Hangtud sa Sunod Natong Panagkita
Ang Atong Suporta sa Pagpaluyo
Gikan sa usa ka pakigpulong sa Oktubre 2005 nga kinatibuk-ang komperensya.
Ang espirituhanong paggiya kadaghanan nagdepende sa pagkamauyunon ngadto sa … mga propeta, manalagna, ug tigpadayag.
Gitinguha nako ang pagsulti kabahin sa sagradong mga katungdanan niadtong mga lider sa priesthood kinsa “gitawag ug gipili” (D&P 55:1) aron sa paggiya sa Simbahan karong panahona. …
… Ang akong mga Kaigsoonan [diha sa Korum sa Napulog Duha ka mga Apostoles], nga walay pili, mga buotan, dungganon, ug kasaligang mga tawo. Nasayud ko sa ilang mga kasingkasing. Sila mga sulugoon sa Ginoo. Ang ilang tinguha lamang mao ang paghago niining mahinungdanong mga calling ug sa pagpalig-on sa gingharian sa Dios dinhi sa yuta. Ang atong mga Kaigsoonan nga nagserbisyo karong panahona napamatud-an na, nasulayan, ug matinud-anon. … Ang ilang mga kasingkasing limpyo kaayo, ang ilang kasinatian daghan kaayo, mga hait pa og salabutan, ug ang ilang espirituwal nga kaalam lawum pa gayud kaayo nga kini makahupay bisan lang kon anaa sa ilang presensya.
… [Sa dihang gitawag ko, gitambagan ko] nga ang pinakamahinungdanong butang nga kinahanglang akong buhaton mao nga ako kanunay gayud makig-uyon sa akong mga Kaigsoonan. … Kana milanog ngari kanako, butang nga buot kong buhaton sa tibuok kong kasingkasing.
… Nakahukom ako nga kanang espirituhanong paggiya kadaghanan nagdepende sa pagkamauyunon ngadto sa Presidente sa Simbahan, sa Unang Kapangulohan, ug sa Korum sa Napulog Duha—silang tanan gipaluyohan … isip mga propeta, manalagna, ug tigpadayag. Wala ko mahibalo kon unsaon nato pagpaabut nga hingpit nga makig-uyon sa Espiritu sa Ginoo kon kita dili mauyunon sa Presidente sa Simbahan ug sa ubang mga propeta, manalagna, ug tigpadayag. …
Ang akong tambag sa mga miyembro sa Simbahan mao ang pagsuporta sa Presidente sa Simbahan, sa Unang Kapangulohan, sa Korum sa Napulog Duha, ug sa ubang General Authority sa atong tibuok kasingkasing ug kalag. Kon ato kining buhaton, luwas kita sa kakuyaw. …
Kinahanglan usab nga kita mosuporta ug mopaluyo sa atong lokal nga mga lider, tungod kay sila usab “gitawag ug gipili.” Ang matag miyembo niini nga Simbahan mahimong makadawat og tambag gikan sa bishop o presidente sa branch, stake o presidente sa misyon, ug sa Presidente sa Simbahan ug sa iyang mga kauban. Walay usa niining mga kaigsoonan ang nangayo sa iyang katungdanan. Walay usa nga perpekto. Bisan pa niana sila mga sulugoon sa Ginoo, Iyang gitawag pinaagi niadtong adunay katungod sa inspirasyon. Kadtong gitawag, gipaluyohan, ug gi-set apart dunay katungod sa atong pagsuporta.