5 ka Paagi nga Makatabang Ka sa Imong Bishop sa Pagtabang Kanimo

Ni Chakell Wardleigh

Mga Magasin sa Simbahan

Nagbuhat siya sa iyang labing maayo, apan usahay nagkinahanglan siya og tabang.

Hugot siyang molamano nimo sa matag higayon nga magkita mo, maglingkod siya sa iyang dapit diha sa atubangan atol sa sakrament miting, ug dako kaayo siya og gisakripisyo sa iyang panahon aron sa pagserbisyo kanimo ug sa Ginoo.

Siya ang imong bishop: usa ka lider sa priesthood kinsa gitawag sa Dios aron mangulo sa inyong ward. Ang iyang mga buluhaton dili gayud makompleto, motambag siya og mga miyembro diha sa iyang opisina human sa busy nga adlaw sa trabaho, ug magpabilin siya sa meetinghouse og dugay human sa mga kalihokan sa simbahan aron mabuhat ang tanan niyang katungdanan.

Tingali makita nga morag walay pagkaluya ang imong bishop, apan ang pagpangulo sa tibuok ward mahimong kapoy kaayo! Naningkamot siya sa pagbuhat sa iyang labing maayo, apan usahay nagkinahanglan siya og tabang. Ania ang lima ka paagi nga makatabang ka sa imong bishop sa pagtabang kanimo:

Pag-ampo alang kaniya. Ang calling sa bishop mahimong mosulay sa kinutuban sa iyang mental, espiritwal, ug pisikal nga kusog. Nagkinahanglan siya sa kalig-on nga ang Dios lamang ang makahatag apan mahimong moabut tungod sa inyong hugot nga pagtuo ug mga pag-ampo (tan-awa sa Santiago 5:16).
Pagbaton og pagtuo sa katungdanan. Gipaluyohan nimo siya isip imong bishop, apan ang imong pagtuo wala diha sa tawo; anaa kini sa katungdanan o calling sa bishop ug sa Dios nga mitawag ug mipaluyo niya. Sa unsang paagi nimo mapakita ang imong pagtuo? Pagmatinguhaon sa pagtuman sa mga calling ug mga buluhaton. Kon makigkita ka sa imong bishop, pakigkita nga andam—pag-ampo, pagpuasa kon gikinahanglan, ug pagsul-ob og tarung aron mapakita ang imong pagtahud sa Ginoo. Ikonsiderar og maayo ang iyang tambag. Nagrepresentar siya sa Ginoo.
Ila-ilaha siya. Paningkamot nga makaila kaniya. Pangutan-a siya kalabut sa iyang kinabuhi, sa iyang background, ug sa iyang kasinatian. Pahibaloa siya nga mapasalamaton ka sa iyang pagserbisyo ug nga aduna kay pagtuo sa iyang abilidad sa pagtuman sa iyang calling. (Tan-awa sa 1 Mga Taga-Tesalonica 5:12–13.)
Ayaw siya hagoa. Ang imong bishop gusto nga motabang nimo, apan kon duna kay problema nga masulbad ra sa imong mga home teacher, usa sa mga magtatambag sa bishop, o sa presidente sa imong Relief Society o sa elders quorum, unaha sila pag-adto. Adunay rason nga anaa ang ilang mga calling! Anaa sila aron sa pagtabang nimo ug usab aron ang imong bishop makatutok sa mga butang nga siya lang ang makahimo.
Ayaw pagdahum nga perpekto siya. Samtang makita nga daw haum kaayo ang imong bishop sa iyang calling, dili siya hingpit. Magduhaduha siya sa iyang kaugalingon, ug makahimo siya og sayop. Apan tinuod siyang nahigugma kanimo ug iyang buhaton ang tanan alang sa iyang calling. Pakigsulti kaniya. Kon mas nahibalo siya kanimo ug sa imong sitwasyon, mas makatabang siya nimo.