Hayag nga Nagdan-ag diha sa Czech Republic

Gitigum ni Sharon Goodrich, Mga Magasin sa Simbahan

Mga bata kami sa Primary sa Czech Republic. Kini ang paagi kon giunsa namo sa pagdan-ag og kahayag sa among nasud.

Kausa nawala ang akong paboritong guwantis. Naguol kaayo ko. Ang akong mama ug ako nag-ampo, apan wala namo kini makit-i. Naningkamot ko nga makabaton og pagtuo. Paglabay sa usa ka semana, nakit-an sa akong manghud nga lalaki ang akong guwantis diha sa dalan! Ang Dios mitubag sa among mga pag-ampo. Gimahal nako Siya, ug nasayud ko nga Siya buhi.

Andre W., edad 9

Duna koy mga higala sa eskwelahan kinsa dili mga miyembro sa Simbahan apan mirespeto gihapon sa akong mga sumbanan. Kausa miingon ko nga kinahanglan kaming mag-ampo, ug miuyon sila! Nalipay kaayo ko.

Ivana A., edad 11

Ang akong mga higala ug ako padulong nga monaug. Sa pag-abut namo sa elevator, aduna koy dili maayong pagbati ug gihangyo nako ang akong mga higala nga dili mogamit niini. Mihukom sila nga gamiton gihapon kini. Didto ko miagi sa hagdanan. Sa pag-abut nako sa ubos, wala didto ang akong mga higala. Nadaut ang elevator! Dugay pa una sila nakagawas. Nalipay ko nga walay seryusong nahitabo. Maayo usab ang akong gibati nga gisunod nako ang Espiritu Santo.

Amalie N., edad 10

Sa baybayon, ang langit misugod na sa pagngitngit. Mihuyop ang hangin ug mihimo og dagkong mga balud! Dunay dugdog, kilat, ug ulan nga yelo [hail]. Ang tanan nanagan aron mopasilong. Wala kami madaut sa unos. Sa pagpamauli, nakakita kami og tulo ka bangaw. Nasayud kami nga ang Dios mitabang ug mipanalipud kanamo.

Jakub B., edad 10

Sa eskwelahan duna koy usa ka higala kinsa walay ganahan nga makighigala. Ang ubang mga bata misugod sa pagsulti og ngil-ad nga mga butang ngadto kaniya nga nakapahimo niya nga mobati nga ngil-ad. Akong gisultihan ang akong magtutudlo ug akong gidapit ang akong higala sa pakigdula kanako. Nakapalipay kini sa akong higala!

Ludmila V., edad 8

Nasuko ko sa akong mama tungod kay dili ko gusto nga maligo ug matulog. Pagkasunod adlaw naguol ko tungod sa akong bati nga pagpili. Miingon si Mama nga mahimo kaming mag-ampo ug mohangyo sa Langitnong Amahan sa pagpasaylo kanamo. Nangluhod kami ug nag-ampo. Miarang-arang ang akong gibati. Nakat-unan nako nga makahimo kita sa paghinulsol, ug tungod ni Jesukristo, mapasaylo.

Samuel H., edad 5

Akong gipaambit ang akong pagpamatuod sa simbahan. Nagkinahanglan kadto og kaisug! Sukad niadto, nabati nako ang Espiritu.

Eliska K., edad 11

Sa dihang ang akong binuhi nga guinea pig nasakit, nag-ampo ko alang kaniya. Mapasalamaton ko sa Langitnong Amahan tungod sa pagtabang kanamo.

Aneta P., edad 10