Elder Ulisses Soares: Usa ka Tawo nga Walay Pagpanglimbong
Sa unang mga adlaw sa Iyang pagpangalagad, samtang namili si Jesus sa Iyang mga Apostoles, Iyang nakita si Natanael nga nagpaingon Kaniya. Diha-diha dayon Iyang namatikdan ang kamaayo ni Natanael, mideklarar nga, “Tan-awa, aniay usa ka tinuod gayud nga Israelinhon, kang kinsa wala ang pagkalimbongan!”1
Si Jesus nasayud nga si Natanael usa ka tawo nga putli og kasingkasing, matinuoron sa iyang mga katuyoan, ug walay pagpakaaron-ingnon ug pagpanglimbong. Ang Ginoo ganahan niini nga kalidad sa matarung nga kaligdong, ug gitawag Niya si Natanael aron mahimong usa ka Apostol.2
Si Ulisses Soares susama ni Natanael sa karaan, ug ang Manluluwas mitawag usab kaniya.
“Ang Ehemplo sa Akong mga Ginikanan”
Si Ulisses, ang kinamanghuran sa upat ka managsoong lalaki, natawo sa São Paulo, Brazil, niadtong Oktubre 2, 1958. Gikan siya sa ubos nga sinugdanan, apan ang iyang mga ginikanan, si Apparecido ug Mercedes Carecho Soares, dungganon, kugihan nga mga tawo kinsa matinuorong naminaw sa mga misyonaryo. Nagpasakop sila sa Simbahan niadtong 1965 sa dihang si Ulisses unom ka tuig ang panuigon.
“Wala gayud ako makakita ni Brother Apparecido nga napakyas sa pagtambong og miting,” miingon si Osiris Cabral, kinsa miserbisyo isip presidente sa stake sa dihang batan-on pa si Ulisses. “Si Mercedes usab matinud-anon kaayo. Napanunod ni Ulisses ang kamapahinunguron sa iyang mga ginikanan.”
Si Ulisses Soares “nagtubo sa simbahan nga nagsunod sa ehemplo” sa iyang mga ginikanan, si Apparecido ug Mercedes Soares (wala). Samtang si Ulisses misalig sa Ginoo bisan pa sa oposisyon, iyang nakat-unan isip bata pa nga hugot nga mogunit ngadto sa Manluluwas ug sa Iyang ebanghelyo.
Ang natural nga maayong kasingkasing ni Ulisses milambo samtang nakakat-on siya sa mga paagi sa Ginoo. “Nagtubo ko sa simbahan nga nagsunod sa ehemplo sa akong mga ginikanan,” miingon si Elder Soares. Samtang gisunod niya kana nga ehemplo, ang iyang pagpamatuod misamot pagkalig-on bisan pa sa oposisyon.
“Ako lamang ang miyembro sa Simbahan sa akong eskwelahan, ug ang ubang mga bata kanunay nga mogalgal kanako ug moawhag kanako sa pagbuhat og sayop,” miingon siya. “Kinahanglang makakat-on ako sa pagpanalipod sa akong kaugalingon niini nga mga hagit, apan kanunay akong misalig sa Ginoo sa tibuok nakong kasingkasing sa pagtabang kanako nga magmalampuson. Akong nakat-unan sa akong kabatan-on nga kon imong buhaton ang imong parte, ang Ginoo mobuhat sa Iyaha. Apan kinahanglang manggunit ka pag-ayo sa Iyang kamot ug sa Iyang ebanghelyo.”
Sa dihang 15 anyos na si Ulisses, ang iyang bishop mihangyo kaniya sa pagtudlo og klase sa youth Sunday School. Usa ka leksyon nga iyang gitudlo nakasentro diha sa pag-angkon og pagpamatuod sa ebanghelyo. Natun-an na ni Ulisses ang Basahon ni Mormon, gibati kanunay nga ang Simbahan tinuod, ug nagtuo diha sa Manluluwas nga si Jesukristo.
Samtang nangandam siya sa iyang leksyon, gusto niya nga kusganong mopamatuod sa iyang klase sa katinuod sa ebanghelyo. “Nagtuon ko ug nag-ampo pag-ayo,” nahinumdom si Elder Soares. “Human ko miluhod, dihay miabut sa akong kasingkasing nga maanindot kaayo nga pagbati, usa ka gamay nga tingog nga mimatuod kanako nga anaa ako sa sakto nga dalan. Kusog kaayo kini nga ako dili gayud makasulti nga wala ako masayud.”
Sa paghingkod na ni Ulisses, nahibaloan niya nga kon mobuhat siya og labaw pa kay sa unsay gilauman o gihangyo, ang Ginoo madagayaon nga mopanalangin kaniya. Usa niana nga leksyon miabut samtang nangandam siya alang sa misyon. Atol sa mga pag-interbyu kang Ulisses, ang iyang bishop mihatag og gibug-aton sa kaimportante sa pagsunod sa mga sugo ug sa pagpakabuhi nga takus. Gipasabut usab niya pag-ayo ang pinansyal nga pagpangandam.
Karon ang tanang mga misyonaryo gikan sa Brazil mitampo ngadto sa ilang mga galastuhan sa misyon, diin daghang mga pamilya ang mitampo sa tibuok galastuhan. Sa dihang hapit na moabut si Ulisses sa edad sa pagmisyon, determinado siya nga mokita sa tanang kwarta nga gikinahanglan alang sa iyang misyon. Gigamit ang lig-ong baruganan sa panarbaho nga iyang nakat-unan samtang nagtrabaho sa gamay nga negosyo sa iyang amahan ug gisangkapan sa abilidad nga paspas nga mo-makinilya [type], nakakuha si Ulisses og regular nga trabaho nga motabang og andam sa payroll sa usa ka kompaniya.
Human makapasar og lisud nga entry exam, misugod siya sa pagtuon og accounting sa usa ka teknikal nga high school magabii. Matag bulan, human mobayad sa ikapulo, iyang tigumon ang kwarta alang sa iyang misyon. Human sa usa ka tuig, gibalhin siya ngadto sa accounting department sa kompaniya.
“Mao kana ang paagi sa akong pagtigum og kwarta aron ikabayad sa akong misyon,” miingon si Elder Soares. “Ug matag bulan sulod sa tulo ka tuig sa wala pa ko mobiya, mopalit ko og usa ka butang nga akong gikinahanglan—usa ka polo, usa ka parisan sa karsones, usa ka parisan sa medyas, kurbata, malita.” Nagkinahanglan usab siya, ug nakadawat, og lig-ong gugma ug suporta gikan sa iyang mga ginikanan ug lokal nga mga lider.
Si Ulisses gitawag ngadto sa Brazil Rio de Janeiro Mission. Miserbisyo siya sa unang bahin sa iyang misyon ubos ni Presidente Helio da Rocha Camargo, kinsa sa kaulahian nahimong unang General Authority nga gitawag gikan sa Brazil. Si Ulisses misugod sa iyang misyon sa sayong bahin sa 1978. Ang unang templo sa Latin America gipahinungod sa ulahing bahin nianang tuiga sa São Paulo pinaagi ni Presidente Spencer W. Kimball (1895–1985).
Niadtong Enero 1980, si Ulisses ug ang iyang kompanyon, kinsa wala usab makadawat sa iyang endowment, misakay og bus sa Rio de Janeiro alang sa walo ka oras nga biyahe padulong sa Templo sa São Paulo Brazil. Ang mga ginikanan ug mga igsoon ni Ulisses misugat kaniya didto, ug ang pamilyang Soares nabugkos alang sa karon ug sa kahangturan. Wala gayud malimti ni Ulisses kadtong lima ka oras nga magkauban sila didto sa Templo sa São Paulo. Wala madugay nianang adlawa, siya ug ang iyang kompanyon mibalik ngadto sa natad sa misyon.
Unahon ang Dios
Natagamtam ni Ulisses ang usa ka malampuson nga misyon, nga dugang nga nakapalig-on sa iyang pagpamatuod. Sa iyang pag-uli sa ilaha, nakakita siya og trabaho ug misugod sa pagtuon sa accounting ug economics sa usa ka lokal nga unibersidad.
Nakauli na siya og mga pito ka bulan sa dihang nahimamat niya si “Sister Morgado” sa usa ka multistake nga sayaw. Nakaserbisyo si Ulisses isip iyang zone leader sa makadiyot, ug ang duha migahin sa gabii sa pagbalitaay ug pagpaambit og mga istorya sa misyon. Paglabay sa tulo ka semana, misugod sila sa pag-date.
Si Rosana Fernandes Morgado otso anyos sa dihang ang iyang magulang nga babaye, si Margareth, misugod sa pagdala kaniya ngadto sa simbahan. Sa katapusan, ang duha ka matinud-anong batan-on nga mga investigator nakadawat og pagtugot gikan sa ilang amahan aron mabunyagan, apan ang matag usa kinahanglan nga maghulat hangtud nga moabut na siya og 17. Si Rosana misimba sulod sa siyam ka tuig sa wala pa siya makadawat og pagtugot nga mabunyagan.
Si Ulisses nagpuyo sa amihanang bahin sa São Paulo, ug si Rosana nagpuyo uban sa iyang mga ginikanan diha sa habagatang bahin sa siyudad. Ang pagbiyahe tabuk sa dakong siyudad molungtad og duha ngadto sa tulo ka oras pinaagi sa bus ug subway. Maayo gani, si Margareth ug ang iyang bana, si Claudio, nagpuyo duol sa balay sa iyang mga ginikanan.
“Kon moabut si Ulisses sa mga tapos sa semana aron makig-date kang Rosana, lisud na alang kaniya ang pagpauli og layo kaayo inig ka gabii,” mihinumdom si Elder Claudio R. M. Costa, General Authority Seventy, sa iyang umaabut nga bayaw. Busa, siya ug si Margareth midapit ni Ulisses nga diha matulog sa ilang balay human sa iyang mga pakig-date. “Gisagop namo siya sa makadiyot,” midugang si Elder Costa.
“Matulog siya sa sofa diha sa among sala,” miingon si Sister Costa. “Bag-o lang kaming naminyo niadto, mao nga wala kami sobra nga mga habol. Apan iyang tabunan ang iyang kaugalingon gamit ang among karaang kurtina. Nalipay siya tungod kay makakita na usab siya ni Rosana pagkasunod adlaw. Maayo siya ngadto sa akong igsoon, ug ganahan kaayo niya ang akong mga ginikanan.”
Si Ulisses ug Rosana gikasal sa Templo sa São Paulo Brazil niadtong Oktubre 30, 1982.
Kon mogahin ka og pipila ka minuto uban ni Elder ug Sister Soares, ang ilang gugma, pagdayeg, ug pagtahud sa usag usa maklaro dayon. Alang ni Elder Soares, si Rosana “ehemplo sa kamaayo, gugma, ug hingpit nga debosyon sa Ginoo ngari kanako ug sa akong pamilya.”3 Alang ni Sister Soares, si Ulisses maoy “usa ka gasa gikan sa langit.”
Midugang si Sister Soares: “Kanunay siya nga responsable kaayo ug matarung, kanunay siyang moatiman og maayo sa among pamilya, ug kanunay siyang maayo kaayo og tinagdan kanako. Sa tanan niyang mga calling sa Simbahan, gibuhat niya ang iyang pinakamaayo. Molakaw siya ug mobuhat. Kanunay niyang unahon ang mga butang sa Dios diha sa iyang kinabuhi. Balik-balik akong nahigugma kaniya tungod kay nasayud ko nga kon iyang unahon ang mga butang sa Dios, iyaha usab akong unahon.”
Kabahin sa iyang asawa, si Elder Soares miingon: “Siya ang tinuod nga bayani ug inspirasyon sa among pamilya. Mahigugmaon, mabination, ug mapailubon siya sa tanan. Gihiusa niya ang among pamilya, ug aduna siyay makitang maayo sa tanan. Dako kaayo siya og natampo sa unsay nahitabo sa akong kinabuhi. Sa akong tawag ngadto sa Korum sa Napulog Duha ka mga Apostoles, ako siyang gikomedyahan, ‘Ikaw ang akong basulon niini tungod kay gipalambo nimo og maayo ang gahum sa ebanghelyo dinhi sa akong kinabuhi.’”
Mabination nga Kasingkasing
Si Gustavo, ang kinamagulangang anak sa mga Soares, nahinumdom sa gabii sa dihang, niadtong bata pa, gisupak niya ang iyang mga ginikanan ug miikyas aron motan-aw sa tinuig nga kasaulogan sa ilang kasilinganan sa São Paulo nga nailhan isip Festa Junina.
“Anaa ako sa tunga-tunga sa usa ka dakong pundok sa mga tawo nga naglingaw-lingaw sa dihang nadunggan nako ang tig-anunsyo nga mitawag nako nga moadto sa atubangan,” miingon siya. “Didto akong nakit-an ang akong papa.”
Nabalaka na pag-ayo ang iyang mga ginikanan, apan imbis nga kasab-an si Gustavo, gigakos siya pag-ayo ni Ulisses.
“Seryuso kaming nag-istoryahanay mahitungod sa akong pagkawala, apan gitagad ako sa akong mga ginikanan uban sa pagtahud,” nahinumdom si Gustavo. “Gibati nako nga gipanalipdan, ug nasayud ko nga tinud-anay nila akong gimahal.”
Si Ulisses mahalaron sa iyang pamilya. Bisan pa sa iyang busy nga eskedyul sa trabaho ug pagbiyahe sulod sa mga katuigan, migahin siya og panahon sa pag-ugmad og mga relasyon ngadto sa iyang mga anak.
Sa dihang si Elder Soares gipaluyohan ngadto sa Korum sa Napulog Duha ka mga Apostoles niadtong Marso 31, 2018, tingali wala nay mas nasurprisa pa kay ni Gustavo ug ang iyang duha ka mga igsoong babaye, si Lethicia Caravello ug Nathalia Soares Avila. Apan kon ang gugma, pagkugi, pagsabut, ug pagkamapainubsanon maoy mopasarang sa usa ka tawo alang sa pagka-apostol, miingon sila, makasabut sila nganong gitawag sa Ginoo ang ilang amahan.
“Sa dihang gitawag ni Jesus ang Iyang mga Apostoles, wala Niya pilia ang labing makinaadmanon nga mga Pariseo, gipili Niya ang mga mangingisda,” miingon Lethicia. “Ang akong amahan ug inahan sama niana. Hingpit sila nga misalig sa Ginoo, ug migamit Siya kanila sa pagtuman sa Iyang mga buhat tungod kay nasayud Siya nga dili sila hakog, andam nga motrabaho og maayo, ug igo ang kamapainubsanon aron modawat og pagkorihir.”
Ang “mabination nga kasingkasing” sa ilang amahan motabang kaniya samtang mopadayon siya sa unahan isip usa sa talagsaon nga mga saksi sa Manluluwas, midugang si Nathalia. “Igo ang iyang kamabination aron mabuhat kana,” miingon siya. “Nabati niya ang impluwensya sa langit, ug gimahal niya ang tanan ug gusto nga mobuhat sa unsay matarung.”
“Ang Tanan Mamaayo Ra”
Sa dihang si Elder Soares nagserbiyo isip presidente sa Portugal Porto Mission gikan 2000 hangtud 2003, naila siya sa paggamit sa mga pulong nga Portuguese “Tudo vai dar certo”—ang tanan mamaayo ra.
“Gitudlo niya kana kanamo,” mihinumdom si Ty Bennett, usa sa iyang mga misyonaryo. “Nagpakabuhi siya uban sa pagtuo ug pagkamalaumon nga kon buhaton nato ang unsay gusto sa Ginoo nga atong buhaton, ang tanan mamaayo ra.”
Gitudloan usab niya ang iyang mga misyonaryo nga dili mogamit sa mga pulong nga lisud o imposible, miingon si Richard Shields, laing usa sa iyang mga misyonaryo. “Among giisip ang mga butang nga ‘mga hagit.’ Kana nga tambag mitabang sa paghulma sa akong kinabuhi sa dihang gitan-aw nako ang mga butang isip ‘mga hagit’ nga buntogon imbis nga ‘lisud’ o ‘imposible.’”
Ang ingon nga pagtuo ug pagkamalaumon wala magagikan sa sayon nga kinabuhi. Si Elder ug Sister Soares nakaila gayud sa kasagmuyo nga wala ang ubang gikinahanglan, sa kakapoy sa dugay nga mga adlaw sa trabaho ug pagtuon, sa mga hagit sa dili maayong panglawas, ug sa kasubo sa makuhaan, sa patay nang daan nga pag-anak, sa pagtaliwan sa mga igsoon ug mga ginikanan.
Apan sa tibuok nga panaw sa kinabuhi, misalig sila sa mga pulong sa paborito nga kasulatan ni Elder Soares: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo.”4
“Ang mga hagit kabahin sa atong pag-uswag,” miingon si Elder Soares. “Apan kon mapailubon kita diha sa pag-antus, kon makakat-on kita sa paglahutay sa mga hagit sa kinabuhi, kon magpabilin kitang matinud-anon, ang Ginoo taas og pagtan-aw kanato ug mopanalangin kanato sa Iyang gisaad nga mga panalangin.”
Ug kon manggunit kita og maayo sa gunitanan nga puthaw, siya midugang, dili kita pasagdan sa Ginoo nga mag-inusara.
“Ang pagkamakanunayon sa pagsunod sa mga sugo, sa ebanghelyo, sa mga kasulatan, ug ni Ginoong Jesukristo makatabang kanato sa pagbuntog sa mga hagit sa kinabuhi,” mipamatuod si Elder Soares. “Kon kita moluhod aron mag-ampo, Siya magauban kanato ug Siya mogiya kanato. Modasig Siya kanato kon asa moadto ug unsay buhaton. Kon magmasulundon kita ug mopaubos sa atong kaugalingon, ang Ginoo motubag sa atong mga pag-ampo.”
Mahalaron nga Disipulo
Si Ulisses Soares usa ka tawo sa abilidad ug pagpangandam. Ang iyang edukasyon, lakip ang masters degree sa business administration, miandam kaniya aron makatrabaho isip accountant ug auditor sa multinational nga mga korporasyon sa Brazil. Kana nga kasinatian miandam kaniya aron makatrabaho sa finance department sa Simbahan, nga miandam usab kaniya sa edad nga 31 nga mahimong usa sa kinabataan nga direktor sa temporal nga mga kalihokan sa Simbahan. Kana nga pagpangandam nakatabang gayud kaniya isip presidente sa misyon ug sa iyang tawag isip General Authority Seventy niadtong Abril 2, 2005.
Sa wala pa matawag ngadto sa Kapangulohan sa Seventy niadtong Enero 6, 2013, si Elder Soares miserbiyo isip usa ka magtatambag ug dayon isip Presidente sa Kapangulohan sa Brazil Area ug isip usa ka magtatambag sa Africa Southeast Area. Didto, miserbisyo siya isip usa ka magtatambag ni Elder Dale G. Renlund, kaniadto usa ka General Authority Seventy. Si Elder Rendlund, nga karon sakop sa Korum sa Napulog Duha ka mga Apostoles, mahinangpon nga mihinumdom sa panahon nga nagkauban sila.
“Si Elder Soares madasigon, mapasaligon, mahalaron nga disipulo ni Jesukristo,” miingon si Elder Renlund. “Wala koy kaila nga mas labaw pa ka mainitong mibati nga anaa siya sa buluhaton sa Ginoo. Kon hangyoon siya sa pagbuhat og usa ka butang, buhaton niya kini kutob sa iyang mahimo.”
Taliwala man sa mga Santos sa Peru (sa wala), Ghana (ubos), o ubang mga nasud diin siya nagserbisyo ug nangalagad, si Elder Soares “daling mahigugma sa mga tawo,” miingon si Elder Claudio R. M. Costa.
Miingon siya nga si Elder Soares daling “nahigugma” sa mga Santos sa Africa. Usa sa iyang unang buluhaton diha sa dapit mao ang pagdumala sa usa ka komperensya sa stake sa Kananga, Democratic Republic of Congo. “Sa iyang pagbalik, dili siya makahunong sa paghisgut mahitungod sa kabuotan ug debosyon sa mga tawo nga iyang nahimamat,” miingon si Elder Renlund.
Si Elder L. Whitney Clayton, kinsa miserbisyo uban ni Elder Soares sulod sa lima ug tunga ka tuig diha sa Kapangulohan sa Seventy, mitawag kang Elder Soares isip tawo nga motabang sa pagmugna og panag-uyon. “Maminaw siya ug mokonsiderar sa iyang mga hunahuna. Mainampingon siya sa pagpahigayon sa iyang kaugalingon diha sa mga miting aron magka-uyon ang among mga tingog, imbis nga magka-indigay.”
Mapaubsanon si Elder Soares kalabut sa iyang abilidad nga makasulti sa Portuguese, English, Spanish, ug French. Apan kana nga gasa, nga nagkinahanglan og makanunayong pagtagad, usa ka panalangin ngadto sa Simbahan, miingon si Elder Clayton. Si Elder Soares makasulti ngadto sa daghan kaayong mga miyembro sa Simbahan sa ilang kaugalingong pinulongan.
“Si Ulisses usa na ka lider sukad pa sa iyang pagkabata,” nakaobserbar si Elder Claudio Costa sa iyang bayaw. “Makinaadmanon siya ug maantigo kaayo, ug gibati niya ang responsibilidad nga kanunay nga mohatag sa iyang pinakamaayo. Dali siyang mahigugma niadtong naglibut kaniya. Aduna siyay kasingkasing sa tinuod nga disipulo sa Manluluwas, ug aduna siyay sigurado nga saksi nga si Jesus mao ang Kristo. Gimahal nako siya ug mapasalamaton ko nga mopaluyo kaniya isip usa ka Apostol sa Ginoo.”
Ug si Elder David A. Bednar, namulong alang sa Korum sa Napulog Duha ka mga Apostoles, midugang: “Si Elder Soares putli, walay pagpanglimbong, ug inosente nga disipulo sa Manluluwas. Pinaagi sa kahayag sa iyang panagway, sa iyang mainiton nga pahiyom, ug sa iyang mabination nga pamatasan, ang dili maihap nga mga indibidwal ug mga pamilya nadasig kaniadto, nadasig karon, ug madasig sa umaabut uban ang mas dakong tinguha nga mosunod sa Manluluwas ug sa mga lagda sa Iyang ebanghelyo.”
Litrato uban sa asawa, si Rosana, atubangan sa Templo sa Salt Lake pinaagi ni Kristin Murphy, Deseret News
Sa atong dispensasyon, ang Ginoo misulti mahitungod kang Edward Partridge, “Ang iyang kasingkasing putli diha sa akong atubangan, kay siya sama ni Natanael sa karaan, kinsa walay pagpanglimbong.”5 Kalabut ni Hyrum Smith, ang Ginoo miingon, “Ako, ang Ginoo, nahigugma kaniya tungod sa kaligdong sa iyang kasingkasing, ug tungod kay siya nahigugma niana nga matarung diha sa akong atubangan.”6
Kalabut ni Ulisses Soares, ang Ginoo mosulti og sama niana.