Mga Itlog, Mga Fuse, ug Hugot nga Pagtuo

Alvaro Alcaino

Antofagasta, Chile

Usa sa among mga tumong isip pamilya mao ang pagtigom og igong kwarta aron makahimo og down payment sa among kaugalingong balay. Kon wala kana nga tumong, tingali mausikan lang nako ang akong mga tapos sa semana sa pagtan-aw og telebisyon, maghulat sa pinansyal nga mga oportunidad nga moabut kanako.

Isip drayber sa usa ka kompaniya sa mina sa amihanang Chile, motrabaho ko og upat ka adlaw diha sa minahan ug dayon mopahulay og tulo ka adlaw—Sabado hangtud Lunes. Aron madugangan ang among kita ug tinigom alang sa balay, nakahukom kami nga magsugod sa pagpamaligya og itlog. Ang among plano mao ang pagkuha og mga order gikan sa mga higala, mga silingan, ug mga miyembro sa Simbahan; mopalit og mga 1,000 ka itlog kada semana gikan sa usa ka wholesaler; ug dayon kuhaon ug ihatud ang mga itlog ma-Sabado ug ma-Lunes.

Ang akong asawa, si Laura, ug ako nakahukom nga among dad-on ang among duha ka mga anak sa pagpanghatud ug pahimuslan ang panahon nga mag-uban. Hinoon, samtang padulong mi nga mopalit sa among unang gidaghanon sa mga itlog, dunay kalamidad nga nahitabo. Usa sa among mga bata, nagdula-dula og gamay nga puthaw nga tahal sa lapis, miitsa sa tahal ug mitugpa kini sakto gayud sa walay sulod nga sudlanan sa lighter sa sigarilyo. Kalit nga misigag gamay, ug ang among van nawad-an sa tanang kuryente niini, kalit nga mihunong diha gayud sa tunga-tunga sa highway. Mibuto ang among fuse.

Samtang nanglingkod mi didto nga nakaali sa trapiko, nasagmuyo mi og maayo nga daw kahilakon mi. Apan nianang higayuna, nakahinumdom ko nga ang Ginoo misaad sa pagbayaw kanato ug motabang kanato kon mosalig kita Kaniya. Ang kakalma miabut kanako. Nakaamgo ko nga dili lang ko pwede nga maglingkod ug magreklamo. Duna kami problema, ug uban sa tabang sa Ginoo, masulbad namo kini.

Si Laura ug ako mitan-aw sa usag-usa ug miingon, “Kinahanglan kitang mopakita og hugot nga pagtuo.” Nag-ampo kami ug gipahiran ang among mga luha. Dayon, si Laura ang nagmaneho, migawas ko aron sa pagtulod sa sakyanan. Pipila ka mga tawo dali nga nanggawas sa ilang mga sakyanan ug mitabang kanako.

Gitulod namo ang sakyanan og mga 200 ka metros una kami nakakita og luwas nga dapit sa kilid sa highway aron maka-parking. Sa paghunong sa sakyanan, nakabantay ko nga mi-parking kami tungod gayud sa usa ka car stereo shop.

Akong nakit-an ang mibuto nga fuse, misulod sa shop, ug nangutana, “Duna moy ingon niini?”

Mitubag ang clerk, “Siyempre.”

Mipalit ko og fuse ug mitaud niini, midiretso og andar ang sakyanan, ug mipadayon mi sa pagbiyahe. Ang wholesaler sa mga itlog hapit na manirado sa dihang miabut mi. Namalit kami sa mga itlog ug gipanghatud kini.

Kon aduna kitay mga hagit, kinahanglan kitang mahinumdom sa pagpangayo og tabang sa atong Langitnong Amahan. Nasayud ko nga motubag Siya kanato samtang mopadayon kita ug mopakita og hugot nga pagtuo diha Kaniya.