Usa ka Milagro sa Balay sa Ginoo sa Kyiv
Doru Vasile
Bucharest, Romania
Paghulagway pinaagi ni Allen Garns
Ang akong pamilya ug ako naghinamhinam nga mobiyahe pinaagi sa sakyanan gikan sa Romania padulong sa Kyiv, Ukraine, alang sa pagpahinungod sa templo niadtong Agosto 2010. Nasayud nga mao kini ang templo alang sa mga Santos diha sa Romania/Moldova Mission, mibiyahe kami og mga 14 ka oras aron lang makatambong. Sa among pag-abut, nakahimamat kami og laing grupo kinsa mibiyahe usab gikan sa Romania. Malipayon kaming tanan nga maanaa sa Kyiv alang niining sagrado nga kalihokan.
Sa adlaw sa pagpahinungod, ang among grupo nga gikan sa Romania gi-assign nga motan-aw sa pagpahinungod pinaagi sa sibya diha sa usa ka lawak sa unang andana sa templo. Ang uban misugod sa pagpahayag sa ilang kasagmuyo. Naglaum sila nga makaapil sa pagpahinungod uban sa propeta diha sa celestial nga lawak. Ang uban miingon pa gani nga nagpabilin na lang unta sila sa ilang balay ug mitan-aw sa sibya gikan sa ilang chapel sa Romania.
Misugod ko sa pag-ampo diha sa akong kasingkasing, “Langitnong Amahan, unsaon namo sa pagtabang niini nga mga miyembro gikan sa Romania nga makabaton og dili makalimtan nga kasinatian diha sa Imong balay?”
Wala gihapon koy nadawat nga tubag sa dihang gisugdan na ang sesyon sa pagpahinungod. Sa wala madugay among nasayran nga ang propeta, si Presidente Thomas S. Monson (1927–2018), monaug ug mopahimutang sa bato sa pamag-ang. Tingali mao kini ang among tubag! Nag-ampo ko og paagi nga ang propeta moduol ug motimbaya sa mga Santos sa Romania.
“Wala ako mohangyo niini alang sa akong kaugalingon,” nag-ampo ko, “apan alang sa akong kaigsoonan.”
Human sa seremonya sa bato sa pamag-ang, si Presidente Monson milakaw agi sa among lawak sa iyang pagpadulong sa celestial nga lawak. Sa kalit lang, akong gibati nga kinahanglan kong mobarug ug dapiton siya sa pagsulod sa among lawak.
Mibarug ko ug miingon, “Among propeta! Dali ug tan-awa kami. Gikan kami sa Romania.”
Daw wala siya makadungog nako. Dayon, sa usa lang ka gutlo, mibalik siya. “Romania!” miingon siya ug misulod sa lawak.
Mitimbaya siya kanamong tanan ug miingon nga gimahal kami niya pag-ayo. Napuno ko sa kalipay samtang nagtan-aw ko sa malipayong mga nawong sa among minahal nga mga miyembro. “Salamat, minahal nga Amahan,” nag-ampo ko, “alang niini nga milagro sa Imong balay.”
Sa dihang mibiya na ang propeta sa lawak, wala nay naguol pa. Gibati nako nga anaa kami sa labing bulahan nga lawak sa templo. Usa kadto ka kasinatian nga dili gayud nako hikalimtan.