Pagtuo, Paglaum, ug Grasya—Bahin 3
Paglaum diha sa Holland
Ang tagsulat nagpuyo sa New Jersey, USA.
Si Grace usa ka 15 anyos nga batang babaye nga nagpuyo sa Holland panahon sa Ikaduhang Gubat sa Kalibutan. Nagsige na og gubat sa dugayng panahon. Ang mga tawo sa Holland gipanggutom, ug naglaum sila nga hapit na matapos ang gubat.
Ang katapusang tuig sa Ikaduhang Gubat sa Kalibutan mao ang labing grabe alang sa Holland. Hingpit nga gikuha sa mga Nazi ang tanan. Si Grace dili maka-eskwela. Walay uling nga magamit sa pagpainit sa ilang balay. Si Grace ug ang iyang pamilya kinahanglang mokaon og mga saha sa tulip aron dili magutman. Lain kaayo kini og lami! Ang labing grabe sa tanan, si Papa usa gihapon ka piniriso sa gubat.
Apan adunay gibati nga paglaum. Ang mga tawo miingon nga ang mga Nazi mapildi na sa gubat. Ug pagka-Mayo sa 1945, mihural ang mga Nazi. Ang Holland sa katapusan gawasnon na usab! Nagsaulog ang mga tawo sa kadalanan. Karon si Grace makabalik na sa pag-eskwela. Wala nay mga sundalo nga angayng kahadlukan.
Labing maayo sa tanan, samtang si Grace ug ang iyang mga igsoon nanglakaw pauli gikan sa eskwelahan usa ka adlaw, ilang nakita ang bandera sa Holland nga nagwagayway sa atubangan sa ilang panimalay. Nasayud sila nga nagpasabut lang kana og usa ka butang.
“Nakauli na si Papa!” misinggit si Heber.
Nanagan pasulod si Grace ug ang iyang mga igsoon. Gigakos og maayo ni Grace ang iyang Papa. Hugot usab siya nga gigakos sa iyang Papa. Nindot kaayo nga nakauli na si Papa sa balay.
Wala madugay human niana, mga pinutos nga pagkaon, sinina, tambal misugod sa pag-abut sa Holland. Ang mga lider sa Simbahan sa Siyudad sa Salt Lake mipadala og daghang suplay aron sa pagtabang sa mga tawo human sa gubat. Nakadawat pa gani si Grace og bag-ong sinina! Gisul-ob niya ang samang sinina sulod sa lima ka tuig, mao nga malipayon kaayo siya nga makadawat og bag-o.
Sa unang higayon sulod sa mga katuigan, adunay igong makaon si Grace. Ang kapangulohan sa misyon ug ang gobyerno sa Holland nakahukom nga magsugod og proyekto sa pagpananom og patatas aron makapatubo og dugang nga mga pagkaon. Ang mga miyembro sa Simbahan mitanom og daghang patatas sa duol nga kaumahan. Pagka-tinglarag aduna na silay liboan ka mga patatas nga makaon.
“Tan-awa!” Gisultihan ni Grace si Papa, gitudlo ang miturok nga tanom nga patatas. “Dili na gyud ta magutman pag-usab!”
Miyango si Papa apan wala mopahiyum. Miingon siya, “Nakig-istorya ko ni Presidente Zappey. Miingon siya nga ang mga Santos sa Ulahing mga Adlaw sa Germany gipanggutom gihapon, sama nato kaniadto. Wala sila makadawat og tabang gikan sa gobyerno sama nato.” Giagbayan ni Papa si Grace. “Nangutana si Presidente Zappey kon ihatag ba nato ang atong mga patatas ngadto sa mga Santos sa Germany.”
“Ipanghatag ang atong mga patatas!” Nakatuaw si Grace. Apan ang mga Nazi gikan sa Germany! “Tingali mga Santos sa Ulahing mga Adlaw sila, Pa, pero mga German gihapon sila.”
“Nasayud ko nga dili kana sayon,” miingon si Papa. “Apan mga anak usab sila sa Dios. Nagmahal usab Siya kanila. Gipasaylo nako sila sa ilang pagpriso kanako. Ang Ginoo makatabang natong tanan sa pagpasaylo.”
Mihangad si Grace sa iyang Papa. Siya ang labing isug nga tawo nga iyang nailhan, apan wala mahibalo si Grace kon duna ba siyay kaisug nga mopasaylo sama sa iyang Papa. Dayon nahinumduman niya ang usa sa iyang mga magtutudlo sa eskwelahan panahon sa gubat. Miingon ang iyang magtutudlo nga dili tanang German mga Nazi, ug dili tanang sundalo nga Nazi mga dautan. Ug karon ang mga bata sa Germany gipanggutom, sama kaniadto ni Grace.
Miginhawa og lawom si Grace. “Nakasabut ko,” miingon siya. “Atong ihatag nila ang atong mga patatas.”
Migakos si Papa niya ug mipahiyum. “Isug kaayo ka nga babaye. Lisud kini nga buhaton. Apan mga disipulo kita ni Jesukristo, ug mao usab ang atong German nga mga kaigsoonan.”
Mipahiyum si Grace. Ang masuk-anon nga mga pagbati diha sa iyang kasingkasing nahanaw, ug mibati siya og kakalma ug kainit. Makahimo siya sa pagpasaylo sa mga German. Ug si Jesus makatabang niya sa paghigugma usab kanila.