagkat-on.