Usa ka Pahiyom sa Pagdawat

Franklin Romero

Manabí, Ecuador

Usa ka gabii ang among ward mipahigayon og usa ka kalihokan nga gigahinan namo og daghang oras sa pagpangandam. Human sa kalihokan usa ka batan-ong investigator nanamilit nako apan paglabay sa pipila ka minuto mibalik ug nangutana, “Bishop, kanus-a man ko kinahanglang mobalik?” Ako siyang gisultihan nga sa Dominggo, ug ang batan-ong lalaki daling miingon, “Dili, wala na bay laing kalihokan?” Nalingaw kaayo siya uban sa kabatan-onan sa among ward nga gusto niyang mobalik.

Nakig-istorya usab ako sa mibisita nga managtiayon kinsa mitambong sa kalihokan ug gipangutana sila kon unsay ilang hunahuna. Miingon ang bana, “Sukad sa among pag-abut dinhi, mibati kami og kalinaw ug kakalma,” nga gipamatud-an sa iyang asawa pinaagi sa pagyango sa iyang ulo. Nasurprisa ako niini tungod kay sa ilang pag-abut, daghan kaayo ang mga tawo nga nag-istoryahanay ug nagsaba. Apan mipadayon siya ug mitan-aw kanako ug nangutana, “Mao kadto ang Espiritu Santo, dili ba?” Nakalitan, igo lang ko nga mitando.

Daghan kaayo ang gibuhat aron sa pagpangandam niini nga kalihokan, mao nga nianang gabhiuna sa dihang nahuman na ang tanan, ang gusto lang nakong buhaton mao ang pagpauli ug pagkatulog. Tungod sa akong kakapoy, wala na nako mahunahuna ang akong pakig-istoryahanay sa mga investigator. Sa akong pag-abut sa balay, nag-ampo ko ug mihigda, apan wala ko makatulog; sa akong hunahuna nahanduraw nako ang Ginoo nga nagpahiyom. Usa kadto ka pahiyom sa pagdawat. Nianang higayuna misugod ko sa paghinumdom sa talagsaong mga butang nga nahitabo atol sa kalihokan.

Akong nasabtan nga ang kamakugihon ug gugma sa mga miyembro sa ward nakahimong posible nga matandog ang mga kasingkasing niadtong tulo ka mga investigator. Nasabtan nako nga ang pahiyom sa pagdawat alang sa unsay among gibuhat. Wala nako mapugngi ang paghilak, ug mapasalamaton kaayo ko sa gasa nga gihatag kanamo sa Ginoo. Mihatag Siya kanamo og usa ka pahiyom sa pagdawat. Mopamatuod ko nga tinuod ang mga pulong sa Ginoo; nga kon magdala kita og usa ka kalag ngadto Kaniya, dako ang atong kalipay diha sa gingharian sa Amahan (tan-awa sa D&P 18:15).