Pagpaambit sa Gugma sa Dios
Sa dili pa lang dugay ang akong pamilya ug ako mibalhin ngadto sa Kentucky. Naglagot kaayo ko tungod kay gibiyaan nako ang tanan nakong mga higala ug mga paryente. Ang Kentucky lahi kaayo sa unsay akong naandan. Sa unang higayon nga miadto kami sa simbahan, akong nakita nga dili kaayo daghan ang mga tawo didto. Sa dihang akong naamgohan kon unsa ka gamay ang akong branch, nakahukom ko nga imbis nga maghunahuna og dili maayo kabahin niini, aduna koy buhaton kabahin niini.
Pagkasunod adlaw, ang akong mama ug ako miadto sa tindahan. Sa wala pa kami mobiya sa balay, mikuha ko og hugpong sa mga pass-along card [kard nga dunay gipaambit nga mga mensahe]. Sa pag-abut namo sa tindahan, mikuha ko og kendi ug miadto sa counter aron mobayad. Gi-scan sa kahira ang kendi, dayon gihatag kini kanako. Ako kining gibalik kaniya. Daw naglibug siya ug miingon, “Bag-o ra nimo kining gibayaran, ma’am.”
Miingon ko, “Nakahibalo ko, apan ako kining gihatag kanimo isip gasa.” Dayon mibutang ko og pass-along card uban sa kendi. Mipahiyom siya ug mipasalamat kanako. Gitan-aw niya ang luyo sa pass-along card, diin gisulatan nako, “Ang tanan anak sa Dios.” Mibiya ko nga malipayon, nasayud nga bisan kon dili siya magpamiyembro sa Simbahan, duna gihapon koy nabuhat nga maayo.
Sa wala madugay nianang adlawa, akong nahinumduman nga nabiyaan nako ang nahabilin nga mga kard duol sa cash register! Sa sunod higayon nga miadto mi sa tindahan, miadto ko aron mangutana kon naa pa ba kini didto. Dayon duna koy nakita, ug mihunong ko sa akong paglakaw. Mga lima sa mga cash register adunay pass-along card nga nag-ingon, “Ang tanan anak sa Dios.” Gipanghatag diay kini sa kahira! Nalipay kaayo ko tungod sa akong nabuhat.