Gitudloan pinaagi sa Espiritu Santo

Kini nga kabatan-onan nangandam nga matudloan pinaagi sa Espiritu sa wala pa ang kinatibuk-ang komperensya. Ania ang ilang nakat-unan gikan sa usa ka milabay nga komperensya ug unsa ang ilang gibuhat nga lahi tungod niini.

Dinasig nga Instruksyon

Nadasig ako sa kinatibuk-ang komperensya. Samtang naminaw sa instruksyon gikan sa atong mga lider sa pagserbisyo sa uban, mosalig kang Kristo, ug hugot nga manggunit sa gunitanang puthaw, akong gibati ang Espiritu Santo nga mipamatuod kanako nga kini nga ebanghelyo tinuod ug nga kita makaangkon og kinabuhing dayon pinaagi sa pagsunod sa mga sugo ug sa pagsunod sa pulong sa Dios. Mihimo ko og mga tumong nga mas makaserbisyo sa akong komunidad ug sa paglig-on sa akong pagpamatuod pinaagi sa inadlaw nga pag-ampo ug pagtuon sa kasulatan. Nasayud ko nga ako anak nga babaye sa Langitnong Amahan. Siya buhi ug nahigugma kanako hangtud sa kahangturan ug sa kanunay.

Madelyn B., edad 16, Delaware, USA

Mga Tubag sa mga Pangutana

Sa wala pa ang kinatibuk-ang komperensya ako adunay duha ka pangutana: (1) Unsaon nako pagbaton og maayong kinaiya ug pagtabang sa akong mga higala kon makahimo sila og sayop nga mga desisyon? ug (2) Unsaon nako sa pagpamatuod mahitungod sa Simbahan nga dili ko nila bugal-bugalan? Atol sa komperensya, ang Espiritu mipamatuod kanako nga wala ako mag-inusara. Karon nasayud ko nga pinaagi sa pagtuon sa mga kasulatan sa tibuok nakong kasingkasing, akong madawat ang mga tubag sa akong mga pangutana mahitungod sa akong mga higala. Nasayud ko nga ang akong Amahan naminaw sa akong mga pag-ampo, ug maningkamot ko nga mahimong mas maayo matag adlaw.

Isaak R., edad 13, Pichincha, Ecuador

Nangandam nga Makat-on

Kusog kaayo nakong gibati ang Espiritu panahon sa kinatibuk-ang komperensya. Sukad akong gisugdan ang pag-andam og mga pangutana ug pag-andam sa akong kaugalingon sa espirituhanong paagi alang sa komperensya, aduna na kini mas dakong kahulugan sa akong kinabuhi, ug daghan na kaayo ako og nakat-unan sa matag pakigpulong. Mapasalamaton kaayo ko sa mga propeta ug mga apostoles, ug nasayud ko nga gipadala sila gikan sa Langitnong Amahan sa pagpangulo kanato ug sa paggiya kanato sa atong kinabuhi!

Ben H., edad 17, Kentucky, USA

Gidapit sa Paglambo

Ang kinatibuk-ang komperensya milig-on kanako uban sa tinguha sa pagsunod sa dalan sa ebanghelyo ni Jesukristo. Nakatabang kini kanako nga masayud ug makasabut nga kini mao ang tinuod nga Simbahan, nga naghatag kanato sa kahayag ug kalipay. Akong gibati ang Espiritu nga nagdapit kanako sa paglambo matag adlaw ug sa pagbasa sa Basahon ni Mormon aron makaangkon og lig-on nga pagpamatuod sa ebanghelyo. Nagtuo ko nga ang akong Langitnong Amahan gusto nga maminaw ko niini nga dinasig nga mga mensahe.

Vicente A., edad 16, Metropolitan Region, Chile

Pagtinguha sa Kahayag

Ang panahon duha ka tuig na ang milabay lisud kaayo alang kanako. Ang akong papa nanlimbasug batok sa kanser, ug dihay mga teroristang pagpang-ataki sa akong siyudad. Napuno ko sa kabalaka, naghunahuna kon unsaon nako sa pagbati og kalinaw nga nahadlok man ko sa akong espiritwal ug pisikal nga kasiguroan. Gikan sa kinatibuk-ang komperensya akong nakat-unan nga makakaplag kita og kalinaw samtang magsunod kita nga mahiyasnon, mopuno sa atong mga kasingkasing uban sa pagtuo, ug magbaton og mahangturong panglantaw. Nadasig ko nga modangup kang Kristo panahon sa kalisud imbis nga mosalig sa akong kaugalingong salabutan. Nasayud ko nga makabuntog ko sa mga impluwensya sa kangitngit pinaagi sa pagtinguha sa kamasanagon sa kahayag ni Kristo.

Olivia H., edad 17, Belgium