Pagpangayo og Tabang aron sa Pagtabang sa Uban

Unsaon nato pagpaapil sa uban kon magkinahanglan kita og tabang sa atong mga paningkamot sa pagpangalagad? Apil sa mga interbyu sa pagpangalagad ug mga miting sa council sa unang Dominggo.

Sa dihang dili na makalakaw si Kathy tungod sa multiple sclerosis ug nagkinahanglan og wheelchair, iyang nakita nga nagkinahanglan siya og tabang matag gabii sa pagbalhin gikan sa iyang lingkuranan ngadto sa iyang higdaanan. Dako ra kaayo ang trabaho alang sa usa ka miyembro. Busa ang elders quorum nagtinambagay mahitungod sa iyang sitwasyon ug nakahukom nga mohimo og eskedyul sa pagtabang niya matag gabii.¹

Kon masayud kita sa mga panginahanglan ug mga kalig-on niadtong atong giserbisyuhan, tingali atong makita nga magkinahanglan kita og tabang sa pagtabang nga matubag ang ilang mga panginahanglan. Ang mga interbyu sa pagpangalagad ug ang mga miting sa council sa unang Dominggo mao ang duha ka oportunidad nga mahisgutan kon unsaon sa pagpaapil sa uban sa tukmang paagi.

Mga Interbyu sa Pagpangalagad

Kining matag tulo ka bulan nga mga interbyu tali sa tigpangalagad nga mga sister ug sa kapangulohan sa Relief Society o sa tigpangalagad nga mga brother ug sa kapangulohan sa elders korum mao lamang ang pormal nga report nga atong himoon kalabut niadtong atong gialagaran. Ang interbyu usa ka oportunidad sa labing minos kausa matag tulo ka bulan sa (1) pakigtambag mahitungod sa mga kalig-on, panginahanglan, ug mga hagit sa gi-assign nga mga pamilya ug mga indibidwal, (2) pagtino unsa nga mga panginahanglan nga mahimong matabangan sa quorum, Relief Society, o ward council; ug (3) pagkat-on gikan sa mga lider ug madasig diha sa mga paningkamot sa pagpangalagad.

Ang presidente sa elders quorum ug ang presidente sa Relief Society direktang mosulti ngadto sa bishop sa importanting mga panginahanglan ug modawat og tambag ug direksyon gikan kaniya.

Makakita ka og dugang nga impormasyon mahitungod sa mga interbyu sa pagpangalagad diha sa ministering.lds.org.

Paghimong Makahuluganon sa mga Interbyu sa Pagpangalagad

Agig pagsuporta sa pamahayag ni Presidente Russell M. Nelson nga ang programa sa pagpangalagad maoy importanting elemento nga makaapekto sa kaugmaon sa Simbahan, si Elder Gary E. Stevenson sa Korum sa Napulog Duha ka mga Apostoles mitudlo, “Ang katumanan sa iyang panglantaw … mahimong mabase kon unsa ka maayo nga natudloan ug naapil sa interbyu sa pagpangalagad ang tigpangalagad nga mga brother ug sister.”²

Upat ka mga sugyot alang sa tigpangalagad nga mga brother ug sister:

Adto sa interbyu nga magtinguha og tambag. Pangandam nga makat-on.
Pangandam nga hisgutan ang mga panginahanglan nga tingali nagkinahanglan ka og tabang aron matubag.
Tutuki ang mga kalig-on ug abilidad sa indibidwal, dili lang ang mga panginahanglan.
Kontaka ang kapangulohan aron magpakitambag bisan wala pa ang matag tulo ka bulan nga mga interbyu kon gikinahanglan.

Lima ka mga sugyot alang sa mga lider:

Ang mga interbyu dili kinahanglang taas, apan pag-iskedyul og igong panahon nga mag-istorya sa usa ka dapit nga nagtugot og makahuluganon nga pag-istoryahanay.
Gamita ang oportunidad nga mangalagad ngadto sa tigpangalagad nga brother o sister.
Ayaw paghimo og mga pangutana nga makahatag og impresyon nga nag-ihap lang ka sa mga pagbisita o nagmarka sa mga pagkontak (“Nahimo na ba ninyo ang inyong pagpangalagad?”). Paghimo og mga pangutana nga naglig-on sa gitinguha nga mga kinaiya (“Unsa nga pag-aghat ang inyong gibati samtang nag-ampo mo alang sa pamilya? Unsa ang nahitabo sa dihang gisunod ninyo kadto nga mga pag-aghat?”).
Paminaw og tinud-anay ug paghimo og mugbong mga sulat.
Pagtinambagay sa usag usa. Ang magkompanyon nga tigpangalagad dunay katungod nga makadawat og pagpadayag alang niadtong gi-assign kanila nga ilang alagaran.

Mga Pangutana ug mga Tubag mahitungod sa mga Interbyu sa Pagpangalagad

Unsa ang interbyu sa pagpangalagad?

Usa kini ka diskusyon tali sa tigpangalagad nga mga brother ug usa ka sakop sa kapangulohan sa elders quorum o tali sa tigpangalagad nga mga sister ug usa ka sakop sa kapangulohan sa Relief Society diha sa usa ka palibut nga nagtugot kanila sa pagtinguha ug pagdawat og inspirasyon gikan sa Espiritu Santo. Isip resulta, ang tigpangalagad nga mga brother ug sister mahimong madasig sa pagbantay, paghigugma, pagtudlo, ug paghupay sumala sa pamaagi sa Manluluwas.

Kinahanglan bang buhaton nga mag-atubangay kining mga interbyu matag tulo ka bulan?

Kasagarang ipahigayon kini nga mag-atubangay, apan mahimo kining buhaton pinaagi sa telepono o sa internet kon ang personal nga pag-atubangay dili praktikal. Sa kinatibuk-an, ang duha ka mga kompanyon moapil sa interbyu kon angay.

Unsa ang katuyoan sa interbyu sa pagpangalagad?

Ang mga interbyu sa pagpangalagad maoy oportunidad alang sa mga tigpangalagad nga mga brother ug sister sa pagribyu sa kasamtangan nga mga sitwasyon, paghimo og mga plano sa umaabut, ug pagkuha sa gikinahanglang tabang alang sa mga indibidwal o mga pamilya nga ilang gipangalagaran. Usa kini ka kahigayunan sa paghisgot kon unsa nga mga kapanguhaan ang mahatag sa korum ug Relief Society.

Unsaon nako pagdumala ang kompidensyal o sensitibo nga mga isyu?

Ang tigpangalagad nga mga brother ug sister mopaambit lamang og kompidensyal nga impormasyon ngadto sa presidente sa elders quorum o Relief Society—o direkta sa bishop. Ang kompidensyal o sensitibo nga impormasyon dili angay nga ipaambit sa mga miting sa council sa unang Dominggo.

Mga Miting sa Council sa Unang Dominggo

Agig dugang sa mga interbyu sa pagpangalagad, ang mga miting sa council sa unang Dominggo mao ang laing paagi sa pagpaapil sa uban diha sa pagpangalagad. Sa mga miting sa Relief Society ug elders quorum, ang inspirasyon mahimong moabut ngadto sa mga nanambong pinaagi sa Espiritu ug gikan sa uban diha sa grupo.

Ang katuyoan sa miting sa council mao ang:

“Pagtinambagay bahin sa lokal nga mga responsibilidad, mga oportunidad, ug mga hagit;
“Magkat-on gikan sa mga ideya ug mga kasinatian sa usag usa; ug
“Magplano og mga paagi sa pagbuhat sa mga impresyon nga nadawat gikan sa Espiritu.”³

Ang mga miting sa council labaw pa kay sa mga diskusyon: ang mga miting mogiya kanato sa paglihok isip mga indibidwal o isip grupo kon gidasig sa Espiritu. Ang mga miyembro mahimong mobati og tinguha sa pagtuman sa buhat sa Ginoo isip resulta niini nga mga miting.

Pagdapit sa Paglihok

“Among pag-ampo karong adlawa,” miingon si Elder Jeffrey R. Holland sa Korum sa Napulog Duha ka mga Apostoles, “mao nga ang matag lalaki ug babaye––ug atong mga hamtung nga young men ug young women––mobiya niining kinatibuk-ang komperensya nga mas hugot ang kamasaligon sa kinasingkasing nga pagpakabana alang sa usag usa, dinasig lamang sa putli nga gugma ni Kristo sa pagbuhat sa ingon.”⁴