Elder Gerrit W. Gong: Higugmaa ang Ginoo ug Salig Kaniya
Usa ka bag-ong minyo nga estudyante sa graduate school sa University of Oxford sa England, nakat-unan ni Gerrit W. Gong pinaagi sa personal nga kasinatian nga kon mohigugma kita sa Ginoo ug mosalig Kaniya, Siya motabang kanato, mogiya kanato, ug molig-on kanato.
Si Gerrit usa ka Rhodes Scholar nga naningkamot nga makompleto ang duha ka graduate degree, usa niini doctorate. Sa samang higayon, nagserbisyo siya sa bishopric sa Oxford Ward. Siya ug ang iyang asawa, si Susan, nahinumdom sa tambag nga gihatag ni Elder David B. Haight (1906–2004) sa Korum sa Napulog Duha ka mga Apostoles sa dihang gipahigayon niya ang ilang kasal sa Templo sa Salt Lake. “Miingon siya namo nga kanunay nga magbaton og calling,” miingon si Elder Gong. “Nasayud kami nga kon mosalig kami sa Dios ug mobuhat sa among labing maayo, motabang Siya kanamo.”
Si Gerrit ug Susan nakadawat gayud og “balaang tabang ug malumong mga kalooy”, miingon si Gerrit. Samtang nagpadayon diha sa bishopric, nahuman ni Gerrit ang tanang akademik nga panginahanglanon alang sa doctoral degree, gawas sa iyang thesis. Mihangyo siya og panalangin sa priesthood gikan sa bishop sa Oxford Ward, si Alan Webster. Diha sa panalangin, nakadawat si Gerrit niini nga saad: “Padayon sa pagbuhat kutob sa mahimo, ug ang Ginoo mopanalangin kanimo.”
Duha ka mga miyembro sa ward kinsa mga sinati na nga legal nga mga sekretarya miboluntaryo nga motabang sa pag-type sa iyang manuskrito, ug nakahimo si Gerrit sa pagtapos sa iyang thesis sulod sa pipila ka bulan. Gani, nakompleto niya ang masters ug doctoral degree lapas lang og gamay sa tulo ka tuig. Human sa gradwasyon midawat usab siya og posisyon sa faculty research diha sa unibersidad. Ang iyang kasinatian sa Oxford nakapalig-on sa iyang pagsalig sa Ginoo, pagsalig nga milahutay hangtud karon ug mopadayon sa pagpanalangin ni Gerrit W. Gong samtang magserbisyo siya karon sa Korum sa Napulog Duha ka mga Apostoles.
Mga Tinapay ug mga Isda
“Ang Ginoo manggiluy-on ug mabination ug nagtinguha sa pagpanalangin kanato,” miingon si Elder Gong. “Kon buhaton nato ang atong labing maayo, motabang Siya kanato sa pagbuhat og labaw pa kay sa atong mahimo kon kita ra. Sama kini sa pagdaghan sa mga tinapay ug mga isda. Kuhaon sa Ginoo ang unsay anaa ug padak-on kini lapas pa sa unsay atong mahimo kon kita ra.”
Ang baruganan sa mga tinapay ug mga isda magamit usab diha sa pagkat-on, miingon siya. “Bisan kon walay makuha nga pormal nga edukasyon, ang diwa sa pagkat-on maoy importante, tungod kay ang pagkat-on mahangturon. Makahimo kita sa pagpangita sa kahayag ug kamatuoran, bisan unsa pa ang atong mga kahimtang. Kon atong buhaton, ang Ginoo motabang kanato sa pagkaplag niini.”
Pagkalakip diha sa Pakigsaad
Samtang didto sa Oxford, nakakat-on si Elder Gong og laing baruganan sa ebanghelyo, usa nga gitawag niya og “pagkalakip diha sa pakigsaad.”
“Samtang mas magpaduol kita sa Ginoo, kita usab mas mapaduol ngadto sa usag usa,” miingon siya. “Sa Oxford, among gimanggad ni Susan ang among kasinatian sa ward sama sa among pagmanggad sa among kasinatian sa akademik. Daghan sa among minahal nga mga higala hangtud karon mao ang mga tawo nga gikan sa Oxford Ward.”
Lakip niadto nga mga higala mao si Tim ug Katherine Witts, kinsa nahinumdom nga miadto sa templo uban sa mga Gong. “Klaro nakong nahinumduman nga gitangtang ni Brother Gong ang iyang relo aron dili siya malinga o mapugngan sa oras kon mamalandong sa mga butang sa kahangturan,” miingon si Sister Witts. “Kanang gamay nga lihok nakatabang kanako nga mahimong mas makugihon sa akong kaugalingong pagsimba diha sa templo.”
Ang mga Gong kasagarang makahimamat sa mga higala nga ilang nakaila tungod sa ebanghelyo. “Ang mga tawo moingon, ‘Nakigtrabaho kami nimo sa dihang naa pa ka sa high council,’ mga butang nga sama niana,” miingon si Elder Gong, “ug mao usab kana kanamo. Mapasalamaton ko sa usa ka presidente sa stake ug sa ward council nga mitabang nako niadtong batan-on pa ko nga bishop. Utangan kita ngadto sa mga ginikanan, mga in-law, mga silingan, mga presidente sa misyon, mga sister, ug mga lider sa priesthood kinsa buotan kanato, naggiya kanato, ug nag-awhag kanato sa pagduol ngadto kang Kristo.”
Panulundon sa Pamilya
Ang kasaysayan sa pamilya ni Elder Gong masubay balik sa 34 ka henerasyon ngadto ni Unang Dragon Gong, nga natawo sa AD 837. Ang mga apuhan ni Elder Gong milalin gikan sa China ngadto sa Estados Unidos. Ang iyang inahan, si Jean, nagpamiyembro sa Simbahan samtang usa ka tin-edyer pa sa Hawaii, USA, ug sa wala madugay mieskwela sa Brigham Young University sa Provo, Utah, USA, diin mipuyo siya uban sa pamilya ni Gerrit de Jong, ang unang dean sa College sa Fine Arts. “Ang mga de Jong mitabang nako nga makasabut kon sama sa unsa ang usa ka pamilya sa ebanghelyo,” miingon siya.
Human sa BYU, si Jean mieskwela sa Stanford University sa Palo Alto, California, USA, diin iyang nahimamat si Walter A. Gong. “Usa na siya ka Kristiyano ug daling nakasabut kon unsay gitanyag sa gipahiuli nga ebanghelyo,” miingon si Jean. Nagpamiyembro siya sa Simbahan, ug paglabay sa usa ka tuig naminyo sila sa Templo sa Salt Lake. Ang duha nahimong propesyonal nga mga magtutudlo ug migahin og sobra sa 70 ka tuig sa pagtudlo kon tingbon silang duha.
“Si Papa nahimo usab nga patriarch,” miingon si Elder Gong, “ug tungod kay ang patriyarkal nga mga panalangin gihatag didto sa among balay, ang among panimalay napuno sa ligdong nga pagtahud alang sa gugma sa Dios ngadto sa Iyang mga anak.”
Niadtong Disyembre 23, 1953, sa Siyudad sa Redwood, California, ang kinamagulangan sa tulo ka anak nila ni Jean ug Walter natawo. “Ang iyang unang ngalan, Gerrit, usa ka Dutch, aron sa pagpasidungog kang Gerrit de Jong,” mipasabut si Jean. “Ang iyang tunga-tungang ngalan mao si Walter, aron sa pagpasidungog sa iyang amahan. Ug ang among apelyido Intsik, nga nagpasidungog sa iyang panulundon.”
Miingon si Jean nga mahunahunaon si Gerrit ngadto sa iyang mga manghud, si Brian ug Marguerite. “Ganahan siya nga motabang kanila,” miingon siya, “bisan sa gagmay nga mga butang sama sa pagtudlo kanila unsaon sa pagliston sa ilang mga sapatos.” Nakahinumdom siya nga mipauli sa balay gikan sa simbahan usa ka adlaw ug nakadungog ni Gerrit ug Brian nga nag-ingon nga gilaayan sila sa usa ka pakigpulong sa sakrament miting. “Busa ako silang gihagit: ‘Nan paghimo og mas maayo nga pakigpulong.’ Ilang gidawat ang hagit ug misugod sa paghatag og dugang nga pagtagad sa tanang pakigpulong,” miingon siya.
Isip tin-edyer, ganahan si Gerrit nga mag-backpack ug mag-hike kauban sa ubang young men sa iyang ward. Si Wally Salbacka, usa ka dugay na kaayong higala, nakahinumdom sa usa ka piho nga pagkamping. “Kauban nako si Gerrit ug ang iyang igsoon, si Brian, ug usa ka higala nga dili miyembro sa Simbahan. Sa dili matino nga rason, misugod mi sa pagkanta og mga himno. Si Gerrit ang mikanta sa melodiya, si Brian mikanta sa tenor, ug ako ang mikanta sa bass. Siguro nakakanta kami og 10 o 20 ka mga himno, tungod lang sa kalipay sa pagkanta. Nindot kadto nga kasinatian. Nakadayeg ang among higala nga dili miyembro.”
Si Brother Salbacka nakahinumdom usab nga sa high school, si Gerrit mihangyo sa mga cheerleader nga pangulohan ang hilum nga pag-abiba sa chess team. “Iya silang gikumbinser nga ang moral nga suporta maayo alang sa tanan,” miingon siya, “ug miadto gayud sila sa dula!”
Gikan sa wala: Si Marjorie ug Gordon B. Hinckley mitimbaya ni Gerrit ug Susan sa salo-salo sa kasal sa mga Gong. Isip usa ka misyonaryo sa Taiwan, si Elder Gong mitudlo og usa ka pamilya ug paglabay sa katuigan, isip usa ka General Authority, nahimamat ang apo sa usa sa mga anak nga babaye sa pamilya. Sa Vietnam, si Elder ug Sister Gong mipintal og mga hulagway diha sa bungbong isip usa ka paagi sa pagdala og kalipay sa mga bata nga nag-atubang og kalisdanan. Ang mga sakop sa pamilya nga Gong nakigpundok uban niadtong mitabang sa pagpintal og mga hulagway diha sa bungbong didto sa Vietnam.
Human sa high school, si Elder Gong mieskwela sa Brigham Young University. Gikan sa 1973 hangtud 1975, miserbisyo siya sa Taiwan Taipei Mission, dayon mibalik sa BYU, diin niadtong 1977 nadawat niya ang bachelor’s degree sa Asian studies ug university studies.
Pagpangulitawo ug Kaminyoon
Human sa iyang misyon, si Elder Gong miboluntaryo sa pagpasiugda og mga fireside ma-Dominggo sa gabii didto sa Provo Missionary Training Center. Ang mga fireside nakatabang nga masinati sa mga misyonaryo nga padulong sa Taiwan ang mga tawo, mga kustombre, ug kultura didto. Usa sa mga misyonaryo mao si Sister Susan Lindsay gikan sa Taylorsville, Utah, ang anak ni Richard P. ug Marian B. Lindsay. Si Brother Lindsay kaniadto sakop sa Ikaduhang Korum sa Seventy. “Gibati nako nga si Susan usa ka tawo nga dugay na nakong kaila,” miingon si Elder Gong.
Paglabay sa duha ka tuig, pipila ka bulan human mibalik si Susan sa BYU human sa iyang misyon, didto si Gerrit sa Provo uban sa iyang pamilya. Ang iyang amahan nagtudlo sa unibersidad, ug nagplano si Gerrit og duha ka semana nga pagbisita. Ang pagbisita milungtad og upat ka semana, samtang siya ug si Susan nag-date matag adlaw. Dayon si Gerrit mibiya aron mag-intern sa Hawaii sa dili pa mobalik sa Oxford.
“Nagka-uyab kami nga anaa sa duha ka managlahing bahin sa kalibutan,” nahinumdom si Elder Gong. “Naningkamot ko og eskwela sa England samtang nagkat-on sa tanan nga akong mahimo mahitungod niya tabok sa Atlantic Ocean.”
“Nagkasabut mi nga magminyo diha sa telepono,” miingon si Sister Gong. “Miuli na usab siya pagka-Thanksgiving, ug gikasal kami sa unang adlaw sa pag-abli sa templo sa bag-ong tuig.” Paglabay sa duha ka semana, milarga sila ngadto sa England aron sugdan ang bag-ong kinabuhi nga magkauban.
“Kon ang mga tawo magminyo, maghisgot sila mahitungod sa duha ka pamilya nga magkahiusa,” miingon si Elder Gong. “Ug mao gayud kadto ang nahitabo kanako. Gibati nako nga parte sa pamilya nga Lindsay, sama nga ako parte sa pamilya nga Gong.”
Usa ka Talagsaong Panarbaho
Human siya migahin og mubo nga panahon diha sa faculty sa Oxford, ang panarbaho ni Gerrit mibalhin ngadto sa pagserbisyo sa gobyerno sa Washington, D.C., USA. Niadtong 1984 miserbisyo siya diha sa kawanihan sa Reagan-Bush nga kampanya sa reeleksyon, diin iyang nakauban sa opisina si Mike Leavitt, nga sa kaulahian nahimong gobernador sa Utah. “Si Gerrit mapaniiron ug manggihunahunaon,” miingon si Brother Leavitt, “apan naila siya sa iyang walay puas nga pagkamabination.”
Niadtong 1985 miserbisyo si Gerrit isip special assistant sa Under Secretary sa State Department. Niadtong 1987 nahimo siyang special assistant sa U.S. ambassador sa Beijing, China. Ug gikan sa 1989 hangtud 2001, naghupot siya og pipila ka mga posisyon sa Center for Strategic and International Studies sa Washington, D.C. Dayon mibalik siya sa kalibutang akademikanhon dihang gidawat niya ang posisyon nga assistant to the president for strategic planning sa BYU. Migahin siya og siyam ka tuig niana nga tahas.
Si Carri Jenkins, assistant to the president for university communications sa BYU, anaa sa tupad nga opisina. Nahinumdom siya sa abilidad ni Gerrit Gong sa pag-awhag niadtong anaa sa iyang palibut. “Kon ikaw walay pagsalig nga makahimo sa usa ka lisud nga buluhaton, aduna siya niana nga pagsalig alang nimo,” miingon siya. “Buhaton niya ang tanan nga iyang mahimo aron sa pagtambag kanimo, paghatag kanimo og paglaum, ug sa pagduso kanimo sa pagpadayon ug pamatud-an ang imong kaugalingon.”
Ang federal nga huwes nga si Thomas B. Griffith, kinsa nakaila ni Elder Gong didto sa Washington ug sa BYU, mihulagway sa iyang pagpakig-uban kaniya niini nga paagi: “Sa katapusan sa pag-istoryahanay, imong maamguhan nga nakatutok ang pag-istoryahanay nganha kanimo. Maayo kaayo siya maminaw. Ug mohimo siya og mga pangutana nga makahimo nimo sa paghunahuna.”
Si Cecil O. Samuelson, emeritus General Authority Seventy ug kanhi presidente sa BYU, miingon nga si Elder Gong “kasagaran nga hilum, apan kanunay nga nagtrabaho ang hunahuna.”
Kinabuhi sa Pamilya
Si Gerrit ug Susan Gong nahimong mga ginikanan sa upat ka mga anak nga lalaki—si Abraham, Samuel, Christopher, ug Matthew—kinsa nanagko diha sa nagkalain-laing mga kahimtang.
“Sa dihang didto kami sa Beijing, ang among mga anak nakabaton sa panalangin nga mahimong suod nga higala sa usag usa,” miingon si Elder Gong.
“Sa usa ka bahin, aduna silay oportunidad nga makakita og halapad nga panglantaw sa kalibutan,” midugang si Sister Gong. “Sa laing bahin, nakatabang kini kanamo nga mahimong suod kaayo nga pamilya. Ang among mga anak moingon gihapon nga ang labing maayo nga among nabuhat isip mga ginikanan mao ang paghatag kanila og mga igsoon.”
“Kausa, among gigamit ang among frequent-flyer miles,” miingon si Elder Gong. “Among gipapili ang matag usa og usa ka destinasyon. Nagsugod kami sa Washington, D.C., diin kami nagpuyo, dayon miadto sa England, sa Czech Republic, Greece, Turkey, India, China, ug Japan.
“Aduna kami usa ka lig-on nga lagda niana nga biyahe,” miingon si Susan. “Bisan asa kami moadto, mokaon kami sa unsay gikaon sa lokal nga mga tawo.” Sa katapusan, didto sa Japan sa pagtapos sa biyahe, gisultihan ni Elder Gong ang iyang mga anak nga dad-on niya sila ngadto sa usa ka restawran nga naila sa tibuok kalibutan sa baka niini. Sa McDonald’s, upat ka gutom nga mga anak ug duha ka ginikanan mihurot og 17 ka hamburger!
“Si Mama ug Papa parehas nga mipakabililhon sa pagkat-on pinaagi sa kasinatian,” miingon si Abraham. “Si Papa naghunahuna og maayo kon sa unsang paagi ang mga kasinatian moimpluwensya sa mga tawo, lakip ang tibuok nga mga kultura.” Mitimaan usab si Abraham nga ang iyang amahan “mainampingong mamulong tungod kay kinahanglan niyang kompleto nga mapasabut ug hingpit nga matuohan ang unsay iyang isulti.”
Nahinumdom si Sam nga “bisan unsa siya ka busy sa State Department, si Papa migahin og panahon matag gabii aron sa pagtudlo ug pagbansay kanako alang sa third-grade nga kompetisyon sa matematika nga gusto nakong apilan, nga gitawag og ‘Challenge 24.’ Miingon siya nga kon modaug ko, mag-party mi nga dunay mga ice cream sundae ug 24 ka mga sagol.” Nakaabut si Sam sa nasyonal nga finals apan wala makadaug. Ang pamilya nga Gong nag-sundae lang gihapon. Apan dili sayon nga makakuha og 24 ka sagol—ang usa niini beef jerky.
Si Christopher ug Matthew mikomentaryo kon unsa sila “kamapasalamaton sa pagsalig, gugma, ug debosyon nga giambitan sa among amahan ug inahan.” Usa kini ka gugma nga gipaambit ni Elder ug Sister Gong sa usag usa ingon man usab sa matag anak ug sa mga paryente.
“Sama nga usa siya ka mahalaron nga amahan, si Gerrit usa usab ka mahalaron nga anak ug igsoon,” miingon si Susan. “Kini nga mga tahas importante kaniya. Mitabang siya kanamo nga makasabut nga ang mga relasyon sa pamilya maoy labing importante sa tanan.”
Kasinatian sa Simbahan
Bisan og busy sa panarbaho ug pamilya, si Elder Gong nagpadayon nga andam moserbisyo sa Simbahan, nagtuman og mga calling lakip sa pagka-high councilor, lider sa high priest group, presidente sa stake Sunday School , seminary teacher, bishop, presidente sa stake mission, presidente sa stake, ug Area Seventy.
Bisan unsa ang ipabuhat kaniya, ug ingon man usab sa iyang kinabuhi nga pangpamilya, kanunay siyang mipakita og piho nga mga kinaiya. “Gitan-aw niya ang tanan isip usa ka anak nga lalaki o anak nga babaye sa Langitnong Amahan,” miingon si Sister Gong. “Apan labaw sa tanan, gihigugma niya ang Ginoo. Tinud-anay siyang nagtinguha uban sa tibuok niyang kasingkasing sa pagtukod sa gingharian ug pagpanalangin sa mga anak sa Langitnong Amahan.”
Ug nakadayeg siya sa iyang asawa. “Bisan unsa ang ipabuhat kanako,” miingon siya, “si Susan anaa sa akong kiliran. Komportable siya uban ni bisan kinsa ug anad makig-atubang sa ubang mga tawo. Ganahan gayud siyang moadto og bag-ong mga dapit ug mosulay og bag-ong mga butang, diin mapasalamaton ako.”
Pagserbisyo uban sa Seventy
Niadtong Abril 3, 2010, si Elder Gerrit W. Gong gipaluyohan isip General Authority Seventy. Gi-assign siya sa Kapangulohan sa Asia Area, nga ang opisina anaa sa Hong Kong. Sa wala madugay nahimo siyang Presidente sa Asia Area. Niadtong Oktubre 6, 2015, si Elder Gong gipaluyohan ngadto sa Kapangulohan sa Seventy, diin ang iyang internasyonal nga kasinatian mipadayon, lakip ang mga pagribyu sa area sa lain-laing mga parte sa kalibutan sama sa Africa ug Central America.
“Makahimamat ka ug mahigugma sa mga Santos sa tanan niini nga mga dapit,” miingon siya. “Mobati ka nga napanalanginan nga ang mga tawo mosulti kanimo mahitungod sa ilang pagtuo, tungod kay ang ilang kasinatian sa Dios nga naglihok sa ilang kinabuhi nahimong kabahin sa pagsabut kon si kinsa ang Dios ug sa unsang paagi Siya nahigugma sa matag usa kanato.”
“Kon among ipadala si Elder Gong ngadto sa bisan unsang sitwasyon, kadtong nalambigit mobati nga nakakaplag sila og higala,” miingon si Presidente Russell M. Nelson. “Taas ang lebel sa iyang kahibalo, apan mapainubsanon siya. Mahimo siyang makigsabut sa mga tawo sa tanang ang-ang ug kanunay nga andam kaayo ug maayong mokumbinser.”
Gikan sa wala: Sa Thailand, si Elder Gong nakigkita sa Iyang Kamahalan Francis Xavier Cardinal Kriengsak Kovithavanij, ang Katoliko nga Arsobispo sa Bangkok. Si Elder Gong ganahan og indibidwal nga mga biyahe uban sa iyang mga anak, sama niini nga biyahe sa Canada kauban ang iyang anak nga si Sam. Si Elder Gong mipaambit sa iyang mga hunahuna kabahin sa Tinapay nga Nagahatag og Kinabuhi ngadto sa mga magtutudlo sa seminary ug institute niadtong 2017. Si Sister Gong nakigbayloay og mga pagtimbaya diha sa panimalay sa usa ka miyembro nga taga-Cambodia.
Tawag isip usa ka Apostol
Sa dihang gipadangat ni Presidente Nelson ang tawag alang ni Elder Gong nga moserbisyo isip sakop sa Korum sa Napulog Duha ka mga Apostoles, ang propeta “mahigugmaong [migunit sa] akong mga kamot, nga anaa sa akong tupad ang minahal ko nga si Susan, ug mihatag niining sagradong tawag gikan sa Ginoo nga nakasurprisa kaayo kanako” (“Si Kristo ang Ginoo Nabanhaw Karon,” Liahona, Mayo 2018, 97). Mapainubsanon, apan sigurado sa gugma ug pagsalig sa Ginoo, gidawat ni Elder Gong ang tawag. Gipaluyohan siya niadtong Marso 31, 2018. Mainampingong giandam sa Ginoo, siya karon mangalagad isip “talagsaon nga [saksi] sa ngalan ni Kristo sa tibuok nga kalibutan” (D&P 107:23).