5 ka Paagi sa Pagkat-on gikan sa Kinatibuk-ang Komperensya
Ang kinatibuk-ang komperensya maoy usa ka talagsaong oportunidad sa pag-apil sa mga miyembro sa Simbahan sa tibuok kalibutan aron maminaw sa mga lider sa Simbahan ug modawat og direksyon gikan sa Ginoo. Ang pagtan-aw, pagpaminaw, ug pagtuon sa mga mensahe sa kinatibuk-ang komperensya modala sa Espiritu diha sa imong kinabuhi ug motabang sa pagpalig-on sa imong pagpamatuod. Usa kini ka oportunidad alang nimo sa pagdawat ug pagsunod sa personal nga pagpadayag.
Ania ang lima ka paagi nga makakat-on ka gikan sa kinatibuk-ang komperensya.
1. Isulat ang imong mga pangutana sa dili pa magsugod ang kinatibuk-ang komperensya
Paggahin og panahon sa pagsulat sa imong mga pangutana sa dili pa magsugod ang komperensya, ug dayon hatagi og pagtagad ang mga tubag nga moabut kanimo atol sa komperensya. Ang imong mga pag-ampo ug mga pangutana mahimong matubag samtang moapil ka ug maminaw sa Espiritu.
2. Pagtinguha nga magkat-on mahitungod ni Kristo
Detalye gikan sa Si Kristo ug ang Adunahan nga Batan-ong Magmamando, ni Heinrich Hoffman
Ang mga propeta nagpamatuod ug nagtudlo mahitungod sa Manluluwas (tan-awa sa Mga Buhat 10:43). Samtang maminaw ka sa mga mensahe sa komperensya, mahimo ka nga maghunahuna sa unsay gitudlo kanimo sa mga mamumulong mahitungod ni Jesukristo. Mahimo ka pa gani nga maghimo og lista diha sa imong mga sulat.
3. Pagbantay sa mga tema
Mga imahe gikan sa Getty Images; litrato sa batan-ong mga lalaki sa tumoy sa bukid gikan ni Joshua Earle/Unsplash
Human makatan-aw og pipila diha sa kinatibuk-ang komperensya, tingali imong mabantayan nga nakadungog ka og usa ka hilisgutan o tema nga gihisgutan og sobra sa kausa. Ang mga sumbanan nga imong nabantayan tingali usa ka paagi nga nagtabang kanimo ang Espiritu sa pag-ila og usa ka butang nga kinahanglan nimong makat-unan.
4. Timan-i ang Basahon ni Mormon
Daghan ka og makat-unan kon hatagan nimo og pagtagad ang mga kasulatan nga gihisgutan sa mga lider sa Simbahan, ilabi na sa Basahon ni Mormon, nga mao “ang sukaranan sa atong tinuohan” (pasiuna sa Basahon ni Mormon). Tan-awa kon makasubay ka sa matag higayon nga gihisgutan kini sa kinatibuk-ang komperensya. Mahingangha ka sa imong makaplagan!
5. Pagmadasigon sa paglihok
Isulat ang mga mensahe ug mga kinutlo nga nagdasig kanimo o nagdapit kanimo sa paglihok. Makatabang kini kanimo sa paggamit sa unsay imong nakat-unan—ug makatabang kanimo sa paghinumdom sa unsay imong mga hunahuna sa kadugayan kon magkinahanglan ka og pahinumdom!